2008年1月2日 星期三

2007年自我回顧

喺呢度首先要恭喜哂克勤!恭喜佢第二次喺叱吒頒獎禮得到一首「季軍歌」!
完成咗一項歷史性嘅創舉!真係可喜可賀!哈哈~

講起上嚟,真係好奇怪……每次我覺得嗰年克勤好普通嘅歌……
喺903就通常都會得到一個唔錯嘅成績!
例如係「空中飛人」、「情非首爾」同埋今年嘅「花落誰家」……
哈~唔知係咪因為知道自己首歌俾人夾硬降咗位嘅關係呢?
所以今年克勤就同上年一樣都係冇出席到頒獎禮……
不過我自己就反而覺得佢咁做實在係明智之舉!
先唔好講呢個台公唔公平係咪做馬先啦!
基本上903又好,TVB又好,RTHK又好,METRO又好……
每個台其實都有自己特別偏好嘅歌手!只係903做得出面啲啫!
但係有時候我就覺得……冇獎都係其次!最重要嘅係……
一個一向都唔buy你,甚至根本就冇人當你存在嘅自己人派對……
咁你仲去嚟做咩啫?講真呀!就算佢哋夾硬俾個獎你都冇意思啦!
好似劉德華咁年年唔去就唔去咁咪仲好!不過點都好啦!再一次恭喜哂克勤!
話咁快又到新嘅一年喇!同上年一樣……
呢個時間我就依然都係喺工作中渡過,所以就要到而家先有時間寫下嘢!

回顧自己喺07年嘅各樣嘢……我發覺我06年嘅心願其實大部份都算係實現咗!
而喺06年同自己許下嘅承諾……我亦都差唔多可以話係全部做到哂!

工作方面,喺殯儀館同戲院之間,最後我都係揀咗戲院!
上年仲先後幫咗兩間大公司做開荒牛添!我第一間做嘅《維港巨幕汽車影院》……
呢間戲院剛開張嗰陣可以話係做到有聲有色,但勢估唔到唔夠一年就執笠玩完!
哈哈~至於我而家做緊嘅呢間《The Grand Cinema》就係阿六叔開嘅!
所以我諗喺短期內就肯定唔使怕佢會突然摺埋!不過呢間公司啲人事就真係好鬼麻煩!
個個都藤㨢瓜,瓜㨢藤……仲好鬼多是非!成日你搞我我搞你……
唉~但講真呀!喺出嚟做嘢呢九年裏面其實我真係乜都慣哂!
雖然成日要帶著個假面具做人真係非常之難頂!
不過冇計啦!要搵食呀嘛!咁就唯有繼續做一隻「披著狼皮的羊」啦!

愛情方面,同女友冷戰完畢之後,雙方感情反而就比以前更穩固。

友情同家庭方面,因為工作太忙嘅關係……
所以同朋友、家人見面嘅時間相對地就少咗!多數都係靠電話聯絡!
至於而家同我見面最多嘅……就反而係我屋企嗰隻反斗貓!哈哈~

老豆上年曾經入過心切治療部,仲做咗一個「通波仔」手術……
不過幸好最後都平安無事!而Miss黃就仍然一直同病魔戰鬥緊,但就進展良好。
另外,最近身邊有唔少朋友都分別結婚生子!
我喺度除咗戥佢哋開心之餘,亦感覺到時間真係過得好快……

至於喺06年我同自己許下嘅承諾……
煙,我戒咗!酒,我飲少咗!而未完成嘅故事寫作,就仍然都係未完成……

喺嚟緊呢一年,我嘅心願依然係同上年一樣!
就係希望我每個家人、朋友包括我自己都健康快樂!

至於承諾呀……希望我喺今年可以好好改下自己啲臭脾氣啦!哈哈哈哈~

頭先同成班同事又去咗打邊爐,當係送別華記……



華記,既然你真係決定咗唔做咁我都唔再勉強你喇!
我都知個仆街死肥佬又的確係非常之老乜套兼賤狗格嘅!
華記,希望你以後事事順利啦!要記住,即使你走咗,我哋依然都係一世嘅老友!
不過,唔好意思!要出賣你一次喇!仲有阿肥!哈哈哈~08年一齊再繼續努力啦!

沒有留言: