意外的收穫 -《The Vanishing》

《The Vanishing》，中文譯名叫做《逝影驚心》或者係《神秘失踪》，

噚晚喺Cable HMC 1台無意中發現到呢部遺珠好片，
剛開始睇嗰陣仲以為呢套嘢應該會幾悶，但估唔到竟然一睇著迷。

套戲係講有一日，男主角Jeff嘅女朋友Diane突然離奇失蹤，令Jeff感到百思不得其解，
於是佢就決定用盡一切辦法都要搵返Diane，可惜時間一日一日咁過去，
Jeff就始終都係搵唔返個女朋友，呢份揮之不去嘅陰影一直深深困擾著Jeff，
以致佢喺後來即使同另一個女人發展，內心仲仍然沈溺喺追尋前女友下落嘅深淵裡面，
直到某一日，一堆迷離怪事就如魅影一樣跟隨喺Jeff嘅周圍，
然後當謎底一步一步揭盅，危機亦逐漸逼近，驚心動魄……

Cast

Kiefer Sutherland飾演男主角Jeff Harriman

咦～阿生乜面善呀！望真啲！哦～原來係大熱美劇《24》嘅男主角！失敬失敬！

Jeff Bridges飾演精神病綁架者Barney Cousins

呢位戲路縱橫嘅大叔出身於演藝世家，從影多年拍過近60部作品，
仲曾經四度提名奧斯卡，係一個名副其實嘅超級演技派。

Nancy Travis飾演Jeff新女友Rita Baker

我總係諗唔起呢位女士有乜嘢代表作，但係佢喺呢套戲入面嘅精湛演出就深深吸引住我。

Sandra Bullock飾演Jeff失蹤女友Diane Shaver

嘩～咁pure咁true嘅Sandra Bullock，你哋見過未呀？

成套戲實在有太多令人印象難忘嘅場面喇！
例如係Jeff因為綁架者主動求見，兩人終於有機會正式碰面，
一見面綁架者即提出一個要求，就係Jeff必須要坐上佢架車咁佢先至會願意透露Diane嘅下落，
喺毫無選擇嘅情況之下，Jeff只好冒險答應佢嘅要求。
抵達Diane嘅失蹤地點之後，綁架者又提出另一個要求，要Jeff飲一杯含有安眠藥嘅咖啡，
佢話要Jeff親自體驗一下失蹤者嘅感受，以作為佢搵Diane嘅最後一個條件，
面對呢一個如同送死嘅要求，諗唔到Jeff居然會乖乖配合，充分表現出佢嗰份不惜一切嘅精神。

嗰一位患有精神病嘅綁架者Barney，佢本身嘅身分係一名化學講師，
佢擁有一個相當美滿嘅家庭，但就經常都不甘寂寞，
有一幕佢喺架車度同Jeff講，話佢每一個家人都好尊敬佢，更視佢為偶像，
但係佢覺得自己做天使做得太耐，所以就忽然想試下做惡魔嘅滋味，其後仲開始實行佢嘅綁架計劃。

講真，我覺得Diane落得如此下場其實係有少少抵死，
當睇到Barney車上嘅一張家庭照，佢就誤以為Barney一定係一位正人君子，
跟著諗都唔諗就上咗佢架車，就係佢嘅一時好奇同疏忽，最終就釀成一場不可挽回嘅悲劇。

至於Jeff嘅新女友Rita係我喺套戲入面最鐘意嘅一個角色，

Rita同Diane嘅性格完全相反，佢為人謹慎，處事精明，又擅長玩心理戰，
我諗若然唔係Rita夠聰明機智，相信Jeff早就畀Barney送咗歸西。

整部電影令我最深刻嘅，係嗰種突如其來嘅心理恐懼，

呢套戲雖然甚少血腥鏡頭又冇鬼魂加持，亦甚少出現一啲嚇人必備嘅恐怖音效，
不過，單憑「唔聲唔聲嚇你一驚」呢一點，我認為已經足以令人極度心寒。

大家試諗下，若果有一日，你最愛嘅另一半喺你哋最相愛嘅時候突然無故消失咗，
然後你花咗三年時間用盡一切方法都搵唔到佢……嘩～都真係咪話唔得人驚！
直到而家我都仲係忘記唔到有一幕，就係當Jeff醒返所見到嘅嗰一幕殘酷事實……

我後來先知道呢套《The Vanishing》係一部重拍電影嚟，
佢嘅前身係嚟自88年嘅一部荷蘭驚慄電影《Spoorloos》。
嗱～套原版呢我自己就冇睇過，之但係我覺得呢部重拍版喺選角方面就確實係非常之一流！
好似飾演Jeff嘅Kiefer Sutherland就完全符合男主角嗰種戇直而又衝動嘅性格特質，
而飾演精神病綁架者嘅Jeff Bridges，佢嘅外表本身就夠晒陰沉，連化妝都可以慳返！

再嚟係女主角，即係飾演Jeff新女友嘅Nancy Travis，呢位女強人喺戲入面smart到爆嘅外型，
完全令人感受得到佢嗰份聰明同埋冷靜，咁當然佢本身嘅演技亦都十分好啦！

另外，呢部電影亦帶出咗一個問題：如果你係Jeff……
你會選擇冒住危險去飲Barney呢一杯加咗料嘅安眠咖啡嗎？
定抑或你會選擇立刻掉頭走，從此唔再探索前女友嘅失蹤下落呢？

呢部電影絕對係我喺今個禮拜最意外嘅一個收穫，好彩我有一路睇落去咋！唔係就真係走寶喇！