Goodbye My God！

Walk on walk on with hope in your heart～And you'll never walk alone～

噚晚喺歐聯決賽度真係徹底咁輸咗畀AC，
喺90分鐘內就畀人哋KO咗，確實係輸得心服口服！
不過，我認為我哋亦要畀返啲掌聲同鼓勵一班輸咗嘅紅軍鬥士，
事關大家都盡咗力，實在係雖敗不辱！

平心而論，其實利記成場波打得唔差㗎！而AC亦唔係話踢得特別好，

我覺得利記之所以會輸，唔多唔少係因為以下呢兩個因素……

一係賓Sir嘅戰術的確係好有問題！點解死都要出冇態嘅辛頓？
點解要換走Mark死KaKa嘅馬斯仔？點解要打單箭頭？點解成70分鐘仲唔肯變陣？

敗因二係利記班前鋒嘅把握力簡直係差到一個點！
講真呀～噚晚佢哋加加埋埋都有唔少埋門機會㗎！只係自己成日把握唔到啫！
唉～你睇下人哋恩沙基，淡淡定定咁就搞掂咗兩球啦！
咁當然，佢入嘅第一球到底有冇犯手球呢？對於呢一點我就有啲保留喇！

坦白講，而家利物浦班前鋒嘅射手觸覺仲有臨門嗰腳都唔算得上係好標青，
高治係幾有潛質，但畀我感覺佢始終都唔會成為一個頂級射手，
去到盡可能只會係一線尾二線頭，至於古治雖然係國腳級人馬，
又曾經做過荷甲神射手，而踢法亦夠機動而且又夠勤力，
但係佢喺把握力方面就硬係同班頂級射手有啲差別！

唉～睇住而家班友仔頻頻敗家，就更令我覺得「神真係冇人可以取代」。

科拿終於要走喇！唔捨得但亦都係意料中事……

我同好多人一樣，當年都係因為利記班Spice Boy而成為利迷，
此時此刻，要睇住一個自己咁鐘意嘅球員離開，內心當然係會有啲難受，
但與此同時，我亦好多謝賓Sir喺呢兩個球季入面畀咗一個咁難得嘅機會我哋一班利迷去「朝聖」。

神，永遠記得你喺23號仔年代對住阿仙奴嗰陣喺四分鐘內連中三元，

永遠記得你當年點樣射爆舒米高，永遠記得贏紐卡素四比三嗰場你同哥利摩亞有幾堅……

永遠記得有一場你用後腳Tick波過人然後再球不著地將個波抽入網，

嗰種感覺就有如《足球小將》入面嘅戴志偉一樣咁Amazing！

永遠記得喺97年嘅Cup Winner's Cup度你一入波就即刻除衫，
然後裡面件T-Shirt就寫著一啲支持利物浦市碼頭工人罷工嘅字句。

永遠記得你對愛華頓入波後係咁爬喺個地下度追龍嘅嗰個慶祝動作，

永遠記得有一場對阿仙奴，你喺禁區內跌低，跟住球證判咗個十二碼畀利記，
但係你就竟然走埋去同球證講話施文根本冇整跌你……

永遠記得你喺歐洲足協盃對亞拉維斯嗰陣幫利記追平嘅嗰一球，

永遠記得當年老侯同湯臣夾硬迫走你，令我憎佢哋憎到今時今日！

永遠記得你踢緊曼城嗰陣對49000入波後舉起五隻手指嘅嗰一幕畫面，

永遠都會記得你同老麥一齊合作嘅日子……

再見喇科拿！向著新嘅一方出發！你對利記嘅貢獻，我哋一眾利迷將會永留心中！

即使離開，你依然會係我哋心目中最尊敬嘅「利記之神」！God！You'll Never Walk Alone！