狂小子"Time Is Changing ": 揮別2025

爸爸～爸爸～後補Boxing Day禮物～特別送上本公主香吻一個～請笑納！喵～🐈‍⬛

曾不幸畀無良奸商拎嚟做繁殖工具，再三番四次遭人惡意遺棄，難得搵到個「五星級的家」，冇幾耐就感親發高燒，好返唔夠半個月又畀Latte惹到周身蝨，捱過種種劫難之後，我足足花咗接近一年時間去治療Indie嘅心靈創傷，無論佢平時有幾懂事，我都會堅持喺各自臨瞓前互相交流多啲，盡量令個妹豬有返些少安全感。💓

相信有一定養貓經驗嘅奴才，都應該會感受到此刻嘅Indie有幾冧，咪睇個衰女包成日呆呆滯滯咁款，實情佢內心嗰一股澎湃激昂嘅暖流，足以融化你整個人。🥰

今晚黃家請食飯，隨便坐！每年12月嘅指定動作，去姑姑屋企做冬。🍚

食完餐冬至飯，姑姑就同家人飛咗去重慶玩一個禮拜，與其獨守空房，不如一齊瘋狂，同大婆華到蘑界野生菌石鍋雞滾返夠本。🥘

話就話主打鮮嫩靚雞，查實最令人驚艷嘅，反而係表面睇起嚟唔太起眼嘅九節蝦。🦐

嘩～只係去轉澳門都特登帶兩塊「手信」落嚟，真不枉我一路對你一往情深！😚

Happy Birthday To You～Happy Birthday To You～Happy Birthday To Alan～Happy Birthday To You～🍻

20251210靚佬綸生日Party，四條麻甩齊集老地方觀塘為食火鍋公司吹過唔停，直至凌晨先肯散band。🚬

前幾日收到輝哥從獄中寄嚟嘅聖誕咭，字裏行間充滿住無盡嘅唏噓同感慨，不過喺訴苦嘅同時，呢位多年老友就依然不忘為我送上親切嘅祝福同慰問。💌

仲記得當年為咗將個「家」砌返埋，我幾乎付出晒畢生精力，點知活到今時今日，終歸帶畀我最多溫暖嘅，往往係一啲同我毫無血緣關係嘅人，類似嘅事情不斷發生，諗返轉頭的確係好諷刺，但假如呢個係你難逃嘅終身宿命，咁你又何必要逆天而行呢？🙂‍↔️

「有樣嘢我一直都冇話畀何寶榮聽，其實我唔想佢咁快好返，佢受傷嗰排，係我同佢最開心嘅日子。」媽，同樣嘅一番說話，我真係好想親口同您講，其實，喺您哋欠債嘅嗰一段時期，雖然日子係好難捱，但至少冇咗堆牛鬼蛇神圍住喺隔離，每日大家都相處得好融洽。對於呢一類難以啟齒嘅家事，我現時可以做嘅，就係默默去消化並接受，承認自己六親緣薄，無謂再苦苦掙扎。🚶🏻‍♂️

親情能斷，友情更容易切斷，自從某位長年拎我嘅出身、家庭環境同先天缺陷嚟嘲笑，更多次企圖迫我走上絕路嘅中／小同學患上重病，身邊有幾個舊友曾經語重心長咁勸導我，問我點解唔能夠藉此機會原諒並放低呢段仇恨？首先，選擇離開群組，裝作若無其事，係唔想損害到佢本人嘅自尊心，跟住拒絕八卦、唔去落井下石，已經係我所能展現嘅最大風度同氣量。須知道「寬恕」呢兩個字係好寶貴，而且有啲過錯係會影響人一生，你就算講一百句對唔住都係於事無補。更何況，喺此人嘅字典內，根本從未在乎過我嘅存在，懶理我試過喺某個婚禮場合上為佢護駕擋酒，仲淪落到通宵瞓電燈柱，每次見到有人想恰佢，我又會忍唔住幫佢出頭，即使去到前幾年，我仍然一心認為，保持低調不作打擾，係當下對佢最適合嘅支持方式，最後居然反被人誣捏成告密者，直到真兇現身，依舊冇半個人企出嚟為我主持公道。或者係我get錯傳話人所講嘅嘢啦！但係有時候換個角度去諗，若然老哥唔係個性剛烈，可能老早就同【Mystic River】入面個Dave一樣畀你班友棄屍荒野 + 人格謀殺。😆

早排無意中喺Facebook睇到上面呢幅圖，先至發現我之前確實係病得唔輕⋯⋯☠️

明明辛辛苦苦跳咗出去，最終又不甘寂寞走返條回頭路，咁鍾意將啲完結咗嘅關卡重新restart，係要玩到滿分先肯離場，卒之搞到損手爛腳仲流血不止，你話戇鳩唔戇鳩？🤷🏻‍♂️

歸根究底，我份人實在太崇尚浪漫主義，同時又太過感性，喂～大佬你而家唔撚係梁朝偉同金城武呀！你係「一代夢遺大師」劉以達個細佬“流耳滴”咋！學【門徒】昆哥話齋：「個世界係供求㗎！」你提供唔到價值畀人，咪自然冇人願意企喺你嗰邊囉！正所謂人性本惡，家吓你仲要走返入局將啲弱點放晒畀人睇，咁同撼頭埋牆又有乜嘢分別呢？正如班‘’叠馬仔‘’會專喺一堆病態賭徒當中落手，無他嘅！鬼叫你好玩得嚟又就手咩？呢啲咁簡單嘅道理人人都知，只在於你係咪要學似天哥咁keep住執迷不悟落去，然後畀世人恥笑。🥺

人到中年就要學識何謂斷捨離，減少有毒社交，決心放下執念，徹底斬斷源頭，每察覺到唔對路咪馬上一刀切！夠喇！我覺得一切都夠喇！以後再提班仆街我即刻爛賓周！總之一句講晒：噚晚Jody鬧得我好啱。🙂‍↕️

別高興～別以為叫始祖～萬歲千歲都會依你意願來營造～下一世～別理誰叫高祖～別要賭～天命最高～⚔️

一刻粉身碎骨～未能止痛～一刻千瘡百孔～淚流不住難看通～一刻風吹雨打～逆流洶湧～知很孤單想要被抱擁～懇請講給我聽～共承受這異夢～🥊

唔使帶個腦入場嘅典型爆谷片【狂蟒之災】、啱晒一家大細觀看嘅【海綿寶寶：深海尋「寶」】、全靠一班fans撐住嘅【優獸大都會2】、輕鬆勵志又熱血嘅【逆轉上半場】，定抑或係“悉尼“搏盡，波濤洶湧嘅【美傭誘罪】，仲有尚未落畫嘅【金童】、【殺手#4】、【國寶】，加上萬眾期待嘅【尋秦記】同【阿凡達3 MX4D】，歐美／亞洲／港產新舊猛片共冶一爐，到底邊一部最合你心水？坦白講，身為戲院從業員嘅我，對以上所有作品都冇興趣，每日只想忙裏偷閒到公司附近嘅Sushiro嘆返個下午茶。🍣🍵

唉～用成1.25億英鎊買你返嚟，咪就係為咗欣賞呢幾吓A級射手功架囉！睇見Isak漸入佳境越打越好，諗住佢嚟緊開始會路路暢通，點估到Van De Ven條人渣會癲到使出熱狗MMA秘技「奪命鉸剪腳」收人山咁卑鄙先得㗎！🤬💢

從90年代只係威咗一季嘅「壞孩子」Collymore，到硬件一流嘅Núñez同「新Shearer」Carroll，再加埋「傷追人」Keïta，逢親利物浦用超高價買入嘅攻擊球員，似乎一律係閪多過Like，究竟係八字唔夾定單純係各任領隊嘅戰術問題？只要集合天下最強兵器，難道即可輕易成就霸業？照現階段去睇，條數又好似唔係咁計。😮‍💨