CoCo＆Me 生活瑣事雜誌（2018年3月號）

Chapter 1：晨早起床，清新開朗 🌤

Chapter 2：為食總動員，出發！🍴

Chapter 3：3月觀影小記 🎥

Chapter 4：和歌山貓站長要搬家囉！😽

Chapter 5：CoCo電眼寫真放送 🐱

Chapter 6：貓奴的日常 👀

Chapter 7：奴才快滾～別搶我的新玩具！💢

Chapter 8：第二期焦點音樂猛人 - Bonnie Tyler 🎧

Chapter 9：有好多好多新住客啊～ 😲

Chapter 10：一輩子的偶像 💞

Chapter 11：一代武打巨星李小龍 👊

Chapter 12：春光乍洩2018之西毒撞正葉師傅🎬

Chapter 13：候選房客名單 👥

Chapter 14：今期好書推介 📖

Chapter 15：野原一家伴我同行 😊

Chapter 16：非常離奇的靈異桌面事件 😕

Chapter 17：好人好事盡在利物浦 💝

Chapter 18：兩位小貓女終於長大了！🐈

Chapter 19：親愛的，祝您生日快樂 🎂

Chapter 20：P.S.阿奶，我很好 💌

各位Blog友你哋好嗎？好耐冇見喇！消失咗幾個月，我諗都係時候要蒲下頭幫個blog掃下塵喇！🤗

Chapter 1：晨早起床，清新開朗 🌤

我哋呢班打工仔～一生一世為錢幣做奴隸～啊哈～呢排我幾乎日日一去到凌晨五點鐘就要起身返工，呢種朝七晚四嘅寫字樓式生活，對於我呢個長年夜鬼嚟講確係少啲魄力都唔得掂呀！😵

哼～做晨操之嘛～使乜驚呀！食完呢幾件老媽子特製嘅愛心芝士腿蛋治烘底，我直頭老虎都打死幾隻啦！啊呵～😪

「阿迪，我覺得你都係去配返副眼鏡好啲，就算對你隻眼幫助唔大，至少都可以增強其他人對你嘅信心。」因為一個高層嘅一句說話，兇神惡煞嘅火爆仔從此就變成一個斯文怕醜嘅四眼仔。講真呀～以前我一向都好抗拒呢種「裝假狗」嘅行為，但唔知係咪年紀大咗嘅關係呢？今時今日聽到佢呢個溫馨提示之後，我反而就從中悟出咗少少道理！嗯～或者係我一直以來都知道自己隻眼係冇得救，所以好自然就會經常將佢擺埋一邊，完全冇留意到一啲比較深入嘅層面～講起上嚟，真係好多謝呢一位唔願意公開姓名嘅高人朋友，所謂「聽君一席話，勝讀十年書」，火爆仔今次都算得上係出路遇貴人喇！🤓

俗語有云：早起嘅雀仔就有蟲食，遲起嘅雀仔就畀蟲食，咁多位新朋友，以後請大家多多指教！✊🏻

Chapter 2：為食總動員，出發！🍴

為咗盡快融入新公司嘅工作團隊，我每一日都好畀心機做功課，有時候甚至會忙到連放飯嘅時間都冇埋！呢種餐餐捱飯盒嘅日子，真係已經有N年冇試過……🍱

咁如果唔想捱飯盒呢？冇問題㗎～你可以選擇到公司就近嘅地方買外賣，一杯Latte加多個雞批，承惠$66～💁🏻

食完呢一碗好睇唔好食嘅$100海鮮丼，就令我更加掛住東京同大阪啲壽司刺身！嗚嗚～🍣

我當然明白，當你嘅職位越大，人工越高，自然就要比以前肩負更多嘅責任，所以一有空閒時間，我就會非常珍惜同家人朋友相聚嘅時光！🍹

震乳兄，數數手指，我哋應該都有成廿年冇見喇！好開心從阿龍口中得知原來你一直都有記住我呢個老朋友，Sam哥、龍兄，得閒一定要再約埋一齊打冷同落K啊！🍻

早排同華Dee傾開，我哋都異口同聲認為今時今日喺香港地打邊爐實在係貴到離晒譜！正因為咁，而家約埋班三五知己，通常大家都寧願會選擇坐埋嗌返幾個惹味小菜嚟送酒就算～🍺

好似喺月頭嗰陣我嘅Darling輝輝就帶咗我去一間位於葵涌美芳街1-9號美寧大廈1B舖嘅街坊小店度開餐，仲專程介紹咗一個新朋友畀我認識！💬

嚟到呢度一定要試下佢哋嘅薑葱魚皮！信我～食完包你哋返唔到轉頭！🤤

呢個鱔球煲叫做乜嘢名堂我就真係唔記得咗喇～淨係記得佢好鬼惹味，用嚟送酒簡直係一流！👅

同輝哥食飯喎～唔嗌返碟砵仔蠔就想走～係咪想死呀？😝

彪哥海鮮菜館，我細細個就聽過呢個名喇！呢間位於觀塘宜安街4號嘅小菜館曾經係小弟同一班夜校同學嘅聚腳處，咁多年以嚟我一直都好鬼掛住佢哋嘅豉椒炒蜆同埋椒鹽鮮魷～於是喺十幾日前，我就終於都忍唔住要帶埋姑姑特登走入觀塘懷緬一下昔日喺夜校嘅開飯時光！🎒

近排啲天氣咁反常，一坐低梗係就即刻要整返碗蛇羹補補佢先啦！🐍

呢一味餸叫做碧綠西蘭花，啲冬菇炆得幾入味，不過個主菜西蘭花就整得淡口咗少少！🤷🏽

卜卜脆嘅椒鹽鮮魷，啲炸粉落得剛剛好，但就衰在唔係好夠熱！🙅🏽

萬眾期待嘅豉椒炒蜆，一擺入個口度……妖～乜又係凍冰冰㗎！你哋今日個爐頭係咪壞咗呀？🤦🏽

多年冇嚟，相比起以前彪哥啲嘢認真係失色咗唔少！唉～有時啲嘢，真係往事只能回味……😔

Attention！為食總動員第一小隊！Dismiss！下一期我哋將會繼續帶大家走勻全港品嘗各地好西～🏃🏻

Chapter 3：3月觀影小記 🎥

片名：賊鬥（Den Of Thieves）

導演：Christian Gudegast

主演：Gerard Butler、50 Cent

片長：140分鐘

級別：IIB

語言：英語

上映日期：2018-03-15

個人評分：★★☆（☆為半粒星）

片名：盜墓者羅拉（Tomb Raider）

導演：Roar Uthaug

主演：Alicia Vikander、Dominic West、吳彥祖

片長：118分鐘

級別：IIB

語言：英語

上映日期：2018-03-08

個人評分：★★

片名：竊密風暴（Mark Felt: The Man Who Brought Down the White House）

導演：Peter Landesman

主演：Liam Neeson、Diane Lane

片長：103分鐘

級別：IIA

語言：英語

上映日期：2018-03-08

個人評分：★★

片名：紅雀特工（Red Sparrow）

導演：Francis Lawrence

主演：Jennifer Lawrence、Joel Edgerton

片長：140分鐘

級別：III

語言：英語

上映日期：2018-03-01

個人評分：★★☆（☆為半粒星）

片名：棟篤特工（Agent Mr Chan）

導演：張家傑

主演：黃子華、佘詩曼、 蘇麗珊、 C君

片長：100分鐘

級別：IIA

語言：粵語

上映日期：2018-02-15

個人評分：★

片名：戰雲密報（The Post）

導演：Steven Spielberg

主演：Tom Hanks、Meryl Streep

片長：117分鐘

級別：IIA

語言：英語

上映日期：2018-02-01

個人評分：★★☆（☆為半粒星）

密切留意下期復活節巨獻比得兔（Peter Rabbit），小心笑到肚痛！🐰

Chapter 4：和歌山貓站長要搬家囉！😽

用咗接近三年嘅Samsung Note 4終於都要正式退役喇！取而代之嘅……就係呢部Sony Xperia XA2 Ultra！👆🏻

和歌山喵喵站長， 從今日起你就要喺另一個地方值班囉！辛苦晒！🙇🏻

拎起部新手機第一時間應該做啲乜？當然係立即要同天下第一貓美男CoCo哥影返輯靚相先啦！🤳🏻

Chapter 5：CoCo電眼寫真放送 🐱

喵喵喵～CoCo最新十二宮格寫真，數量有限，送完即止！因住手快有手慢冇呀喂～📢

Chapter 6：貓奴的日常 👀

一梳梳到尾；二梳白發齊眉；三梳兒孫滿地；四梳四條銀筍盡標齊；五梳翁娌和順；六梳夫妻相敬；七梳七姐下凡；八梳八仙來賀壽，寶鴨穿蓮道外遊；九梳九子連環樣樣有；十梳夫妻兩老到白頭……妖～ 我到底喺度噏緊乜東東呀？😴

Chapter 7：奴才快滾～別搶我的新玩具！💢

Yeah～訂咗成個月嘅貨終於送到嚟喇！開封儀式啟動！哎……😐

喂喂～前面呢位貓大哥～你可唔可以借過少少呀？😟

Do Remember！You disturb me playing～Your spring pocket will be barbecued！🔥

哦～你想要個紙箱咋吓嘛～唔使燒人Pocket咁惡呀！OKOK～隨便攞去玩！✋🏻

查實我一直都唔明白點解啲喵喵一見到紙箱就會發晒癲，但無論係乜嘢原因都好啦～我都衷心希望今次呢個亞馬遜盒子先生嘅壽命可以維持到超過一個月……😬

就喺CoCo同亞馬遜盒子先生喪玩緊嘅同時，不如就同大家分享一下我今次喺網上訂購嘅一啲戰利品啦！✌🏻

大俠愛食黑麻麻，神經牛肉無奶媽，香港市民添口福，食完唔會亂打交！🍔

Yeah Baby～Yeah～唔講你唔知！凸務之王嘅男主角Michael Myers原來同小弟一樣都係死忠利迷嚟㗎！👓

老實講，我始終都係比較鐘意Mini Me著住中山裝嗰個經典造型多啲，但鬼叫而家網上面淨係得返呢一隻太空Mini仲有貨咩～😩

Wild thing～You make my heart sing～You make everything groovy wild thing～Wild thing～I think I love you～But I wanna know for sure～Come on and hold me tight～I love you～🎸

經過本人嘅多番遊說同三跪九叩之下，一代結他大師Jimmy Page就正式加盟咗小弟旗下嘅宇宙世紀巨Band！親愛嘅Jimmy哥～我等你真係等得好辛苦呀～😭

來自英國嘅Electropop二重奏女子組合Kaleida，佢哋喺2017年9月所發行嘅首張專輯《Tear the Roots》實在非常值得推介畀各樂迷欣賞！💿

YoYoYo~幾經波折，Bonnie Tyler喺2013年推出嘅《Rocks And Honey》實體專輯總算就落咗喺我手上！好啦～為咗慶祝獲得呢一件稀世珍品，喺呢度小弟就決定要將自己同Bonnie嬸嬸多年以來嘅一啲音樂回憶細說一番 ！🤘🏻

Chapter 8：第二期焦點音樂猛人 - Bonnie Tyler 🎧



要數本人最喜愛嘅十大外語女歌手，相信來自英國威爾斯嘅老牌搖滾女唱將Bonnie Tyler定必榜上有名！當年一張風靡全港嘅《The Power Of Love》精選專輯，令我認識到好多首百聽不厭嘅英文老歌，而其中Bonnie Tyler呢一首〈Total Eclipse Of The Heart〉更加係深深震撼我嘅心靈！佢嗰把沙啞得嚟又鬼咁狂野嘅聲音，充分將歌入面嗰一份失落嘅痛苦心情表露無遺，呢種聲嘶力竭嘅演繹方式，徹底打破我一直以來對靚聲歌手嘅定義同執著。👂🏻


Bonnie Tyler原名叫做Gaynor Hopkins，喺未成名之前佢因為睇到報紙上嘅一段招聘廣告而搵到一份和音歌手嘅工作，後來仲同一班朋友組成咗一支樂隊。可惜好景不常，有一日Bonnie Tyler就畀一位醫生診斷出聲帶生繭，喺做完手術之後佢把聲就變得比以前粗啞低沉咗好多，呢件事嚴重打擊咗佢嘅自信心，更一度以為自己嘅歌唱生涯將會就此Game Over，但萬萬諗唔到嘅係，呢一個突如其來嘅意外反而就令佢獲得RCA唱片公司嘅垂青，而呢一把受到地獄使者撫摸過嘅爛聲喺往後嘅日子亦成為佢嘅最大標記。🔊

喺1977年，Bonnie Tyler憑住首張大碟《The World Starts Tonight》闖入樂壇，呢張專輯雖然擁有〈Lost in France〉同〈More Than a Lover〉兩首Hit歌，但係銷售成績就只屬一般，並未有成功開創Bonnie Tyler嘅歌唱事業。或者係風格錯配嘅關係，呢隻碟入面嗰種接近Country Pop嘅曲風，同Bonnie Tyler嘅聲線／唱腔簡直如同南轅北轍，最明顯嘅例子就係Track 4嘅〈Piece Of My Heart〉，呢個翻唱版本既表現唔到原唱Erma Franklin嗰一份誘人嘅騷味，論搖滾味道亦遠遠比唔上Janis Joplin，成首歌我只能夠用「不倫不類，唔痕唔痛」呢八個字嚟形容，完全係為唱而唱。👎🏻

首張大碟銷量未如理想，並冇就此封住Bonnie Tyler嘅歌唱道路，喺1978年，由英國著名音樂人Ronnie Scott、Steve Wolfe聯手創作嘅〈It's a Heartache〉以平地一聲雷嘅姿態橫空誕生，呢首單曲一出就意外打入美國Billboard第三名同多個地方嘅音樂排行榜冠軍位置，細碟總銷量更高達六百萬張以上，而喺1983-1986呢三年期間，〈Total Eclipse Of The Heart〉、〈Faster Than The Speed Of Night〉同〈Holding Out For A Hero〉呢一連串嘅Big Hits金曲仲成功將Bonnie Tyler推入巨星行列之中。🌟

若講到Bonnie Tyler喺事業上嘅伯樂，除咗我先前有提及過嘅著名音樂人Ronnie Scott、Steve Wolfe同埋一手發掘佢出嚟嘅星探Roger Bell之外，有一個人同樣都係不能不提嘅，佢就係曾經幫多位歌王歌后寫過無數暢銷經典嘅天王製作人Jim Steinman。呢位人兄嘅音樂風格好鮮明，所創作嘅作品大部分都係編曲龐大副歌就超多起伏而且歌詞又勁長，呢一類戲劇張力咁強嘅歌曲真係需要有一定唱功嘅巨肺級人馬先至駕馭得到，好似Jim Steinman喺80年代嘅兩位愛將（女嘅就係Bonnie Tyler，男嘅就係Meat Loaf），佢哋兩位正正就係我剛才所講嗰一類音域非常寬廣嘅唱家班。🎙

Bonnie Tyler嘅天后之路相當短暫，喺1983年，Jim Steinman為佢所寫嘅〈Total Eclipse Of The Heart〉足足霸咗美國Billboard個冠軍寶座四星期咁耐，而佢喺同一年推出嘅大碟《Faster Than The Speed Of The Night》喺全球就一共賣出五百幾萬張。不過，當登上歌唱事業最巔峰嘅時候，Bonnie Tyler跟住落嚟所發行嘅專輯／單曲銷量就一張比一張慘淡，但喺呢堆作品入面我哋就依然可以搵到好多首出色嘅好歌，例如係我先前曾經提及過嘅〈Holding Out For A Hero〉、同美國搖滾男歌手Todd Rundgren合唱嘅〈Loving You's A Dirty Job, But Somebody's Gotta Do It〉、由Aerosmith同Bon Jovi嘅御用音樂製作人Desmond Child加上Jim Steinman合力製作嘅〈Lovers Again〉同埋〈If You Were A Woman And I Was A Man〉，仲有就係令佢獲得27th Grammy Awards提名嘅〈Here She Comes〉，而較為冷門一啲嘅就有〈Angel Heart〉、〈Bitterblue〉、〈Against The Wind〉、〈Silhouette In Red〉、〈I Climb Every Mountain〉同〈Clouds In My Coffee〉，我特別想推介〈Clouds In My Coffee〉 呢首歌畀大家，試下喺夜闌人靜嘅時候播住佢，然後再沖返杯苦到痺嘅黑咖啡慢慢嘆，成首歌個畫面同意境就會立刻出晒嚟！☕

踏入90年代中期，Bonnie Tyler就簽咗華納唱片旗下嘅EastWest，企圖走出呢一個事業發展瓶頸期，而喺頭炮大碟《Free Spirit》入面，呢位褪色搖滾歌后就請嚟德國神檯級樂隊Scorpions嘅主音Klaus Meine同埋結他手Rudolf Schenker為佢度聲訂造一首好聽到上太空嘅首波主打〈You're The One〉，又嘗試挑戰老拍檔Jim Steinman喺1983年寫畀Air Supply嘅世紀經典情歌〈Making Love Out Of Nothing At All〉，仲將碟內多首性感撩人兼且火力十足嘅作品演繹得淋漓盡致，奈何樂迷同樂評人就照樣係唔買賬！自此之後，Bonnie Tyler每次出碟就變成好似例行公事一樣，更漸漸畀外界歸類為過氣歌手組別。🍂

去到千禧年代，已經逐漸遠離大眾視線嘅Bonnie就開始將重心放咗落自己嘅家庭生活上，當所有人都以為呢位養專處優嘅金毛大嬸再冇可能搞出啲乜嘢新花臣嘅時候，Bonnie喺2013年就推出咗一張辣味甚濃嘅新專輯，有好多英國媒體喺聽完呢張碟之後都紛紛送上好評，大家都好驚訝闊別樂壇八年嘅Bonnie竟然仲可以保持住咁好嘅狀態，平心而論，呢張《Rocks And Honey》嘅整體質素絕對稱唔上驚為天人，但喺〈This Is Gonna Hurt〉、〈Believe in Me〉、〈Crying〉、〈Flat On The Floor〉同埋〈All I Ever Wanted〉呢幾首歌當中，我就發現年過60嘅Bonnie嬸嬸除咗激情猶在之外原來仲好鬼Rock得！嗰種直達心靈深處嘅快感，真係不禁令我回想起歐美流行樂壇嘅最黃金時代。📻

當青春年華慢慢划過歲月嘅痕跡，你或者會對眼前嘅種種轉變有所感歎，的確，時至今日，Bonnie Tyler嘅現場演唱功力早已大不如前，而喺唱片市場上亦徹底失去自己嘅定位，呢啲都係鐵一般嘅事實。之但係，當你見到佢開口唱住你喺少年時期曾經迷戀過嘅英文老歌嗰陣，呢一切一切馬上就變得唔再重要。🎵



雖然捉唔住逝去嘅光陰，但我哋仍然可以從呢段影片感受一下，當昔日嘅英國新貓王Shakin' Stevens遇上喺80s初炙手可熱嘅Bonnie Tyler所產生出嚟嘅火花同光芒，喺當時Bonnie姐嘅巨星風采真係想藏都藏唔住！✨



覺得聽唔夠喉？唔緊要～再送上Bonnie姐十三年前喺巴黎La Cigale演唱會嘅一段精彩演出畀大家欣賞！睇完成段Live你哋就一定會明白點解小弟會咁迷戀呢位獨一無二嘅沙聲歌后！💘


第二期焦點音樂猛人（完），第三期焦點音樂猛人將會係……嗯～近排好忙，忙完先再諗！💭

Chapter 9：有好多好多新住客啊～ 😲

喺近幾個月有好多新朋友都紛紛搶住要搬入嚟小弟嘅憤怒鳥宿舍，好似呢一班歷史悠久嘅龍珠家族喺今個月頭就租咗我哋嘅1號特製板間房！😌

嘻～望住唔同時期嘅悟飯，真係乜嘢童年回憶都返晒嚟！⏳

影迷苦候多時，荷里活鬼才導演Quentin Tarantino嘅新戲《Kill Bill 3》於日前終於正式宣布開拍！你哋睇下～今次嘅陣容簡直係破天荒咁強勁！唯一比較美中不足嘅就係Samuel L. Jackson因為檔期問題而未能加盟劇組……🚷

而喺另一邊廂，我隊卡通樂隊嘅成員就正喺度密鑼緊鼓為佢哋嚟緊嘅演唱會進行彩排～💪🏻

人人期望可達到～我的快樂比天高～人人如意開心歡笑～跳進美夢尋獲美好～爬進奇妙口袋裡～你的希望必得到～離奇神化不可思議～心中一想就得到～🎶

靈感ＩＱ稱得上十分之高超～創作力量同幻想會嚇你一跳～小雲同小吉好重要～🎶

Bu Bi～Bu Bi～小雲～唔好以為淨係妳先識得玩屎尿屁呀～💩

無敵嘅聖衣金光璀璨好美麗～唔係鐵～係聖衣～著咗打都打得勁啲～全賴有聖衣～咁先可以將佢哋～潛在嘅能源第七感都一一發揮～🎶

咦～因乜解究阿冰河仔會擺出一個咁城城嘅Pose嘅？哈哈～冇計啦！啲偶像派通常都係鐘意整色整水！🙄

呵～不過有咗呢班聖鬥士，住喺二樓嘅阿愁就唔使咁苦悶喇！🙂

嚟嚟嚟～有請兩位電子遊戲界嘅天王級人物，Mario & Sonic！🎮

再嚟就帶大家參觀一下本宿舍嘅的骰客房，月租大概係三千六百蚊，優惠期內仲會免費贈送一個馬桶畀你用嚟放飯煲！🍚

呢度係鑽石級VIP總統套房嘅住客，住喺裡面嘅朋友個個都係有頭有面嘅知名人士！💎

特別八卦新聞報導，著名金牌司儀鹹濕胡迪又～又～又換咗新女伴喇！🕵

貓～全部都係貓～貓貓貓貓貓 ～喵喵喵喵喵喵～😽

同大家介紹，呢位就係本舍舍監，佢個名叫做我老豆！🐽

有興趣入住我哋宿舍嘅朋友就快啲打比包租公Angry Bird（即係我）啦！電話係99963388～記住！係99963388！📲

Hey～兩位客官，請問你哋登記咗未呢？唔好諗住側側膊唔多覺喎！😈

Chapter 10：一輩子的偶像 💞

Cause this is thriller～Thriller night～There ain't no second chance against the thing with forty eyes girl～Thriller～Thriller night～You're fighting for your life inside of killer～Thriller tonight～🎶

Just beat it～beat it～beat it～beat it～No one wants to be defeated～Showin' how funky and strong is your fight～It doesn't matter who's wrong or right～Just beat it～Just beat it～🎶

Because I'm bad～I'm bad～shamone～You know I'm bad～I'm bad～you know it～You know I'm bad～I'm bad～shamone～you know～And the whole world has to answer right now Just to tell you once again～who's bad～🎶

嘩～能夠邀請到我嘅超級偶像Michael光臨寒舍，仲要一次過以三種形態出現，實在係本人嘅榮幸！😍

呵呵～你放心啦小MJ！無論將來有幾多位星級住客搬入嚟我都一樣唔會遺棄你㗎！😗

Chapter 11：一代武打巨星李小龍 👊

以無法為有法，以無限為有限，是為武術最高境界！正所謂活到老學到老，一般人最大嘅通病就係過份自滿，一味以為自己好巴閉，於是就疏於鍛鍊，但我就唔同！即使已經得到世人賜予「世上最好打」呢個美譽，我都依然會keep住繼續修練，好似噚日咁，我就走咗去花果山跟大聖爺學習佢嘅超級秘技龜波氣功！🖐

咦喂～呢招又叫做乜嘢名堂呀？擺兩隻手指喺個額頭度就可以叉到電？🔌

哼～我讀得書少！妳唔好抄我！前面呢位靚女，想成為一個真正嘅武術家？唔使用劍嘅～用黑旋風就得啦！🌀

話比你哋知！我功夫耍家就唔在講～跳舞唱歌彈結他都一樣唔會難到我！😏

有我教曉你哋唔係東亞病夫～黃皮膚～都可以做返自己～唔要跟人哋抄人哋黐人哋～香港人～唔要睇死自己～🎤

支持我嘅新歌之餘，大家亦千祈唔好唔記得我同豪仔主演嘅新片《死亡遊戲II之父子齊翻生》呀！Water～💦

好～各位朋友，我而家要趕住同我班雀友大戰四方城～係咁先！後會有期！曱甴～🀄

Chapter 12：春光乍洩2018之西毒撞正葉師傅 🎬

Bala～Bala～身體向下～黐手黐身黐脾罅～葉問問我食唔食蝦～葉問話你先跳Cha Cha～🕺

黎耀輝～呀唔係～葉師傅，不如我哋重頭嚟過，好唔好？👄

Chapter 13：候選房客名單 👥

今天我施法術～妖魔你盡快離開～今天我施法術～將妖怪全部逐世外～唔經唔覺，呢隻達爾已經由$118炒到$220呢個高位！唉～早知當日我就趁低吸納啦！🙄

我真係唔知道原來《魔女嘉莉》都有出過figure，嗯嗯～你話如果呢兩個公仔係參照舊版Carrie（由Sissy Spacek飾演）個樣嚟做咁就更加好喇！😁

吓～乜嘢話？佢係賭神高進？喂～咪玩阿叔好喎！呢個分明就係鄧光榮嚟啦！😤

嗱～呢個刀仔就似樣好多喇！嘻嘻～你哋睇唔睇到佢褲袋入面嗰包紅萬？真係相當抵死！🚬

幾位咪就係大名鼎鼎嘅天使得得B！唔好意思～我只係一個普通嘅地球人，完全聽唔明你哋嘅星球話，借問聲咁多位B哥係咪想租房呀？😯

哎吔吔～我最討厭就係砌模型㗎喇～呢種咁麻煩嘅工作都係交比其他人去做比較好！嘿嘿～英格倫1號機，Bye Bye～See You Later～👋🏻

Chapter 13：今期好書推介 📖

主編：黃愛玲、潘國靈、李照興
策劃：香港電影評論學會
出版社：三聯書店出版社
出版日期：2015-02-14
頁數：459
定價：HK$168

凡係喜歡王家衛嘅人都一定唔可以錯過呢本書，集合多位香港資深影評人編寫同策劃，從畫面、配樂到取景都分析得非常仔細認真，仲好深入咁去解構王家衛每部電影裡面一啲令人難以理解但又回味無窮嘅情節同對白，而一班合作伙伴例如係杜可風、張叔平、譚家明、劉鎮偉、徐皓峰亦會喺入面細談同王大導嘅合作之道，另外當然唔少得嘅就係請黑超王本人嚟個現身說法！經過深層次嘅思路梳理之後，我建議各讀者第一件事要做嘅就係將王家衛歷年嚟嘅所有電影全部再Replay一次！😎

作者：黃夏柏
出版商：非凡出版
出版日期：2017-10-28
頁數：264
定價：HK$128

1980-1989年肯定係香港流行音樂創作最為鼎盛同繁榮嘅十年，隨住電台、電視、電影嘅普及，一首首悅耳動聽嘅廣東歌就好順理成章咁火速滲入各家各戶。作者黃夏柏先生首先就喺當年嘅一堆報刊同雜誌度尋找素材，再結合自身嘅聆聽經驗同成長過程寫成一本書。我認為，先唔好理佢寫成點，就單純衝住呢位黃生嘅嗰份誠意同用心大家就好應該走去書局買返本嚟睇下啦！須知道而家要喺香港出呢類型題材嘅書真係極之唔容易㗎！🎼

繪著：Rex Koo
出版商：非凡出版
出版日期：2016-08-19
頁數：144
定價：HK$98

由70後插畫師Rex Koo（顧沛然）繪制，有趣可愛嘅港漫畫風，將數十年間香港電影嘅經典畫面一一記錄落嚟，再通過將近一百幅插畫作品重現香港電影黃金時代各個膾炙人口嘅名角色，例如係《花樣年華》裡面嘅蘇麗珍（由張曼玉扮演）、《阿飛正傳》裡面嘅阿飛（由張國榮扮演）、《胭脂扣》裡面嘅如花（由梅艷芳扮演）、《92黑玫瑰對黑玫瑰》裡面嘅呂奇（由梁家輝扮演），而最令我估唔到嘅就係連《槍火》入面嘅阿Mike（由張耀揚扮演）同埋《食神》入面嘅夢遺大師（由劉以達扮演）都有！絕對係所有港產片愛好者嘅必藏之作。👍🏻

Woo～我嘅兒時動漫女神美神令子～Long Time No See！若果唔係因為工作嘅原故經過188，我諗我可能一世都未必會記返起妳！💗

Chapter 15：野原一家伴我同行 😊

我一向都有一個習慣，每當感到苦悶難耐嘅時候，我就必定會上Youtube睇返幾集《蠟筆小新》，咁樣我嘅心情就會立即好返晒！小新、小葵、小白，非常感謝你哋陪我度過咗咁多個寂寞嘅晚上！😄



近期我最鐘意就係呢一集，小葵同小新真係太可愛喇！😆

當小白變成小新嘅哥哥？究竟係乜嘢一回事呀？😮



嗚嗚～小白嘅忠誠實在係太令人感動～唔怪得知啲人成日都話狗狗永遠都係人類最好嘅朋友！😭



其實，我好耐之前就已經覺得喺台灣版小新裡面幫小新阿媽配音個女人把聲好似我其中一位好朋友，所以每次聽到美冴姐開口講嘢，我都會感到份外親切！喂喂～慧菁呀慧菁～老老實實，個配音員係咪真係妳嚟？😂

臼井先生，眨下眼你就離開咗大家差唔多有九年咁耐，唔知你喺上面住得慣唔慣呢？你知道嗎？直到今時今日，我都覺得你創造咗《蠟筆小新》呢本漫畫出嚟簡直就係功德無量，直頭係拯救蒼生於苦難呀！🙏🏻

Chapter 16：非常離奇的靈異桌面事件 😕

喺今年嘅3月1號晚，我經歷咗一件極之離奇古怪嘅事，話說我買咗部新手機返屋企之後就火速同CoCo影咗輯寫真，跟住我就從呢堆靚相入面揀咗兩張嚟做主屏幕同上鎖屏幕嘅Wallpaper，然後我就瞌咗一陣，到我醒返嗰時，一個戴住頭盔嘅神秘人就突然出現喺我面前，仲足足困擾咗我成晚！😑

當時我心諗：「呢條友到底係乜水呀？點解我趕極佢都唔走㗎？」而最恐怖嘅係，我經已搵勻晒成部電話，但就完全搵唔到有呢張相嘅任何蹤影！喺無計可施之下，我就唯有使出終極一招，就係將部機還原到初始狀態～果然，此招一出，呢隻死人頭盔怪就隨即煙消雲散，而我亦終於都可以有返覺好瞓！嘿嘿嘿～講到呢度，大家係咪開始有少少心寒嘅感覺呢？👁

Chapter 17：好人好事盡在利物浦 💝

十日前睇住自己嘅愛隊喺Old Toilet以1-2輸咗比獌狗，我嘅心情本來真係肉酸到爆！但之後偶然喺一個利迷群組度睇到一段有關羅拔臣同一位小利迷嘅窩心小故事，就令到面如死灰嘅我馬上重拾歡顏。🌞

是咁的，某日有一個名叫TomRadford0嘅Twitter用戶就將佢個仔Alfie利用零用錢捐比食物銀行呢單嘢放咗上自己嘅平台上面，件事好快就引起利物浦左後衛羅拔臣嘅注意，後來仲特登寫信比Alfie仔以作表揚，封信嘅內容大概係咁的……📝

親愛嘅Alfie仔：

啫喱哥喺度寫信比你。

我噚晚喺Twitter見到你為晏菲路嘅食物銀行做咗一件好特別嘅事。

我記得喺我細個嗰陣，零用錢對於我嚟講係十分重要嘅，我可以運用呢筆錢去購買各種各樣嘅嘢嚟滿足自己。

坦白講，喺呢個社會能夠為咗一班生活艱難嘅人而放棄個人利益嘅人實在係唔多，我而家話比你聽，你今日已經成功為其他人示範咗為他人設想同關懷係一件極之美好嘅事，成件事真係非常之「利物浦」！相信我！捐獻比食物銀行絕對係值得嘅！而你所做嘅好事亦一定會長留喺我嘅心入面。

好，我哋言歸正傳！我要開始表明我寫呢封信嘅真正目的：Alfie仔，你不問回報做咗呢件好事，我好佩服你，我好想做返少少嘢嚟獎勵你！嗱！細路，我哋不如坦白少少啦！一件左後衛嘅波衫真係搵鬼要咩？所以我就喺Bobby嗰度拎咗一件佢今季嘅比賽波衫，仲叫佢喺件衫上面畫咗隻龜比你，希望你會鐘意啦！

最後我想講，我會確保其他小朋友都會知道你嘅偉大事蹟，你確實為利物浦做咗一件好自豪嘅事，我深信你嘅家人必定會以你為榮。

向你送上祝福

Andy

呢篇報導係轉載自：

https://www.liverpoolecho.co.uk/sport/football/young-liverpool-fans-incredible-foodbank-14381436

Chapter 18：兩位小貓女終於長大了！🐈

大家仲記唔記得呢一隻咁可愛嘅小貓咪係邊個呀？佢就係我三弟文鋒嘅心肝寶貝魔女小喵喇！💕

時間過得真係快，一轉眼魔女原來已經有兩歲半大！🤞🏻

喵喵～我個名叫做棉花糖～各位哥哥姐姐你哋好～喵～😺

呢隻係姑姑家姐收養咗一段時間嘅小貓女，呵～只係冇見一排，佢就比之前大隻咗咁多！Hey～靚女呀靚女～嚟緊妳一定要快快樂樂咁成長啊～知道嗎？😚

Chapter 19：親愛的，祝您生日快樂 🎂

Happy Birthday To You～Happy Birthday To You～Happy Birthday To Ki Ki～Happy birthday To You～🎉

上星期適逢姑姑23（+20）歲生日，我就帶咗佢去呢一間位於沙田新城市廣場一期7樓嘅《芽莊越式料理》度食大餐。🍽

特別想讚一讚呢度嘅煎墨魚餅，彈牙煙韌又足料，簡直係冇得輸呀！😋

食飽飽之後，我哋就嚟到新城市中央廣場6樓嘅IKEA度睇傢俬。👫

Lady & Gentleman～Welcome To姑姑嘅搏殺區域！💁

嗯嗯～屋企突然多咗咁多位新住客，我諗身為包租公都係時候要為佢哋各自安排返幾間豪華劏房先得！🤔

「咦～我覺得呢隻公仔個樣好似你喎！」之前話我似憤怒鳥都算啦！而家居然仲夠膽死話我似隻猩猩？哼～臭姑姑！咁您家陣即係曲線話埋自己係猩猩夫人嘅啫！🦍

喂喂喂～咪走住！現在正值係CoCo嘅換毛季節，我當然就要準備多幾張地氈做替換啦！👣

嚟到IKEA嘅指定動作，瘋狂夾糖糖！😜

什麼？$29一個凍蝦盤？確實係好Ｑ抵喎～但可惜我哋已經飽到上心口喇！🤐

屌～講呢啲！我同您之間仲需要講多謝㗎咩衰鬼！😘

嘩嘩嘩～呢幾件中古好物真係正到無倫呀！作為壽星女反而仲調返轉頭送嘢比我，姑姑份人就係咁，幾時都咁鬼有我心！💋

Chapter 20：P.S.阿奶，我很好 💌

阿奶，最近唔知點解成日都會夢到您～到底您係咪有啲乜嘢特別事想同我講？定還是呢一切其實只係我自己日有所思夜有所夢呢？無論點都好，能夠喺夢入面再見返您，我真係非常之開心！我想同您講，我而家過得好好，我有一個乜都唔會同我計較嘅絕世好女友，我有一隻活潑可愛又經常帶比我無限歡樂嘅反斗貓，我有一班願意為我赴湯蹈火兩脅插刀嘅知己良朋，同老豆老母嘅關係就一日比一日好，而經過一月嘅大阪之旅然後返嚟再休息咗一個月之後，我嘅情緒同身體狀況亦開始慢慢重回正軌，您唔需要再擔心我，喺呢個世界上，除咗一啲我認定嘅親人同朋友之外，已經再唔會有任何人可以令我唔開心，從今以後，我一定會好好咁善待自己，唔會再比自己受咁多無謂嘅委屈，喺嚟緊嘅日子裡面，只要有人立心想傷害我，唔理係邊個都好，我都會立刻遠離佢哋，至於喺工作上如果遇到一啲過咗我底線嘅嘢，我就會即刻辭職，直到我嘅經濟能力唔可以比我再繼續任性為止。好～暫時就報告住咁多先啦！我哋夢中見，晚安阿奶。😉

喵～CoCo＆Me 生活瑣事雜誌（2018年3月號）完，下一期嘅出版日期，我想太約會是在～冬～季～🌬