當為食貓女遇上百厭星君 👀

爸爸～嫲嫲～呢隻喪B痴線㗎～你哋快啲幫我鬧吓佢呀～喵～😾

各位哥哥姐姐好，我個名叫做Latte，係一隻又乖又聽話嘅小貓B，眨吓眼嚟咗呢個新屋企差唔多有一個月，暫時同幾位家庭成員相處都好融洽，尤其係美艷動人嘅Indie大姐姐～喵～🖤

吓？融洽？麻煩借個靚歪得唔得？我想作嘔呀～喵～😿

話說上個月喺一個機緣巧合之下，我收養咗一隻啱啱斷奶冇耐嘅貓BB，然後一接佢入屋唔夠一個鐘頭我就發現⋯⋯呢隻傻B嘅百厭程度，比起童年時期嘅CoCo真係有過之而無不及！😆

佢適應力特強，剛到步一陣已經識飲識食又狂撩人玩，完全唔怕生保，直頭係老實不客氣，而且仲好鬼奄尖添！😏

喂～做乜畀個爛鬼紙皮箱我？我要真．屎兜呀蠢奴才！吼喵～💢

自己做錯嘢仲喺度發啷厲？信唔信我罰你冇飽飯食呀嗱？豈有此理！😤

阿叔，呢個咩嚟㗎？砂煲咁大個拳頭呀～見過未呀？唔好逼我出手啦！我癲起上嚟自己都驚呀！喵～🖤

喵～大鑊！發爛不成唯有出大絕～喵星人之賣萌連發無極限～看招！💞

好喇好喇～怕咗你喇～即刻出去托個靚砂盆返嚟，而家滿意未？不過唔該唔好成日專登喺姐姐面前示威，唔係佢又會出“醉貓鐵拳”打扁你㗎喇！知冇？🤭

喵喵～放心啦！我哋不嬲情比金堅，直程係friend過打band！💓💓

哦～係咩？我早排先見Indie鬧鬼你日日整到間房通地都係沙喎！🤔

嗯嗯～冇事嘅～正所謂床頭打交床尾和，轉頭攬返笑呵呵，話晒大家都係住喺同一屋簷下，試問又點會有隔夜仇呢？喵～💋

佢天生好奇，對鏡頭嘅敏感度極高，絕對有潛質可以成為貓模界嘅明日之星。😎

Hey～你到底識唔識擺鏡頭㗎？使唔使搵我老友杜可雷嚟教一教你？喵～📸

佢超級頑皮又愛搗蛋，十足再世孫悟空咁款，最擅長嘅運動係短跑同跳遠。☝🏻

嘩～因乜解究整到對眼咁核突㗎？正一污糟貓！🙄

我每日最鍾意嘅活動係玩姐姐條尾，而姐姐每日最鍾意嘅活動就係畀我玩佢條尾～嘻嘻～🖤

咁當然，有時候太曳曳都要付出少少代價嘅～最經典嗰次，都莫過於係玩風扇玩到隻手仔夾咗喺個風扇蓋啲罅位入面，嚇到隻傻B半夜嗌晒救命，跟住我幫佢整返隻手出嚟，佢就一個人眼濕濕坐喺個貓架度郁都唔郁扮憂鬱。🤣

基本上，Latte晚晚都要玩到筋疲力盡先肯上床瞓覺，呢排一放工沖完涼就要湊住呢隻冇時停嘅反斗喵，實在係少啲精力都搞唔掂！😪

打打鬧鬧唔好預我，得閒瞓返個靚覺好過～喵～💤

喺Latte搬咗入嚟嘅呢段時間，作為長輩嘅Indie一直擔任住一個非常重要嘅角色，佢除咗幫Latte迅速融入新生活之外，間唔中仲會客串做埋教官，實行當佢親生骨肉咁看待。🤗

嗱～阿B你聽住！以後乖乖哋跟我搵食，有邊個夠膽恰你嘅，就即時同我Indie姐講聲！清楚嗎？😼

其實，喺一開始嗰陣，呢兩隻活寶貝並唔係咁啱牙㗎咋～每次當Indie好友善咁同Latte問好，隻衰B唔單止唔領情，仲猛咁噬起棚牙裝兇作勢，搞到Indie個傻妹唔開心咗成晚⋯⋯🥺

哼～本官不惜紆尊降貴走埋去溝佢，佢竟然就不識抬舉？我宣佈由呢一分鐘起，阿姐同呢隻嘢勢不兩立！🔥

咦～爸爸佢噏緊乜呀？點解我聽唔明嘅？喵～🖤

自此之後，佢兩個日日就好似貼錯門神咁，lndie仲周不時會大搖大擺行入Latte間房度偷食佢啲BB糧同飲晒鐵兜啲水～哈哈～睇吓肥妹當時個樣幾鬼得戚！😂

眼見情況惡化到咁嘅地步，我嘗試過用好多種唔同類型嘅方法去解決，最終得出嚟嘅結果係⋯⋯總之將兩隻喵擺埋一齊玩吓啲追追逐逐嘅無聊game，日子耐咗自然就會OK㗎喇～😁

有了你開心啲～乜都稱心滿意～鹹魚白菜也好好味～我與你永共聚～分分鐘需要你～你似是陽光空氣～💗

望唔望到肥妹嗰種充滿母愛嘅眼神？係咪又sweet又迷人呢？😉

講起上嚟，Indie呢隻妹豬的確係好抵錫嘅～佢嘅性格雖然係好飄忽，但同時又擁有一顆十分善良嘅心，並且性情溫順，就算喺幾嬲嘅狀況下都唔會出爪傷害阿B，仲識得體諒埋身邊嘅人，從來冇因為Latte嘅出現而做出任何爭風呷醋嘅行為。👍🏻

曾經好不幸成為某班無良份子嘅繁殖工具，又三番四次遭人惡意遺棄，唔知道係先天問題定係欠缺愛護嘅關係，呢個傻妹望落去就總係長期keep一副厭世mode咁樣，所以，無論佢表現得有幾懂事，我都會堅持喺各自臨瞓前互相交流多啲，盡量令個妹豬有返些少安全感。😘

我係一個標準嘅電視精，平日最愛坐喺嫲嫲側邊齊齊煲劇，希望藉此增進雙方感情。📺

前日有幾位朋友同老媽都不約而同地表示Latte嘅容貌同動靜似足已仙遊嘅CoCo (一樣係標準電視精)，話之前只係怕我觸景傷情先一路唔敢提起⋯⋯💭

對於離世嘅親人／朋友，有人會選擇逃避到底，即係索性唔諗唔提唔講，而我就剛好相反，即使去到今時今日，我對Co仔嘅思念依然係絲毫不減，亦唔會刻意避開所有關於佢嘅事物，正因為人生苦短，我先更加要珍惜眼前嘅每一個美好片段，盡情去享受「有貓在家千日好」嘅嗰一份幸福同喜悅。💝