《破事兒》

噚晚開午夜場嗰陣終於落去睇咗呢套《破事兒》，
我覺得套戲比想像中好睇，冇外間D評語講得咁差，
將七個故事串連成一套戲擺上大銀幕，幾有創意同時亦都好冒險，
用一套咁嘅小本製作去同一眾聖誕大片對打，彭浩翔，你都算夠薑囉！

好～講返套戲先！呢七個故事，總括嚟講我認為只算係好壞參半……

《德雅星》
 
好Q無聊，完全唔知佢噏乜鬼…… 

《公德心》

最無謂，但幾鐘意佢拍出嚟個Feel，夠晒怪雞！

《不可抗力》

講兩夫妻性生活唔協調，好寫實但拍得好悶，
林海峰嘅聲音演繹非常抵死，相反田蕊妮爆粗就爆得好唔自然。

《增值》

全套戲最三級嘅一個故仔，
講一個嫖客同妓女互相產生咗一份微妙嘅感情，
色情場面絕對唔止2B級，但就遠遠唔及《色戒》激，
亦唔覺如外間所講咁刻意賣弄色情……
講真，做愛本身就係赤裸裸㗎啦！
露兩點 + 毛又有乜問題先？家陣未見過咩？ 

《做節》

口爆舌精哽死人？誇張得嚟又幾好笑，不過喺《增值》嘅片頭就有交代返……
其實《做節》就只係一場戲嚟，幽咗自己一默。

《尊尼亞》

好戇居，但唔知點解我笑咗，余文樂同陳子聰做得幾搞嘢，
而馮小剛同金培達嘅客串演出更加係一絕，真係估佢哋唔到呀！

《大頭阿慧》

拍得最有水準嘅一個故事，劇情簡單又感動到人，
尤其係結尾阿琪重遇大頭阿慧嗰一幕，
阿琪嗰種慚愧又羨慕嘅心情，確實非筆墨所能表達。 

大頭阿慧做人一向隨遇而安，而且仲乜都依賴晒阿琪去幫佢，
但係阿琪有好多時根本唔係真心去幫佢，但最後反而就誤打誤撞令阿慧得到幸福，
而一向精打細算嘅自己，喺感情路上就一直處處碰壁，
整個故事除咗帶出咗「世事難料」呢個道理之外，亦形成咗一種幸福同落寞嘅強烈對照。

演員方面，Stephy同阿嬌分別都撞啱一個合適嘅角色，做得幾好，
另外，Juno所飾演嘅車房仔亦都極之入型入格。

 
若要簡單咁去形容，呢套《破事兒》畀我個感覺就係兩個字：「寫實」。
做愛、爆粗、三點盡露呢D本來就係日常生活常見嘅嘢嚟，
喺現實生活中，何來三級制？我好認同某篇影評所講：
「看時或大笑，或黯然，看後趨於平淡，盡數化為回憶。人生豈不如此？」

整體嚟講算係拍得幾Fresh，同《出埃及記》相比完全係兩種style，彭浩翔，請繼續努力！