CoCo＆Me 生活瑣事雜誌（2019年10月Halloween特別號）

Chapter 1：CoCo電眼寫真放送 🐱
Chapter 2：私伙潮物再分享 💀
Chapter 3：我的正氣住客 😌
Chapter 4：懲罰黃店大行動 🤪
Chapter 5：今期好書推介 - 貓奴在家千日好 🐾
Chapter 6：第四期焦點音樂猛人 - Bilnd Melon 🍈
Chapter 7：本月好歌放送 🎶
Chapter 8：各地唱片大晒冷 💿
Chapter 9：港樂懷舊靚聲點唱機 - 雷安娜 📻
Chapter 10：我最喜愛的張耀揚電影角色 🎬
Chapter 11：10月觀影小記 🎥
Chapter 12：容易受傷的男人 - Jamie Redknapp ⚽
Chapter 13：世上最美的風景 🇭🇰
Chapter 14：緣起緣滅，緣聚緣散 🚬
Chapter 15：恨從何來？怨從何起？🎭
Chapter 16：龜仙伯伯壽辰慶典 🐢
Chapter 17：J圖贈囚友，清熱毒，解煩憂 😘
Chapter 18：北卡州惹火尤物 - Lacy Lennon 🤤

吓～乜嘢話？新一期嘅生活雜誌竟然咁快就出版？人嚟！快啲搵人搣我兩嘢睇下我而家究竟係咪喺度發緊白日夢～喵～

哼～搣你咪搣你囉！你睇死我唔敢呀！哼哼哼～問你怕未？

Chapter 1：CoCo電眼寫真放送 🐱

各位觀眾～天下第一貓美男CoCo哥新一期九宮格型仔寫真終於出爐！呢張殺死人冇命賠嘅絕版珍藏數量有限，價值連城，因住手快有手慢冇呀喂～

Chapter 2：私伙潮物再分享 💀

再一次多謝好姊妹Candy喺上海帶嚟嘅手信，呢件骷髏頭Tee型仔得嚟又唔會太浮誇，用嚟做返工衫就最適合！

每次光臨位於大阪美國村嘅American Long River 55都必定會血洗荷包，因為呢間舖頭入面所賣嘅嘢實在太啱我style喇！

計我話每個男人都應該擁有一件屬於自己嘅M65 Jacket，你哋話係咪？

至於呢件Rock十足嘅外套就係喺京都寺町三條商店街一間名叫Blue嘅Fashion Store度買嘅，做咗折扣優惠之後唔使¥2000就有交易！

我宣佈由呢一分鐘開始正式成為Dragon Beard嘅忠實信徒，直到永遠，阿門。

呢個日版Dickies斜揹袋嘅布料好堅韌，容量又夠大，真係非常實用。

像真度極高嘅蝦仔鎖匙扣，見親佢都有種衝動想一啖咬落去～

經過一輪尋尋覓覓、攀山涉水，我就總算幫公司隻水杯搵到個合適嘅頭盔……

開工解壓三寶，大家有冇留意到上面嗰個靚靚園長首領眼鏡盒呢？係我喺大阪梅田蠟筆小新官方商店度買㗎！

放心啦小柴～等你休養好個身子，我就會安排你同肥貓輪流On Duty！絕對唔會輕易離棄你嘅～

Chapter 3：我的正氣住客 😌

搞到中共門口一地玻璃碎嘅South Park搗蛋五人組、改善社會風氣，瘋魔萬千少女，提高青年人內涵，刺激動漫市場嘅撒亞超人正義俠、良心漫畫家井上雄彥嘅大仔流川同細仔花道、日本私了界天王日日野晴矢，仲有幾個不便透露姓名嘅前線抗爭者，感謝你哋喺呢幾個月以嚟對香港嘅付出，為表謝意，本人決定推出一連串減租計劃以協助各低收入住客。請注意！此計劃只適用於一眾默默耕耘、努力工作嘅真．香港人。

閣下貌美如花，夜闌人靜，獨自歸家，容乜易畀休班色狼辣手摧花，扯你條底橫，抆你個Bra～咁多位勇敢嘅革命女義士，歡迎隨時嚟小弟嘅寒舍暫住，費用全免，另加送勇武巴打24小時貼身保護服務。

失蹤超過兩個月，憤怒鳥宿舍嘅五星級VIP客戶，Joker Arthur嘅啟蒙，人稱的士判官嘅Travis Bickle至今仍然下落不明，Travis自幼無父無母，喺六月份更曾經發表過一則「不自殺聲明」，故此「被消失」嘅可能性係相當高。喺呢度，我呼籲所有讀者切勿隨便相信外界一堆疑幻疑真嘅新聞報導，並衷心希望Travis本人可以盡快聯絡本舍尋人部報平安。

Chapter 4：懲罰黃店大行動 🤪

以下資訊純屬個人意見，僅供參考，真真假假就有待各巴絲自己親身去感受一下！

舖頭名：Explorer Fusion Restaurant

地址：沙田石門安群街3號京瑞廣場第一期地下G10號舖

電話：26656781

Facebook專頁：請按此進入

營業時間：星期一至日：11:00 - 03:00

黃色指數：💛💛💛💛💛 (五個心心為滿分)

未行入門口就見到呢塊石門連儂牆，政治立場相當明顯。

一坐低就聽到一首接一首嘅反佔中歌曲，裡面嘅員工全部清一色著晒黑衫戴晒黑口罩，喺言談間又每每流露出對黑警同港共政權嘅不滿，直頭係黃到發光！

呢碗嘢有名堂㗎～叫做Explorer豊盛丼，加埋前菜、蒸蛋同埋個麵豉湯，盛惠$98，另收加一服務費。

呢間餐廳仲有壽司、西式扒餐、Pasta同大量酒類飲品供食客選擇，而且環境又唔錯，係一個把酒談心嘅好地方。最後，要十分感謝一位好熱心嘅年輕店員用九秒九嘅速度飛奔出嚟畀返把遮我呢隻大頭蝦，真係辛苦晒！

喺京瑞廣場一期呢邊嘅黃店尚有上車車仔麵、入麵、入素同埋專賣漢堡嘅Supine，有機會一定會將佢哋一一試匀！

舖頭名：九份茶舍

地址：沙田石門安群街1號京瑞廣場二期1樓145號舖

電話：59392260

Facebook專頁：請按此進入

營業時間：星期一至日：11:30 - 20:30

黃色指數：💛💛💛💛

食完碗丼口乾乾，忽然好想飲返杯冰凍嘅烏龍解解渴消消滯～於是，我就行到嚟呢間位於石門京瑞廣場二期1樓嘅九份茶舍。

杯茶明明$21，但係個店員就無啦啦找返$5畀我，跟著我向右一望，就望到一張咁嘅公告……

嗯～令人懷念嘅台灣風味……飲完杯茶真係好想立即買張機票飛過去！

舖頭名：基隆茶餐廳

地址：太子界限街24號

電話：23968971

Facebook專頁：請按此進入

營業時間：星期一至日：07:00 - 23:00

黃色指數：💛💛💛💛💛

基隆茶餐廳嘅老闆娘一向都好有善心，每逢初一十五等日子佢都會免費派發素菜飯盒畀持有長者卡嘅老人家，又經常會準備一啲營養餐盒送到附近嘅託兒服務社區中心。曾當選「傑出社區愛心商戶」，更被網民同街坊譽為良心食肆，由雨傘運動到反送中，縱然遇到業主加租及生意額下跌等經營問題，但老闆娘就依然繼續堅守住自己嘅立場去支持一班年輕人，無怨無悔，風雨不改。

講起上嚟，都好耐冇食過茶記嘅碟頭飯，事關喺沙田市中心入面絕大部分都係集團式連鎖店，所以平日嘅早餐／午餐／晚餐時間我多數都會幫襯大快活，間中就會食下Mos Burger。

無論有冇受過基隆老闆娘嘅一飯之恩，若果經過太子呢頭都麻煩入去幫下手塞爆佢間舖，難得香港有一間咁有愛心嘅茶記，我哋千其咪畀佢執笠呀！

順帶一提，喺基隆隔離就有一間同樣係黃到核爆嘅Fusion餐廳，名叫芳華絕代，不過佢哋個場長期都好Full，想食就要早啲訂位喇～

舖頭名：丸茶手作

地址：太子西洋菜街258-260號長寧大廈地下C及D號舖

電話：26283937

Facebook專頁：請按此進入

營業時間：星期一至日：12:30 - 22:30

黃色指數：💛💛💛

有九份茶舍，有丸茶手作，又有賞茶同一芳，我真係唔明點解仲會有咁多人排住隊仆街咁仆去課金畀強國出產嘅喜茶？唉～香港人，爭氣少少啦好唔好！

喺10月16號當日有幾多人買咗呢份蘋果？請舉手！

舖頭名：渣哥一九九六

地址：東涌港鐵東涌站TUC15號舖

電話：不詳，歡迎提供

Facebook專頁：請按此進入

營業時間：星期一至日：08:00 - 22:00

黃色指數：💛💛💛💛

講真，若然唔係要入去石壁探監，我諗我都冇乜幾何會路經東涌，咁既然一場嚟到，就當然要去黨鐵站附近嘅渣哥度整返兜魚蛋嘆下啦！

舖頭名：All Day

地址：馬鞍山鞍源街11號福安花園商場地下50號鋪

電話：63780120

Facebook專頁：請按此進入

營業時間：星期一至日：13:00 - 21:00

黃色指數：💛💛💛💛

嗱～乜Q嘢都唔好講住！先同我睇晒條片！OK？


點呀～睇完條片係咪好感動呢？感動嘅話就馬上飛入嚟馬鞍山懲罰下All Day個老闆娘啦！

養顏滋潤嘅杏汁銀杏白肺湯、每日限量120粒嘅元貝燒賣，粒粒都係新鮮手做。

網上好多人激讚嘅阿媽水餃，下次再試！

紅伶老闆／老闆娘、好耐冇去過嘅牛屋餐廳、位於烏溪沙嘅屋子咖啡、位於大埔嘅象月泰國菜、位於荃灣嘅素食媽咪、位於太子嘅東京街同埋神經餵飼，總有一日我實會吼準時間嗌晒成班兄弟姊妹去踩你哋場～睇住嚟！

譚仔係黃店？人唔笑狗都吠啦！只能送你一句戇撚鳩鳩食賓周！返屋企早唞啦！你班100毛小丑～

Chapter 5：今期好書推介 - 貓奴在家千日好 🐾

書本名稱：貓奴在家千日好
類別：圖文繪本
ISBN：978-988-8605-23-1
作者：葉貓
價錢：$88
頁數：152頁
出版日期：2019年7月

喺躁鬱最嚴重嗰段時期，香港插畫家葉貓小姐所畫嘅喵喵漫畫真係陪我渡過唔少難關……

葉貓小姐同好多香港人一樣都好關心反送中運動嘅發展進度，仲不時會利用佢筆下嘅柑柑、藍藍插圖去記載自己當時嘅心情，久而久之，好快我就成為咗呢兩隻貓咪嘅忠實fans。

冇獎問答時間，以上咁多隻貓貓邊一隻先至係你／妳嘅心水選擇？個人嘅答案係：Why Not Both？

最新一期嘅柑柑、藍藍WhatsApp Stickers (打氣篇)，你哋Download咗未呀？

呢本【貓奴在家千日好】喺各大書局同7仔便利店均有待售，要買就襯早喇！

Chapter 6：第四期焦點音樂猛人 - Bilnd Melon 🍈

1985年，年滿18歲的Shannon Hoon寫下他人生的第一首作品Change，還離開了自己的出生地印第安納州搬到洛杉磯。1989年，Shannon Hoon在一個派對上認識到Guitar手Rogers Stevens和Bass手Brad Smith，三位音樂人一見如故，惺惺相惜，其後，Rhythm Guitar手Christopher Thorn與鼓手Glen Graham相繼加入他們的圈子，到1990年，一支前途無限的獨立搖滾樂團Blind Melon便正式誕生。在樂隊成立後不久，Shannon就因為姐姐Anna的關係而跟Guns N'Roses的主音Axl Rose結為好友。同年1月，Axl更邀請Shannon進入他的工作室參與雙專輯《Use Your Illusion I & II》的錄音工作，當中就包括歌曲The Garden、Don't Cry的伴唱部分，以及在Don't Cry的MV中客串露面。從此，Shannon Hoon這個名字便開始廣為搖滾樂迷所熟悉。

1992年9月22日，Blind Melon推出了樂隊的首張同名大碟，於1992年至1993年期間，他們為Ozzy Osbourne、Guns N'Roses和Soundgarden等知名歌手／樂隊的演出提供Opening Performance，藉此作巡迴宣傳。1993年夏天，碟內的第二波主打No Rain的MV被單獨發行，在這支MV裡面，由美國小演員Heather DeLoach所扮演的年輕眼鏡女孩身穿著蜜蜂服裝在台上大跳踢躂舞，卻慘遭一群無情的觀眾猛烈恥笑，令這位小妹妹傷心地哭著離開舞台，然後當歌曲前奏響起，她就一個人在鬧市中徘徊，想了一會，便停下腳步為街上的途人表演舞蹈。最終，那些被感動的途人就化身各種形狀的蜜蜂人跟隨著她在綠色的草原中歡快地跳舞。蜜蜂女孩的故事與Blind Melon於蔚藍天空下的演唱鏡頭交織在一起，構成一幅美麗動人的圖畫，MV播出後受到外界一致好評，惹來一時佳話，讓Blind Melon這張同名專輯火速衝上美國Billboard排行榜第三位。



首張專輯獲得空前成功，Blind Melon正準備要成為美國獨立搖滾樂的一顆新彗星，可是，Shannon Hoon的毒癮問題就反覆不停地纏繞著他們。Shannon為了尋找靈感，長期濫用大麻、迷幻藥、海洛英和可卡因，而在成名後，身為主音的他更是變得無法無天。1993年10月於奧蘭多的一場演唱會上，Shannon就即席在台上抽大麻以表達對好友Lenny Kravitz的支持，之後在溫哥華又試過因不雅裸露和向著一位現場歌迷小便而被捕。1994年，Shannon穿著女友Lisa的白色連衣裙登上Woodstock'94音樂節，完Show後，受到迷幻藥影響之下，他就突然將鼓扔向觀眾席那邊，同一年佢又在Billboard頒獎禮中襲擊一名保安人員。


Shannon似乎很樂意沉溺在這種放縱、混亂的生活中，一直到他的女兒Nico Blue出生後情況才漸漸有點改善。在發表Blind Melon第二張大碟《Soup》時，Shannon就實施了一連串的戒毒計劃，還特意聘請一名私人助理全天候跟在他身邊。相比起他們的首張專輯，《Soup》的銷售數字雖然遠遠不及前者，但就得到不少樂評人的認同，這張碟所走的曲風路線較為偏向暗黑系，有講述冷血媽媽Susan Smith如何謀殺兩名親生兒子的Car Seat (God's Presents)，有探討自殺風潮的St. Andrew's Fall和記錄Shannon自身排毒經歷的2 X 4，還有跟戀屍癖連環殺手Ed Gein有關的Skinned，另外值得一提的是隱藏於Track 2 Galaxie前面的Hello, Goodbye，此歌作為整張碟的序曲果真是起了一種畫龍點睛的作用。

本以為Blind Melon和Shannon的音樂路途會慢慢步向光明，殊不知在1995年10月20日，當他們完成於侯斯頓的一場演出後，對自己表現甚為不滿的Shannon又再度回到毒海的懷抱裡，還開除了才任職兩個月多的戒毒顧問。翌日，即1995年10月21日清晨，正前往新奧爾良Tipitina's酒吧進行表演的Blind Melon就遇上一件令他們畢生難忘的悲劇。在乘車途中，樂隊的Audio Engineer Lyle Eaves想喚醒Shannon做聲音檢查，卻發現Shannon坐在原位久久昏迷不醒，及後一輛救護車趕到，就證實Shannon已告死亡，享年28歲，死因為過度吸食可卡因。他的遺體被安放於印第安納州Dayton Cemetery内，而在墓碑上的墓誌銘就刻著其出道作品Change的幾句歌詞。



猝然失去隊中的靈魂人物，剩下來的四位Blind Melon成員就花了將近十一年的時間改革重組，重組期間，Capitol Records就發行了一張以Shannon Hoon女兒Nico為名的雜錦合輯來向他致敬，專輯內收錄了Blind Melon多首Unreleased Tracks和一些翻唱作品。然而，真正屬於他們四人的Studio Album《For My Friends》就要等到2008年4月才推出市面。


第四期焦點音樂猛人 (完)，所有Blind Melon的忠實歌迷請密切留意他們久違多時的第四張錄音室大碟暫定將於2020年破繭出爐。

Chapter 7：本月好歌放送 🎶



要我講幾多次都係嗰句！喺香港樂壇真正識得Rap嘅組合從來就只有LMF，其餘都係WTF！闊別樂迷五年，新歌二零一九繼續火力全開為公義發聲，盡情屌爆權貴！



迷路在雲端～煙火不會太完美～Wo～蕭煌奇同A-Lin把聲簡直係夾到無與倫比，令人聽出耳油！



三年又三年，足足等咗六年，Céline Dion嘅全新英語大碟《Courage》將會喺下個月15號同大家見面！聽到呢個消息……很興奮～你知道嗎？我好興奮呀～我好興奮呀～Céline！Céline！Céline！Céline！Céline！Céline！Céline！

Chapter 8：各地唱片大晒冷 💿

山崎葉子是【櫻桃小丸子】作者櫻桃子本人很喜愛的一位日本民謠歌手，有樂迷曾將她和中島美雪、森田童子並稱為「昭和黑暗之歌三人眾」。他們說，三者之間，中島代表著的是一份“情念”；森田代表著的一份“斷念”；而山崎則代表著一份“怨念”。在此想推介山崎的幾首好歌給各位日文歌愛好者，分別是望鄉、織江の唄、一人靜、一人の旅、白い花、ヘルプミー、ヨコハマ、呪い，特別是ヘルプミー，這首歌所散發出來的那份惆悵與哀愁，硬生生撕開我心底裡面的陳年傷疤。

這幾年到日本和台北旅遊，不時都會搜尋到一些在市面較難看到的稀有珍品，除了剛才所提到的山崎葉子外，於上個月的大阪之旅中，我就在京都一間隱世二手唱片店裡發現已故日本地下女王浅川マキ兩張極為珍貴的絕版唱片。

英國殿堂級組合Pink Floyd首張Studio Album《The Piper At The Gates Of Dawn》被視為是前樂隊成員Syd Barrett畢生最大成就，亦是迷幻搖滾樂史上其中一張不可多得的絕世天碟。它的碟名是取自著名作家Kenneth Grahame生平最後一本小說【The Wind In The Willows】的第七章標題，印度攝影師Vic Singh所拍攝的萬花筒狀唱片封面圖片，至今仍是為人津津樂道。2012年，此碟更入選了滾石雜誌五百大專輯排行榜的第347位。

太好啦！The Doors這張雙CD合輯真是一次過滿足我兩個願望！這兩張碟話說小弟經已找了很久，幾乎快要放棄了～嗚嗚～

你們能想像Marianne Faithfull年輕時是以民謠歌手出道嗎？那時候她的臉上時常掛著天真純潔的笑容，形象清麗脱俗，1964年，Mick Jagger就聯同Keith Richards為她寫了一首As Tears Go By，讓當時只有17歲的Marianne Faithfull初嘗一夕成名的滋味。擁有天使般的臉孔，歌聲又甜美動人，又怎會不成為大眾的寵兒？在往後的日子，Marianne陸續推出了數首單曲例如是This Little Bird、Summer Nights、Come And Stay With Me，全部都大受歡迎，瞬間把她捧上了天，但隨之而來的墮落亦一樣快速……

凡是對Nico有興趣的樂迷都不能錯過這張精選輯！它不但集合Nico頭四張專輯以及The Velvet Underground & Nico時期的多首歌曲，還收錄了她在1965年所發表過的兩支單曲I'm Not Sayin和The Last Mile。

縱橫爵士樂壇超過半個世紀之久，曾創下以爵士樂手身份入圍奧斯卡金像獎最佳男主角的記錄，外型高大俊朗的Saxophone手Dexter Gordon，他的真實生平似乎比電影裡的劇情還要精彩。

初出茅廬的美聲歌后鄭怡、第三屆金韻獎得主王新蓮、還未成為MV教母的馬宜中，攜手炮製出多首百聽不厭的民歌經典，一曲高亢暸亮的月琴猶如天籟飄來，讓人一聽難忘。

陳百強的創世記GALAXY Back To Black 25 CD套裝，現時市價大概是$2098，某日在信和10樓‘經濟’特區看到一Set全新未拆只售$1480，便二話不說掏荷包把它買回家，所謂地上執到寶，問天問地攞唔到！

不求與人相比，只求超越自己！睽違10年再出發，十首經典．重生再唱，關淑怡自身翻唱專輯《Psychoacoustics》，餘音裊裊，不絕如縷，勢必成為2019發燒珍藏，支持實體唱片，由你我做起。

Chapter 9：港樂懷舊靚聲點唱機 - 雷安娜 📻

有日在Youtube無意中看到雷安娜姐姐的演唱片段，赫然發現這位於80年代初出道的老牌歌手歌聲原來是如此優美動聽，她並沒有普遍老一輩唱家班那種過份賣弄、油膩如豬的職業通病，她的聲線清脆響亮，唱法自然樸實不做作，字正腔圓，氣量充足，又不至讓人感到過時，實屬難得。

好～廢話少說！現在不如就和大家分享一下我最喜愛的二十首雷安娜歌曲吧！

我最喜愛的雷安娜歌曲Top 20

1.那一陣風 (收錄於雷安娜同名專輯) 試聽

2.痴情劫 (收錄於《痴情劫》專輯) 試聽

3.無奈我心亂如麻 (收錄於雷安娜同名專輯) 試聽

4.彩雲曲 (收錄於《彩雲曲》專輯) 試聽

5.別了憂鬱Johnny Blue (收錄於雷安娜同名專輯) 試聽

6.舊夢不須記 (收錄於雷安娜同名專輯) 試聽

7.人在旅途灑淚時 (關正傑合唱，ATV電視劇【人在江湖】插曲) 試聽

8.人在秋風裡 (收錄於雷安娜同名專輯) 試聽

9. 問為何 (收錄於《溫馨集》專輯) 試聽

10.停不了的愛 (彭健新合唱，電影【停不了的愛】主題曲) 試聽

11.濁世暖流清 (收錄於《溫馨集》專輯) 試聽

12.遠在天外 (電影版【千年女王】主題曲，收錄於《痴情劫》專輯) 試聽

13.暫別 (譚詠麟合唱，收錄於《彩雲曲》專輯) 試聽

14.含羞草 (收錄於雷安娜同名專輯) 試聽

15.美麗的童話 (收錄於《彩雲曲》專輯) 試聽

16.孤影暗自憐 (收錄於雷安娜同名專輯) 試聽

17.山石盟 (收錄於雷安娜同名專輯) 試聽

18.做個木頭人 (收錄於《痴情劫》專輯) 試聽

19.真的喜歡你 (收錄於雷安娜同名專輯) 試聽

20.痴心再會期 (收錄於雷安娜同名專輯) 試聽

Chapter 10：我最喜愛的張耀揚電影角色 🎬

要數本人最喜愛的十位華語男演員，張耀揚定必榜上有名！

從影以來，張耀揚並不是沒有當過主角，亦曾經做過不少正派角色，但很諷刺的是，他給普羅觀眾留下最深印象的往往都是那些邪氣十足的終極大反派，每當提到他的名字，別人就只會牢牢記著那一幕幕的血腥場面……

本為模特兒的張耀揚於1986年被林嶺東發掘出道，從而進入演藝圈，之後參演了風雲電影三部曲【龍虎風雲】、【監獄風雲】、【學校風雲】的一系列奸角，恃勢凌人的惡漢形象深入民心。來到90年代初，張耀揚就嘗試轉型並出演了幾個正派角色，像是【衝擊天子門生】裡面正氣凜然的反黑組督察鐵面虎、【白玫瑰】裡面跟影后張曼玉談談情說說愛的情深浪子Roy以及【新邊緣人】裡面對兄弟有情有義的江湖大佬雄泰。此外，一臉正經的耀揚哥又兩度走入周星馳的電影世界，可是，這幾年間他最受人注目的一個角色就還是於1993年在【人皮燈籠】中那個霸氣迫人的大壞蛋蘇雄。這種現象完全印證了【白玫瑰】一句越聽越心酸的精警對白：「你何時見過一部戲是張曼玉配張耀揚的？」有時候，一個演員被大眾定型便很難回得了頭，張耀揚就是當中的表表者。

去到90年代中期，改編自同名漫畫的古惑仔電影系列深深影響著當時的年輕一輩，而張耀揚於第三、四輯所扮演的東星社烏鴉和奔雷虎，前者心狠手辣、無惡不作，後者陰險狡猾、深謀遠慮，雖然在導演和編劇極為無厘頭的舖排下，這兩個角色在電影尾段就突然智商變零，但就仍被一眾影迷稱為是反派中的教科書，就連原著作者也特意畫了一本外傳漫畫【火武耀揚】來表示對他的喜愛。只是，如此淋漓盡致的精湛演出卻始終未有為張耀揚帶來任何的獎項肯定。

1998年，由陳嘉上、林超賢共同執導的【野獸刑警】在第18屆香港電影金像獎橫掃最佳電影、最佳導演、最佳編劇、最佳男主角、最佳男配角等多個大獎，張耀揚於此片中飾演行事魯莽的火爆大哥高佬輝，本來表現不俗，但其鋒芒就被如有神助的爛鬼東 (黃秋生飾演) 和一鳴驚人的㩒釘華 (譚耀文飾演) 硬生生壓下去，果真是時也命也。

踏入千禧年代，張耀揚的演藝生涯才漸漸露出一線曙光，2000年，他憑藉【槍火】神鎗手Mike一角奪得第5屆香港電影金紫荊獎最佳男配角；2001年，他在【江湖告急】中飾演一個默默守在任因久 (梁家輝飾演) 背後的同志保鑣，則讓他得到第20屆香港電影金像獎最佳男配角提名；2004年，於【無間道II】飾演潛伏在倪永孝身邊多年的臥底羅雞，全片一言不發，只是單靠身體語言和眼神演戲，表現技驚四座，成功獲得第4屆華語電影傳媒大獎最佳男配角提名。可惜到2008年，張耀揚卻因為長年參演動作片導致脊椎過度操勞，引發椎間盤突出和腰部勞損等症狀，期間更不忍疼痛想過輕生，此後他便開始淡出幕前，慢慢遠離觀眾視線。

不知道大家又看過張耀揚的哪些作品呢？在他演過的芸芸角色之中你又最喜歡哪一個？慢慢想～不用急～先等耀揚哥演唱完他的首本名曲再說！不然的話他生氣起來可能又要「反檯」了！


我最喜愛的十個張耀揚電影角色

第一位 - Mike (來自電影【鎗火】，由杜琪峯執導)
第二位 - 雄泰 (來自電影【新邊緣人】，由劉偉強執導)
第三位 - 烏鴉 (來自電影【古惑仔3之隻手遮天】，由劉偉強執導)
第四位 - 羅繼賢 (來自電影【無間道II】，由劉偉強、麥兆輝執導)
第五位 - 何君愉 (來自電影【江湖告急】，由林超賢執導)
第六位 - 高佬輝 (來自電影【野獸刑警】，由陳嘉上、林超賢執導)
第七位 - 阿貓 (來自電影【放．逐】，由杜琪峯執導)
第八位 - Roy (來自電影【白玫瑰】，由趙良駿執導)
第九位 - 雷耀揚 (來自電影【97古惑仔：戰無不勝】，由劉偉強執導)
第十位 - 朗青 (來自電影【旺角風雲】，由葉偉信執導)

Chapter 11：10月觀影小記 🎥

片名：小丑 (Joker)

導演：Todd Phillips
主演：Joaquin Phoenix、Robert De Niro、Frances Conroy
片長：122分鐘
級別：IIB
語言：英語
上映日期：2019-10-03
個人評分：★★★★★

片名：鬼片：驚嚇現場 (Warning: Do Not Play)
導演：金鎮元
主演：徐叡知、陳善圭、金寶羅
片長：86分鐘
級別：IIB
語言：韓語
上映日期：2019-10-03
個人評分：咪撚嘥時間！

片名：惡搞便當反「激」戰 (Bento Harassment)
導演：塚本連平
主演：篠原涼子、芳根京子、佐藤隆太
片長：106分鐘
級別：I
語言：日語
上映日期：2019-10-10
個人評分：★★★☆ (☆為半粒星)

片名：雙子任務：疊影危機 (Gemini Man)
導演：李安
主演：Will Smith、Mary Elizabeth Winstead
片長：117分鐘
級別：IIB
語言：英語
上映日期：2019-10-10
個人評分：★☆ (☆為半粒星)

片名：鯊海47米：狂鯊出籠 (47 Meters Down: Uncaged)
導演：Johannes Roberts
主演：Sophie Nélisse、Corinne Foxx、Sistine Stallone
片長：90分鐘
級別：IIB
語言：英語
上映日期：2019-10-10
個人評分：☆ (☆為半粒星)

片名：黑魔后2 (Maleficent: Mistress of Evil)
導演：Joachim Rønning
主演：Angelina Jolie、Elle Fanning、Michelle Pfeiffer
片長：119分鐘
級別：IIA
語言：英語
上映日期：2019-10-17
個人評分：★★

片名：我和父親的Final Fantasy XIV (Final Fantasy XIV Dad of Light)
導演：野口照夫、山本清史
主演：吉田鋼太郎、坂口健太郎
片長：115分鐘
級別：IIA
語言：日語
上映日期：2019-10-17
個人評分：★★★

片名：天堂山莊 (Paradise Hills)
導演：Alice Waddington
主演：Emma Roberts、Danielle McDonald、Awkwafina
片長：95分鐘
級別：IIA
語言：英語
上映日期：2019-10-24
個人評分：★★

片名：喪屍樂園：連環屍殺 (Zombieland: Double Tap)
導演：Ruben Fleischer
主演：Woody Harrelson、Jesse Eisenberg、Emma Stone、Abigail Breslin
片長：93分鐘
級別：IIA
語言：英語
上映日期：2019-10-24
個人評分：★★★

片名：犯罪現場 (A Witness out of the Blue)
導演：馮志強
主演：古天樂、張繼聰、宣萱、顏卓靈
片長：104分鐘
級別：IIB
語言：粵語
上映日期：2019-10-24
個人評分：★★☆ (☆為半粒星)

預祝Joaquin Phoenix能夠一舉掃晒多個電影頒獎禮嘅影帝獎座返屋企！(冇提名我切！)

今期猛片有官方親自認可嘅Terminator第三部曲未來戰士：黑暗命運 (Terminator: Dark Fate) ，Carl、Sarah Connor、John Connor相隔28年再次聚首一堂！

Chapter 12：容易受傷的男人 - Jamie Redknapp ⚽

曾幾何時，利物浦被認為是全英超踢法最悅目的一支球隊，還記得在90年代中期，當時利物浦雖然正處於一個低潮期，經常都與大型賽事的錦標絕緣，但其水銀瀉地、絲絲入扣的Pass & Move進攻打法卻深深吸引著眾人的眼球，回想當年，我就是因為麥馬拿文、科拿和列納那班利記「Spice Boys」而愛上利物浦的。

1991年以35萬鎊從般尼茅夫轉會到利物浦的占美列納是一位甚有星味的靚仔球員，他是前熱刺領隊哈利列納的兒子，是車路士球星林柏特的表哥。在利記時期，他的踢法冷靜而理性，並且具有超卓的領導才能，也曾擔任過球隊的隊長。早在90年代中期，列納於利物浦隊中已可獨當一面，他擁有廣闊的眼界和強勁的遠射腳頭，在傳球和處理自由球方面的能力亦絕不下於碧咸，可以說是白賴仁笠臣之後英格蘭最全面的中場球員。可是，長期的傷患問題就不斷困擾著他。

在過去多年來，列納一直默默耕耘，表現亦尚算平穩，特別是1998-99球季，他就一共為球隊貢獻了10個入球，也給隊友創造了很多機會，踢出個人職業生涯的頂峰，成功帶領利物浦重回英超聯賽的前三名。不過，這位「容易受傷的男人」都可算是英格蘭其中一位極欠運的苦命球星。他曾分別因傷而失意於96年歐洲國家盃（只踢了一場賽事）和落選98年世界盃，於2000-01球季，嚴重的膝傷使他無法參與當季的任何一場賽事，為了可以早日重回綠茵場上，他就在名醫生Dr. J. Richard Steadman的陪同下接受了膝蓋手術，並趕及於2001-02球季的季前熱身賽中復出。可惜，他的歸來並沒有持續多久，2001年10月27日，他協助球隊在山谷球場以2-0戰勝查爾頓並取得一個入球，然後三日後，在對戰多蒙特的歐聯賽事入面，他又再度因傷退陣，與此同時，這位「掛名隊長」在晏菲路的日子亦開始進入倒數階段。

離開利物浦之後，列納曾效力過熱刺和修咸頓，但就同樣因為傷病而限制了他的表現。

列納於2005年正式宣佈掛靴，在退役後他曾做過足球教練和模特兒等工作，還創辦了一本名叫《Icon》的雜誌，而現時他的職業就是在Sky Sports擔任足球評述員，也是英國名嘴占士高登 (James Corden) 在Sky1所主持的受歡迎運動遊戲節目【A League of Their Own】的固定班底成員。

Chapter 13：世上最美的風景 🇭🇰

望住街上面各式各樣唔同類型嘅文宣，實在唔可以唔佩服香港人嗰種與生俱來嘅創意同心思……

邏輯簡單易明，圖片有趣精美，所有前因後果都一目了然。

呢兩張Poster真係好有Woodstock音樂節嘅味道，It's So Cool～

做得好有心機嘅抗爭日誌，資料詳盡又夠寫實，呢啲先至稱得上係真正嘅國民教育！

嘩～冚唪唥都係大師級作品，證明香港呢個地方的確係埋沒咗好多出色嘅人才……

港共嘅罪孽又點止七宗咁少呀？講到2047都未講完啦！

知唔知點解去到今時今日都仲會有咁多大陸人寧願博埋條老命都要偷渡去其他地方？因為大部分中國人都係口講愛國身體卻很誠實，更重要嘅係，生喺祖國嘅人民往往就比我哋更加清楚中共政權嘅可怕……

親，連毛主席嘅說話你哋都敢唔聽，係咪想抄家滅族？

大地在我腳下～國計掌於手中～哪個再敢多說話？夷平共國是誰？哪個統一稱霸？維護香港我的家～

摧毀咗一座民主女神，仲有千千萬萬個民主女神會企喺身！一班年輕人，喺呢段日子真係辛苦晒你哋～

Chapter 14：緣起緣滅，緣聚緣散 🚬

能夠容忍唔同政見，不撕裂，不割席，先係真．老友！到今日仍然留喺我身邊嘅每一位朋友，慶幸有你哋！無言感激！尤其係華Dee、柏盛、Jody、阿龍、Sam哥，仲有經常喺台中／台北遠道送祝福畀我嘅慧菁同文帥弟，肉麻嘢我唔識講，總之一切在心中啦！

一位相識多年嘅好朋友早排喺我封塵N年嘅WeChat度留咗一連串極侮辱嘅攻擊性說話，大概都係話我收咗人好多錢同埋記得提老闆準時出糧之類咁啦～鬧完我一大輪，隔咗一個禮拜又喺Whatsapp度留言，問我係咪莫薑先唔覆佢？哈～我想講，我當初之所以會開WeChat，純粹就只係為咗同一個飛咗去澳洲嘅長輩朋友繼續保持聯繫，後嚟買咗部新電話，我就索性連WeChat都唔裝，淨係返到屋企先間唔中會拎部舊電話Check下啲Message……喂～何仔～做人成熟少少啦！有乜嘢就兜口兜面同我講！唔好隔住部電話咁老套！更何況我喺好耐之前已經講過：道不同不相為謀，志不同不相為友，君子斷交，不出惡言，緣起緣滅皆強求不得。咁當然，若有人存心要找晦氣同搞事嘅話我就幾時都咁歡迎！

你有冇出過去？做乜唔企前線？唉～個遊戲唔係咁玩㗎！應該點樣點樣點樣……下刪廢話一大堆。我成日覺得最鍾意將呢啲嘢掛喺口唇邊嘅人，通常都係鳩噏鍵盤戰士又或者係出去跟隊尾打完卡跟住就返歸狂打飛機！然後當你問返佢哋點解唔企喺前線做支援，佢哋就會話：「吓～我？我有大有細梗係唔得啦！仔細老婆嫩呀大佬～一陣畀人拉咗點算？」哦～既然係咁……咁你就出少句聲當幫忙啦！每個人都有權自行選擇參唔參與呢場運動，但係人哋所揀嘅路就唔輪到你班冷氣軍師多多批評！

唔係反送中，我都唔知道自己身邊原來有咁多個暗藍朋友同埋偽民主勇士，睇住班Friends一個個自動同我割席，心裡面就點都會有少少難過同不捨，但每當諗起前線嗰班後生仔嘅付出同犧牲，我呢啲芝麻綠豆嘅小事又算得係啲乜嘢呀～

我可以好坦白咁同大家講，如果我由Day 1開始就變身做藍血人，咁我嘅生活就一定會比而家好幾十倍，亦唔會得失一班對我好好嘅親人同朋友。只不過，要我蒙住雙眼去過呢種自欺欺人嘅生活……Sorry～我做唔到，亦拒絕接受！

Chapter 15：恨從何來？怨從何起？🎭

嚟到呢一刻，我經已冇晒意慾再去回應嗰啲所謂收錢論，一句到尾，我家下畀十萬蚊你去前綫食催淚彈、布袋彈甚至係實彈，你去唔去？班𡃁仔𡃁妹可以日日打機、溝女、BBQ，閒時就買張機票Book間酒店爆房爆天光，為乜要揀一條咁難行嘅抗爭道路？有好多人話啲年輕人戇居，係呀～出親去都畀人打到頭破血流，有啲仲生死未卜，從李旺陽、劉曉波、陳光誠到趙連海、譚作人、艾未未……得罪中共會有乜嘢下場？個個有版你睇！明知九死一生都仲要衝，確實係幾撚戇鳩㗎！但班新一代就係憑住呢一份傻勁先有勇氣企到咁前，到大個咗開始有包袱，就會越嚟越識得計算。我明白，嚟自唔同年代嘅人自然就會有唔一樣嘅生活、經歷同思想，老一輩嗰代捱過唔少鹹苦，嗰陣科技仲未發達，言論自由呢樣嘢對於班老人家嚟講可能只係小事一件。去到我個年代，由於我好早就出嚟做嘢，所以有段時間我都覺得班90後、千禧後好高騖遠又唔捱得，講嘢冇大冇細份人又唔孝義，但後來接觸班後生多咗，我就漸漸感受到佢哋前面條路有幾難行……

我認為有啲嘢係積落嚟嘅，一隻手掌又邊會拍得響？當你睇住每日一車車運落嚟嗰150張建制鐵票，當你睇住焦土之母Carrie派晒成隊軍隊去保護一班擺明賣淫嘅跳舞大媽，成為國際大笑話。當你睇住班終日無事生產、呃飲呃食嘅腥港人攞盡社會福利仲要倒返轉頭講到我哋好似欠咗佢咁！當你睇住班幾十歲嘅鹹濕伯父連孫都有埋都繼續晚晚北上尋歡，跟住就整返一盅兩件落嚟拗綜援！何解呢班無賴又無恥嘅蛀米大蟲會有本事極速上樓？相反，一班努力工作嘅真．香港人就等成十年都未輪到公屋？仲有一大堆數之不盡嘅唔公平待遇……其實道理好簡單，國家對人民好，人民自然就會愛，經常強調「我們都是一家人」，咁我想問下……你老豆會唔會一日到黑掹槍指住你個頭？你老母會唔會因為你唔願意接濟班哎吔親戚而不停鬧你忘本？你阿婆會唔會用啲有毒嘅食材煮早午晚餐畀你食？你阿爺會唔會為咗唔想畀你知道外面個世界有幾大就搵條鐵鏈鎖住你對腳？你當人哋係自己人，有冇諗過人哋當你係乜鳩？普教中滅你廣東話，企圖用洗腦教育去沖淡固有嘅本土文化，毁你真普選，只准選貪贓枉法嘅保皇黨，全部政策逆民意，將香港人嘅血汗錢拱手奉送黑心國企，有害食物堆滿街，鳩吹話沙士係佢哋派八國聯軍落嚟平息，再特登開閘等人搶你啲資源……請問呢個世界上真係會有啲咁嘅屋企人咩？

警民關係難再生，以暴制暴誰之過？因乜解究喺近呢幾個月會突然掀起一股私了文化？咪就係你班黑警／白衫佬／藍色獅子狗教班勇武派㗎囉！仲記唔記得雨傘時期班年青一代係點對你班差佬？我親眼睇住㗎～幫你哋擔遮，拎水你哋飲，對住嗰堆愛港怪物又處處忍讓，下下畀人恰到上心口都唔還拖，但換嚟嘅係乜嘢？係一連串嘅濫捕同毒打！嚟到今次嘅反修例運動，最初啲學生只係貼下連儂牆嗰班藍色獅子狗就要買起人手腳，白衫佬隨機襲擊途人你哋就高調拉低調放！速龍冇Number，布袋彈射眼，實彈射心口，啲𡃁仔扒晒地沙晒冧都仲要踩多佢幾腳，721／831過後死咗咁多人，鑊鑊新鮮件件離奇，但你班禽獸高官居然就淨係關心堆死物，對班死難者就隻字不提。

香港人唔撐警察？當日大法官包致金個姪女Amina大巴大巴摑你個同僚，當時有邊個香港人唔係企喺你哋嗰邊？引用全宇宙最偉大嘅毛主席一句名言：世界上沒有無緣無故的愛，也沒有無緣無故的恨，所有事情皆有因有果，恨從何來？怨從何起？我講呢堆嘢唔係為咗要幫班示威者洗白，我只係想大家花少少時間去思考一下呢班人哋口中嘅「暴徒」今時今日呢種以死相搏嘅心態到底係點樣煉成。

Chapter 16：龜仙伯伯壽辰慶典 🐢

恭祝你福壽與天齊，慶賀你生辰快樂，年年都有今日，歲歲都有今朝，恭喜你～恭喜你～喺度衷心祝姑姑老豆身體健康、工作順利、風調雨順、鴻圖大展、五福臨門、花開富貴、笑口常開、百事可樂、萬事如意、福如東海、壽比南山，感謝你同伯母生咗一個咁好嘅女人畀我！

喺當晚嘅抽獎環節入面，我一口氣贏咗好多獎品獎金返屋企，而喺咁多份禮物當中，我認為就以上面呢兩份最珍貴。

Chapter 17：J圖贈囚友，清熱毒，解煩憂 😘

老友一聲令下，就算係王母娘娘個蟠桃都要即刻摘落嚟畀佢啦！中國作家南派三叔 (本名徐磊) 嘅起朵之作【盜墓筆記】，呢套爛鬼二手小說真係好X難搵！

我呢個Friend呢～就出晒名多多要求嘅！嗰頭話要睇小說，呢頭又話要睇寫真集，轉個頭仲話要我寄啲J圖入去畀佢解毒！唉～好啦！小弟就唯有盡下人事揀幾張正嘢畀大佬止止血……

Chapter 18：北卡州惹火尤物 - Lacy Lennon 🤤

試問我又點會諗得到，呢位外型高貴典雅又酷似Sophie Turner嘅性感尤物嘅正職竟然係拍四仔？呢種做福人群嘅善舉簡直係功德無量，真係唔怕做多啲！

佢叫做Lacy Lennon，嚟自美國北卡州，22歲，出生日期係1997年1月23號，身高163cm，體重52kg，三圍34-24-35，星座係水瓶……點？仲有冇嘢想知？

咳咳～親愛嘅朋友們，是咁的～朕現在要趕快去茅廁試下喺日本新買返嚟嗰堆日用品質素如何，所以……多謝各位嘅收睇！我哋下次見！嘿嘿嘿嘿～

喵～CoCo＆Me 生活瑣事雜誌（2019年10月Halloween特別號）完，下一期嘅出版日期……喵～唔知道～等柒婆壽終正寢我再話你哋知啦！喵～

CoCo＆Me 生活瑣事雜誌（2017年11月創刊號）
http://timeischanging2013.blogspot.com/2017/11/coco-me-201711.html

CoCo＆Me 生活瑣事雜誌（2018年3月號）
http://timeischanging2013.blogspot.com/2018/03/CoCoAndMe-March.html

CoCo＆Me 生活瑣事雜誌（2018年7月號）
http://timeischanging2013.blogspot.com/2018/07/CoCoAndMe-July.html

CoCo＆Me 生活瑣事雜誌（2019年9月號）
https://timeischanging2013.blogspot.com/2019/09/CoCoAndMe-Sep.html