穿著窄身西裝的潮店老闆 - 李克勤三十周年紀念專輯《30克》

我對上一隻買嘅克勤唱片，數數手指，已經要數返去2013年嘅《復克》。其實，自從畀陳詠謙大師首〈姐姐〉嚇親之後，搞到我有一段時間唔太敢再去接觸克勤嘅新歌，而事實上，除咗〈鑽石人生〉 、〈紙牌屋〉、〈生活大爆炸〉同〈戀愛為何物〉之外，克勤喺2012年至2015年呢段期間所推出嘅嗰堆作品，我真係大部分都聽唔入耳！

喺新專輯方面，今年克勤嘅舊公司環球就幫佢出咗隻《復克II》。我起初見到隻碟個封面咁有型，都有少少興趣將佢買返屋企！但當我仔細咁望一望啲曲目之後……妖～原來全部都係揀返佢喺《我是歌手》唱過嘅嗰堆歌！咁都唔只，喺隻碟入面，克勤仲要首首歌都係用埋啲死人罐頭式唱法去演繹，所以我只係試聽咗一陣就頂唔順要放低個耳筒。

喺上年6月，當克勤對外宣佈將會加盟英皇娛樂嗰陣，有唔少勤迷都唔太相信同願意接受呢個事實。嚟到今日再調返轉頭一睇，唔知大家又覺得克勤當日呢個決定又有冇為佢嘅歌唱事業帶嚟一啲新嘅衝擊呢？嗱～我份人就唔係咁市儈嘅！佢嘅轉會費有幾多？夠唔夠供兩個仔去外國讀書？呢啲嘢真係關我餐蛋治咩？我哋做歌迷最關心同最在意嘅就梗係佢啲歌嘅質素啦！當舊公司環球仲喺度不停炒緊冷飯嘅時候，新東家英皇就一心要打造一個全新面貌嘅李克勤出嚟。於是，佢哋就搵咗喺咁多年以來一直同王菀之合作無間嘅馮翰銘（Alex Fung）幫佢監製呢一張蓄勢以待嘅頭炮大碟。呢位80後音樂才子喺過去為王菀之同容祖兒等歌手寫過好多膾炙人口嘅hit歌，亦幫克勤監製過唔少作品，而我先前提及過嗰一首嚇到我打冷震嘅驚世巨作〈姐姐〉，剛巧就係出自呢位人兄嘅手筆。所以，當我知道克勤隻碟將會搵佢做製作人嗰時，個心就當堂涼咗一截！喂～你兩位大哥唔係諗住又玩返喺《在森林和原野》入面玩過嘅嗰啲花臣吓嘛？唔好喇啩！我當年就係畀呢隻碟嚇到我唔敢再買克勤嘅唱片，呢個陰影仲足足跟咗我五年咁耐！勤哥～呢隻話晒都係你嘅三十週年紀念專輯呀～唔好搵啲咁嘅嘢玩好喎！不過又話分兩頭，佢今舖冇走去搵陳詠謙同Johnny Yim做幕後班底，查實我已經要謝天謝地兼柯彌揭諦！

我諗係明眼人都睇得出，克勤近年係好有心想迎合一班後生樂迷，而出嚟個效果好唔好呢就真係見仁見智喇！你哋可能會覺得我喺度雞蛋裡挑骨頭，冇突破又話人哋不思進取，試新嘢又話人哋攞嚟搞！但大家仔細啲去諗下，一個四十幾歲仲要有兩個仔嘅已婚男人成日走去啲賣潮tee嘅boutique度揀衫，當大部分人都笑緊你衣不稱身嘅時候，你就仍然堅持要keep住行呢種路線。其實，所謂突破有好多種，無需要經常去做一啲同自己風格唔吻合嘅嘢嚟話畀人知你有幾緊貼個潮流！當你嘅大師兄張學友已經升華到識用餘生去愛嗰陣，你就選擇繼續喺廣東歌市場度不停兜圈，完全冇諗過去苦練下自己嗰口爛到爆嘅國語，反而樂此不疲咁屢次拎呢樣嘢嚟做賣點搞爛gag！更大煲嘅係，你本身擁有咁紮實嘅填詞功底，居然就接受到〈姐姐〉同〈你最重要〉呢類齋睇啲字就想作嘔嘅歌詞，仲要拎埋佢哋嚟做主打歌！計我話呢兩份歌詞莫講話張學友同陳奕迅，連尹光同朱咪咪睇到都唔一定會收貨啦！



記得當時我睇完克勤同陳詠謙幫〈姐姐〉平反嘅呢一段訪問，嗰陣我心諗：「點解你哋兩個可以用一個咁樂觀嘅心態去分析一件咁撚荒謬嘅事？」另一方面，喺訪問中陳生就解釋話〈姐姐〉唔係一首膠歌，而係一首Cult歌。哦～原來係咁呀！但聽完陳大師嘅呢番解說之後，就真係令到小弟更加摸不著頭腦喇！Ed Wood、Quentin Tarantino、三池崇史、園子溫……佢哋會唔會走出嚟同大家講自己係Cult片界嘅代表人物先？一部電影或者係一首歌Cult唔Cult，唔係應該由我哋觀／聽眾嚟定奪嘅咩？邊有人會咁唔知醜稱自己為Cult界乜乜乜㗎？同埋，我仲想講多樣嘢，就係以歌頌菲傭為題材嘅歌曲喺香港樂壇其實一啲都唔罕見！早喺N年前，林海峰同周博賢就分別寫過〈最菲精選〉同〈菲情歌〉，前者風趣抵死鬼馬到肉兼而有之，後者則道盡晒一眾菲傭離鄉別井嘅嗰份辛酸同無奈嘅心情。有時候，如果你啲作品係好嘅，自然就會有人欣賞，根本無須喺度諸多解釋（掩飾）。

陳詠謙有一段時間幾乎成為咗克勤嘅御用填詞人，亦明顯睇得出克勤同樣都好欣賞呢位詞壇後輩，由買物寫到碌卡，由非凡人生寫到高山低谷，論創意論話題性，陳詠謙絕對係有嘅！有時我喺佢啲歌詞入面仲會隱約見到80's詞壇鬼才林敏聰嘅一啲影子。咁當然，同樣係創意無限，但兩人嘅寫詞功力同文字根基就實在係差天共地！若以電影人嚟作比喻嘅話，林敏聰就肯定係王家衛嗰種級數，而陳詠謙頂多只會係黃精甫、杜緻朗之流。我覺得阿陳生填啲詞係有構思亦有畫面，但就成日都好鐘意喺一啲稜角位度玩下花巧掩眼法嚟魚目混珠，好似〈天河〉呢類輕輕幾筆帶過嘅小品，可能仲畀你呃呃騙騙過到骨，再深入寫落去嘅話，就難免會漸漸出現破綻百出嘅情況，不停喺唔應該落筆嘅地方落筆，感覺上似係喺度玩緊填字遊戲咁，尤其係喺早年，佢就更加將呢種特色推到極致，每次只係將所有啱音嘅文字都放入首歌裡面，然後就搏命左塞右塞，完全忽視咗成份歌詞嘅結構同內容，呢種空洞、鬆散嘅寫詞手法，喺當時唔只辣㷫一班資深樂迷，同時亦惹嚟唔少年輕網民給予負評。

面對洶湧而來嘅劣評，陳詠謙當時嘅選擇就係立刻搬晒成個樂壇出嚟做掩護。每次睇見陳大師出嚟做訪問嗰個沾沾自喜嘅招積樣同埋佢嗰一份莫名其妙嘅自信嗰陣，都會不其然令我諗起林子善喺電影《半支煙》入面嘅一段對白：「嘩～你咁春蠢㗎！厄爾尼諾現象都唔知點解！嗱～厄爾尼諾現象呢就即係話……好Q勁咁解！」識得固步自封當然係能夠永遠處於一個不敗之地，但如果連半句批評都包容唔到嘅話，咁成個香港樂壇同啲圍威喂嘅小圈子選舉又有乜嘢分別呢？咁我都好明白，有某班音樂人真係周身都係G點㗎！最鐘意就係將啲問題推晒落班樂迷身上，責怪人哋理解能力低，先無辦法領悟到佢哋嘅境界，然後繼續肆無忌憚咁亂寫一通，呢班人心裡面最想得到嘅唔係樂迷嘅用心支持，而係需要一份居高臨下、萬人膜拜嘅假風光。喂～你班大帝自我感覺良好，呢啲係閣下嘅事！我哋唔一定需要奉旨配合你㗎吓話？一個消費者用真金白銀去買咗一張正版唱片返嚟，唔通就連想寫下真實嘅內心感受都唔得？嘩～咁你班人咪仲惡過共產黨？

大家唔好以為我對香港大部分嘅填詞人都好有偏見，亦唔好以為我係一個只會懷緬過去嘅人，相反，我一向都好尊重一啲用心創作嘅好詞人，佢哋喺文字早就差唔多畀人用盡嘅時候仍然可以定時交出一堆好作品，單係呢一點已經令我深感佩服。仲有就係，舊一代嗰堆填詞人雖然的確喺樂壇立下咗好多豐功偉績，但亦唔代表新嗰批後輩就肯定個個都冇貨賣，好似小克、林若寧、周博賢、Tim Lui，同埋喺克勤今次隻碟度包辦咗大部分歌詞嘅梁栢堅，佢哋個個都係喺2000年後先開始寫詞，亦一樣寫過唔少令人留下深刻印象嘅好歌。

李克勤 X 梁栢堅，當住家好男人遇上爛鬼作詞人，到底會產生啲乜嘢化學作用出嚟呢？望一望梁栢堅幫克勤寫嘅嗰四份歌詞……嗯～可能係為咗遷就克勤嘅風格啦！又或者係克勤本身都唔想喺呢張三十週年大碟度搞咁多風風雨雨……所以，向來詞風挑釁又踩界嘅PK（梁柏堅）今次就好明顯比以前「規矩」咗好多！既冇寫出好似〈C餐〉呢類抵死到肉仲將啲字玩到出神入化同〈篋神〉呢類盡情諷刺時弊又極具爭議性嘅歌詞，亦唔見有〈雲圖〉呢種寫得咁細膩同有意義嘅作品，但係喺〈恭喜你〉同〈30克〉入面，我哋就依舊可以睇到呢位惡搞詞神鬼馬風趣嘅一面。

或者係我個人真係已經out晒date啦！當身邊有好多後生仔都走埋嚟同我講：「喂～阿叔！而家聽粵語流行曲就梗係旋律同編曲行先，其次就係Vocal，啲歌詞填得好唔好就冇乜所謂啦！如果歌詞對一首歌真係咁重要嘅話，咁你聽英文歌同埋日文歌嗰陣又知唔知人哋噏緊乜先？」嗱～即係唔係話我睇唔起香港個樂壇，亦唔係話外國嘅月光就特別圓！只係我想問下，自從流行音樂界國民教育「搞靚衫」開始大行其道之後，有幾多首廣東歌嘅旋律同編曲係勁揪到可以衝出國際先？自己嘅音樂都未做到人哋個水準就要啲聽眾跟你嘅步伐去行？會唔會開玩笑咗少少呀？好老實講呀～假如你張碟啲音樂係能夠做到達哥隻《麻木》咁嘅水平，我仲會同你理咁多其他嘢咩？我咁講絕對唔係要貶低香港啲作曲人同編曲人，而係假若按照班後生仔個邏輯嚟睇嘅話，咁點解詞壇大師林夕到今時今日都仲會畀人當係神咁拜？點解開親作品展嘅就大部分都係啲填詞人？你哋再諗遠啲，若然周杰倫冇咗方文山，佢喺華語樂壇嘅成就仲會唔會好似而家咁高？羅大佑同李宗盛之所以會畀人稱為大師，主要係因為佢哋喺邊方面嘅才華呢？再唔係嘅咪試下上網摷返舊陣時嗰啲乜鬼嘢《台灣百大唱片排行榜》嚟睇下囉！喺個榜上面排頭幾位嘅嗰幾張專輯，基本上一概都係以歌詞行先。

有好多時下嘅年輕人都認定我哋呢班老屎忽咁注重啲歌詞係一種行為上嘅倒退，但站喺我嘅立場嚟睇，身為一個土生土長嘅香港人，又點可能對自己最熟悉嘅語言毫無要求呢？我知道呢類咁主觀性嘅問題就算再繼續拗落去都係唔會得到一個明確嘅答案……與其再永無止境咁爭論落去，不如就嘗試尊重一下大家嘅諗法啦！正所謂鹹魚青菜各有喜好，聽歌呢樣嘢就從來都冇高低之分嘅！正如一碗拉麵最重要嘅到底係麵質，湯底定抑或係啲配料？相信每個人嘅選擇都會唔一樣！先唔好理人哋個準則係點，就只從一個客觀嘅角度去睇，我始終都認為，要成為一首流傳萬世嘅華語經典，係必須要具備好多條件，除咗旋律、編曲同歌詞，仲要配合埋天時地利人和同歌手本身嘅音樂Sense先成就到成件事。須知道音樂Sense呢家嘢就唔係人人都有嘅！咁若果你係冇嘅咪交畀你經理人同啲幕後人員去搞囉！要知道你個人幾叻都好，都要揀返啲適合你自己嘅嘢嚟做先得㗎！即係你唔會見到甄妮有一日會無啦啦走出嚟同人講佢要轉型去做一個熱力四射嘅勁舞Dancing Queen，趙傳喺個演唱會度亦唔會不停唱一啲超低音嘅歌嚟折磨觀眾，呢啲嘢真係唔可以亂咁嚟㗎大佬！你哋試幻想下，如果由第一日開始就將關正傑同張國榮啲歌冚唪唥掉換嚟唱，聽完包保嚇到你瞓唔著呀！

嘩～聽你咁講，好似李克勤呢類齋賣靚聲嘅歌手除咗繼續行演奏廳同發燒碟路線之外，咪即係點搞都係死路一條？咁就當然唔係啦！要數喺歌詞上嘅重大突破，2009年嘅《Threesome》絕對係當中嘅表表者，而成件事亦好適合佢呢類感情比較內斂嘅歌手去做，特別係碟入面嘅第三Plug〈二十四城記〉，嗰種令人痛到入心嘅無力感真係一巴巴咁打落去嗰班經常批評佢唱歌似機械人嘅樂迷塊臉度。至於喺旋律同編曲上嘅重大突破，喺同年推出嘅《Today Special》專輯入面，克勤就請咗一班後輩歌手為佢度身訂造咗好多首唔同類型嘅歌曲，出嚟嘅效果仲相當唔錯，嗰份濃濃嘅麻甩佬浪漫情懷瀰漫住成隻碟，聽落去個感覺都幾過癮㗎！

可惜嘅係，呢兩張專輯喺當時所引起嘅迴響就唔係咁大，迫使佢後嚟又要走返去扮後生仔，而所揀嘅歌亦開始越嚟越商業化，一次又一次推翻自己嘅「西裝論」。直至近幾年，呢一位著住老西嘅潮店老闆仲經常會利用「撚聲」嚟取悅一班年輕客仔，好似今次呢隻新碟嘅第二Plug〈C3PO〉，就係一個好典型嘅例子。講真呀～呢種Gimmick大過一切潮童氣味又咁鬼重嘅「兵仔歌」若然係交畀方力申、周柏豪同吳業坤佢哋唱就OK啫！嗯～我諗古巨基都可以嘅！但係環觀成個香港樂壇，又有幾多把「不老童音」先？查實呢～阿勤哥喺N年前染晒金毛唱〈高妹〉，當時我已經覺得個feel有啲怪怪哋，更何況你而家差唔多成五十歲人先走去行埋呢啲兵仔路線，咁咪即係似足無記以前啲電視劇叫汪阿姐同司棋姐佢哋扮返學生妹，又或者係叫劉華唔著唐裝著Hip-hop，同埋要梁朝偉去演葉念琛電影裡面啲角色一樣！冇話唔得㗎！只係成件事望落去好Q夾硬囉！總之做嗰個又尷尬，睇嗰個仲尷尬！



相比之下，同樣由克勤所填詞嘅〈五十路〉就討好得多！雖然呢首歌嘅歌詞同〈C3PO〉一樣都係「歌名大過歌詞」，而喺內容方面亦都係冇乜中心點，跟住去到Chorus部分咪又係左砌右砌咁囉！幸好，輕快清新嘅旋律配上克勤悠然自得嘅寫意演繹，就成功幫呢首歌爭返唔少分數，聽完成首歌就好似遊完一場車河一樣，令人心曠神怡。


個歌手可唔可以將歌詞入面嘅意境帶到出嚟？佢把聲夾唔夾首歌？佢個人本身適唔適合做呢件事？呢三樣嘢確實係好緊要㗎！我夠膽講，而家香港有一半歌手唱歌嗰陣都唔係唱緊首歌入面所講緊嘅嘢！先唔講嗰啲五音不全淨係齋賣樣嘅偶像派，因為呢班人根本唔配被稱之為歌手！我家吓想講嘅，係嗰堆有啲資歷而唱功又有返咁上下嘅實力派！呢班前輩好奇怪，一到咗某個階段佢哋啲打公仔心態就會浮晒出嚟，每次出show就如同例行公事咁，有時都冇細心睇下人哋份歌詞寫乜就拎起支咪唱，總之求其唱啱晒啲音就算。我試舉一個例子，大陸有一位經常唱爆咪嘅巨肺歌后，佢個名叫做韓紅，呢支樂壇重型大炮曾經完成過一個極之驚人嘅創舉，就係用唱〈義勇軍進行曲〉嘅嗰一種方式嚟去演繹趙傳首〈我很醜可是我很溫柔〉，然後出嚟個效果仲恐怖過你入戲院睇十次《失眠》。睇到呢度，可能有啲學生哥會話：「喂～我哋係香港人嚟㗎！大陸嘅嘢關我哋叉事咩？」好！唔講大陸，就近近哋講返我哋香港本土嘅唱家班！記得幾年前喺一個乜鬼群星演唱會入面，葉振棠無啦啦就唔知挑起邊條筋走去翻唱楊千嬅首〈小城大事〉， 點知唔唱由自可，經佢一唱之後，小城大事當堂即刻變咗做好大件事！或者你又會話：「唓～王菲同Eason夠成日hea唱啦！咁點解人哋又唔會有呢啲問題呢？」係！我當然明白，有種人天生就係有本錢打天才波，所以陳奕迅唱現場即使有幾唔穩定，啲人都係照樣會仆街咁仆去睇佢嘅演唱會！無論佢唱得有幾衰，表現得有幾咁晦氣，佢有樣嘢就始終都係獨一無二，就係唔理你將乜嘢歌擺落去佢個口度，佢都可以將佢哋唱得好通順，永遠唔會畀人有一種好古怪嘅感覺。而王菲就仲犀利，我相信佢就算係企喺個台度乜都唔做，成晚淨係喺度依依哦哦，佢都一樣有本事可以感動到你！呢啲係天分，唔係話你想學就一定會學得到嘅！之但係好似佢哋呢一類能夠將腐朽化為神奇嘅天才型歌手，真係廿年都唔知出唔出到一個！

咁一個歌手如果冇天分，係咪即係等於乜嘢都唔使玩呢？嗯～又唔一定嘅！好似林憶蓮同張學友咁，一個係由零變有嘅最佳模範生，一個即使上到歌神呢個地位都仍然會不斷咁去發掘自己喺歌路上嘅無限可能性。咁若果你又冇天分但又唔想努力嘅話，咁又可以點呢？咁就唯有交畀你嘅Producer去搞囉！一個Producer嘅重要性究竟有幾高？你淨係睇下以前黎明同鄭伊健嗰堆hit歌就知道啦！另外，唔知大家仲記唔記得，郭富城喺出道嗰時咪成日都畀人話佢唱歌把聲似足雞仔嘅！但係佢就偏偏屎忽撞棍用呢把雞仔聲將一堆充滿少男情懷嘅糖衣情歌演繹得鬼咁入心！咁就證明咗一件事，所謂夾唔夾同唱功都唔一定係有關係嘅，即係雖則我就點都冇法子接受到麥浚龍同周國賢嗰種無病呻吟嘅扯蝦式唱法，每次聽呢兩位人兄唱歌都好想即刻走去買個氧氣筒畀佢哋！不過，人哋就至少係喺度唱緊一啲啱自己Style嘅歌，成件事睇落去都叫做係合情合理呀！反觀克勤……我唔知係佢本身嘅音樂Sense有問題定係佢班Producer有心整鬼佢啦！當好多小朋友都準備要考上大學嗰陣，身為教師級人馬嘅李生就竟然要走返去幼稚園學ABC！喺呢十幾年裡面，我經已唔只一次聽過啲製作人話要將李克勤慢慢tune返做一個正常人，而克勤本人似乎亦好樂意朝著呢個方向去行……到後來，呢班製作人就經常都會要求克勤唱得粗豪啲，甚至係搞爛自己把聲，務求達到佢哋想要嘅嗰種真實效果，卒之就將克勤嘅所有缺點暴露晒出嚟。



你話我個人保守又好，死板又好，刻意用一啲方法去谷出嚟嘅感情，又會有幾真實呢？再者，一個出色嘅Producer就應該同化妝師一樣，係要適當咁將Artist嘅缺點遮蓋，而唔係將佢唔好嘅地方畀晒人哋睇！喺呢方面，馮翰銘喺克勤今次隻新碟裡面就表現得相當稱職。將呢張《30克》反覆聽咗幾十次之後，我發現除咗〈C3PO〉 同〈一個都不能少〉之外，碟入面大部分嘅歌都畀我有一種煥然一新嘅感覺，無論喺曲風同唱法上都好有突破，同時又可以喺中間攞到個平衡，特別係克勤喺演繹〈恭喜你〉呢一類頹廢味比較重嘅歌嗰陣，唱起嚟就終於都唔會好似斯文佬講粗口咁，呢個轉變實在係非常之唔容易。

稍為有返少少資歷嘅勤迷應該都會記得，克勤自從開完04年嗰一次《左麟右李》之後，把聲就突然廢咗一半武功，以致佢後來每唱到一啲比較高音同需要用到「實聲」嘅歌嗰陣，通常就會出術用混音同假音輕輕帶過！而隨著年紀變化，佢嘅唱腔同埋用聲嘅方法亦同以往有好大分別，佢啲假音同混音聽起嚟個feel十分之陰陽怪氣，啲高音又變得好模糊同好唔集中，十足十啲漏氣耳筒咁！喺呢段時間，克勤就作出咗好多新嘗試嚟keep住自己嘅人氣同賣碟量，例如係叫好又叫座嘅《演奏廳》系列同搵Eric Kwok幫佢轉過另一種唱法去迎合潮流，仲因此而得到佢人生第一個「金曲金獎」。

〈花落誰家〉嘅成功，就畀到克勤喺唱腔上有一個全新嘅啟發，並決定要繼續沿用呢種避重就輕嘅唱法去演繹歌曲，因而令到佢把聲長期都處於一個好唔自然嘅狀態，呢種冇神冇氣嘅情況一直要去到2009年先至有返少少改善。喺重傷過後，克勤嘅唱功就始終都係冇法子同佢「高清亮」嗰段時期相比。有見及此，當時環球就即刻將佢掟去Hi-Fi碟市場企圖混淆視聽，但就畀佢哋誤打誤撞殺出一條新血路，亦令我哋發現克勤嘅中音同低音原來仲未打柴，而且仲比以前更加醇厚同有味道。只可惜，與此同時，環球對佢投放嘅資源就明顯地減少咗好多，以致克勤喺各方面嘅發展都畀人有一種停滯不前嘅感覺。



直至兩年前，因為大陸嘅一個歌唱節目《蒙面歌王》，令我感覺到克勤嘅狀態開始有回勇嘅跡象。雖然《蒙面歌王》喺香港嘅評價絕對係閪多過Like，但一首有如行雲流水嘅〈富士山下〉，加上同容祖兒喺紅館嗰十二場好評如潮嘅演唱會，就成功省靚返克勤呢部「人肉CD機」個生招牌。而喺同Joey合作嘅過程裡面，我認為克勤或多或少都有受到呢位後輩所影響，尤其係喺唱法方面，除咗越嚟越跟貼到個潮流之外，同時亦保留到佢自己嘅個人特色。



吸收咗多位後輩嘅日月精華之後，克勤喺掌握一啲風格較為新潮嘅歌嗰陣就顯然冇以前嚟得咁拘謹！我自己就特別鐘意佢喺呢張新碟度同RubberBand主音6號合唱嘅〈黑膠〉，李克勤，繆浩昌（6號），一杯係入口溫醇嘅紅酒，一杯係口味濃郁嘅威士忌；一個係出道於黑膠唱片年代嘅資深前輩，一個係喺千禧世代崛起嘅80後Band友，估唔到呢兩把聲混合埋一齊竟然會毫無衝突同違和感，而克勤喺合唱嘅部分就更突顯到自己嘅靚聲特質。雖然有部分樂迷認為克勤嘅表現應該可以再Chillax啲，但個人就覺得而家個feel已經啱啱好，再Chillax啲就唔係李克勤嚟㗎喇！此外，亦想讚一讚馮翰銘嘅編曲實在係做得極其到位，柔和抒情嘅氣氛配合埋嗰堆鳩噏到上太空又懶有品味嘅歌詞，令成首歌聽起嚟個感覺就好似兩條中產麻甩走咗去一間好高級嘅清吧入面扮上等人，然後就坐喺個吧檯度拎住杯酒無無謂謂咁吹咗成晚水。「看！最簡單的對話是如此！」講得啱！有時候，麻甩佬傾偈啲內容本來就係咁Q無聊！



若果抽起啲歌詞，淨係留意〈給歌迷梁小姐的公開信〉嘅旋律同編曲，驟耳聽落去你或者會以為佢只係一首好普通嘅溫馨小品。不過，當大家細心嗒真下啲歌詞，就會發現喺呢層糖衣底下原來係暗藏咗一個鋪滿洋蔥嘅催淚故事喺入面。冇利用一啲Sad到爆嘅音樂同一堆慘絕人寰嘅歌詞去製造煽情效果，亦冇搬晒啲滿天神佛出嚟同你瘋狂說教，反而就以一種好輕鬆嘅態度去同一位已經唔喺人世嘅歌迷Say聲Hello，成首歌畀人個感覺好正面，嗰份感動係慢慢咁滲出嚟，雖然用詞簡單，但又不落俗套。



〈失魂記〉成首歌都畀我有一種似曾相識嘅感覺，尤其係前段同後段嘅旋律同陳奕迅首〈Shall We Talk〉真係至少有七成相似，而個編曲手法亦令我諗起Do As Infinity首〈Yesterday & Today〉。喺歌詞方面，林若寧就嘗試從枕邊人嘅角度出發，一步步咁去探索佢哋面對失智病患背後嘅嗰一份徬徨同無助，雖然寫得有啲平鋪直敘，但喺推進上就尚算自然流暢。旋律順耳入心，歌詞寫得感人，咁克勤嘅演繹喺成首歌入面又有冇起到畫龍點睛嘅作用呢？我覺得大致上都算OK，特別係喺開段嘅氣聲唱法，有感情得嚟又唔算好做作，慢慢咁將歌詞裡面嘅故事一層層表達出嚟，稍為有啲美中不足嘅……係每當克勤唱到一啲比較高音嘅部分嗰陣，把聲就畀人有一種乸乸哋嘅怪雞feel。



作為克勤加盟英皇後嘅首支單曲，〈一個都不能少〉喺質素上無疑係合格有餘。呢首歌嘅旋律悅耳流暢又易記，同時又Show到克勤一貫長氣嘅犀利好唱功。至於Wyman份歌詞論故事性就唔係咁強，需要配合埋個MV先可以令成首歌個畫面感大大提高，但就勝在簡單易明，喺結構上亦比其他作品較為完整，又能夠發揮到激勵人心嘅作用，絕對係一首不可多得嘅佳作！不過，將呢類風格咁鬼成熟嘅作品放喺呢張潮味十足嘅專輯裡面，畀人個感覺就有些少格格不入。



當我第一次聽到呢張紀念專輯嘅點題作〈30克〉，只係聽咗30秒左右，我就由心而發咁笑咗出嚟！先用七首經典勤歌做Background Music，再以A Cappella嘅形式去編排，成首歌個Concept都幾盞鬼，但聽落去又唔覺突兀，唯一缺點係首歌嘅長度太短，似足啲唱片公司特登將每首歌cut到淨返十幾秒嗰啲新碟試聽版咁。由出道、拍劇唱到做無記契仔拎勁歌金曲獎，再由老婆盧淑儀、偶像譚詠麟唱到阿叔食煙同蒙面啟賢，最抵死嘅係連送禮事件都搬埋入歌詞，中間仲要搵嚟譚炳文客串唱返兩嘴，當中嘅幽默係肯定要有返咁上下資歷嘅克勤歌迷先至可以感受得到！

《30克》好歌推介：黑膠、給歌迷梁小姐的公開信、失魂記、一個都不能少、30克


眨下眼就做咗克勤嘅歌迷廿幾年，睇住佢由有頭髮變冇頭髮，再由冇頭髮變咗做金頭髮又變返做黑頭髮，當中有好多轉變實在係令我有啲意想不到……

哈～我唔知道有冇人會有過我呢種感受，就係當你默默欣賞咗一個人好多年，然後到有一日你先漸漸發現……原來呢個人嘅思想、思路、思維同真實嘅一面同你一直以嚟所諗嘅完全係背道而馳！細個嗰陣我一直都以為克勤係一個天生嘅歌唱家，喺將來應該係會走Andy Williams嗰種路線，殊不知幾年前佢竟然走出嚟同大家講話自己嘅目標係想做一個爛gag歌王，仲話要學人開「棟篤唱」添！坦白講，作為一個廿幾年嘅忠實歌迷，除咗一啲個別嘅真心膠事件之外，我真係從來冇一刻覺得李克勤好笑過，我認為佢嘅強項就只有唱歌，他所演嘅劇集、電影同主持嘅綜藝節目，我通通都唔懂欣賞！

經過咗好多年之後，我先發現係我自己諗多咗！克勤其實係冇我想像中咁有藝術家脾氣，佢甚至比香港好多打工仔更能屈能伸！唱歌撈唔掂咪去拍劇囉！冇碟出咪走去做勁歌主持囉！做厭勁歌主持咩？我直頭撈埋講波佬都仲得！問你死未？

我諗克勤喺星光年代都曾經對自己嘅歌唱事業好有抱負，佢試過專誠走去美國學唱歌，嘗試修正震音過多同唱腔守舊呢兩個問題，又作出過好多大膽嘅突破，佢唱過搞Gag怪歌，唱過Jazz，唱過Blues，就連Rap都唱過！喺嗰陣佢啲高音粒粒都爆到盡，每次企喺台上唱歌都畀人有一種揮灑自如嘅感覺，我認為就只有呢個時期嘅克勤先至真正配得上「零瑕疵歌手」呢個稱號。但可惜，只能夠講句時也命也，克勤喺唱功達到最巔峰嘅時候反而就得唔到應有嘅輝煌成就，而1995年嗰十場票房慘淡嘅演唱會，仲搞到佢一蹶不振，之後個人就變得越來越莫薑……

可能係受到佢偶像譚詠麟嘅影響，喺2002至2003年當佢憑著〈高妹〉同左麟右李一躍成為最受歡迎男歌手，佢成個人嘅行事作風同待人接物嘅態度就突然嚟個180度改變！佢講嘢越來越圓滑，啲歌就越來越商業，畀人個觀感似係一個生意佬多過似一個歌手，而當有咗小朋友之後，佢嘅心態更加似足一個打工仔咁！我以前成日都會諗……假若克勤嘅偶像唔係譚校長而係張國榮，咁成件事係咪會即刻唔同晒呢？佢嘅人生同歌唱事業又會因為哥哥而起咗啲乜嘢變化呢？

曾經有一段時期，克勤「hea唱」嘅功力可以話係登峰造極！當我以為李生團火已經熄晒嘅時候，佢喺《蒙面歌王》首集嘅表現令我知道條友唔揸流灘原來係可以唱到咁嘅水準，之後佢上《我是歌手》同郎朗即席現場合作嘅〈我不會唱歌〉，就更加Show埋畀所有人睇其實佢仲有大把貨賣！喺近年有好多香港人都屌柒佢成日上大陸搵人仔，又話參加《蒙面歌王》呢類節目對於佢嚟講係一個恥辱，但個人就覺得……唓～家陣佢都係玩下蒙面啫～做歌手都要搵食㗎！仲有呀～唔上《我是歌手》唔通上《勁歌金曲》咩大佬？只要佢唔好學似某啲天王巨星咁……對住我哋香港人就亂鳩咁唱閪晒口面，然後上到大陸就即刻施展國粹玩變面咁咪OK囉！

數十年匆匆過去，到今日，睇見克勤依然堅持要走一條隨波逐流嘅商業路線，內心雖然都係會有啲戥佢可惜……但如果站喺佢個角度去睇，今時今日嘅李克勤就絕對稱得上係一個人生大贏家！佢有家庭有地位有身家有人脈，仲有車有樓有舖頭，圈中老友又多到數唔晒……而家佢得閒就同啲屋企人去下旅行，唔係就同老婆去英國睇下波，同兩個仔砌下Lego，呢種寫意嘅生活態度都唔知幾咁happy！

PS：部份照片係轉載自各大報章同李克勤嘅Facebook專頁。

我相信我絕對係大部分歌手眼中最乞人憎嘅嗰一類樂迷，雖然我同普羅歌迷嘅諗法都係一樣，都認為要支持自己鐘意嘅歌手，最直接嘅方法當然係行入唱片鋪買佢哋嘅正版唱片。唔同嘅係，一般歌迷對住偶像通常都會採取一種有讚冇彈嘅態度，再Die-hard啲嘅就直頭會帶埋隻碟去參加個歌手嘅簽名會，實行同佢哋嚟一個近距離接觸。有啲人會希望有一日可以同自己深愛嘅藝人成為朋友，有啲仲更加會將佢哋當係屋企人咁看待。而我嘅諗法就比較現實，我拒絕盲目崇拜，更討厭時下嘅造神文化，我欣賞一個歌手，就只會單純去欣賞佢喺歌唱方面嘅成就。至於佢嘅為人係點？佢嘅政治立場係乜？佢鍾意啲乜嘢球隊？佢有冇包二奶或者係畀帽人戴？我真係完全冇興趣知道！喺我心目中，歌手同歌迷之間只係一買一賣咁簡單，唔需要包含太多私人感情喺裡面，咁當然，好似林志炫呢一類對於我嚟講有特殊意義嘅歌手又另作別論。

我不嬲都有一個習慣，就係每次買隻唱片返嚟都會即刻將佢擺落部機度重覆聽十幾次，然後就會寫一篇短短嘅聽後感做一個紀錄。喺Yahoo Blog仲好鬼盛行嘅嗰段時期，都有唔少人睇過我所寫嘅一啲唱片聽後感。當年，我嗰種諸多挑剔十足百彈齋主嘅寫文作風，就曾經為我樹立咗好多「網上仇家」，有啲比較激進嘅歌迷仲試過瘋狂轟炸我Email同咒我死全家添！但我當時心諗……我本身又唔係啲乜嘢出名嘅Blogger，只係一個純粹鐘意分享音樂同電影嘅無聊人，況且我都係就返件事實話實說啫，又冇對任何人作出人生攻擊，區區嗰幾十隻網絡小螞蟻，真係怕佢有牙咩？所以喺往後嘅日子我就一直都堅持沿用返呢種風格去寫樂評／影評。直至近呢幾年，因為眼疾日漸嚴重嘅關係，我開始逐漸減產，有時就算係寫好咗一啲感想都未必會將佢哋放落去自己個Blog度。諗起嚟，自《紙牌屋》之後，我已經足足有四年時間冇寫過一篇完完整整嘅唱片聽後感，萬萬估唔到，事隔四年，我終於有意欲再次執筆寫樂評，而篇文入面嘅主角居然咁啱得咁蹺又係同一個人，世事往往就係咁鬼玄妙。

追加感想：話說噚晚我無意中見到有一位認識咗一段時間嘅舊Blog友喺佢嘅社交平台上分享我呢篇看後感，仲寫咗一大段文字去回首當年嘅一啲點點滴滴，真係諗唔到自己嘅文章曾經令到咁多人產生過共鳴，呢一切實在係太滾動喇！音樂果然係全世界最好嘅溝通語言！🎶

因為我寫嘅文章而令到更多人認識到一啲石沉大海嘅好歌同好唱片，呢個就係我一直堅持寫Blog嘅最大動力。✏