是日晚餐 - 元綠迴轉壽司

今晚老媽子請客，去咗《元綠》度食迴轉壽司，實行兩母子齊齊撐檯腳，
講起上嚟，我同老母都好耐冇食過《元綠》喇！
哈哈～冇計啦！我哋兩個鬼死咁懶又唔願行得遠，
又忽然撩起條筋好想食壽司，咪唯有幫襯最＂就腳＂嘅《元綠》囉！
點知好日唔嚟，一嚟依然係咁多人等位！妖～

基本上馬鞍山而家除咗《元綠》之外就冇乜邊度有日本嘢食，
嗯～係仲有間《鐵人料理》嘅……但佢哋D壽司款式認真係少得可憐！

 14/9/2007（馬鞍山元綠迴轉壽司）
 
開始食嘢喇！（同場加映老媽子一條強而有力嘅臂彎！哈哈哈哈～）
         

                               櫻花魷魚壽司
  
螺肉壽司 、松島螺片壽司 、平貝壽司 、甘蝦壽司 、日式炸雞
 
有好多人同我講，話《元氣》D壽司係全港最正，
而《元綠》D壽司甚至連《百佳》同《惠康》都不如，
我唔知係咪所有人都係咁諗，我自己就覺得佢哋呢個講法實在係有點誇！
講真，我雖然冇乜食過一D好正宗嘅高級日本料理，
但係大家普遍食過嘅壽司連鎖店，其實我都差唔多間間都試勻晒咁滯，
平心而論，《元綠》D嘢唔算得上係好好食，但就至少好過《元氣》，
咁當然，有時候好唔好食呢樣嘢都好睇時段同地區嘅！
《元綠》嚟講，我認為馬鞍山同鑽石山分店D嘢就最OK，
不過我奉勸大家喺紅日嗰陣就最好唔好去馬鞍山嗰間分店，因為D嘢真係會差D㗎！
 
哈～或者係我黑仔啦！唔知點解我每次去親《元氣》都必定會賴嘢，
仲要係間間分店都係咁！唉～D嘢難食唔在講，D壽司又勁鬼細碟，而且價錢亦唔係話好平！
老實講呀～要我食《元氣》，我就寧願去《金太郎》食下平價壽司好過！

嘻嘻～有時候去得多迴轉壽司連鎖店，
間唔中都會想去試下一D唔同類型嘅日本料理，
所以搵日真係要約埋阿琪去返大埔嗰間《御八築地》度開餐先得！
哈～講開又講，自從上年生日去過一次之後，我就一直對呢間嘢念念不忘，
佢哋D食物高質得嚟款式又多，喺價錢方面仲十分大眾化，
喺呢度，誠意將佢推介俾所有鐘意食日本菜嘅朋友！