2007年9月8日星期六

好歌不厭百回聽 -【呂方好情歌演唱會2007】

等咗咁耐,呂方隻演唱會DVD終於都喺前幾日推出咗,噚晚同老母出去食完飯之後,
我第一時間就即刻買咗呢張自己已經期待已久嘅DVD返屋企,仲急不及待開嚟同老母一齊睇。
睇完晒呢三隻碟我只可以用五個字嚟形容,就係「完全唔夠喉」,
呂方喺呢個演唱會入面親身為大家示範乜嘢先叫做真正嘅歌者,
喺成場演唱會入面佢從頭到尾都係瀟瀟灑灑咁唱,相當從容,極之淡定,
佢唔需要歇斯底里嗌爆喉嚨,淨係自自然然將每個字唱出嚟,就好似同大家喺度傾緊計咁,
而且仲首首歌都咬字清楚,音準聲靚,一切就正如張學友所講,
佢話呂方根本唔需要一個華麗嘅舞台,亦唔需要刻意編排一啲花巧嘅舞蹈,
佢只需要一個人棟篤企喺個台度齋用佢把靚聲已經可以征服晒全場嘅觀眾。



演唱會最大嘅一個高潮位,當然係呂方請嚟天王級嘉賓張學友同佢合唱一曲「李香蘭」,
講開又講,其實喺若干年前,我經已覺得「李香蘭」呢首歌本來應該係屬於呂方嘅!
嗰陣我仲成日都會幻想呂方到底會用邊種方式嚟去演繹呢首歌,
估唔到喺N年後嘅今日我居然就有機會能夠欣賞到佢嘅翻唱版本,實在係太驚喜喇!

「李香蘭」呢首歌,張學友唱得好,李克勤、林志炫唱得更好,
而呂方嘅演繹更加係無懈可擊,講真,若果只係單單以「李香蘭」呢首歌嚟計嘅話,
學友哥就確實畀呂方比下去,因為相比起歌神恍如大刀劈樹葉一樣嘅鋒利唱法,
呂方嗰種淡淡然嘅演繹方式反而就將歌裡面嗰份半醉半醒嘅感覺真實呈現出嚟,
仰揚頓挫嘅聲調,加上佢每次唱完假音轉真音嗰陣嗰一下超自然嘅哽咽,簡直係正到爆廠呀!



除咗同張學友合唱「李香蘭」之外,呂方仲同倫永亮合唱咗「不要重播」同「沙沙的雨」兩首歌,
同樣係令人聽出耳油、繞樑三日(我指呂方咋~),至於佢其餘嘅經典金曲……
好似「流浪花」、「求妳講清楚」、「妳令我快樂過」等等就唔使我再花時間介紹啦!



經典固然精彩,遺珠亦不容忽視,都幾意外佢會喺個演唱會度唱「重遇」同「別了秋天」,
「別了秋天」係經典電影《秋天的童話》嘅主題曲,係一首好有意境令人百聽不厭嘅好歌,
而「重遇」就係呂方其中一首冇hit到嘅主打歌,亦都係本人最愛嘅一首呂方冷門作品。



國語歌方面,令我印象最深刻嘅就梗係我兒時第一首識得唱嘅歌「普通人」啦!
另外,當年喺台灣好流行嘅「老情歌」同埋曾經喺大陸爆紅嘅「朋友別哭」……
亦都係一啲令人聽出耳油嘅呂方國語經典金曲。

整個演唱會最後以一曲「聽不到的說話」作為結尾,
「妳叫我的心倒掛~Ah~」完美無瑕嘅絕妙假音,為今次演唱會畫上一個十分完滿嘅句號。
三隻DVD眨下眼就睇完,真係快樂不知時日過,不過比較可惜嘅係……
喺呢個演唱會度呂方就始終都冇揀到佢喺01年所推出嘅嗰一張專輯【Dear】入面啲歌嚟唱。
呢張國語碟嘅好歌有如恆河沙數,「Dear」、「聽回憶」、「眼淚有多重」……
同埋當年仲未成名嘅周杰倫同方文山寫畀佢嘅「悲傷的斜對面」,全部都係小弟嘅心頭好,
但係細心啲咁諗,查實佢唔揀上面呢堆歌嚟唱又係無可厚非嘅!
事關【Dear】呢隻碟當年喺市面又的確係從來冇流行過,只係我個人好鐘意啫!
頭先睇碟嗰陣,我同老母發現到一樣好好笑好得意嘅嘢,
就係我隻傻貓貓喺我哋睇緊演唱會嗰陣,竟然就一路伏喺個電視上面同我哋一齊聽好歌,
喺呢三個鐘入面,佢完全冇行開過,仲豎起晒隻耳仔嚟聽,條尾就起勢咁打拍子……
哈哈~我呢隻貓貓平時一聽到啲佢認為唔好聽嘅音頻就即刻會大發脾氣鬼殺咁嘈,
呢種情況大大話話都發生過廿幾次㗎喇!而以我觀察所見……
貓貓最討厭嘅三位歌手九成九就係盧巧音、何韻詩同許志安!哈哈哈~
所以話,阿呂方你都算巴閉囉~連隻貓都做咗你嘅Fans!
隨著羅文、張國榮同梅艷芳先後離開人世,譚校長亦早已廿五不再,
李克勤唔再係「零瑕疵」嘅代表,歌神學友同Lam叔把聲又一日比一日唔聽話……
咁喺而家嘅香港地仲可以去邊樹搵啲中文好歌返嚟聽下呢?登登登登~
答案就係嗱嗱林走入唱片舖買返張【呂方好情歌演唱會2007】嘅DVD返屋企慢慢嘆!
咁就唔使再四周圍搵㗎喇!好~臨瞓前又摷返啲呂方嘅舊碟出嚟聽下先!Good night~

15 則留言:

  1. 我得支持方方。。方方,加油呀~~方方噶歌聲真系唱得好好啊,我真系好中意距。一家噶歌手我已經好難穩到好似距噶唱功噶了。
    [版主回覆05/02/2009 17:21:00]雖然現在呂方的高音跟全盛時期比起來....
    好像少了一份通透感....
    換氣位亦急促了!~
    但就多了一份滄桑和濃厚的男人味道!~
    和以前比起來又是另一種風味!~

    回覆刪除
  2. Hi Hi,
    係呢隻dvd裏, 個首"重遇"唱得好好啊, 唱到呂方自己都有d想喊咁, 真係唱得好perfect。

    回覆刪除
  3. 非常同意!~~
    其實"重遇"已經係89年o既歌o黎o架啦~~
    但今時今日聽番仍然都係覺得好好聽!~

    回覆刪除

  4. 呂方唱歌真係好好, 佢既live係好聽過錄音好多好多, 好多歌星係錄音好聽過live, 我覺得佢而家成熟左, 實在係唱歌的黃金歲月。 
    點解佢可以唱得咁好架, 呢隻dvd裏面既星之歌medley、偶像, 唱得好得不得了,真係一粒音都冇走, 半節拍子都無luck過, 最緊要係有感情, 真係無話可說。
    唔好意思, 我都好長氣, 不過呂方真係低讚, 希望有多d機會聽到佢唱live。

    回覆刪除
  5. 絕對唔長氣!~~能夠搵到知音人實在係好難得!~
    我都覺得呂方唱Live比CD好!~
    當然CD佢都唱得好好...但Live就更有Feel!!~

    回覆刪除

  6. Hi, Time Time,
    你唔嫌我長氣就好啦。 睇番你寫到佢唱”別了秋天”,又係一首令人百聽不厭o既好歌... 我覺得呂方將首歌唱得好, 如果比第二個歌手唱, 未必會唱得咁好聽, 首歌好似好平淡,其實應該係好難唱得好聽,越平淡既歌, 要唱得好就越難啦, 呂方唱得好有feel。 
    同意呂方唱李香蘭比學友好, 感情更細膩,學友似乎係注重技巧多一些,好彩呂方係技巧上一d都唔執輸。

    回覆刪除
  7. 學友唱歌的確又係一流!~佢係強在夠全面!~
    我超鐘意佢o既"Cry","生命的插曲"~~
    ""這麼近(那麼遠)"同"她來聽我的演唱會"真係百聽不厭!!~
    但若單計"李香蘭"呢首歌o既演繹,響聲線方面我就嫌佢厚得滯~~
    我覺得克勤同呂方唱歌種style....就剛剛好非常適合唱呢首歌啦!~
    而呂方就更加係perfect!~只係得佢可以唱出"李香蘭"歌中o既故事!

    回覆刪除

  8. 對的,每個歌手都有自己的風格,唱啱自已style的歌, 就更完美嘞。
    咁點解你覺得呂方唱李香蘭好過克勤呢? 因我未聽過克勤唱呢首歌。

    回覆刪除
  9. 響2003-12左麟右李合輯中克勤有翻唱過李香蘭!~

    回覆刪除

  10. 張學友同李克勤唱呢首歌最高果粒音,好似都唔係假音,而係真高音。 呂方就係唱假音,不過好似有少少未到,可能真係好難唱到咁高既假音。  另外,由假音轉拆返去真音,呂方好似做得好d,有d哽咽既感覺,首歌當堂淒怨好多。我尤其鍾意呂方引嗓子唱”啊...”的時候,很通透、優美。 我已經 中左呂方毒,冇得救啦。

    回覆刪除
  11. 係呀~~佢果幾下好自然o既"哽咽"真係好正!~
    相比之下克勤唱呢首歌就有少少過份計算啦...

    回覆刪除
  12. 我今天介紹了呂方的一首好歌《君心知我心》,請來我的 blog 看看。
    [版主回覆06/11/2009 20:04:00]好!~

    回覆刪除
  13. Hello,我覺得你好勁,可以將d歌分析得咁仔細。
    而且,你隻貓都幾搞笑喎。
    另外,你咪話2001佢出左隻【Dear】,在邊度有得買。
    如有請詳述地址。Thank you !
    [版主回覆05/03/2009 21:26:00]你好!~好高興又認識到一位欣賞呂方o既知音人!~
    哈~~我呢隻反斗貓的確係好鐘意聽一D柔和o既音樂!~
    一聽到佢就會慢慢伏響度耳仔"旭旭"咁好陶醉....好好笑!~

    回覆刪除
  14. TO pinkykitty :

    另外...
    【Dear】而家應該好難有地方有得買o架啦!~
    妳或者可以去旺角D舊唱片鋪同HMV碰碰運氣!~

    回覆刪除
  15. 呢隻碟好多歌活活都好鍾意。唯一有少少不滿既係,不捨得你點解會改到變佐快版!
    [版主回覆05/22/2009 05:53:00]好同意呀!~好唔鐘意D歌手響演唱會度將D情歌夾硬改成舞曲!~簡直大失風味呀!~

    回覆刪除