我最愛的球員，始終都是你 - 麥馬拿文

最近有唔少傳聞話麥馬拿文可能會來港獻技，仲話會強勢加盟流浪，

我覺得前段令人雀躍，後段則令人笑爆，哈哈～又點會呀？講笑咩大佬！

當然我近排工作都幾忙，即使佢嚟咗，睇怕我都唔會抽到身去捧佢場，

但係聽到呢個消息，內心依然係好興奮，好想親身去一睹佢本人嘅風采。

查實講真呀～早幾年皇馬訪港老麥咪已經嚟過囉！
但當時有咁多球星睇，加上老麥又冇落場踢，先會畀啲人忽略咗啫！

唔經唔覺，老麥原來都三十有四，記得我首次接觸嘅足球賽事係94 World Cup，
而我第一隊追捧嘅球隊，就係十上十落嘅橙色兵團荷蘭，
然後當荷蘭八強不幸畀巴西踢咗出局，我咪唯有一心寄望班意粉佬幫我隊愛隊報仇囉！

只可惜最後……唉～蘿蔔頭巴治奧嗰球十二碼，到今時今日仍然係記憶猶新。

不過，如果要追溯到真正迷上睇波嘅嗰個階段，有一位人兄就一定不可不提！

佢就係今篇Blog嘅主人翁，亦都係Liverpool永遠嘅7號仔 - 麥馬拿文。
90年代中期嘅Liverpool雖然正處於一個非常低潮期，
但佢哋極為悅目嘅打法就深深吸引住我，更令我成為利物浦球迷至今。

當年利記班Spice Boy，即係老麥、科拿、列納、占士同麥卡迪亞……
佢哋全盛時期嗰時實在係各有千秋，列納嘅打法冷靜，有領導能力，又擅於處理自由球；
而科拿就具有神一樣嘅射手觸覺同把握力，至於老麥就係少數擁有秀麗腳法嘅英倫球員，
佢可以一個人連續扭過幾個對方後衛，而且活動範圍又夠大，分分鐘令人防不勝防。

咁我鍾意老麥嘅最大原因係乜？答案好簡單！因為喺呢個世界上……

真係冇邊個可以好瀟灑咁扭住波嚟撥頭髮咁鬼有型，

就以球王施丹為例，佢扭波係好勁呀！但慘在冇髮可撥呢！XDXDXD～

喺1999年，老麥為咗6萬鎊周薪而運用Bosman條約離開利物浦轉投皇馬，

呢個無情嘅決定，確實係傷咗唔少利迷嘅心（包括我），
而自從三大辣仔老麥、科拿同列納先後撤離晏菲路，
基本上我大部分時間就只會focus喺利記啲賽事度，
係有時老麥、科拿或者係列納效力隊波有比賽我先會睇下。

公平啲講，其實老麥去到皇馬都唔係一路冇正選嘅，尤其喺第一季都算係球隊主力嚟㗎！

表現唔錯之餘仲入過唔少金球，又協助皇馬攞過兩次歐聯冠軍，
到後來，隨住費高、施丹同朗拿度呢三條煙相繼加盟，老麥先正式開始其板凳生涯。

從銀河戰艦降落地面冇耐，老麥就選擇加盟由奇雲·基瑾執教嘅曼城，

坦白講，老麥喺曼城嘅表現絕對可以用一無是處嚟到形容，
佢每次落場無論係有波定冇波喺腳都淨係識得手指指，簡直一啲建樹都冇！
而最終佢亦都只係喺曼城踢咗兩季，之後就冇再落班喇！

回顧老麥15年嘅足球生涯，我認為除咗伊雲斯同雲拿保斯之外，
就冇幾多位領隊識得點樣善用佢嘅長處。
有返咁上下波齡嘅球迷應該都知道，老麥嘅最佳位置從來都係中場自由人，
夾硬將佢放喺兩邊打翼根本完全發揮唔到佢嘅優點，
對於麥記嘅遭遇，我只能夠輕嘆一句生不逢時，
相信佢若然唔係生喺英格蘭同埋撞正獌狗盛世嘅話，佢嘅成就肯定不至於此。

喺今年，科拿回歸利物浦令到一眾利迷驚喜萬分，
唔知老麥你又會唔會有機會……喂！妄想下都得啩？

我最愛嘅球員，永遠都係你 - 麥馬拿文！

冇老麥，我唔會係利記球迷；冇老麥，我唔會係球迷。