2007年5月16日 星期三

一首好歌 + 一齣好戲

最近,我認識到一首好好聽嘅新歌,又重溫咗一部好好睇嘅港產舊戲……
近排幾乎個個人都喺度談論緊《溏心風暴》呢套劇……
前排我上女朋友屋企同佢姪女慶祝生日嗰陣,除咗我同佢姪女之外……
佢哋全屋人就全部都眼定定咁望住部電視……哈哈~都真係咪話唔誇張!
好老實講,我自己就真係對呢套劇冇乜興趣喇!一嚟我一向都唔太好呢類死唔斷氣嘅爭產劇!
二嚟就係呢套劇啲演員嘅演技實在係太參差喇!前排我自己就好無聊咁睇咗幾集……
講真,我覺得李司棋、關菊英、米雪甚至係阮兆祥都算係交足戲……
但鏡頭一轉……一睇到「作狀王」夏雨、「Pose王」林峰、「懶音王」蒙嘉慧……
再加埋全世界演技最差嘅女演員鍾嘉欣!我就真係即刻冇眼睇!
坦白講,一個好劇本固然係好重要,但一班演員帶唔帶領到觀眾入局,其實亦都係十分重要。



雖然我對《溏心風暴》呢套劇真係冇乜興趣,但係我就幾鍾意套劇首主題曲「講不出聲」……
我覺得呢首歌同之前克勤所唱嘅「心計」,真係近年TVB最好聽嘅兩首劇集主題曲!
講真,其實「講不出聲」呢首歌本身個旋律真係唔算係好突出,而歌詞方面亦未見驚喜!
不過,關菊英出色嘅演繹就令到成首歌有番哂靈魂!真係好難得……
一個老牌歌手竟然可以將一首時下嘅流行曲唱到咁自然,令人聽落好舒服,仲一啲out嘅感覺都冇!

其實我一直都好欣賞菊姐嘅歌藝!由以前嘅「狂潮」開始就已經好欣賞……
佢把聲靚得嚟又夠磁性,唱歌咬字又夠清,而且仲好有感情!
講真,聽完菊姐唱歌之後,我真係好想同時下班偶像歌手講一句:「嗱!呢啲先叫做唱歌㗎嘛!」
另外,前排Cable就重播咗一套我己經唔記得咗好耐嘅好戲……
呢套就係由吳奇隆、朱茵同朱健鈞所主演嘅《那有一天不想你》!
我真係好鐘意呢套戲個故仔!自然真摯、笑中有淚又夠寫實,亦道出咗人生無常呢個道理。
今日同聽日都放假!哈哈~終於都可以盡情抖抖喇!
頭先女朋友就嚟咗我屋企煮咗餐意大利餐俾我食……
嘩~真係好有水準呀!真不愧係美女廚神!
不過,放完假番去……公司就會上嗰套韓片《醜女大翻身》……
OH NO!成116分鐘!慘啦呢次!

2 則留言:

  1. 那有一天不想你係我最喜歡的一部港產片(雖然好多人都話係爛片),不過我鍾意佢的主題,好溫馨,好真摯,好純潔!

    回覆刪除
  2. "溏心風暴" 嘻嘻 , 我曾經都係捧場客! 認同菊姐嘅歌藝真係一流 !!

    回覆刪除