《思念》：一封由「樂壇牧師」張信哲用心朗讀的佈道式情書 📖

在1997年1月推出的《思念》為張信哲的第十六張個人大碟，裏面的作品幾乎都是全新原創的粵語歌，可謂誠意十足。整張專輯以「思念」為核心主題，內容涵蓋了暗戀的苦澀、分手後的單戀、含淚的祝福，乃至於對宗教信仰的省思，風格非常統一，配合阿哲柔軟溫潤的聲線和療癒又帶點「佈道式」的唱腔，讓人不禁聯想到他的出身背景。

曾被公認為「全台灣唱廣東歌唱得最好聽的男歌手」，阿哲這次成功地把粵語流行曲那份應有的樂韻完完全全呈現出來，一股淡淡的遺憾感持續瀰漫，無須轟轟烈烈、呼天搶地的大叫大喊，已能徹底打進聽者的心靈深處。首波主打〈早知道愛上你〉浪漫而無奈，明知一切是白費力氣，卻仍舊無法自拔深陷其中；第二主打〈沒有人知的故事〉表面平靜如水，內心翻江倒海，張美賢所填的詞精準到位，直接描繪出各個暗戀者的日常寫照。阿哲在這首歌裏表現得特別克制，並沒有用誇張的哭腔去“賣慘”，感覺含蓄內斂，雖然副歌那句「直至此」當時被監製杜自持戲稱像「食廁紙」，但是，這種略顯笨拙的咬字，反而就更貼近歌中主角的心境；〈祈禱〉聽起來似在做晚禱，或是向上帝傾訴其孤單寂寞的心情，然而，來到〈背影〉一曲中，又一再質疑「祂」的存在，阿哲將箇中的矛盾詮釋得淋漓盡致，聽得人心揪揪。

悲傷過後，由高世章作曲、李敏填詞的〈朋友祝福〉彷如雨後陽光照耀著你的心窩，為你帶來巨大的慰藉和鼓勵，豈料下一首歌〈自你往年離去〉突然曲風驟變，憂怨纏綿的旋律配上弦樂編曲相得益彰，一陣失戀後的追憶與無力感層層遞進，教人痛徹心扉，另外，張信哲在此歌中亦完美展現其高音優勢，為一眾後輩親身示範什麼叫做「穿透而不刺耳」；〈如果你快樂〉曲式簡單不複雜，歌詞好記易上口，流行元素甚高，相當典型的香港K歌格局，令人不自覺地反覆細聽。

〈該怎樣愛〉的melody有點像〈城裏的月光〉，惟編曲相對平淡，不夠抓耳；〈感謝您〉用Waltz慢板舞曲作表層，歌詞方面也流露出滿滿的感謝之情，可是不知為何，當曲子快將接近尾聲時，我腦海裏卻忽然浮現出一幕畫面：於某個婚禮場合上，前一刻眾人仍沉浸在歡聲笑語和舉杯慶祝的氛圍中，隨後燈光逐漸轉暗，新郎、新娘及各賓客都陸續離場，僅留下難以言喻的空寂；〈如若我是他〉很有電影配樂的feel，流暢的真假聲轉換盡顯阿哲的歌唱功架；最後一首歌〈時差〉曲詞單調欠新意，從Intro>Verse>Chorus>Outro均無記憶點，唯一比較可取是跟碟內其他作品擺在一起尚算協調，並未有予人格格不入或濫竽充數之感。

回首當年，張信哲除了是台灣本土的賣碟王，還橫掃了港台地區多個重要音樂獎項，有見及此，EMI於96/97年就打鐵趁熱連續為他推出了兩張粵語專輯，希望可以藉此令這位情歌王子的聲音傳入更多華人的耳朵裏。可惜的是，阿哲的每一張粵語碟，不論是EMI時期的《深情》和《思念》，還是Sony年代的《到處留情》，以及由英皇娛樂發行的《雪國八月》，它們在香港的銷量均只屬平平，未能開創一個屬於他的廣東市場。

同場加映 - 15/1/2026 - 23/1/2026 生活寫真 📸

每日放工沖完涼之後嘅指定動作，幫Indie、Latte梳完毛，按埋摩，再剷乾淨屎兜，仲要準備好各種零食作伺候，先可以受到寵幸同兩位小公主聯誼一番。

點呀？力度OK嘛？摙得冧唔冧？需唔需要做埋腳？定order杯暖水，另加一條貓條畀阿靚女妳嘆住先？

嗯嗯～最近天氣好冷凍，本宮想出廳取暖，奴才你且退下！喵～

爸爸～爸爸～我唔要出廳呀～我要入房上床同你攬住一齊瞓！喵～

阿b個衰妹呢排越嚟越為食，每隔兩個鐘扭計要雜糧已經係等閒事，有次吼我返咗工，仲偷偷哋打開個櫃撥包魷魚絲落嚟慢慢嘆，畀我發現話佢兩句啫～就即刻扁晒咀扮可憐，認真吹脹！

不過講係咁講，定期去超級市場掃貨，確保家中糧食充足，係作為一個貓奴最基本要盡嘅責任。

分享吓呢幾日開工食嘅早午晚餐，首先係已被本人列入「堂食黑名單」嘅永年車仔麵茶冰廳，原因係乜？事關嗰度有個操鄉音嘅阿姐簡直串過碼頭咕哩，無啦啦用力掟張QR code單落枱唔在講，見到隔離枱有幾位老人家只係問少少嘢都畀條八婆呼呼喝喝，叫佢跟杯嘢飲就喺度阿支阿左口噏噏，卒之要我開口大聲話佢先至醒水，啲咁嘅爛鳩服務仲夠膽死收人加一服務費？想愴你個心呀！

半年前因檢出含過量蠟樣芽孢桿菌而被迫全線停售嘅「譚仔風味小吃」巴蜀爽脆生腸喺近日終於重新上架，實在可喜可賀。

位於沙田橫壆街1-15號好運中心3樓3093-3094號舖嘅不二江湖菜，晚飯時段嗌咗碟大盆花菜加碗白飯，盛惠$63，味道算係不過不失，叫做平時多個選擇囉！

早排去又一城攞DCP，見有啲肚餓，咪走去敏華冰廳食咗個傳說中嘅「黯然銷魂飯」，70幾蚊包埋羅宋湯，八個字：「空有虛名，不外如是。」

放假同姑姑到新港城三期lunch鬆一鬆，望住質素每況愈下嘅大壹招牌燒鵝瀨，只能輕嘆一句：「往事只能回味」。

多謝好上司華仔哥特登幫我keep起兩張Stanley Kubrick系列硬卡海報，超有心，勁感動。

據聞《反斗奇兵5》將排定於今年6月19號上映，我都好想睇吓班編劇究竟仲可以搞到啲乜嘢花臣出嚟？

上年其中一套備受注目嘅動畫電影《劇場版『鏈鋸人蕾潔篇』》，連Blog友inanna、芝都鍾意。

要數全宇宙最有型嘅雄性動物我只認Brad Pitt，不服來辯。

以《功夫》火雲邪神一角紅遍兩岸三地，喺70年代同李小龍、成龍、狄龍並稱「四龍」嘅著名武打影星梁小龍上星期 (14號) 因心臟衰竭離世，享壽75歲。淫蟲大哥得知消息後喺微博發文哀悼：「梁兄，北京下雪了，天很陰，懷念您…」，而曾經畀梁小龍公開表明拒絕再合作嘅星爺，亦喺社交平台‘’破冰‘’出Po留低九字悼念：「永遠懷念梁小龍先生。」

生命短暫無常，隨時轉瞬即逝，想去嘅地方盡快去，想見嘅人馬上見，至於一啲狠狠傷害過自己嘅“髒東西”，就好應該將佢哋徹底拋諸腦後，例如係呢個之前買嚟送畀放映部一位舊伙伴嘅MOS burger保溫樽，如今「景物依舊，人事全非」，我諗都係時候要揼佢落垃圾桶喇！

有傳羅拔臣季中將提前轉會到熱刺，曾協助利記贏得英超、歐聯等多項錦標，攻守兼備 + 無盡體力，當日有本事憑一人之力mark住球王美斯同哨牙蘇，全盛時期嘅「啫哩仔」，就算稱佢為「世一左閘」亦不為過，儘管近年派膠頻頻，仍靠著滿腔熱血激勵隊友勇往直前，失去一個咁有heart嘅精神領袖，絕對係愛隊一大損失。

喺英超聯賽死氣沉沉，去到歐聯戰場就生龍活虎，照近期情況咁睇，下場對般茅恐怕又係兇多吉少！但係話分兩頭，這支畀外界一致睇淡嘅殘缺紅軍，確實似係一步步行緊「2005伊斯坦堡奇蹟」條路，到底係我癡人說夢話？定抑或真係畀「神奇光頭」史諾sir鳩吓鳩吓又一冠？若果小弟柒咗，歡迎各位嚟呢度瘋狂鞭我屍。

嘩～萬能的慧菁，您真厲害！居然替我們搶到最前排特B區的票！很興奮！你知道嗎？我很興奮！我很興奮！齊豫姐姐，5月9日，台北流行音樂中心見。

Hi～親愛的炫友們！請你們將炫哥在【歌手2025】的參賽曲目這樣很好、愛·不要愛我、太難唱了、秋意濃、悟空，另加空、我忘了我已老去、妳是我左邊的風景、羞答答的玫瑰靜悄悄地開、這世界那麼多人和天涯通通唱一遍，總之不聽夠，不離場。🎤

喂喂～拖咗差唔多成個月都唔回信畀輝哥？係咪想死呀？罰你額外買多張卡做補償！