欣賞康康（康晉榮）

第一次留意到康康呢個人，係喺吳宗憲嘅綜藝節目入面，
呢個樣衰衰但又風趣抵死，講野好慢但又思路奇快嘅主持人，確係台灣綜藝圈嘅一大奇葩。

雖然康康一啲都唔靚仔，仲曾經被選為全台灣最醜藝人第二名，

但係佢嘅才華就絕對係無可置疑，好似佢嗰種咁獨特嘅主持風格，其他人係想學都學唔嚟，
比如係佢嗰堆康康式嘅鹹濕笑話，配合佢樣衰衰嘅表情同動作，簡直係笑死人冇命賠！
我諗，如果呢啲笑話係由另一個人去講嘅話，或者已經唔係嗰回事喇！

除此之外，康康嘅扮嘢功力亦都係堪稱一絕，一般人模仿都只會拎人哋嘅歌聲同表情嚟做參考，
但康康就唔同，佢成日都好鍾意扮人哋講嘢同自編一啲天馬行空嘅爆笑劇情，
例如係學比莉姐講嘢、扮齊秦裝香，仲有一人分飾兩角製造陳昇、伍佰鬧交嘅場面等等，
我覺得喺台灣綜藝圈入面，康康、羅志祥加埋歐弟同光頭佬辛隆，佢哋都可以稱得上係台灣嘅四大模王。

雖則話康康嘅主持功力經已講得上係獨當一面，

不過我就始終認為佢都係喺吳宗憲身邊先發揮到自己嘅長處，
亦可能係佢主持親啲節目通常性質都好悶嘅關係啦！
講開又講呀～自從《周日八點黨》冇咗康康、NoNo同歐弟之後，
成個節目就即刻變得冇咁好睇，我深信只得憲哥一個人撐住，遲早都會有冇貨賣嘅一日。
唉～真係好懷念以前嘅「食字路口」、「無厘頭猜迷王」同埋「害你在心口難開」呀！

嗯～提起歐弟，唔經唔覺佢都入咗娛圈接近11年，
我不嬲都覺得佢才華橫溢又有heart，肯做夠搏又唱得，但唔知點解一路都紅唔到。

講返康康，我除咗好欣賞佢喺主持方面嘅才華，仲有就係佢鮮為人所認識到嘅歌唱實力。

唔講大家未必知！康康想當年係一個酒廊歌手，佢喺一間Pub度做咗11年主唱，
仲同老爹（外號迪克牛仔）、新一代嘅高音之神楊培安做過同事添！
之後佢喺1997年參加咗由《上華唱片》舉辦嘅《Pub英雄會》，
喺呢個比賽入面，佢總共打低咗106隊對手奪冠，繼而進入演藝圈，認真係巴之閉！

以前我淨係識得康康一首叫做「你不愛我」嘅歌，

但喺嗰陣，佢沙沙哋嘅獨特聲線就深深吸引住我。
佢唱歌時啲感情落得好夠，唱起悲情歌上嚟好到肉好有味道，

同佢平時主持綜藝節目個Character形成一個好強烈嘅對比，
望住佢認真唱歌個樣，確實會令人霎時間忘記佢扮鬼扮馬嗰時個衰款！哈～

最近，康康出咗一隻名叫《灰色調》嘅新歌+精選，

喺碟度除咗收錄咗佢嘅五首新歌，仲收錄咗佢嘅十二首精選舊作，
而且仲清一色全部都係悲情歌，100%配合返「灰色調」呢個主題。

喺新歌方面，我最鍾意係而家狂打緊嘅嗰一首主打「離開了」，

康康喺歌曲嘅開頭同高潮部分特登放咗佢女朋友一段喊住嚟講嘅獨白入去，
再配合埋成首歌嘅歌詞，成功將歌裡面嘅嗰份悲傷感推至頂點。
佢女友段獨白係就係作撞咗少少，但係我就幾認同康康嘅呢個構思，
一段女友嘅獨白，加上康康聲嘶力歇嘅呼喊，兩者融合起嚟就構成一種好真實嘅感覺，
其實喺你哋女人喊嘅時候，我哋男人一樣都係十分之唔好過，
但正所謂男兒流血不流淚，所以我哋只能夠用咆哮嚟到代替眼淚。

另一首新歌「自言自語」係一首怨曲味好重嘅藍調作品，

康康沙啞嘅聲線搭上好憂怨嘅Blue曲調，成件事真係完全match晒。

「自責」同「你我他」就只屬不過不失，冇乜特別感覺。

「別」嘅歌詞不禁令我諗起兩位忘友，而康康嘅演繹亦都算得上係可圏可點。

新歌固然出色，舊歌方面亦同樣精彩！由「兵變」、「圓夢」、「或許你是對的」……

到 「定時炸彈」、「你不愛我」同「孬種」，真係首首慘，首首灰，首首正！

而喺呢張碟入面嘅唯一一個敗筆……

就係收錄咗康康翻唱齊秦嘅嗰一首「夜夜夜夜」入去。
我一開始仲以為康康唱齊秦嘅歌個feel應該會幾正，
但原來我估錯晒！康康呢次嘅翻唱，實在係非常之唔掂。

但話分兩頭，「夜夜夜夜」呢首歌又的確係幾蝦人唱嘅！
除咗康康，我仲分別聽過巫啟賢同梁靜茹嘅翻唱，但畀我個感覺一樣都係好麻麻，
講真呀！我一向都認定原唱齊秦嗰一種好玄妙好飄逸嘅唱法，
喺華語樂壇上都好難有人超越到佢，連稍為相近啲嘅都冇。

仲有一點要批評嘅，係唱片公司竟然冇將康康唱嘅「藍雨」同「望你早歸」放落隻碟度，

呢一點就令我有少少失望，我認為呢兩首歌都算係康康本人嘅重唱代表作，
尤其係「藍雨」，佢嗰種無奈又帶點頹廢嘅演繹，將一份淡淡然嘅哀傷表露無遺，
相比起原唱張學友澎湃激情嘅演唱方式，又係另一種風味。

個人建議，假若康康今次呢隻碟賣得唔錯嘅話，佢間公司就可以諗下同佢出返一隻慶功版，

實行賣大包3CD+DVD！而另一隻精選，就將康康一堆好開心又好得意嘅快歌全部放晒落去，

好似「快樂鳥日子」、「恁姊仔住市內」同「電燈泡」呀等等！至於個碟名……
不如就叫做《快樂調》啦！或者係《彩色調》都得㗎！Sony Music，諗諗佢啦！哈哈～