完成咗一項歷史性嘅創舉，確實係可喜可賀！哈哈～
講起上嚟，真係好奇怪，每次我覺得克勤喺嗰一年最普通嘅歌，
嚟到903呢度通常都會得到一個唔錯嘅成績，
例如係「空中飛人」、「情非首爾」同埋今年嘅「花落誰家」，
但唔知係咪知道自己首歌畀人夾硬降咗級嘅關係呢？
所以克勤同上年一樣都係冇出席到頒獎禮，
我唔知其他人點睇，個人覺得佢呢種做法簡直係明智之舉！
嗱～先唔好講呢個台公唔公平係咪做馬先啦！
基本上903又好，TVB又好，RTHK又好，METRO又好……
每個台都一定會有佢哋特別偏好嘅歌手，只係903做得出面啲啫！
講真，有時候冇獎都係其次，更重要嘅係……
一個一向都唔buy你，甚至根本冇人當你存在嘅圍威喂party，你仲去嚟托咩？
好似你老友劉華咁年年貫徹始終，話唔去就唔去咁咪仲好！
呢個時間我依然都係喺工作中渡過，一直要等到而家先有時間寫少少嘢。
回顧喺07年嘅各樣嘢，我發覺我喺06年嘅心願其實大部份都算係實現咗，
而喺06年同自己許下嘅各樣承諾，我亦都差唔多可以話係全部做到晒！
工作方面，喺殯儀館同戲院之間，我就毫不猶疑揀咗入戲院學做放映，
喺上年仲先後幫咗兩間大公司做開荒牛添！首先係《維港巨幕汽車影院》，
呢間戲院喺剛開張嗰陣搞到有聲有色，勢估唔到唔夠一年就執笠玩完，
至於我而家做緊嘅呢間《The Grand Cinema》就係阿六叔開嘅，
我諗喺短期內就肯定唔使怕佢會突然摺埋，只係呢間公司啲人事關係認真係麻撚柒煩，
個個都藤㨢瓜，瓜㨢藤，又鬼死咁多是非，日日你搞我我搞你……
唉～好老實講，喺出嚟做嘢呢九年裡面實在係乜鬼都慣晒喇！
雖然成日要帶著個假面具做人確係非常之難頂，
之不過冇計啦！要搵食呀嘛！咪唯有繼續做一隻「披著狼皮的羊」囉！
愛情方面，同女朋友冷戰完畢之後，雙方嘅感情反而仲比以前更穩固。
友情同家庭方面，因為工作太忙嘅關係，
同朋友、家人見面嘅時間相對上少咗，多數都係靠電話聯絡，
而喺上一年同我見面最多嘅，就係我屋企嗰隻人見人愛嘅反斗貓。
老豆喺上年年中曾經入過深切治療部，仲做咗個「通波仔」手術，
幸好最後都大步檻過平安無事；Miss黃就持續同病魔戰鬥中，進展都幾良好。
另外，最近身邊有唔少朋友都紛紛結婚成家立室，
我喺度除咗戥佢哋開心之外，同時亦感覺到，時間的確係過得好快。
數一數喺06年所許下嘅承諾……
煙，我戒咗；酒，我飲少咗，而未完成嘅故事寫作，仍然都係未完成……
喺嚟緊呢一年，我嘅心願同上年一樣，
就係希望我每個家人、朋友包括我自己都健康快樂！
喺承諾方面呀……嗯～喺今年我就不如嘗試改善一下自己啲臭脾氣啦！
華記，既然你一早決定咗唔做咁我都唔再勉強你，
我都知個仆街死肥佬又的確係相當之老乜套兼賤狗格嘅！
師兄，祝福你以後萬事順利，要記住，即使你走咗，我哋都會係一世嘅老友！
但係唔好意思，喺度要出賣你一次喇！仲有阿肥！哈哈哈～08年一齊再繼續努力啦！
沒有留言:
不接受新留言。