狂小子"Time Is Changing ": 從【尋秦記】電影版，聊到我最喜愛的TVB劇集TOP 10 📺

我愛吳卓羲！我愛唔唱K！佢好撚勁㗎！又好冷靜！Ron Ng，賣飛佛！💞

師傅，冇見咁耐，寡人白撚咗，對眼大撚咗，個鼻直撚咗，塊面削撚咗，你都膠撚咗。🗿 (設計對白💬)

嗶嗶嗶！宣傳易時間！最近香港天氣急跌，日日天寒地凍，各貓奴快啲嗱嗱臨買部暖風機返去看門口，因住冷親屋企嘅主子呀！喵～🐈‍⬛

由Imarflex伊瑪牌出產嘅立體遙控暖風機INT-1808R擁有1800W強勁功率，配合PTC陶瓷加熱技術，仲有二段溫度選擇 (1300W/1800W)、2/4/8小時定時關機、前置LED燈、獨立搖擺吹風 (上下45度/左右80度)、傾倒同過熱安全停機裝置等功能，機頂輕觸面板非常易用，另附遙控器，操作方便，絕對係冬季必備好幫手。👍🏻

自從奴才買咗部陶瓷遙控暖風機之後，我明顯靚咗，健康咗，個自信心返咗埋嚟！喵～🐈

7號同姑姑去Festival Grand Cinema睇【尋秦記】，喺入場前，我哋就落咗G樓王家沙．花好月圓醫吓個肚先。🥢

蟹粉小籠包五件 ($78) 皮薄餡靚汁又多，配埋香醋薑絲，口感確一流。😋

老醋拌海蜇頭 ($98) 清脆爽口，唯一美中不足嘅係味道偏淡唔夠酸。🙂‍↔️

花雕醉雞 ($108) 酒味欠奉，肉質榎歰歰，碎骨多到暈，回水呀喂！😑

乾煸四季豆 ($98) 微辣香口，越食越開胃，但價錢稍貴。😬

上海粗炒 ($118) 大碟足料，靭度適中，肉絲、椰菜、菇片比例均勻，接近滿分冇投訴。🤗

加多四件棗泥糕 ($48) 連茶錢、服務費埋單$629，算係可接受水平啦！😃

食飽飽放低幾兩行入House 1，即時密集恐懼症發作！😵‍💫

咦～今期隨飛附送嘅「項少龍幻彩銀卡海報」望落又幾有誠意喎！ 🤩

對於呢類「港劇延續回憶殺」我並唔會過份挑剔，亦睇得出劇組有啲心思，尤其見到由智叔飾演嘅烏博士回歸真係深有感觸，所以當知道公司班後生仔話想喺播完尾嗰句「天命最高」先出“半燈”，我都馬上“畀心”以示支持。🫰🏻

朋友朋友～下面有劇透，想睇就埋嚟，唔睇就早唞，再唔係直接skip落下一個Chapter亦得！🫱🏻 (設計對白💬)

若果要我認真評一評套戲，劇本始終係一大硬傷，想玩「Ken哥刺秦王」呢條橋又寫到兩頭唔到岸，嗰頭話要做皇帝，轉頭話想彌補Galie (阿Ken個女) 嘅親情缺失，同項少龍傾交換人質嗰陣就無厘頭交個女出去。吹到隊team有幾高科技，仲識激光治療，嚟到埋身肉搏階段，竟然唔著避彈衣、唔帶武器入宮挑機？畀人秒殺滅團冚包散自然係意料之中，到Galie失驚無神衝出嚟送頭，個老豆先突然良心發現話想返香港，屌你好好玩咩而家？🤷🏻‍♂️

其實只需將劇情稍作調整，話Ken哥原來係嫪毒 (連晉) 或者係趙穆 /呂不韋轉世，甚至當麥偉健 (麥包飾演嘅炸彈狂徒) 放監覆桌，條故事線至少都make sense少少，不過苗僑偉啲演技向來係圈入面數一數二最“出色”，叫佢handle呢個咁複雜多變嘅反派，似乎又有啲強人所難。😅

嗱～我唔係刻意針對三哥㗎！要數全片演得最爛嘅頭五名，佢只係同黃心穎並排第四咋 (第二係「爆石琴清」郭羨妮，第三係喺片尾友情客串嘅雪兒，第五係做阿Tim嗰個鬼佬)！對比起個樣十足十《中年好聲音2》「痰Kai子」姓吳嗰位油膩大叔，佢哋嘅表現已經算合格有餘。我屌你阿媽個臭之掰！到底係邊個天才提議揀呢件蛋散入嚟搞亂檔？條友啲戲仲誇撚過王祖藍、李思捷mix埋，同其他人根本唔喺一條channel上面，每次出場都想佢快啲畀人Headshot收皮，唔通所謂嘅「中國國家話劇院一級演員」就係得咁多料？🤏🏻

究竟邊個先係我心目中嘅MVP？之唔係“玉樹林峯”嘅秦始皇囉！整齣戲只得佢同李斯能夠連貫到原劇裏面個角色，無論喺語氣定行為舉止上都盡顯帝王風範，面對生平最尊敬嘅恩師，嗰種愛恨交纏、又敬又畏嘅矛盾心情實在係百感交集，特別係結尾幫師傅托返起把劍嗰下，啲淚水啱啱好𠺘吓𠺘吓，更加係全片最大感動位。🎬

其餘要角方面，作為男一嘅古天樂喺頭30分鐘都叫做勉強還原到項少龍嘅面貌，但去到後面唔知搞乜越做越求其，啲內心戲完全畀盤兒屌打；滕麗名風采依舊，可惜長期熊尚善上身，冇咗昔日剛中帶柔嗰一面，而歐瑞偉所飾演嘅陶總管則有啲為死而死嘅feel；繼續係“人質擔當”嘅宣萱一貫婆仔本色，出親場例必嘈喧巴閉，至於做佢個仔嘅朱鑑然全程木口木面，明顯係花瓶一個；「Silly」陳國邦恰如其分咁重現原著人物嘅神韻，功課做足，態度專業；張繼聰個定位好模糊，演得亦兒戲，索性將佢啲戲份分畀善柔同二弟會更適合；有傳片酬高達1500萬嘅「翻版雅夫人」白百何純工具人，全無發揮空間，同埋就算想攻入大陸市場，都唔使用埋啲唔夾口型嘅爛鬼配音㗎！家吓咩年代呀？解釋返Galie老母係山東人，話佢自細喺北京留學然後直出國語咪得囉！🤨

歸根究底，因食住「港片尾班熱潮」加上「古老闆」當旺至有機會重見天日嘅陳年倉底貨，質素可想而知，先唔好講將善柔、廷芳、琴清、李斯、滕翼等老班底變晒做茄哩啡甲乙丙，齋係講嗰個重返現代嘅彩蛋結局 (事實上係原先嘅結局，成家人坐船走反而係後補，睇古天樂個膠化程度即分到先後 ) 經已係“教科書式趕客”，乜撚嘢珍珠奶茶呀？仲老尷過【明日戰記】中二病金句「天幕就係我，我就係天幕」同【年少日記】個“燒賣梗”，犯晒近年港產片嘅普遍通病。第一個結局本來都唔錯嘅，但如果夠膽去盡啲反口殺晒項少龍全家，整部戲嘅層次肯定即刻提升多個grade。👈🏻

你哋估吓【尋秦記】嘅最終票房會唔會過到【破·地獄】？我覺得只要keep住玩多幾十場“恐慌式謝票“ + 一連串“本土情懷道德綁架”，再搵埋眾“Diu媒”瘋狂洗版唱好，榮登「香港華語電影最高票房排行榜」首位應該指日可待，各位fans，請坐等加長版嘅嚟臨。🫡

Btw，新版主題曲兩師徒唱到腎虧一樣冇釐神氣，相比之下原版嗰首霸氣鳩味兼備，確係正好多。🙂‍↕️

從【尋秦記】電影版延伸到本人所揀選嘅「無綫十大神劇」，排喺第十位嘅，係於1991年9月30號起首播嘅《灰網》，全劇共25集，由溫兆倫、吳鎮宇、陶大宇、鄧萃雯領銜主演，監製為徐正康，係1991年度最低收視劇集。程浩為人浪蕩天真、有情有義，無奈損友害人，影響一生，喺最後佢雖然被判死刑，但生前至少見晒想見嘅人，仲同另一半結埋婚，不至於眾叛親離。光芒四射嘅鎮宇哥一定係全劇嘅焦點所在，吳麗珠亦獻上佢演戲生涯嘅最佳代表作，而溫兆倫喺結局探監嗰場戲同樣係可圈可點，感染力極強。🥲

第九位係於2008年10月20號起首播嘅處境喜劇《畢打自己人》，集數原定為260集，後加至337集，每集30分鐘 (連廣告)；最鍾意嘅角色係殷賞、余家昇同包國仁，最討厭嘅角色係殷大德；最難忘係310集大閆生過身 (亦成陳鴻烈遺作) ；最熱血係97集生死雙雄 (下) 包公勇救閆汝大；最好睇係毛姐同黎耀祥嘅對手戲；最大敗筆係將余社長改為警方臥底，設定相當老土。😮‍💨

第八位係於1999年10月11號起首播嘅三十二周年台慶劇【創世紀】，全劇共106集，第一部分《創世紀》共51集，第二部分《創世紀II天地有情》共55集；最鍾意嘅角色係對敵人毒辣兇狠，但對親人永遠一條心嘅許文彪，最討厭嘅係畀編劇強行洗白，成日滿口仁義道德實則衰到貼地嘅終極偽善撚葉榮添；最難忘係48集許文彪大叫：「呢個世界公平咩？」；最精彩係73集惠英紅、馬神、秦沛、汪阿姐喺醫院互飆演技；最好睇係見證住許文彪點樣一步步走上一條黑化之路；最大敗筆係後期忽然將大梟雄霍景良智商減至零，以襯托不學無術，單靠劇情屈機嘅商界奇才張自力，徹底脫離邏輯。🤯

第七位係於1999年3月1日起首播嘅《先生貴性》，由金牌監製戚其義、著名編審周旭明全力打造，鋪足19集到最尾先嚟個反高潮，以廿幾年嚟講算係走得好前好破格，仲早過唔少日劇泡菜劇。本身以為玩紅綠燈講再見都夠晒touching㗎啦！點知個“Dream Ending”唔只同現實產生到關聯，又一次過彌補返男女主角嗰一段未完嘅人鬼情緣，彷彿成個世界只有鄧炳權同方思晴兩個人先知當中發生過啲乜，搭配主題曲對你．我永不放棄同插曲未來沒法計算，感覺十分浪漫。羅嘉良由圍村村長化身成Diana，到變返做正常男人，整段轉折演得極有說服力，不枉佢三屆視帝之名。咁當然江華、郭少芸同谷峰三位資深實力派亦各有千秋，令人印象深刻。🙌🏻

第六位係於2000年2月21號至7月7號期間首播嘅100集“千禧Sitcom傳奇”《男親女愛》，由首位奪得影后視后大滿貫嘅「百變Do姐」同尚未成神嘅「棟篤笑之王」黃子華組成嘅「黃金CP」火花四濺，潑辣女強人Miss Mo + 爛口賤精余樂天 + 由「綠葉王」蔣志光飾演嘅女人湯丸詹士安，成功創下50點收視紀錄。除咗長達30秒嘅「世紀之吻」掀起全城熱話，試問又有邊個諗得到，喺影視圈居然有人可以有本事將星爺喺【唐伯虎點秋香】入面嘅”小強Gag”再度發揚光大；要數最爆笑一集我會揀Alex Pao喺「左手之夜」畀人裝彈弓屈佢係同志，嗰種有口難言、欲哭無淚嘅神情，仲正過佢飲“甜甜的洗腳溫泉水”同擺王敏德上枱；最抵死嘅金句唔係「又如何？」、「寂孤池」、「3個C」同「你同我Off啦！」，係「妳個死人荷爾蒙失調，內分泌失敗，一出世妳就更年期喇妳！」。😤

第四位係於1998年10月12日號起首播嘅《烈火雄心》，由王喜、錢嘉樂、鄭敬基、古天樂、關詠荷聯合主演，監製為王心慰。編劇好巧妙咁透過消防員作包裝，去推動多條扣人心弦嘅支線發展，最催淚嘅場面我認為係群姐病逝/頸叔殉職/司徒拔跳樓；最討厭嘅角色係“大眾尿壺”吳美樂同埋口窒窒懶音又多嘅滕井悅；最鍾意睇大興＆飛鳳，又名“鬥雞眼 + 矮磨碌”組合，無憂無慮冇機心嘅爽直個性，而且真誠待人，就咁平平凡凡開心過日子，印證咗「傻人有傻福」呢句俗語嘅道理；三首插曲無出息的漢子、兩脇插刀、56769 Goodbye各自各精彩，令到原本好貼題嘅片頭曲火焰心相形失色。🔥

第三位係於1992年10月5號起首播嘅“股市剋星”《大時代》，編劇界神人韋家輝巔峰之作，鄭少秋、劉青雲、藍潔瑛、劉松仁、曾江、劉江、江毅一眾好戲之人火力全開輪住出招，其中秋官所飾演嘅丁蟹更被譽為TVB百大經典角色之首。由丁蟹監生打死方進新、益蟹老強方敏、方敏跳樓，到扔方芳、方婷落街、掟四隻蟹落樓，簡直一幕癲過一幕，睇到人嘩嘩聲！要揀全劇最佳演出，松哥嘅：「畀次機會，老細。」無庸置疑係NO.1；最有共鳴嘅對白，係方展博爆SEED鬧爆賤婆婆嗰一part；最乞人憎嘅劇中兩大人物，「歪理王」丁蟹同無惡不作嘅老二丁益蟹當真係實至名歸，前者壞事做盡，仲鍾意擘大對眼講閪話，後者姦淫擄掠樣樣做齊，基本上判佢落十八層地獄，再放佢落油鑊勾脷筋亦不為過；最愛角色我會毫不猶豫投玲姐一票，藍潔瑛層次分明咁展現一個女人點樣獨自撐起半邊天，一路從學生妹＞成為繼母，到後來瘋癲崩潰瞓喺展博懷裏斷氣，如此優秀兼且「靚絕五台山」嘅一線女演員，偏偏紅顏薄命，你話唏噓唔唏噓？💔

第二位係韋家輝另一神作《馬場大亨》，於1993年10月11號起首播，堪稱華哥 (黃日華) 從影以來之最佳演技示範作，面對爐火純青嘅老戲骨曾江叔依然不落下風，好一個叫人又愛又恨嘅傻佬李大有，成世大起大落，迂迴跌宕，經常烚熟狗頭咁款，搞到身邊啲女人全部黐Q晒線，同喜怒無常嘅「食錢怪」錢淺直頭係天作之合。相反，天性單純嘅鍾愛玲就注定只能望住大有哥嘅背影，冇辦法同佢並肩同行。提到錢淺呢個角色，都稱得上係陳秀雯演藝事業一次好重要嘅轉型，回顧第29集錢淺同大有喺餐廳重遇對望嗰一場，Amy姐啲內心戲勁到華哥幾乎接唔實，整個心理轉折冇返咁上下功力都幾難駕馭得到。唔只男女主角夠黐夠喪，由江毅、劉兆銘飾演嘅錢開、宋啟邦 (疑似影射何鴻燊、葉漢) ，仲有由羅樂林飾演嘅倪冠鶴 (疑似影射殯儀鉅子蕭明) ，位位充滿稜角，全員大癲，睇得我好鬼爽，似飲咗一大杯冰凍生啤咁暢快。若論震撼場面，《馬場大亨》遠唔及《大時代》咁多 (最盡係用Close-up影住四個細路女歸西)，係贏在個Ending，加埋嗰一股「不成功便成仁」嘅強大衝勁。🐎

登登登登～恭喜冠軍得主，於2004年7月19號起首播，由黃子華同蔡少芬領銜主演嘅黑色喜劇《棟篤神探》，喜歡佢嘅原因好簡單，事關莫作棟同李慧慧呢一pair歡喜冤家嘅互動模式，正是我同姑姑嘅相處日常。👩🏾‍🤝‍👨🏻

除此之外，“女長人”同莫探員嘅性格特徵，甚至係溝通時嘅語氣、音調、聲量、語速，亦同我哋有99％相似。男嘅睇落喱哩啡啡、冇嚟正經，平時又懶懶行，只會喺危急關頭先會同你落力，係個典型大事精明，小事糊塗嘅生活白痴；女嘅份人不拘小節、心地善良、胸無城府、富正義感，做事乾淨俐落，並且對感情認真，男仔頭得嚟，私底下又有小鳥依人嘅一面。明明有咁多人追，就係要揀擗連烏蠅飛過都唔嬲嘅一等爛泥，真係唔知話佢犯賤定口味獨特好？🫣

當年有好多觀眾打電話去投訴呢個Sad Ending，子華神仲特登喺《娛樂大搜查》訪問中解釋，話假若《棟篤神探》係一套純Comedy嘅話就冇可能兇案不斷。事隔廿二年，當經歷過形形色色嘅生離死別，我先至領悟到「世事變幻無常，莫說來日方長」，人生又邊會有咁多BBQ結局呢？😌

順帶一提第11至第20位，依次序為：孕育出「世紀奸狗」丁有康，1989年全年收視冠軍《義不容情》、將「萬年配角」黎耀祥推上一線，並憑柴九一角首奪視帝嘅《巾幗梟雄》、《難兄難弟》、連原著作者金庸都大讚嘅1996版《笑傲江湖》、熱潮持續至今嘅穿越始祖《尋秦記》、筆者Last一套睇嘅無綫劇集《天與地》、兩屆金像影帝張家輝起朵之作《天地豪情》、畢打姊妹作《同事三分親》、無心插柳柳成蔭，奠定江華「電視劇界男GOAT」地位嘅《九五至尊》，以及畀“煩膠”晴晴扣咗一半以上分數嘅《巾幗梟雄之義海豪情》。🥴

最喜愛嘅TVB劇集主題曲？係改編自王傑名曲〈惦記這一些〉，並由潘偉源填詞、陳百強主唱嘅〈一生何求〉，沒有之一。☝🏻

同場加映 - 5/1/2026 - 13/1/2026 生活寫真 📸

喵～我唔要剪指甲呀～我唔要呀～我唔要呀～嗚嗚～💢

Yo～指甲甲之嘛～使乜驚呀？輕鬆疏乎冇難度啦！喵～😼

幾日前搭巴士返工差啲唔見咗隻Paddington Bear掛飾，幸好司機叔叔同清潔姐姐幫我保管住，特此致上萬分感謝。🧸🙇🏻‍♂️

一位離咗職成年嘅妹妹返嚟探班，仲喺Starbucks買咗啲咖啡請大家飲。🤗

早晨開工提神三寶，Coffee, Tea or Ice water？☕️🍵🫖🥛

喺工作上遇到啲好谷氣嘅人同事無處宣洩？Tea Time走去壽司郎擦返餐勁，食飽飽叉足電再搏殺。🍣

噚日放假相約姑姑出去鬆一鬆，觀塘開源道68號觀塘廣場15樓鮮味蒸滾鍋，星期一至四$368位 (加一服務費)，龍蝦、鮑魚、生蠔、蟶子、海貝乜都有。🦞

1月球壇風起雲湧，車仔領隊馬列斯卡主動辭職，取而代之嘅……係球員時代效力過富咸、侯城、雷丁、白禮頓，被外界嘲諷為「無名小卒」嘅羅仙尼亞；阿廉爆煲博炒離隊現笑顏，舊部加拿曹火速讚好；沙比鍠馬協議分手，激發利物浦球迷無限遐想。👀

你愛搓搓搓～令人想想想～我在看看看～賽程是悲是喜？Full Team對住英甲榜下游班士利，齋睇比數似係冇乜問題，但場面核突零戰術，贏得毫無說服力，喺沙拿缺陣嘅情況下，契仔“凍肉”冇串連，神鋒伊薩等波到，皇基、恩古未Ready，只得伊基迪基會幫手做組織，全靠呢塊遮醜布撳掣啟動「7+17+22連攜」，先暫時保住光頭老闆顏面。🫢

現時利迷分成兩派，炒同唔炒各有爭論，個人立場一向冇變，如非必要，堅決唔贊成季中換帥，況且史諾近期好好醜醜都保持住11場不敗 (雖則話水分好高)，一班新兵域斯、卻基斯、費林邦同舊將干拿迪、加雲貝治、麥亞里士打狀態亦有所回升，捱唔捱得到去季尾目前仍有待觀察。🤫

紅軍傷兵名單更新：一個報銷 (伊薩) / 兩個收咧 (利安尼、巴特利) / 兩個復出無期 (丹斯、巴積迪)，跟住轉會窗唔買人，唔續約，得返兩個半中堅 (祖高美斯計半個) + 兩個左閘頂到完季，Woo～淨係諗起就興奮了。🫠

妖～理得你前中後點排，到頭來咪又係由我傻波一人carry全場！🙄 (設計對白💬)

曾協助利物浦三次贏得聯賽冠軍及一次歐冠盃，仲拎過兩次金球獎嘅英格蘭名宿奇雲基瑾被醫生診斷患上癌症。紐卡素透過社交網絡祝福前主帥基瑾早日康復，並寫下：「King Kev. We're with you every step of the way. Hoping for a full and speedy recovery 🙏🖤」。此外，利物浦球會亦表示：「All of us at LFC and official former players association Forever Reds send our best wishes to Kevin, his family and friends," added the Anfield side.💪🏻」