《The Grand Cinema》終於正式開幕！

千呼萬喚始出來，The Grand Cinema終於正式開幕！
為咗隆重其事，公司就同《Bee Movie》搞咗個簡單而隆重嘅首映禮。

首映禮當晩嘅場面可謂星光熠熠，有好多粒星都有到場支持，

當中就包括美國著名喜劇演員Jerry Seinfeld、曾志偉、徐克、
陳豪、谷德昭、湯盈盈、鄧梓峰、向華勝同劉家昌夫婦等等……
另外，當然就唔少得《蜜蜂電影》嘅兩位導演Steve同Simon啦！

除咗《蜜蜂電影》之外，嚟緊仲有萬眾矚目嘅《投名狀》首映禮。

噚晚戲院上上下下嘅員工簡直係做到甩肺咁滯，大家都想個開幕搞得好好睇睇，
而收工之後我哋成班機房同事就去咗打邊爐，仲個個都飲到貓晒！哈哈～

呼～飲飽食醉，又同各位講下戲經先！前晩，我喺公司睇咗一齣電影嘅試片，
套戲個名叫做《The Heartbreak Kid》，香港呢邊就譯做《真的想飛你》。

呢齣戲係講述喺現實世界入面有好多人，不論男女……
成日都好鐘意將個「愛」字隨便講出口，

有啲情侶仲往往都會因為一時衝動而走去閃婚，
然後過咗一段時間，當發現另一半嘅各種惡習之後，
佢哋就開始會覺得後悔，心諗：「死囉～呢舖真係中正大伏！」

總括嚟講，我覺得呢套戲個故事舖排都算唔錯，但係個結局實在寫得太差喇！
拍到好似趕收工咁，簡直係極度爛尾！至於喺演員方面，Ben Stiller依舊風趣抵死，
而飾演喪爆女友Lila嘅Malin Akerman亦十分搶鏡！嗯～成套戲我就畀60分佢啦！
即係如果大家只係想Relax一下嘅話，我諗呢齣戲應該都會幫到你嘅！