自問係一個好好嘅聆聽者，但就絕對唔會係嗰種24小時On Call嘅老友，喺我心目中，朋友只係一班用嚟傾計同玩嘅對象，唔使幫我擋兩刀，唔好問我借錢，同樣我亦唔會問你借，我認為做朋友（尤其係男人）千祈唔好涉及金錢、利益同女人，當個Friend有煩惱嗰陣，你只需要安份咁去做一個垃圾筒就經已好足夠。
我一向唔鍾意將「朋友」兩個字搞到咁複雜，平淡如水嘅友情向來係最靠得住，或者係個性問題啦！經歷亦都係一個重要因素。自細就迫住要單拖去處理屋企啲麻煩事，加上成日畀啲收數佬跟住，講真呀～以前邊度有人得閒理我講乜㗎？當時老豆老母長期唔喺身邊，另一方面又唔想嫲嫲擔心，久而久之，就會習慣咗孤身作戰嘅感覺，仲會變得好討厭同其他人交代近況，唔開心嘅時候，我只係想匿埋自閉休息下。
有好多朋友經常會投訴突然搵我唔到，唔知我到底發生咗乜事，對此我只能夠講聲唔好意思，事關小弟份人實在太需要私人空間，有時咁啱撞正嗰排負能量超標，亦唔想出去影響人哋嘅情緒，同埋喺朋友上我通常都會分得好清楚，玩嘅朋友、傾心事嘅朋友、食飯嘅朋友、網上嘅朋友，我通通會分得好明確，乜人係只適合群埋一齊吃喝玩樂？邊個係義氣仔女？我一早心中有數！
我冇可能逐家逐戶拍門去解釋，只有等唔明白嘅人慢慢去明白同了解我……相信喺而家班朋友入面，應該就得返一個住喺港島嘅青梅竹馬最了解我，話晒自細就識呀嘛！其次係肥龍同柏盛，而華Dee同我認識嘅時間雖然唔係好長，但唔知點解就異常咁夾；至於Miss黃，作為後輩，我真係唔想再加深佢嘅煩惱，所以每次見親佢都一定唔會將心裡面唔開心嘅嘢講出嚟，等佢可以全心全意同病魔搏鬥。
嗯～查實呢～喺呢個世界上，曾經仲有兩個朋友係好了解我嘅，但可惜，我哋經已冇機會再見面，時至今日，我仲係唔能夠接受呢個事實，正所謂時光一去永不回，往事只能回味，生老病死，係凡人一世唔會改變得到嘅命運。
坦白講，喺我嘅現實社交圈子，睇怕都冇乜朋友知我竟然會有寫Blog呢個咁姣嘅習慣，不過我又覺得……冇乜人睇到咁咪仲好囉！有時有好多嘢，又唔使下下講到咁白嘅！
諗返起以前同咁多位老友一齊圍爐隊啤打機玩通宵嘅日子，我都會感到好心甜，呢一點一滴，我係今生今世都唔會忘記，我知道我肯定唔會係一位好稱職嘅知己，但希望你哋會願意體諒一下我呢隻「冇尾飛陀」啦！
好～各位朋友，嘢我就唔再多講喇！總之大家心照不宣！Good Luck to all of us！
沒有留言:
不接受新留言。