2007年12月3日星期一

「國民歌王」周華健 與「歐香女郎」葉璦菱

周華健、葉璦菱,近排我真係中哂佢哋兩個嘅毒,
日日夜夜都喺度狂煲呢兩位實力派唱將嘅歌……

「國民歌王」周華健  
我一直都覺得周華健個唱腔好鬼死怪,
似哭非哭,似笑又非笑,但同時又有一份莫名奇妙嘅吸引力,
更神奇嘅係,佢就算係笑著咁去唱一首悲情歌,都照樣有本事可以感動到人喊
記得我第一張買嘅周華健唱片,就係呢一隻《聽健16首》,
呢張廣東精選裡面所收錄嘅首首都係百聽不厭嘅絕頂正歌
『濃情化不開』『為愛情受傷』『誰叫我』『海角天涯』……
絕對係首首經典,但以全隻碟嚟講我就比較鍾意兩首盞鬼少少嘅作品多啲,
呢兩首歌分別係『新天長地久之男大當戀女大當愛』同埋『有過去的人』
會迷上『有過去的人』,或多或少係因為阿華健哥喺歌入面個唱腔實在係型到核爆
『新天長地久之男大當戀女大當愛』係本人唱K嘅其中一首必唱曲目
呢首歌嘅歌詞密度比克勤首急口令神曲『Victory』仲要密
我唱嗰陣通常都可以勉強唱到晒成首歌嘅歌詞,但就成日唱到好似數白欖咁!哈哈~


呢隻精選仲收錄咗一首好感人嘅冷門歌叫做『月滿 』
「願世間常歡 床前明月多滿 月兒沒膽說傷感的一半 
 完全忘卻也罷 便能描畫夢裡的畫 是這幅畫 即使太完美似虛假」
嘩~齋睇啲歌詞已經冧到暈,用佢嚟求婚肯定實食冇黐牙!


咁當然,周華健好聽嘅歌又點止咁少呀!除咗情歌同搞怪歌之外
佢所唱嘅一堆武俠劇主題曲好似『刀劍若夢』呀~『難唸的經』呀~『風笑痴』呀~
同埋2006年《神鵰俠侶》嘅主題曲『江湖笑』等,每一首都極具風格,
尤其係『難唸的經』份歌詞我只能用八個字嚟形容,就係「精緻美妙,無與倫比」。


其實,我一向都認為周華健嘅聲線同唱腔……
比鄭少秋、關正傑同羅文都嚟得更有江湖味/大俠格,
呢種渾然天成嘅特質配搭一啲武俠劇主題曲/插曲聽起嚟確係份外瀟灑,
而喺佢唱過嘅所有武俠劇主題曲/插曲之中
我自己最鍾意嘅就係《95神鵰俠侶》首
主題曲『神話‧情話』
喺呢首歌入面,周華健同齊豫嘅合作都稱得上係空前絕後,火花四濺。

要數周華健最為人熟悉嘅作品就梗係要提下佢堆國語金曲啦!
若果大家有興趣想了解一下呢位台灣國民歌王嘅風光威水史
咁我就建議你哋可以走去唱片舖搵下佢喺03年推出嘅一張3CD精選輯
個碟名叫做
周而復始》,喺裡面一次過包含晒周華健各個時期嘅國語經典
例如係『讓我歡喜讓我憂』『花心』『明天我要嫁給你』
『愛相隨』『朋友』『有故事的人』『不願一個人』等等……


不過我最愛嘅周華健國語歌反而唔係以上呢堆經典而係上面呢首Sad到爆嘅『終於』。

呢首歌係收錄喺朋友專輯裡面,係一首極之悲情嘅催淚作品,
周華健喺歌入面有血有肉嘅演繹,將歌中主角嗰一份無奈同心碎完全表露無遺。

周華健嘅好歌真係數極都數唔完……
所以,講多無謂!呢幾晚實行要將呢堆CD全部重新聽一次先得!

「歐香女郎」葉璦菱 
 
葉璦菱……我諗喺香港應該冇乜人有聽得佢個大名,
但係呢位阿姐以前喺台灣嘅知名度認真係唔講得笑! 
 
葉璦菱喺全盛時期曾經被人稱之為係蘇芮之後最有實力嘅台灣女歌手
當時一啲台灣媒體仲好誇張咁話:
「如果葉璦菱早十年出道嘅話,咁華語歌壇可能就唔會有歐陽菲菲呢個人嘅出現。」 
由此可見,當年佢喺台灣樂壇嘅矚目程度確實係相當之高。
 
至於葉璦菱喺嗰陣點解會有一個稱號叫做「歐香女郎」呢?
咁就要追溯返佢仲未成為歌手嗰時嘅一段往事……
喺1985年,葉璦菱遠赴法國拍咗《歐香咖啡》一系列嘅廣告
然後廣告一出街,佢獨特嘅都會女郎形象即令佢一炮而紅,情況就好似郭富城初出道咁。
講開又講,葉璦菱後生嗰陣又的確係幾靚幾有味道
仲有一份難以形容嘅特別氣質,所謂天生食娛圈飯咪就係佢呢種人囉!
 
講返我對葉璦菱唱功嘅評價,我覺得佢嘅歌聲之所以吸引到我,
係因為佢嘅唱腔多變而且聲音又極具穿透力,感覺上有啲似香港嘅一代歌姬梅豔芳
別樹一格嘅演繹方式豪放中又略帶點深情內斂,獨特沙啞嘅聲線更加係令人一聽難忘。
佢嘅唱功極之穩定,低音、中音、高音、和音辧辧有
當佢唱Live嗰陣,即使冇好似杜麗莎同甄妮咁樣嗌爆支咪
我哋就仍然能夠感受到佢嘅氣量同音域之廣


要見識葉璦菱嘅音域有幾廣,我建議大家可以去聽下佢嘅成名作『因為……所以』
呢首歌從低音到高音成個轉折嘅處理都好一絕,亦充分表現出歌中嗰一份應有嘅張狂。

 
葉璦菱嘅好歌,查實仲有好多㗎
『喊』『我想』『七月雪』『愛我別走』
『請你帶走』『停不了的愛』同埋『我心已打烊』……
首首都係令人回味無窮嘅極品佳作!
喺葉璦菱嘅芸芸好歌當中,我最鍾意嘅始終都係佢嗰首『殘缺的溫柔』
我對呢首歌嘅形容係:「由第一粒音到最後一粒音都係咁好聽。」 絕無任何誇大成分!
 
計我話,聽葉璦菱同周華健唱歌,簡直係有今生冇來世呀喂!

5 則留言:

  1. 好鐘意佢一首歌難唸的經,唔知有冇記錯歌名?(笑)

    回覆刪除
  2. 當年的天王殺手....

    回覆刪除
  3. 傻吓、傻吓、貓貓頭2009年5月20日 上午11:26

    好 surprise .. .. .. 香港 yahoo 裡面竟然有人喜歡葉璦菱 !!佢磁性嘅聲線真係好正!!合唱歌“喊”火星人覺得尤其好聽!!

    回覆刪除
  4. 佢首南龍北鳯先係正野

    回覆刪除