Chapter 1:孖喵在家千日好 🥰
Chapter 2:頑皮小黑咪 😆
Chapter 3:可憐的Indie 😿
Chapter 4:滅蝨大作戰 😷
Chapter 5:三弟的寶貝 😘
Chapter 6:沿路上的喵星人 🐈
Chapter 7:歡迎新住客Nicolas 🎭
Chapter 8:亂噏一通利物經 🏆
Chapter 9:曾令人聞風喪膽的西班牙雀班王子 - Fernando Torres 🇪🇸
Chapter 10:R.I.P. Eric Carmen 🪦
Chapter 11:深切悼念鄭華娟、何厚華 🙏🏻
Chapter 12:好碟再重溫 - 陳奕迅《The Key》🔑
Chapter 13:被演技耽誤了的隱世好聲音 🎙
Chapter 14:3月觀影小記 🎥
Chapter 15:三款爆谷揀邊兜?🍿
Chapter 16:今日食乜好?🤔
Chapter 17:別了,凱捷 🚬
Chapter 18:給爸爸的信 ✍🏻
號外號外!創刊號益街坊!Latte珍藏限量版得意Postcard!一人只限一張!送完即止!
今期雜誌有乜睇?主要都係想同各Blog友分享返我喺上篇文章中未有提及或者係仲未發生嘅一啲3月生活瑣事,以及一大堆所思所想、所見所聞⋯⋯好~事不宜遲,即刻就帶大家進入第一個Chapter!
Chapter 1:孖喵在家千日好 🥰
陪著你走~一生一世也不分~天天編出兩雙足印~過千山過千海~如果~走到這世界邊端~我倆已是無力前行~跟我一起飛去~
呢個籠仲有另一個好正嘅用途,話說Latte隻衰B成日好鍾意阻住家姐開飯,搞到Indie冇啖好食⋯⋯
我唔係冇試過,我試過安份守己,凡事禮讓,都係食得嗰幾啖罐罐,但係Latte呢條bitch⋯我阿妹呀~佢識得乜嘢叫做尊重長輩咩?佢只係行出嚟擺一擺尾,整個cute樣就不停喺度剝削我嘅福利,咁叫做公平咩?你出去問吓啲貓,是但問一隻貓,問吓佢哋需要啲乜嘢?佢哋嘅答案好簡單,只係想要一餐好普通好普通嘅安樂茶飯!點解我哋日日餓壞肚皮都仲要死忍爛忍呀?因為啲小魔怪喺度玩嘢呀!越細隻就越有得玩呀!呢個世界公平咩?呢個世界公平咩?喵~
定啲嚟~定啲嚟~妳老豆我一早就諗到條絕世好橋嚟去對付呢件百厭星,呵呵~問你服未?
不過,呢兩隻活寶貝有時都會有“齊齊開餐”嘅溫馨時刻嘅~咁耐以嚟得一次咁大把囉!哈哈~
Chapter 2:頑皮小黑咪 😆
看看威風的她~雙腿好似摩打~扭波踢波頂瓜瓜~有嘴巴的都讚她~身手最啿誇 (身手最堪誇) ~小妹志可嘉 (小妹子志可嘉) ~陣法腳法日練夜練~真功夫冇花假~
各位哥哥姐姐好,我個名叫做Latte,係一隻又乖又聽話嘅小貓B,全屋上上下下都錫到我燶!喵~
吓~又乖又聽話?喺我接觸過嘅咁多位喵星人之中,妳都算係最曳最反斗嗰個㗎囉!仙女散砂、當屎係波、挑撥香骨、褻瀆土地、浪費食物、刁蠻任性、小氣記仇,時常胡亂出爪、起勢咬人⋯⋯基本上你諗得到嘅嗱喳嘢,Latte幾乎全部都做齊晒,但鬼叫佢個樣生得天真無邪又cutie咩?只要佢扮吓傻再眼定定咁望住你,就算你把火升到17層樓高都會馬上降返落嚟啦!冇錯呀爸爸~你放心出去賺錢買罐罐啦!唔使掛住我㗎!Bye Meow~
Chapter 3:可憐的Indie 😿
曾經好不幸成為某班無良份子嘅繁殖工具,又三番四次遭人惡意遺棄,唔知道係先天問題定係欠缺愛護嘅關係,Indie個傻妹望落去就總係長期keep一副厭世mode咁樣,基於呢個原因,無論佢平時表現得有幾懂事,我都會堅持喺各自臨瞓前互相交流多啲,盡量令個妹豬有返些少安全感。講起上嚟,Indie條命都稱得上係多災多難,難得畀佢搵到一個溫暖嘅家,冇幾耐就感親發高燒,然後好返唔夠兩個禮拜又畀阿B惹到周身蝨,認真係黑到盡頭又是黑。好痕啊~好痕啊~好痕啊~好痕啊~啦啦啦啦啦~快啲搽啲無舐膏!有好多朋友,包括姑姑同老媽子睇到呢張相都立即笑爆嘴,係得我相反,望見Indie各種唔尋常嘅舉動,我個心就當堂乸住乸住,正所謂咬在佢身,痛在我心呀!
好在,搞完一大輪又沖涼又杜蝨又呢樣又嗰樣之後,Indie同Latte嘅情況就開始慢慢受到控制,係爭在屋入面啲跳蝨唔知幾時先清得完啫!係喇係喇~知妳靚到爆鏡喇!唔該咪阻住我吸地啦好冇?
Chapter 4:滅蝨大作戰 😷
貓狗身上有跳蚤可以滴Frontline、戴蚤帶,人畀蚤咬就麻煩好多喇!尤其係我呢一類專惹害蟲嘅“熱血人士”。咬到我事少,咬親兩位公主事大,想對症下藥,當然要快快走入大埔搵阿姐求救!
三少表示:睇啱乜嘢同我媽媽講OK㗎喇~冇咩特別事請唔好騷擾我瞓覺!喵~
滅蝨工具一覽:保而剋®人畜安全滅蟲劑、LION 100%植物成分低刺激貓狗防蚤防蜱清潔液、LION溫和泡泡洗毛水、Frontline Plus貓用防蝨防牛蜱滴劑、Frontline Spray防蝨防牛蜱噴霧,另加一把蝨梳 & 一杯鹼水。沖完個靚涼係咪醒神晒呢?睇吓Indie姐直頭成個model咁款呀!㗅㗅~洗白白呢啲粗重嘢唔好預我,得閒瞓返個晏覺好過!同姑姑捉咗兩隻囡囡入去廁所搞咗半日,都係時候要整返餐好嘢慰勞吓佢哋。革命尚未成功,仍需繼續努力,用過各樣方法都清唔晒堆跳蝨,今日試吓走去買部納米消毒殺菌機返嚟蒸熟你班仆街先得!搓搓搓~我搓搓搓~截至目前為止,我夾夾埋埋經已loop咗呢條片50幾次,正準備重溫第60次⋯⋯
Chapter 7:歡迎新住客Nicolas 🎭
昨日,有位住喺荷李活道名叫Nicolas嘅鬼佬失驚無神走咗上嚟我office度interview,起初見呢位阿哥個款正正常常,咪諗住彈份job過佢做囉!點知條友一坐低就同我大話西遊,仲扯L到冇雷公咁遠⋯⋯唔講你唔知呀~當年發哥喺【辣手神探】拎住雙槍隊冧羅莽嗰一幕經典場面咪我幫佢設計,只係我平時份人低調冇周圍同人講啫~
吓?乜唔係喺【英雄本色】攞住兩支92F殺入楓林閣射爆盲輝咩?唔通我記錯?嗱嗱嗱~唔好講呢啲住,傾返啲正經嘢先!其實我唔止對槍械有研究,甚至連祖國國粹變臉都練得滾瓜爛熟,至於人工方面,你每個月咪求其畀返十零萬我擲袋,咁就ok㗎喇!喂喂~哥仔,我哋呢度唔係計美金㗎!乜你冇睇清楚報紙同網上面寫啲乜嘢嘅咩?15300係港紙啵!仲有呀~我而家係想搵個滅蝨殺手幫忙除蟲,唔係真係走去冧友喎!
Chapter 8:亂噏一通利物經 🏆
除咗玩吓figure之外,一條麻甩佬喺屋企有乜嘢好做?咪多數都係撚吓貓、聽吓歌、睇吓波咁囉!首先要萬分感謝La子不殺之恩,加埋阿鏝悶和呢個一流賽果,等利物浦可以暫時霸住個榜首多一陣。只用咗478場賽事就完成執教生涯第300場勝利里程碑,高爸,請受小弟一拜!足總盃八強脫腳,四冠夢想隨即粉碎,要點樣去舒解畀死敵49000絕殺後嘅鬱悶心情?唯有寄望愛隊能夠一路長勝去到季尾!距離高普離任嘅日子越來越近,一眾紅軍可唔可以憑住120%嘅拼勁同努力去爭取餘下兩個重要錦標,以答謝領隊一路以嚟嘅知遇之恩?
「一位年輕教練喺一間球會表現得咁出色,我過往都做過差不多一樣嘅嘢,從冇感到有任何遺憾,所以我係好明白佢今次嘅決定。」沙比阿朗素喺早前宣佈下季將會繼續留效利華古遜,意味利物浦同拜仁慕尼黑同樣撬人失敗,其後高普喺出席一場英超賽前記招嗰陣,就對呢件事發表咗以上嘅言論,話自己身為過來人,係絕對理解對方嘅諗法。
隨著沙比對外公布留隊宣言後,最有可能接任紅軍主帥嘅人選分別有目前教緊葡超士砵亭嘅39歲少帥魯賓艾摩廉,以及白禮頓意大利籍領隊迪沙比,前者畀我個觀感有少少似前波圖、車路士、熱刺教頭波亞斯,感覺上唔太可靠;後者個款望落去又Cam Cam哋冇嚟霸氣,真係唔知佢點震住班大哥?我諗若果由佢揸旗,成績應該係同羅渣士咁上下,唔似會有啲乜嘢特別建樹。再講,以F$G近年嘅作風,通常傳得最行嗰啲,最終都未必會係接任人,所以,與其戇狗狗喺度估吓估吓,不如就好好享受埋高普今季喺英超、歐霸嘅最後探戈先啦!唉~王子,如果班仔埋門嗰腳有你當年一半功力就好喇!(設計對白)
嗱~入波呢樣嘢好易嘅啫!見到個龍門出嚟即刻推橫,然後輕輕掃個波入網,就係咁簡單!(設計對白)證實患上末期胰臟癌嘅前英格蘭領隊艾歷臣喺3月14號一圓執教利物浦嘅夢想,以「一日限定」身分,帶領眾多位紅軍名宿喺晏菲路同阿積士名宿隊踢咗場慈善表演賽,成功吸引接近六萬人前嚟觀摩。「鐵血隊長」謝拉特、「雀斑王子」托利斯、「金霸王牛牛」古治、「芬蘭球王」列馬倫、「靚仔副隊」艾加、 「 帶刀侍衛」史基泰爾、「毛毛」施素高、「神經門將」杜迪克、「大蕃薯」卻克蘭、「傷追人孖寶」施斯 & 奧利里奧、小韋、大佬希、巴布仔、比黐筋、凡美、域奴、 史比寧、艾沙亞、麥斯洛迪古斯、麥克干沙利斯⋯⋯熟悉的名字一個接一個,為球迷獻上一場令人難以忘懷嘅足球饕餮盛宴。
Chapter 9:曾令人聞風喪膽的西班牙雀斑王子 - Fernando Torres 🇪🇸
想當年,謝拉特和托利斯這一對「8+9 進攻組合」曾為一眾利迷留下多個扣人心弦的激情時刻,在2008至2009年的英超球季,由「戰術大師」賓尼迪斯率領的利物浦擁有讓人為之羨慕的鑽石中場線,前場有「神奇隊長」作引導,中場有能傳能射兼且眼界廣闊的大腦沙比阿朗素,後場就有以爛打聞名的馬斯查蘭奴做最後一度屏障,前線則有大熟大勇的王子負責衝鋒陷陣,這支星味十足的超強紅軍在當屆聯賽一直長期佔據榜首位置,還成功雙殺死敵曼聯,惟在賽季後半段被數支中下游隊伍逼和,最終才以4分之差飲恨屈居亞軍。在托里斯還未正式離開前,我對於外間所有轉會消息均採取不聞不問的態度,原因是我心中仍然存有半點希望,我從沒想過他會走得那麼決絕,也不相信他會就此離棄一班愛護他的球迷“乘車”往史丹福橋,直到看見王子拿著一件車路士9號球衣站在安察洛堤旁邊,我才願意承認眼前的事實。然而,相比起麥馬拿文和科拿的離去,這宗突如其來的上車事件並未有讓我陷入不快的漩渦之中,須知道球員終究是過客,而且王子本身又不是利記的自家青訓,故此,他為了獲得更多冠軍頭銜和個人榮譽而離隊他投,確實也是無可厚非,試問在這個球壇上,又有多少個華迪、拿鐵斯和馬甸尼呢?
俗語有云:人走茶涼,即使托里斯在車仔的發展有多不堪,都無須用咒罵或是恥笑的方式去抨擊一位昔日紅軍,更何況他們口中的「廢托」又的確於這段期間一舉拿下多項重要錦標,更成為歐洲賽場上首位在世界盃、歐國盃、洲際國家盃、歐聯、歐霸、歐洲超級盃、世界冠軍球會盃都均能取得入球的大滿貫射手,這就直接證明他的選擇也並非完全是錯誤的。說到底,於我而言,若你曾是利物浦的一份子,只要你去的不是曼聯或愛華頓的話,到哪兒我都會默默送上祝福給你,這才是真正的YNWA精神!所以時至今日,我依舊會記住王子為利記所立下過的汗馬功勞,亦從不會將他與「奧脫福廁所獎門人」咪鳩Oh暈和「口水佬」迪奧夫等人混為一談,總之一日Legend,一世Legend。Chapter 10:R.I.P. Eric Carmen 🪦
Céline Dion曾在某採訪中透露,在最後的副歌部分那一段著名高音 (F5) 並不是早計劃好的,當她踏進錄音室時,David Foster即告訴她,若然她駕馭不了此歌,其他歌手便會拿來翻唱並將它發揚光大,這才促使Céline決定要向Foster證明自己的歌唱實力,而最終她亦不負眾望,交出一份近乎完美的功課。
Chapter 11:深切悼念鄭華娟、何厚華 🙏🏻
台灣著名音樂人鄭華娟於3月21日離世,享壽60歲,目前後事由先生Michael等德國親友悉心處理,她的老東家滾石唱片在3月24日亦沉重發文表示:「做為她的同事、朋友、親人,我們聽到這個消息都感到無比的悲傷和哀痛。」然而,對於我來說,第一次接觸到何厚華的名字,反而是在李克勤的頭兩張國語專輯內,主打歌〈一生何求〉、〈不懂溫柔〉,冷門作〈何嘗願意〉、〈把風雨關在門外〉、〈哭過笑過愛過痛過〉、〈來時情路〉,每一首都填得細膩感人,意味深長,惟克勤進軍台灣市場的時間終究還是太晚,當時市面上已有太多形象鮮明的港星,再加上咬字過硬、曲式太舊等毛病,以致他未能在競爭激烈的情況下突圍而出,就這樣兩度跟台灣樂壇擦身而過。
無論如何,願兩位優秀的音樂人能得以安息,而你們曾用心寫下的佳作,以後也必定會長久的傳唱下去。
Chapter 12:好碟再重溫 - 陳奕迅《The Key》🔑
今期好碟再重溫的主角是陳奕迅於2013年7月22日發行的廣東專輯《The Key》,以下是小弟在9年前所寫的一篇大碟聽後感⋯⋯《H3M》新鮮,《...3mm》好玩,《The Key》則是簡單六個字:既好聽又耐聽!專輯內有很多歌都是以書名來命名,並且言之有物,絕不是單純的商業歌曲。
打頭陣的〈主旋律〉氣勢磅礡,明顯是為配合演唱會而“度聲訂造”,作為專輯內的首波主打,它的旋律不算是十分出彩,歌詞有點政治意味但就並非流暢好記,最為可取的莫過於是Eason淋漓盡致的癲狂演繹,為此歌增添了不少的可聽性。
帶點New Age味道的〈告別娑婆〉是筆者的全碟最愛,Eason將這首難度不低的佳作詮釋得完美無瑕,由高低起伏和起承轉合均無可挑剔,特別喜歡他在間奏時的一段鬼魅笑聲,絕對是神來之筆,感覺甚為玩味。此外,由小克所寫的歌詞,亦為樂迷帶來了無限的思考及反思的空間。這個世界到底有沒有因果輪迴、天理循環?還是真的是冥冥中自有主宰?了解前世今生真有那麼重要?你我皆是凡人,活在當下不是更為重要嗎?若能放下塵世的貪嗔痴,一切眼淚思憶都只是過眼雲煙。
〈斯德哥爾摩情人〉的旋律和編曲不禁讓我想起〈裙下之臣〉以及王菲的一首舊作〈情誡〉,而Eason的唱法亦非常的“阿Faye”。林夕所寫的詞意味深長,表面上與陳小春的〈犯賤〉稍有雷同,暗地裏卻把某幾個封閉角度的一群斯德哥爾摩症候群描寫得相當透徹。面對著巨大的邪惡軸心,眾人皆無法抵抗,於是唯有想盡辦法替對方找藉口,還漸成幫兇同諜,為的就是要求個心安理得,實則上卻是騙人騙自己。〈任我行〉的旋律寫得很好,歌詞亦填得頗有意思,很值得我們去再三品味。對於這份歌詞,各人領悟和理解出來的東西可能都會有所不同,個人的看法是:若要堅持獨行獨斷,不隨波逐流,那麼你就先要有被孤立、被遺棄的心理準備。回首兒時天不怕地天怕,作風自由奔放無阻礙,長大後卻諸多顧忌,還不知不覺跟隨都市的步伐成為羊群的一份子,人生匆匆數十載,要怎樣才能令變得世故圓滑的自己尋回昔日那份純粹的傻勁呢?Eason不作修飾的樸實唱法,聽起來像在你耳邊輕說一聲:「Hey Man~請放開懷抱吧!」〈遠在咫尺〉的旋律頗具流行元素,Eason的演繹亦極之入戲,充分將歌中主角那份掙扎與疑惑表露無遺,惟“噴咪”情況嚴重,直接影響樂迷的聆聽感受,這一點監製Eric Kwok該負上全部責任。至於林若寧所填的那份詞則道出了一眾多情漢子的心聲,兩個人互相喜歡對方,最終卻沒有走在一起,這結局看似是充滿遺憾,但事實又當真如此嗎?現在有許多人常常都會抱著一種“另一個會更好”的心態來談戀愛,還會將那個心目中的他/她想得極其完美,可是有一天當你真正得到了他/她,你或許就會發現,他/她根本不是你想像的那麼美好,人往往就是這樣,得不到永遠便是最好,卻不懂得去珍惜在身旁為你默默付出的那一位。〈失憶蝴蝶〉據說是〈路過蜻蜓〉的延續篇,同樣由陳曉娟譜曲,林夕填詞。若〈路過蜻蜓〉所描述的是一份卑微且沒有價值的愛,那它的續集〈失憶蝴蝶〉所表達的則是對愛情毫無奢望的消極態度。「從沒有相戀 才沒法依戀 無事值得抱怨 從沒有心願 才沒法許願 無謂望到永遠」驟聽下來像是一個被愛傷透的人正在自言自語、自問自答、自我安慰,字裏行間盡是看破紅塵之味,卻暗暗予人一種逃避現實之感。由Eason親自作曲的〈床頭床尾〉是一首冧到爆的溫情小品,「徐徐入眠沉睡 徐徐入眠沒眼淚」這是單純的巧合還是刻意安排的愛妻宣言?沒想到Eason和小克竟然可以將“床頭打架床尾和”這句話詮譯得如此窩心感人。結尾曲〈阿貓阿狗〉由新晉音樂人Jimmy Fung作曲及編曲,節奏輕快的和弦呈現出一股朝氣勃勃的美國西部風情,背後卻藏著大時代底下的都市悲歌。詩仙李白曾說:「天生我材必有用,千金散盡還復來意」,意指上天生下我就必定有需要用到我的地方,金錢用盡了,那些散出去的東西以後依然會歸來。但倘若閣下花了畢生氣力才驚覺自己只是一個微不足道的小角色,你又會選擇怎樣去消化這個殘酷的現實呢?
但自從download咗一堆外賣平台Apps之後,我嘅早/午/晚餐款式就比平日多咗唔少選擇,間唔中仲會發現一啲意想唔到嘅著數優惠。歡迎嚟到永年車仔麵茶冰廳外賣部,先生請問訂單number係幾多?雞翼一丁配香煎牛扒 & 火腿奄列 + 餐包,再加多杯抹茶紅豆冰,開工前整返個豐富嘅經典粉麵餐,當堂精神爽利,人都醒目啲!下午茶最強組合:三餸油麵 (魚蛋、魷魚、牛柏葉) 配 檸檬茶王, 另加一碗生菜魚肉。
晚餐食啲乜嘢好?初遇馳名紅燒牛肉麵 + 宜蘭蝦吐司 配 冷泡亞里山烏龍,一個字:正!鹽酥雞滷肉飯 + 六件古早花雕雞卷 配 冷泡亞里山烏龍,原價$143,用Deliveroo按“外賣自取”即享半價折扣。
喪事接二連三,教人倍感唏噓,不到一年,阿琪的爸爸龜仙伯伯和大嫂亦相繼病逝。以前每逢農曆新年,阿琪都會邀請我到她家裏吃團年飯,或許是我身上那一陣六親冷淡的氣味實在太過強烈,她的親友總是會把我當成自家人般看待,有時候還熱情得讓我有點不好意思。明明渴望被愛,卻拒人於千里之外,這一份焦慮不安的矛盾心情,相信您應該很能理解吧?同樣受原生家庭影響而漸漸變得孤僻內向,猶幸能在荊棘的路途上覓得一盞同行的指路燈,無時無刻照耀著我的前方,話說回來,我們兩父子挑女人的眼光還挺準的嘛!
談到演唱會,您最喜愛的「金嗓歌后」蔡琴於5月25至26日將會在紅館舉行兩場演出,不知道當晚會不會有機會聽到我最愛的〈點亮霓虹燈〉呢?總括來說,《The Key》都稱得上是Eason繼《What's Going On...?》之後最出色的一張專輯,一首首耐聽悅耳且極具深度的作品,道盡深了社會裏面的大小事情,我深信凡是於人生有所經歷的人,在聽完整張CD後都一定會有所覺悟。
推介曲目:告別娑婆、斯德哥爾摩情人、任我行、失憶蝴蝶、阿貓阿狗
Chapter 13:被演技耽誤了的隱世好聲音 🎙
開講有話:「自古爛片出神曲」,劉德華監製及主演的【潛行】有多難看,相信已不用我多作介紹,況且我今個Chapter想談論的,主要是新晉影后劉雅瑟所演唱的片尾曲〈道理都懂〉。這首歌是由「孤勇者黃金組合」錢雷 + 唐恬創作,一共錄製了兩個版本,分別是「劉華版」和「雅瑟版」。兩者比較之下,貴為樂壇天王的劉德華算是詮釋得中規中矩,沒甚麼特別出彩之處,反而從偶像團體轉戰影壇多年的劉雅瑟,卻意外唱出了一份樸實無華且略帶滄桑的真摯情感,這種渾然天成的聲音特質,是我在很多專業歌手身上都找不到的,讓人忍不住一聽再聽。
Chapter 14:3月觀影小記 🎥
One love, one heart~Let's get together and feel all right~Hear the children crying (One love)~Hear the children crying (One heart)~Sayin', Give thanks and praise to the Lord and I will feel all right~Sayin', Let's get together and feel all right~總結在3月份觀賞過的10部電影,當中有一半以上都是因工作關係而看的⋯⋯片名:沙丘瀚戰:第二章 (DUNE: PART TWO)
導演:Denis Villeneuve
主演:Timothée Chalamet、Zendaya
片長:166分鐘
級別:IIA
語言:英語
上映日期:2024-02-29
個人評分:★★☆ (☆為半粒星)
簡短後感:
畫面絢爛奪目,場面盛大壯觀,服裝華麗精緻,更坐擁時下最強的新世代卡司陣容,but that's not really my cup of tea。
片名:可憐的東西 (Poor Things)
導演:Yorgos Lanthimos
主演:Emma Stone、Mark Ruffalo、Willem Dafoe
片長:141分鐘
級別:III
語言:英語、法語 (部分)
上映日期:2024-02-29
個人評分:★★★☆ (☆為半粒星)
簡短後感:
在奇幻詭譎的包裝底下鋪陳出一個完整的成長故事,主題暗黑露骨卻不失幽默,單是入場欣賞Emma Stone徹底豁出去的精湛演技經已值回票價。
片名:紅毯先生 (The Movie Emperor)
導演:寧浩
主演:劉德華、單立文、瑞瑪席丹
片長:127分鐘
級別:IIA
語言:普通話、粵語
上映日期:2024-02-29
個人評分:★☆ (☆為半粒星)
簡短後感:
意念不俗但看起來有點綁手綁腳,既欠缺港式民族情懷,又無法抓住大陸影迷的眼球,簡單來說就是捉到鹿不懂脫角,結果還弄巧成拙。
片名:填詞L (The Lyricist Wannabe)
導演:黃綺琳
主演:鍾雪瑩、葛民輝、陳毅燊
片長:113分鐘
級別:IIB
語言:粵語
上映日期:2024-03-07
個人評分:★★★
簡短後感:
題材貼地又寫實,結局餘韻綿延不絕,很適合每一位資質平庸卻熱愛追夢的年輕人觀看。
片名:鬼太郎誕生 咯咯咯之謎 (鬼太郎誕生 ゲゲゲの謎)
導演:古賀豪
編劇:吉野弘幸
片長:105分鐘
級別:IIB
語言:日語
上映日期:2024-03-07
個人評分:★★★★☆ (☆為半粒星)
簡短後感:
意境一流的恐怖動畫大作,配樂直達滿分,回到鬼太郎父親還是人型姿態的時期,揭露人性最醜陋的一面,其殘暴、無恥的程度簡直達到極致,令我不禁聯想起在【幽遊白書】內那盒使到仙水忍完全黑化的「黑之章錄影帶」。
片名:第151個朋友 (Not Friends)
導演:Atta Hemwadee
主演:Baipor、Tony、Jump、Fond
片長:129分鐘
級別:IIA
語言:泰語
上映日期:2024-03-14
個人評分:★★★★★
簡短後感:
有笑有淚有感動,並將每個角色描寫得有血有肉,雖然結尾略顯倉促,仍算交代得條理清楚且自然流暢,亦偶有神來之筆,私心認為這甚至是一部能跟【小情人】並列的高質泰國電影。
片名:音樂傳奇卜馬利:人生愛與夢 (Bob Marley: One Love)
導演:Reinaldo Marcus Green
主演:Kingsley Ben-Adir、Lashana Lynch
片長:107分鐘
級別:IIB
語言:英語
上映日期:2024-03-14
個人評分:★★
簡短後感:
流水作業式操作,平鋪直敘沒波瀾,寡淡乏味的內容使人昏昏欲睡,若非靠著Bob Marley的音樂力挽狂瀾,頂多只值一粒星。
片名:出租家人 (We are Family)
導演:劉偉恆
主演:曾志偉、恬妞、陳家樂、周家怡
片長:103分鐘
級別:IIA
語言:粵語
上映日期:2024-03-14
個人評分:☆ (☆為半粒星)
簡短後感:
陳腔濫調的劇情,老土到打冷震的矯情對白,配合一眾資深演員的overacting,直叫人尷尬癌發作。
片名:熱辣滾燙 (YOLO)
導演:賈玲
主演:賈玲、雷佳音
片長:130分鐘
級別:IIA
語言:國語
上映日期:2024-03-21
個人評分:★★
簡短後感:
Shabu-shabu配油炸鬼、臭豆腐,再加入花椒、八角、陳皮等香料,還把白飯倒進鍋裏煮成了一碗粥,或許有人會很喜歡此吃法,但本人在用餐後所得出來的結論,則是怎吃都不對勁。
片名:捉鬼敢死隊:冰封魅來 MX4D (Ghostbusters: Frozen Empire)
導演:Gil Kenan
主演:Mckenna Grace、Paul Rudd、Carrie Coon
片長:115分鐘
級別:IIA
語言:英語
上映日期:2024-03-21
個人評分:★★
簡短後感:
像一杯普普通通的廉價雪糕,入口時頗涼快,卻不會令人再三回味,隔天便會完全忘記它是甚麼味道。
Chapter 16:三款爆谷揀邊兜?🍿
焦點新戲任你揀,全屬爆谷片類別,想看青春偶像有表面上以12鏡仔作掛帥,實則卻是由阿卵 (楊偉倫) 一人Carry的【12怪盗】;想看珍禽異獸有一切盡在意料之中的【哥斯拉×金剛:新帝國】,還有越拍越爛且毫無新意的【功夫熊貓4】,若只是單純用來消磨時間的話,不知哪一部最合你心水?Chapter 16:今日食乜好?🤔
諗返起啱啱入嚟沙田做嘢嗰陣人生路不熟,每到放飯時間我十居其九都係走去幫襯兩間大字頭快餐店,或者係譚仔、三哥、魚尚、吉野家、Mos Burger五揀一。但自從download咗一堆外賣平台Apps之後,我嘅早/午/晚餐款式就比平日多咗唔少選擇,間唔中仲會發現一啲意想唔到嘅著數優惠。歡迎嚟到永年車仔麵茶冰廳外賣部,先生請問訂單number係幾多?雞翼一丁配香煎牛扒 & 火腿奄列 + 餐包,再加多杯抹茶紅豆冰,開工前整返個豐富嘅經典粉麵餐,當堂精神爽利,人都醒目啲!下午茶最強組合:三餸油麵 (魚蛋、魷魚、牛柏葉) 配 檸檬茶王, 另加一碗生菜魚肉。
晚餐食啲乜嘢好?初遇馳名紅燒牛肉麵 + 宜蘭蝦吐司 配 冷泡亞里山烏龍,一個字:正!鹽酥雞滷肉飯 + 六件古早花雕雞卷 配 冷泡亞里山烏龍,原價$143,用Deliveroo按“外賣自取”即享半價折扣。
有日放lunch心血來潮,喺位於連城廣場嘅一間人氣韓式炸雞店度嗌咗個一人套餐返公司,點知一打開盒就發現⋯⋯
啲雞炸到乾爭爭輆澀澀,失敗!杯粟米硬到好似石仔咁,失敗!盒酸蘿蔔醃到淡茂茂出晒水,失敗!包薯條咬落腍坺坺又一浸油膱味,失敗中嘅失敗!最難食係碗牛肉飯,直頭係凍㗎!妖~食到一肚氣!索性去揀兩盒壽司返嚟慢慢嘆好過,起碼人哋啲嘢CP值高又正正常常先啦!Chapter 17:別了,凱捷 🚬
一星期前在臉書上赫然發現你於蘇州不幸猝逝的消息,感覺極不真實,儘管已見過不少生離死別,心底裏仍是暗暗為你感到惋惜,沒想到一位心地善良、想法正面,同時又才華橫溢的年青人,居然就這樣離開了。我倆因為同樣愛著志炫的歌而認識,雖稱不上為知己,勉強來說只是萍水相逢,卻有著一份難以言喻的親切感。想起九年前來台的第二天,我跟你們一眾炫友開懷歡唱,齊齊分享自己所喜愛的一些「炫歌」,席間還聊了雨傘革命、太陽花學運、中港台矛盾以及捷運殺人事件等社會話題。怎說也是第一次見面,所以在聚會初期難免會有多少羞澀,你看到我緊張得有點鎖喉,便主動邀請我一同合唱,歲月匆匆流逝,猶如白駒過隙,昔日的快樂情景,至今仍歷歷在目,而你那天獨唱的一首台語歌,則不斷迴盪在我的耳邊,久久揮之不去⋯⋯
小捷,願你能在另一個宇宙中得到重生,繼續唱著你愛唱的歌,彈著你最喜歡的音樂,祝一路走好。
您走了之後沒幾個月,姨媽也跟大家說再見,還搬到屯門曾咀那邊,正式成為您的隔籬鄰舍。Chapter 20:給爸爸的信 ✍🏻
生老病死足證世事無常,莫說來日方長,想做的事趕快做,想見的人盡快見,爸,您說對不對?這幾天腦裏忽然不停回憶起昔日於何文田居住的開心日子,理由倒不是想重返過去的富裕生活,而是希望永遠停留在一種無憂無慮、天真爛漫,想急著長大,卻不知長大為何物的心境狀態。
值得懷念和回顧的東西太多,當然少不了這幾項,特別是荔園內的碰碰車和迴轉木馬⋯⋯還有您所煮的每一道絕世佳餚,連帶您學識淵博卻帶有一絲幽默的談吐。
順道也update一下各人的近況,阿龍仍是老樣子,娶了個賢妻,又喜獲兩位乖巧聰明的女兒,總之就家庭和睦,樂也融融,令人羨慕不已;大眼仔之前曾經歷過大大小小的風浪,幸好近日已慢慢重回正軌。廚房仔和戇鳩仔依然是我的最佳死黨,於上年五月還結伴同遊台北,盡情吃喝玩樂,遠離俗世煩囂。在這敞遊程上的其中一個重大收穫:與一眾台灣朋友齊齊觀賞林志炫ONEtake2.0「我忘了我已老去」世界巡迴演唱會。工作方面,與各下屬的關係依舊不錯,當中有好幾個舊夥伴在離開公司後仍未有遺忘我這個脾氣火爆的囉嗦大叔,更不時會在Whatsapp主動分享近況。我真的從來沒有想過,有天我竟然可以從一群年輕人身上攝取那麼多快樂的養分,還不自覺成了這班甩繩馬騮背後的雨傘,時常替他們遮風擋雨,並持續去實踐我那天真又愚笨的管理哲學,能看到各同事天天笑著上班,笑著下班,同時又能妥善地把面前的工作做得最好,身為團隊大家長的我便深感欣慰。
您放在抽屜裏的那瓶威士忌我已將它全喝光了,煙自從加價至$102包就很久沒抽,後來更索性把它戒掉。擺在大廳的神枱你和嗲嗲、阿奶還滿意嗎?等了多年,您們終於都能夠一家團聚,想必會有許多聊不完的話題吧?
此外,想問在天國有遇到CoCo嗎?有沒有告訴給這隻衰貓知道我有多麼的想念他啊?OK~今次就寫到這兒!爸,請放心吧!我和老媽在未來一定會過得好好的,而我亦會如往時一樣肩負起家中的責任,絕不會再讓愛我的人失望。Indie&Latte&Me 生活瑣事雜誌(2024年4月創刊號)完,下一期嘅出版日期係⋯⋯喵~我鬼知呀?話唔定出完一期就滯銷摺埋呢!CoCo&Me 生活瑣事雜誌(三週年停刊號)
CoCo&Me 生活瑣事雜誌(2020年10月號)
CoCo&Me 生活瑣事雜誌(2020年9月風月號)
CoCo&Me 生活瑣事雜誌(2020年7月生日金裝特厚版)
CoCo&Me 生活瑣事雜誌(2020年3月抗疫號)
CoCo&Me 生活瑣事雜誌(2019年10月Halloween特別號)
CoCo&Me 生活瑣事雜誌(2019年9月號)
CoCo&Me 生活瑣事雜誌(2018年7月號)
CoCo&Me 生活瑣事雜誌(2018年3月號)
CoCo&Me 生活瑣事雜誌(2017年11月創刊號)
你兩隻衰豬咁快就咁friend,有咗佢哋,生活真係多樂趣
回覆刪除但indie始終好需要私人空間,阿b太煩,成日阻住佢休息。🐈🐈⬛😂😂😂
刪除Latte真係很可愛!
回覆刪除唔搗蛋嗰陣時真係得意到殺死人嘅~😂
刪除All by myself 係好經典既歌, 我都幾鐘意!🙂 講起 Celine 唔知佢早陣既聲帶 🤔 問題好返未?
回覆刪除我諗佢未來都唔可能再有乜嘢大型嘅演出㗎喇!作為佢嘅歌迷真係覺得好可惜……😔
刪除【Celine Dion近況】患僵硬人症候群病情惡化 親姊揭Celine已無法控制肌肉活動
刪除https://urbanlifehk.com/article/118925/celine-dion%E8%BF%91%E6%B3%81-%E5%83%B5%E7%A1%AC%E4%BA%BA%E7%97%87%E5%80%99%E7%BE%A4-%E6%83%A1%E5%8C%96-%E9%90%A1%E9%81%94%E5%B0%BC%E8%99%9F-%E8%82%8C%E8%82%89%E6%B4%BB%E5%8B%95
真係天意弄人!😶 希望她方方面面有改善、過得好吧!
刪除🐰 讀狂小子網上消息提及關於 Celine Dion 的病情, 實在可惜 🙏 🙏 🙏 🙏 🙏
刪除https://urbanlifehk.com/article/118925/celine-dion近況-僵硬人症候群-惡化-鐡達尼號-肌肉活動
► 視頻 Celine Dion Shares NEW Photo With Her 3 Sons Amid Health Battle | E! News
https://www.youtube.com/watch?v=0NUnCpQMfX4
► 視頻 Celine Dion's History-Making Moments and the Disease Threatening Her Career
https://www.youtube.com/watch?v=FbHO-6P-k6c
► 視頻 Divas: Celine Dion (2023) FULL BIOGRAPHY DOCUMENTARY
https://www.youtube.com/watch?v=qlK3l9exMuA
► 視頻 THIS Is What HAPPENED To Celine Dion
https://www.youtube.com/watch?v=9JWW0cWffXA
► 視頻 Webinar: Stiff Person Syndrome with Dr. Amanda Piquet
https://www.youtube.com/watch?v=IXldpRPiE2M
► 視頻 席琳狄翁罹僵硬人症! 健康2.0 20221224【完整版】
https://www.youtube.com/watch?v=U0xd_4T8VF4
► 視頻 Celine Dion僵硬人症候群|漸凍症與僵硬人症候群有何不同?
https://www.youtube.com/watch?v=imR-yhUPhvk
最近見Céline出席公開活動成個人明顯飽滿咗,唔期望佢會復出,只希望佢身體一路向好。👍🏻
刪除又一詳細紀錄.
回覆刪除🤝🏻🤝🏻🤝🏻🤝🏻🤝🏻
刪除做你D貓一定最幸福啦!
回覆刪除151朋友的確好睇,多謝好介紹,呢D戲香港永遠拍唔到!
寫俾世伯封信情深意重,睇得出你心裏面其實好錫佢。
我真心覺得好睇過【出貓特攻隊】,不過有好多人話個結尾收得唔好。🤔
刪除我覺得收得好好喎,學你話齋有條有理,又冇乜多餘嘅感情線
刪除朋友之間總會有啲瑕疵係你需要接受同包容,我覺得呢一part真係描寫得好好。👍🏻
刪除Beautiful blog
回覆刪除🤝🏻🤝🏻🤝🏻🤝🏻🤝🏻
刪除Please read my post
回覆刪除🤝🏻🤝🏻🤝🏻🤝🏻🤝🏻
刪除Please read my post
回覆刪除👌🏻👌🏻👌🏻👌🏻👌🏻
刪除喬喬你是個性情中人,
回覆刪除聽到你當日唱的海闊天空便即時眼眶紅了,想不到小捷就這樣走了
我20日會親自到板橋出席他的追思會。🙏🏻
刪除特意飛過去?也太有心了吧!
刪除飼養貓貓喜樂參半,好似我屋企隻貓貓,有時走埋嚟哆下我,但百厭上嚟,將防蚊紗網全部整爛晒,又鍾意走上我鋪床上瞓覺,趕極佢都唔走。
刪除也不能說是特意,只是心裏面忽然有此想法,便立刻坐言起行去訂機票book酒店,也可當作是一個人即興到別處散一散心吧!🛫
刪除菲臘兄:我對貓貓嘅照顧方式完全係溺愛無極限,已經多次畀女朋友話我無藥可救。🤣🤣🤣
刪除奴才繼續努力,加油💪EEchan
回覆刪除🙏🏻🙏🏻🙏🏻🙏🏻🙏🏻
刪除我家少爺都係用F牌蝨帶, 防蝨兼俾人知佢有人照顧, 出街唔怕拐子佬
回覆刪除前排睇左個介紹 Celine Dion 嘅特輯, 雖然佢係加拿大人, 少女時代, 佢英文係唔曉架, 為左英文市場, 先至開始認真學
(阿毛)
蝨帶暫時未帶,而家都係keep住滴,先清晒屋企啲跳蝨先再算。😬
刪除Céline有今時今日咁嘅成就當初一定係下咗好多苦功,睇佢平時唱live嘅水準就知道。👍🏻
刪除睇完啱啱嗰場雙紅會更加認同你寫嘅嘢
回覆刪除如果有王子呢啲finishing頂級嘅射手喺度,莫講話呢場波,就連足總盃嗰場都唔使輸啦!
最後睇到你寫畀你朋友段文字同埋寫畀老豆封信,好感動
另外想補充返,調返轉頭睇成件事,
刪除其實費托錯唔曬,本身利記啲軍醫呃佢,佢走去車仔衝冠都唔怪得佢
除咗王子,而家亦更感受到明奴嘅可貴,當然都好懷念當年體能、速度屈爆機嘅文尼, 只可以講往事只能回味,我哋只能夠向前看。👉🏻
刪除睇到F9 S10 離開咗利之後完全冇貨交仲覺得唏噓!
刪除離開利記仲keep住一路有貨交嘅,好似真係得蘇亞雷斯。🤔
刪除咁馬斯仔同古治都ok嘅!!
刪除古治之後始終唔係打頂級聯賽,馬斯仔還好,唔算係大殺四方。🤔
刪除兩隻貓貓嘅互動好得意,Latte真係一隻好得意嘅小貓b!💕
回覆刪除睇到最後好感動,想同你講聲:add oil💪
多謝鼓勵。😬
刪除謝謝分享。
回覆刪除😊😊😊😊😊
刪除劉雅瑟是一個好好嘅演員我一早知,估唔到連唱歌都咁好。
回覆刪除好喜歡你對熱辣滾燙嘅評語,內地大收的片往往都有這種毛病,就是材料錯配,口味又過重。
十二怪胎就算了吧!這種毫無誠意嘅垃圾請供粉絲作內部傳閱好了,別再丢人現眼讓其他人看笑話。
有【盗月者】做對比感覺就更加強烈,就算小李點樣call齊總動員喺facebook嗰度不停幫忙洗地,都遮蓋唔到佢係爛片呢個事實,呢個亦都係呢間公司最乞人憎嘅一點,成日用情感勒索呢一招去限制人哋講真話嘅權利,郁啲就話人係hater,咁同大家當日口中所講最討厭嘅極權主義又有乜嘢分別?😷🤐
刪除任何公眾人物有人鍾意有人唔鍾意好正常,刻意標籤做hater本身就係污名化我唔係hater,我只係講事實嘅正常人。
刪除唔好聽就係唔好聽,肥就係肥。我只係一如國王的新衣中的那位小孩。
只可以講句百貨應百客……🤷🏻♂️
刪除大嘅入籠食,細嘅外面食,咩玩法呀,哈哈,但又真係好方法喎,又唔駛令Latte覺得被困。
回覆刪除Indie而家每朝早都會自動波行入去慢慢嘆佢碟早餐。😼😂
刪除正wor,好耐冇睇過你呢類post!
回覆刪除睇嚟你最近都係弄貓玩figure為樂..
拎佢出嚟影下相咋~每日忙住做清潔,乜嘢都冇時間玩!🥲🤣
刪除如果只係跳蝨可以試下用滅蝨彈,殺蟲水噴得多通常都會無效。
回覆刪除已經改咗用蒸氣機,暫時效果唔錯。👊🏻
刪除跳蝨比床蝨容易處理,往後只要勤點清潔應該可以杜絕禍患。
刪除暫時睇落係,不過我唔會掉以輕心。🙌🏻
刪除拜讀精彩創刋號,精美Postcard收到,謝謝博主😸
回覆刪除客氣客氣。🐈⬛🖐🏻
刪除照顧小貓孩你真的好用心又好計👍
回覆刪除雖然好少睇波但喜歡靚球星包括西班牙王子😜
講到靚仔球星,王子絕對係首屈一指。😬
刪除阿貓你真係一個好盡責嘅主人,對朋友屋企人更加係冇得頂!
回覆刪除所以最後咪得返幾個朋友同一個屋企人。😂
刪除我也鍾意鬼太郎呀.
回覆刪除我其實唔係睇得太多鬼太郎嘅動畫,但今次呢個前傳故事確實係幾出色,就算係完全冇接觸過鬼太郎嘅人都可以入場一睇。👍🏻
刪除我也鍾意鬼太郎呀.
回覆刪除👍🏻👍🏻👍🏻👍🏻👍🏻
刪除而家日日有兩女為你爭鋒呷醋,你就巴閉la😆😂
回覆刪除人生高光時刻!😍😍😍🤣🤣🤣
刪除你仲有個大婆😂😂😂😂😂
刪除二奶你好!🖐🏻🤣
刪除Beautiful blog
回覆刪除🖐🏻🖐🏻🖐🏻🖐🏻🖐🏻
刪除Please read my post
回覆刪除👌🏻👌🏻👌🏻👌🏻👌🏻
刪除我從來唔覺得托利斯差到要俾人叫廢托,
回覆刪除相反,仔細睇返佢D歐聯入球數字, 至少一定好過舒夫真高,
頂多叫做同基斯普差唔多啦!肯定唔係瑟頓、卡沙拉基同白賴仁咁差.
除咗基斯普之外基本上全部都係受傷患困擾影響,軍刀啱啱加盟車仔嗰陣時表現仲係威係勢㗎!蝨頓同媽叉拉基就慘啲,冇記錯全季好似淨係入得一球;白賴仁勞特立感覺上就純粹係水土不服。😅
刪除論整體成就,細佬勞特立遠比唔上大佬.
刪除佢同克羅地亞個蘇加一樣,喺國家隊嘅表現遠比球會好。🤷🏻♂️
刪除Eric Carmen絕對是一個被人嚴重低估的唱作人,蒙娜麗莎的眼淚固中故事很有趣,謝謝提供^^
回覆刪除起初覺得首歌咁有詩意個feel又羅曼蒂克,估唔到內裏嘅故事係咁樣。😅
刪除别说在对岸,克勤老师在内地火红的歌基本上全都是粤语
回覆刪除我記得克勤唔知喺邊個節目講過,話佢當年一錄完紅日國語版之後,公司就即刻叫佢以後無論上任何地方登台都係唱返粵語版比較好。😂
刪除Latte個樣好精靈,我完全畀佢迷倒。。
回覆刪除Indie好乖啊,畀妹妹咁踩住個身都唔發脾氣。。。😍
你朋友隻貓搓被段片好得意呀!😍😍
Indie內心其實錫到佢燶,我同姑姑每次捉住Latte剪指甲或者沖涼隻衰B都例牌會鬼殺咁嘈,然後佢家姐一聽到就會即刻好緊張咁走過嚟睇吓乜事,個樣仲好似好心痛咁。🥰
刪除成個畫面一定十分有愛。。。💝
刪除通常見完啲好溫馨嘅畫面之後兩個就開始打交。🤣
刪除我最近都有幾個朋友未到50忽然間走咗,所以我好明白你感受
回覆刪除我台灣嗰邊個朋友30頭咋,正宗係英年早逝……😞
刪除咁後生就去?因乜事走?
刪除猝死應該都係心臟問題。😔
刪除indie & latte一個cool一個百厭,應該擦出唔少火花,你要努力呀~
回覆刪除eason隻the key可能派錯主打,感覺沉悶又沉重,真係冇乜意慾細聽,不過聽你介紹完再聽吓,sidetracks有新發現~~ 我對上一次鍾意佢既歌,原來已經係重口味~~
其實Indie一啲都唔cool,佢係外冷內熱,好想畀人愛護但又怕畀人傷害,相比之下Latte就完全係一隻不知世途險惡嘅小貓兒。🐈⬛😆
刪除我都覺得《The Key》一開始係派錯歌,如果當時派上台嘅係「斯德哥爾摩情人」或者係失憶蝴蝶,個noise一定會比「主旋律」同「任我行」大好多。🤔
刪除agree
刪除斯德哥爾摩情人👍🏻
兩隻都係女咁咪唔使閹囉??😯
回覆刪除最後睇到你寫比肥叔叔封信😢
絕育係為未來嘅健康著想,既然養得佢哋,咁body check同埋睇醫生嘅錢就預咗唔慳得㗎喇~尤其係Indie呢類貓貓。🐈
刪除100分貓奴非你莫屬!!😝
刪除✌🏻✌🏻✌🏻✌🏻✌🏻
刪除克勤唱國語仲差過佢師傅 alan唱國語個唱腔至少鬆過佢
回覆刪除但勤仔唱國語係一粒一粒字咁樣去 聽落好銀耳
第一張國語碟啲咬字的確係硬掘掘,只靠技巧搭夠;第二隻碟搵咗潘美辰幫手做監製,唱腔明顯有改善,係衰在冇首歌令人有記憶點,就算係第一主打「不懂溫柔」都係啲冇乜起伏嘅白開水情歌;之後嘅《情牢》算係佢唱功上嘅另一個巔峰,嗰陣咬字ok,唱功感情俱備,但可惜當時嘅台灣樂壇已經好多樣化,單憑悲情歌作主打,咁人哋不如去聽把聲比你更加零瑕疵嘅張信哲。🎧
刪除分析好全面 其實嚴格嚟講 Alan嗰代都冇邊個攻台成功
刪除Leslie紅嘅多數係電影 alan最紅係同阿b溫拿時期嗰陣
梅姐都係得幾首歌紅 紅嘅都係佢個名夠響 實質冇乜代表作
最紅嘅歌咪得首「半夢半醒之間」,梅姐就起碼有三、四首國語歌係hit嘅。👍🏻
刪除兩隻貓貓一定日日搞到你屋企好熱鬧,尼古拉斯基治個figure好似喎,how much?
回覆刪除個頭雕算幾似,不過身型唔得,尤其對八字腳。🤣
刪除我真係好佩服嗰啲養寵物嘅人,一定要有愛心、耐性、時間、金錢,否則好難捱。
回覆刪除我好享受同佢哋相處嘅每一刻。💗
刪除跳皮既喵喵,是可愛啊!🐱
回覆刪除😍😍😍😍😍
刪除眨下眼喬老爺都走咗一年
回覆刪除歲月無聲消逝……🚬
刪除估唔到 Mckenna Grace 人仔細細咁鬼好波
回覆刪除兒童色情呀!🙈
刪除睇住愛隊大好形勢畀獌狗搞到得1分,感覺好唏噓, 睇住主場比亞特蘭大炒三蛋,直頭覺得絕望!睇到你寫王子嗰段,再望返而家班前鋒嘅把握力更加覺得:果然係往事只能回味!
回覆刪除要知道傷心總是難免的~在每一個夢醒時分~🎶
刪除睇到最後兩個chapter有少少sad~~😟好彩有兩隻靚貓補番數~~~~😻
回覆刪除🥰🥰🥰🥰🥰
刪除情牢之後Hacken出嘅國語碟基本上擺明係from內地fans,好明顯完全冇理台灣班歌迷!~👀
回覆刪除咁隻《似曾相識》擺明係想打台灣市場嘅,仲特登搵埋黃韻玲做監製,但最後好明顯係慘敗收場啦!🤣
刪除又係老問題,打錯歌!應該第一波就打你要的未來!~
刪除打邊隻都差唔多,基本上諗住單靠流行曲去攻2010後嘅台灣市場都係死路一條。😃
刪除情牢嗰次係最大機會㗎la!~
刪除我覺得呢隻碟係佢出道以嚟唱得最有感情嘅一張,可惜毫無流行元素。💁🏻♂️
刪除夢碎了,之前個個話睇住阿記崩盤,點知自己崩咗先,我終於明白點解Klopp要走..
回覆刪除傷兵太多,前面把握力最高嗰個祖達又出唔到,夾硬畀班新仔去衝,都預咗要交學費。😅
刪除巴打養親啲貓都咁盞鬼,你肯幫佢哋出個page實大把人睇,不過知你性格實唔會😝
回覆刪除蝨嗰個問題最後搞成點?我曾經畀床蝨困擾,最後都差唔多要搞咗成年先搞得掂😩
睇151喊到傻,去到1/3已經忍唔住,劇本明顯轉折位多,但都做到前後呼應,可惜套嘢宣傳弱爆唔起🙄
肥婆嗰套同捉鬼敢死隊你形容得好好,就係雪糕加麻辣火鍋🍦🥘
12怪獸講到白,就係以最低成本求其整套嘢出嚟cap最多棺材本😂
用蒸氣機之後情況即刻有明顯改善,但間唔中仲會有一兩隻,要再努力啲。😅
刪除一定要徹底滅鳩佢族!💀
刪除🔥🔥🔥🔥🔥🔥
刪除費托應該係維迪一世嘅惡夢,但以世界頂級球星嘅標準去睇佢又好似真係唔算最top😴
回覆刪除年份 球隊 出場 (進球)
2001–2007 下體會 214 (82)
2007–2011 猁 102 (65)
2011–2015 軌 110 (20)
如果以美斯牙朗做標準,其實入球率唔算高😏
2007-2011 阿積士 110 (81)
2011-2014 猁 110 (69)
2014- 巴狗 146 (121)
睇入球數字牙蘇仲勁😍
講數據沙拿最勁,但阿蘇係我睇英超以嚟最強嘅利記前鋒,就算係全盛時期嘅神都不及佢。😳
刪除最後一季喺猁直頭係世一水平啦,仲搞到人渣士以為自己係頂級教頭💩
刪除渣哥教蘇超綽綽有餘嘅!🤣
刪除這兩年真的走了很多個重要的音樂人。
回覆刪除😇😇😇😇😇
刪除你屋企有兩隻貓一定好Q熱鬧同埋忙到不得了XXXXD
回覆刪除嚟緊要拜託姑姑幾日,我要一個人飛台北!XDXDXD~
刪除Latte真係得意到痴線~Indie好乖好聽話咁~
回覆刪除Indie係我見過最乖最抵錫嘅貓。😊
刪除睇得出你呢兩年個人即係睇開咗好多
回覆刪除對親人、朋友的確係,而家係爭公司,作為管理層,無論對高層同下屬都仲係太過拘泥於一啲無謂情義。😇
刪除令人懷念嘅生活雜誌,恭喜創刊號開售,內容依舊係咁豐富!
回覆刪除利記真係自己唔爭氣,唔知點解對親坦克硬係腳軟,吹嚟吹去都係7比0個場..
王子當年前面真係一個殺曬,佢同哨牙蘇冇成為前線拍檔確係可惜!
如果隊波係咁有鴻圖大志諗住簽個咁勁嘅partner畀王子,我諗王子可能都未必會走,但換轉另一個角度去睇,王子唔走,球會亦都唔會畀咁大筆錢簽阿蘇同卡佬。😆
刪除卡路爾又係慘,去完Liverpool後一沉不起, 明明踢紐記嗰陣時俾人吹到新舒利亞咁款.
刪除當年大帝一口氣簽咗佢同唐寧,但又成日唔畀佢哋一齊出,呢點真係令我拗曬頭……🙆🏻♂️
刪除Latte個款成隻暹羅貓咁,好正~😂
回覆刪除我阿媽都係咁講!😆
刪除好喜歡兩隻貓咪的互動影片,Indie真的很乖很有愛。
回覆刪除🥰🥰🥰🥰🥰
刪除完了,一切都完了。
回覆刪除未開始已結束……😇
刪除鬼太郎誕生 ゲゲゲの謎 從畫風到故事內容都很昭和,比想像中恐怖,最後有被咯咯朗與水木的友情感動到。
回覆刪除見到有唔少家長帶埋小朋友去睇,當中有好多都係睇到半路就要抱返啲仔仔女女出嚟。😅
刪除不是看你的網誌,真的不知現時還有什麼港產片可看...
回覆刪除會否現在拍港產片的成本低了,似是沒什麼大宣傳~~~
其實你十分重視親情!!!!!!
有幾套宣傳其實都幾多,只係途徑同以前唔同咗。🤔
刪除我當年都好like費托,之後知道咗利班軍醫呃鳩佢之後就原諒咗佢,
回覆刪除講真利物浦時期嘅費托真係型到癲,掂波機會唔洗多,一拎波就入硬咁制。
重點係對親曼聯都上身強姦維迪,國家隊唔洗講,乜都拎過哂,
比較美中不足係如果佢喺黃金時期拎歐聯一定上梗神枱,
雖然佢踢車仔係拎咗好多獎,但感覺上好似全部都唔多關佢事咁。
當年都好嬲
刪除Feel到佢喺車仔都踢得唔開心,不過叫做還咗心願捧過好多獎盃囉!🤔
刪除最記得佢過檔車仔之後第一次返嚟晏菲路心事重重,仲比Agger批咗一踭
刪除艾加一向夠雷夠薑,100%真利!😍
刪除其實聯賽已經玩完,以哥帥實力+鏝板凳深度,
回覆刪除全勝好基本,最多都係和一場,即係點都head住3分,
刷得失球嚟講,鏝仲癲,所以今季基本上99%係一個杯完季。
除非兵同鏝一齊入歐聯四強咪有5%機會,唔係的話咪週中歐霸輸埋end game,
坦白講,我覺得歐霸反cup蘭大仲易過聯賽反cup鏝,當然90%必雙失。
守住前四已任務完成,一定係一隻飛機盃到季尾!🤣
刪除同埋而家咪完全睇到費明奴同文尼嘅重要性,傻紐同擺返喺左邊嘅加普其實唔算好差,但始終冇嗰種一入禁區即食硬你嘅威力。🤨
刪除唔使講明奴同文尼,淨係一個力子埋門就已經好過曬佢哋
刪除力子一走隊波就一路衰,風水呢家嘢有時真係唔到你唔信!🤣
刪除一語道破😫 賣走佢真係對雙方都冇著數
刪除冇辦法,鬼佬唔信風水,你睇拜仁會買哈利簡尼呢隻終極黑腳就知道。🤣
刪除我也很想念昌哥,公司的冷面笑匠,也希望你保重,繼續幸福走下去。
回覆刪除Jane
15/4/2024
佢啲精警金句係好絕 ,到而家我啲friend都仲有講。😆
刪除想當年你突然宣佈同coco本生活雜誌要停刊我哋幾失落呀,話曬都係長期訂閱客戶嚟㗎嘛!然後冇耐coco仲要走埋,真係冇諗過隔咗幾年之後你會忽然復刊(諗起以前一般雜誌叫忽然一周😆)
回覆刪除事過境遷,好開心睇到你終於走出陰影,仲一次過養咗兩隻得意貓貓,你嘅樂評影評唔使多講一向都出色,我哋反為係畀最後兩個chapter感動到眼濕濕,喺殘酷冷漠嘅社會上,重情重義嘅人已幾乎絕種,你到今日仲保持到個初心係好唔容易💪👊
文中見到你提到Tanya嘅跟你借的幸福係我嘅愛歌嚟㗎,諗唔到作曲人 竟然咁後生就走咗(陳太字)🙏
呢篇blog純粹係心血來潮,下一期分分鐘要等到明年今日先出版,今年發生咗好多令人心酸嘅突發事,唯一令我感到欣慰嘅就係有幸得到兩隻活潑可愛嘅貓咪。😊
刪除越見得多心酸嘅事,先會令我哋更加識得珍惜眼前嘅嘢(陳太字)🤝
刪除🤝🏻🤝🏻🤝🏻🤝🏻🤝🏻
刪除Latte and Indie 好可愛呢~~~~~~
回覆刪除🥰🥰🥰🥰🥰
刪除兩隻最有型毛色既貓比你綁架晒, 而家享福太好喇.
回覆刪除你既工作同普通朝9晚5唔一樣, 好特別又好玩
只係撞啱我係一個好鍾意睇戲嘅人,所以先可以一路做落去,普通後生仔通常做半年至一年就會走。😆
刪除家居昆蟲真係唔易搞,細細粒好多地方躱起來,尤其是蝨對人對寵物都有害。
回覆刪除尤其係香港啲天氣咁潮濕,更加易惹埋啲蚊蟲返屋企。🥱
刪除唉 除咗失望 就係失望....
回覆刪除老實講,球隊今季嘅表現其實都唔值得攞冠軍。😑
刪除好彩我地幾隻開餐各自食返自己個兜,Suki食完會乖乖睇吓其他人有冇食剩先去執死雞,因為小黃曾經係浪浪,食野時其他埋去會攻擊架🤣
回覆刪除再講,以F$G近年嘅作風,通常傳得最行嗰啲,最終都未必會係接任人<--時間已證明🤣
老實說,自科拿走後,隊中幾乎沒有一個前鋒是靠得住的<--果段時間名叔都比到希望嘅,不過佢最後選擇做名叔⋯⋯🤷🏾♂️
講開費托,我當年都超鍾意,不過佢臨走之前果季都明顯走下坡了,好多時連單刀都入唔到,以前嘅佢當食生菜啦,5000萬磅算係送給利記嘅禮物了。
一個完全冇權嘅領隊,我唔知佢點樣先可以獲得巨大成功?講起名叔,唔知點解我對佢一直都冇好感,就算係全盛時期亦一樣吸引唔到我。🤔
刪除《任我行》我都好鍾意,當年15年非洲南部係渺無人煙嘅大荒漠自駕,當播到這首歌時,也看看身旁嘅港女陪我癲,感覺真的好正。
回覆刪除份歌詞其實填得好精彩,基本上冇乜重複。👍🏻
刪除看到你家兩隻貓好親切,小黑Latte真係恃竉生嬌,難得Indie姐咁忍耐就得佢。你放了工還要服侍兩隻貓貓,姑姑放了工要照顧家中親人,你們真係很有愛心。祝福生活愉快 !
回覆刪除謝謝。😉😉
刪除飛燕諾個光頭領隊將會接替高dad,blog主你點睇?
回覆刪除我從來冇見過一個冇權嘅領隊可以獲得成功,希望我睇錯。😅
刪除