那些年，我抽過的龍珠閃卡 🤌🏻

咁多位80、90後Blog友，曾經喺香港風靡一時嘅《龍珠》閃卡，唔知道你哋又抽過幾多？呢堆歷久不衰嘅世紀潮物我細個都儲埋好多，直頭有成本電話簿咁厚。📕

喺眾多款閃卡當中以「閃中閃」嘅價值最高，其次係「暗閃」，如果想啲卡一直keep住個好價位嘅朋友，就要謹記千祈唔好手多多，因為被揭開嘅閃卡將會大幅貶值，隨時差成十幾倍有多㗎！🤑

市面上咁鬼多假閃同祖國閃，究竟點去分辨箇中真偽？首先，你可以留意卡背面有冇印住Made In Japan嘅字樣。✔

底下兩張人稱「港版風雲第三代」(85號、86號)，望落去好靚，但其實只值二三百蚊。😆

睇唔睇到左下角嗰張喺1992出產嘅「三大撒亞人集合」？幾個月前上Carousell見到有人以四千五百蚊賣出，確實係犀飛利！😲

Super Barcode Wars係本人至愛嘅珍藏系列，特別係右下角張24號「The Androids」，而家喺市面上已經好難再搵得到。🤗

一連六張人造人，有靚仔有靚女有壯士有老鬼，再加多個北韓領導金正恩大將軍，邊一款最啱你心水？😏

惜才冇架子，語氣又有禮，仲免費提供埋一流嘅護甲武器同超完善嘅醫療設備，曾被網民評選為絕世好老闆嘅菲利大王，絕對係配得上「龍珠最具魅力反派」呢個稱號。💜

魔童、比達、布歐甚至菲利去到《龍珠超》都有得玩洗白白，偏偏斯路條核突佬就次次都冇份！唉～冇計啦！鬼叫你周身係斑咁Q難畫咩？🤪

三位只會喺劇場版出現嘅奸角，論人氣嚟講一定係擁有爆肌身材嘅博羅連(或者係布洛尼)最旺。💪

一向都覺得孫悟空係全世界心地最善良嘅動漫人物，佢份人重情重義、樂於助人、唔記仇，又願意犧牲小我，完成大我，仲一啲機心都冇，同呢類人做朋友的確係一流之極，不過做佢老婆同個仔呢～就⋯⋯🤷🏻‍♂️

有個全宇宙最好打嘅老公查實都唔係咁過癮㗎咋～睇吓悟空個老婆芝芝就知啦！明明係個老公冇尾飛陀，日日淨係掛住練功同拯救地球，難得過返啲和平生活又忽然心血來潮孭住歐布玩無了期私奔，難為阿芝芝姐含辛茹苦湊大兩個仔，兼夾要為家裏嘅開支而奔波勞碌，都仲要畀外面啲三姑六婆歸類為“巴渣嘅煩膠”。另外，呢嚿可憐嘅望夫石有兩項相當慘情嘅記錄，可謂前無古人，後無來者，一係佢無啦啦要接受一個同自己個孫年紀一樣咁大嘅“蝦子餅”(GT篇)，二係佢唔經唔覺經已做過三次寡婦(同一個男人)，嘩～直程係慘過白燕呀陰功！🤦🏻‍♂️

所以，若然係有得揀嘅話，我就情願做比達同莊子個仔好過喇～話晒都叫做出身豪門，一出世幾乎要乜有乜，個阿媽思想新潮兼且知識廣博，個阿爸脾氣係古怪啲，但至少經常喺你身邊，修練完又會肯花精神同你去遊樂場度玩，何謂贏在起跑線嘅人生勝利組？杜拉格斯(唔包括嚟自未來嗰個🗡)所行嘅嗰一條路咪有板你睇囉！💊

外型俊朗嘅杜拉格斯不嬲深受男女老幼喜愛，當年有唔少80後麻甩仔都爭相模仿佢同郭天王個「中間分界」髮型，以前有本漫畫仲試過將杜拉格斯同城城某張CD封面擺埋一齊嚟個二次元Crossover添！🤭

作為全套《龍珠》之中最有血有肉兼全個銀河系入面最有型嘅M額男，比達啲金句簡直多到你數唔到，其中令我留下最深印象嘅，係喺決戰瘦布歐嗰時，佢突然有感而發咁話：「加油呀～格古洛，你先係NO.1。」嗰種識英雄重英雄嘅浪漫情懷，真係聽到我起晒雞皮。 😛

孫悟空個大仔孫悟飯係我喺《龍珠》裏面最鍾意嘅一個角色，記得打斯路完全體嗰陣，我差唔多晚晚都會捕住個電視機等睇悟飯點發威。🤩

短暫做過最強嘅Z戰士，風頭一時無兩，有段時期鳥山明更打算用悟飯嚟代替悟空成為第一男主角，只可惜當時日本嗰邊啲Die-hard fans嘅反對聲音太大，先迫到明哥夾硬要將悟飯越畫越柒，到後期仲貶埋佢做大茄喱啡，卒之咪畀某班動漫迷幫佢起咗個花名叫「野比飯」。🥲

啋～乜啲人咁衰㗎！嚟嚟嚟～野比唔好唔開心，萬大事有魔童叔叔錫返！💕

既係良師益友，同時亦擔當住最佳保姆之職，必要時仲會拎埋條命出嚟為你擋子彈，能夠一個人包辦整套漫畫／動畫超過50%嘅感動位，笛子魔童，講起上嚟，你都算得上係一條名副其實嘅真漢子。☝🏻

相比起悟飯，悟天同悟空相處嘅機會更加係少之又少，基本上佢大部分時間都係同阿媽、阿哥相依為命，同比達、魔童兩位叔叔又極少交集，喺嚴重缺乏長輩指導嘅情況下，久而久之，悟天到大個咗好自然就冇乜建樹。🤔

除咗《龍珠》之外，原來我手頭上仲持有幾張《幽遊白書》同《美少女戰士》(呢兩張卡好明顯唔係我嘅😅)嘅閃卡，死囉～點解我好似毫無記憶咁嘅？莫非我提早患咗老人痴呆？👨🏻‍🦳

由梁偉傑、余健培、李志全做主編，喺1993年出版嘅港漫《超級警察》個故事到底係講乜東東？睇嚟要即刻急Call我嘅Blog友我的漫畫時代過嚟幫手解答先至得！📲

講返《龍珠》本身嘅歷史，佢係鳥山明喺1984年開始創作嘅長篇冒險漫畫，初頭係連載於集英社《少年Jump》。至於故事嘅靈感、概念同初期嘅人物設定，一般都係源自明代文學家吳承恩嘅著作《西遊記》。🐒

起初《龍珠一世》嘅劇情主要係以悟空嘅成長歷程為中心，多數偏重於搞笑多於格鬥，係去到後期先變得越嚟越暴力。👊🏻

話說鳥山明原本想喺「菲利篇」(即單行本21集到28集)後結束連載，無奈《龍珠》喺世界各地嘅人氣實在太高，先迫使明哥要硬住頭皮繼續畫落去，只能講鬼才即係鬼才，喺非自願嘅狀況底下，鳥山明依然成功創造出經典奸角斯路、布歐以及風趣抵死得嚟又夠貼地嘅「人民英雄」撒旦先生。✊🏻

自「布歐篇」完結，我對於後續嘅衍生作品，無論係外傳《龍珠GT》抑或係由鳥山明親自參與原案製作嘅《龍珠超》一樣提唔起任何興趣，唯獨喺2022年9月上映嘅《七龍珠超 超級英雄》度望到悟飯最後使出師傅教落嘅絕招“魔貫光殺砲”打低斯路MAX，唔再係用典型嘅“龜波氣功”或者係“元氣彈”嚟做收場，多多少少都會有返咁上吓感觸。🤧

寫到呢度，都係時候要同大家介紹返住喺筆者寒舍1號特製板間房嘅一班「龍珠家族」。😌

就算再過幾多年，我始終認為打到斯路一仆一碌嘅超二悟飯係最型最Sharp醒嘅，不服來辯！😬

身為悟空兒時嘅最佳好基友，更被公認為最強嘅地球人，無閑哥哥一生人最高光嘅時刻，應該就係娶到女神18號做老婆喇！😜

一時係入得廚房，出得廳堂嘅純情乖乖女，一時係性格狂暴嘅金髮尤物，筆者至愛嘅動漫女角，患有多重人格分裂嘅終極痴線婆蘭芝。😍

正所謂：家有一老，如有一寶，得閒買隻悟空返去看門口，包你年中慳唔少煤氣費。🔥

靈感ＩＱ稱得上十分之高超～創作力量同幻想會嚇你一跳～小雲同小吉好重要～🎶

再見喇鳥山明大師，你為世人留低嘅珍貴回憶，我哋永遠都會好好記住。🙏🏻

同場加映-我的生活日常 👩🏽‍🤝‍👨🏻

Happy birthday to you, happy birthday to you～Happy birthday to 姑姑, happy birthday to you～🎂

上星期日適逢小龍女牛一，我就帶咗佢去位於尖沙咀金馬倫道48號3樓C號舖中國保險大廈嘅驚安燒肉商店度開餐。🥓

賣相極佳嘅上．九宮格($388)，一盒包含壺漬牛肋肉、韓式護心肉、厚切牛舌芯、一口和牛、和牛三筋、極黑和牛、和牛赤身、和牛五花同埋超多油份又夠腍嘅和牛三角腩。🤤

重點推介呢碟自信漬雞腎($32五片)，好食到暈，令我忍唔住Encore再Encore。🥰

極黑和牛牛小排($148)、葱香月見飯、泡菜同鮮菠蘿片(各$28)。🍍

蒜香炒雜菇($48)蒜味同菇味都好夠，入口有一陣濃濃嘅黑松露香，整得好有水準。👍🏻

好～既然咁高興，一於整返杯Sapporo生啤($48買一送一)賀賀佢，另加一杯$28百香果梳打。🍻

與美相聚喝啖酒，當然要嗌返碟味淋魚干($38)先夠完滿。😁

搵完二奶搵大婆，從上年12月起，去華Dee府上開日式大餐，已成每月嘅指定動作。🍣

呢兩張精美嘅日本D5 Poster係我送㗎～係咪又靚又搶眼先？👀

有位好兄弟每次出席邊爐飯局都同我呻，話食唔到為食火鍋公司嘅蟹籽沙律係人生一大遺憾！OK～見你講到咁，今次就特登早到嗌夠兩客畀你，龍哥，問你滿意未？🤣

我的工作日常，一場接一場嘅電影謝票場，有請我哋今日嘅特別嘉賓-非常長氣，正宗係口水多過浪花嘅好戲之人林家棟先生。🎤

以為忙完一日收工返到屋企就可以即時沖個靚涼唞返陣？哈哈～閣下會唔會天真咗少少呀？請問你幫兩位主子梳咗毛、抹咗身、修咗甲、捉咗蝨未呢？若果未請嗱嗱臨埋位做嘢啦奴才！😪

每日忙忙忙，忙到連青葉市子 X Shoegaze界巨頭Slowdive喺亞博嘅音樂會都錯過咗，呢鋪認真係苦過Dee Dee呀媽咪！😭

換人失當，錯判形勢，加上「凍肉佬」減寶一貫街場阿伯式表現，配合埋傻紐兩個致命失誤，最終令利記喺足總盃八強脫腳，四冠夢想隨即粉碎。畀死敵49000絕殺後嘅鬱悶心情該如何舒解？唯有寄望愛隊能盡快重回正軌再度出發！距離高普離任嘅日子越來越近，一眾紅軍可否憑住120%嘅拼勁同努力去爭取餘下兩個重要錦標，以答謝領隊一路以嚟嘅知遇之恩？🏆

欲知後事如何，且待下回分解，世上最可愛嘅小黑貓Latte BB報告完畢！喵～💞