2007年9月17日 星期一

心情隨筆 17/09/07

                                    8:00 am
今朝我八點鐘就起咗身,仲自己煮咗個早餐食!
呢碗自製嘅「金牌健康通粉」材料有冬菇 、白菜、瘦肉同江瑤柱……
個味道清清地,食完個感覺好舒服!食完早餐之後我就落咗街……
然後就買咗份報紙同埋買定今晚嗰餐嘅餸!
哈哈~都好耐冇試過親自為自己女友下廚喇!
今晚忽然心血來潮想浪漫一下!嘻嘻~
返到屋企打開份報紙又睇到一則令人非常心噏嘅新聞,就係【泰國布吉空難88死】!
唉~布吉近年實在係多災多難!04年海嘯,而家又發生空難……
衷心希望呢個世界唔好再有咁多天災人禍!講真呀~每次睇完呢啲新聞個心真係會好唔舒服……

                      13:45 pm(豐富午餐)
             太平芝麻餅乾一包 + 一杯一斤果醋

                  16:00 pm
喺網上睇到有人Post咗一張陳年嘅明星舊相出嚟!
呢位巨星就係三、四十年代嘅著名女影/歌星周璇……
嘩~唔睇過都唔知,原來佢後生嗰陣係咁鬼靚㗎!

                     20:35pm(二人晚餐
 
秘製薯仔洋蔥豬扒、梅菜鯇魚片飯、蕃茄薯仔洋蔥湯
用手機拍出嚟個賣相雖然睇落就麻麻,但自問味道絕對係一流㗎!哈哈~
咦~有位人兄好似想靜靜雞偷食喎!~XDXDXD~
偷食失敗咗……就好不滿咁瞓喺我個鞋盒上面示威抗議!哈哈哈哈~
噚晚我睇咗最新一集嘅《快樂歌喉戰》,真係有好多意想唔到嘅驚喜!
喺參賽者方面,就以新加坡視障歌手陳偉聯嘅表現最為突出!
佢同台灣嘅「盲人歌王」蕭煌奇同樣都係用生命唱歌嘅人!
佢當晚所演唱嘅一首「火柴天堂」……真係深深咁感動咗我!

喺關主方面,今集負責把守一萬蚊關卡嘅璽恩,係一位非常出色嘅實力派唱將!
佢人靚歌甜,唱功又一流!係我近幾年聽過唱得最好嘅一位新進女歌手。

至於把守萬五蚊關卡嘅關主曹西平,大家咪睇佢而家發哂福就以為佢冇料到!
呢位大叔喺八十年代曾經同費翔、陽帆、包偉銘並稱「台灣四大天王」,
真係認真唔嘢少!不過,呢位大叔呢一日所揀嘅歌就先至係最嚇我一跳!
真係估唔到……原來佢竟然就係譚校長首「愛情陷阱」嘅國語版原唱人!
老實講,從呢位大叔當晩嘅演出我哋可以睇得到佢嘅舞台表現依然係功架十足!
但喺唱方面……就當然遠遠唔及我哋活力十足嘅譚校長啦!
登登登~有請今集嘅大魔王!佢就係香港嘅情歌聖手蘇永康!
嘩~真係好驚喜!可能好多人都唔記得……其實蘇永康喺台灣一向都有啲知名度,
仲唱紅過唔少金曲,喺當地仲有個稱號叫做「抒情歌王」!
而睇完今集佢喺歌喉戰入面嘅表現之後,我自己就覺得佢真係幾好嘢!
好嘢在佢近年咁少喺公開場台唱歌,但唱現場就竟然都仲係咁正同咁有味道!
其實我一向都好欣賞蘇永康,佢嘅唱片我以前都買過唔少!
我記得我買佢嘅第一張唱片就係《最深刻的愛》,
其後嘅《紅式》、《情來自有康》同《獨立宣言》我一樣都有買!
我覺得佢唱歌真係好鬼有味道!尤其係當佢唱一啲爵士樂風格嘅歌嗰陣……
我夠膽講!喺香港樂壇嘅流行歌手入面,蘇永康唱Blues同Jazz真係無人能及!
我覺得佢同夏韶聲、譚耀文都算係本地男歌手裏面唱爵士樂同藍調唱得最有水準嘅三位!
但好可惜……蘇永康喺早前就己經宣佈咗自己唔會再出廣東碟,
而譚耀文睇嚟又無乜可能再喺音樂上會有任何發展!至於夏韶聲亦都總唔可以一路咁「諳」落去……
所以我認為而家喺香港樂壇可以唱Blues同Jazz嘅歌手真係已經買少見少喇!

                  我最愛嘅蘇永康唱片Top 5

                          NO 1.【紅式】
蘇永康早期一張爵士好碟,比掛羊頭賣狗肉嘅【Soul Jazz】實在係好得多!

                         NO 2.【獨立宣言】
全隻碟啲歌都好正!特別係「好來好去」同「請將音量收細」……

                      NO 3.【不想獨自快樂】
商業味好重嘅一張唱片!但碟入面就有我最愛嘅蘇永康歌曲「因我太好」……
仲有好好聽嘅Side Track「提我」同「開玩笑」。
另外,當然就唔少得喺98年HIT爆嘅至尊金曲「越吻越傷心」啦!

                    NO 4.【蘇永康的化妝間】
全隻碟有十一首歌,當中有十首都係合唱歌嚟!係一張非常值得樂迷收藏嘅概念專輯!

   NO 5.【Super Nice 新歌+精選 34首】
超值嘅一張國語新歌+精選!收錄咗蘇永康歷年嚟嘅多首國語好歌!
另外,噚晚我同昌哥、Micheal就出咗去傾一啲有關工作上嘅嘢……
嗯~希望我哋傾嗰個計劃真係可以早日成真啦!

                                        23:15 pm

送完阿琪搭車之後,我就立刻返屋企沖涼洗頭……點知沖完涼一打開門……
OH!隻反斗貓又作反喇!唉~又要我做餐死!嗚嗚~

                         00:00 am(18/09/07
你個死仔搞完亂檔仲喺度瞓得咁招積!!!

5 則留言:

  1. 蘇永康的歌我獨愛失眠

    回覆刪除
  2. 睇咗夏韶聲演唱會DVD未呀!拍得好正呀!
    [版主回覆12/26/2007 05:07:00]
    未呀!我都唔知佢出左添!哈~搵日去CD鋪買隻睇睇先!thx~

    回覆刪除
  3. dvd165元in信和
    我是官網的mc,上去 www.dannysummer.com 發表下意見啦
    [版主回覆01/17/2007 23:27:00]好~

    回覆刪除
  4. 聞『韶聲』三月不知肉味啦
    http://youtube.com/watch?v=vuyRoQqXSJM

    回覆刪除
  5. Bo仔,我喺咪咪,現暫居軒軒園.
    有空歡迎來訪共聚..
    http://xuanxuanpopo.blogspot.hk/

    回覆刪除