Chapter 2:快樂的Indie 😸
Chapter 3:Latte BB的生活日常 🐈⬛
Chapter 4:Robot Dreams 🐶🤖
Chapter 5:Inside Out 2 🧠
Chapter 6:全職乖孫 🧓
Chapter 7:催淚的花蝴蝶 🦋
Chapter 8:一年一度的海鮮大餐 🦞
Chapter 9:Happy Birthday To Me 🎂
Chapter 10:我的大婆與二奶 😚
Chapter 11:攜手走過廿一年 👩🏽🤝👨🏻
Chapter 12:感謝您們的厚禮 🎁
Chapter 13:脫離舒適圈的太極,沒有包袱的Utopia 🤟🏻
Chapter 14:愛不是遊戲 (2024年老聲衰版) 😮💨
Chapter 15:有請特別嘉賓 - 鹹永撚 🫡
Chapter 16:好書推介 - IMU | 空晴 📖
Chapter 17:令人又愛又恨的橙色兵團 🇳🇱
Chapter 18:去晏菲路前做足準備 ☝🏻
Chapter 19:人生下半場的目標清單 💁🏻♂️
Chapter 20:Goodbye Roy Roy 🫂
Chapter 21:十二年前後 👥️
Chapter 22:Neway熱唱李克勤 🎤
用咗接近三年半嘅Galaxy A71喺上個月光榮退役,取而代之嘅⋯⋯係被坊間譽為‘’演唱會神機‘’+‘’追星神器‘’嘅S24 Ultra,一拎起部新電話應該做啲乜?妖~仲使問~梗係立即同兩位美艷動人嘅小公主影返輯靚相先啦!號外號外!生日金裝紀念版益街坊!Indie X Latte珍藏限量版靚靚Postcard!一人只限一張!送完即止!今期雜誌主要係想同各Blog友分享返喺近呢半個月嘅一啲生活瑣事,以及一大堆所思所想、所見所聞⋯⋯好~事不宜遲,即刻帶大家進入第一個Chapter!
Chapter 1:孖喵在家千日好 🥰
願我會揸火箭~帶妳到天空去~在太空中兩人住~活到幾多歲~都一般心醉~有妳在身邊多樂趣~
共妳雙雙對~好得戚好得意~地老天崩當閒事~就算翻風雨~只需睇到妳~似見陽光千萬里~
有了妳開心的~乜都稱心滿意~咸魚白菜也好好味~我與妳永共敘~分分鐘需要妳~妳似是陽光空氣~
俗語有話:床頭打交床尾和,呢啲係我同家姐獨有嘅溝通方式,Do You Know?喵~
Chapter 2:快樂的Indie 😸
埋嚟睇埋嚟索~又大又圓嘅貓屎忽~包你愛不釋手~摸過返尋味!喵~徹底解決跳蝨問題,回復良好嘅精神面貌,認真係爽歪歪!呆望我~上半身~下半身~來問聲~今晚我靚唔靚?爸爸~爸爸~我而家成身乾淨晒,請問可以上返床未呀?喵~親愛嘅Indie妹豬,從今以後,屋企所有嘅地盤都歸還返畀妳,另加無限量嘅罐罐同肉泥,欽此。
聽講HOYTV嘅【尋找喵喵的故事】做到第9集喇喎~呢個世界有咁多誘惑,所以本皇后決定去搵周公商量吓貓生大計,有事啟奏,無事退朝!Zzzzzzzzzz~
等Latte BB為各fans示範何謂「高級厭世臉」,1~2~3~Action!Chok係我嘅本能,賣萌係我嘅天性,零食零食快快來,速速磅,唔好兩頭望!喵~難離難捨想抱緊些~茫茫人生好像荒野~如孩兒能伏於姑姑的肩膊~誰要下車~世上唯一能夠將Latte呢隻刁蠻女治得貼貼服服嘅,恐怕只有大埔小龍女有此本事。聽日就要帶阿B去獸醫診所度做絕育手術,祝一切平安,從此做個健康小寶寶。
Chapter 4:Robot Dreams 🐶🤖
前陣子於Festival Grand Cinema觀賞電影【Robot Dreams】,港譯【汪汪夢裡人】,離場後深有感觸。當你結識了一位新夥伴,還共同度過了一段十分愉快的美好時光,對方更視你為他的終身依靠,然而,一場殘忍無情的命運安排,迫使你們分隔兩地,即使苦苦向上天哀求仍挽回不果。在學習如何面對失去之同時,你亦從而領悟出與人相處之道,其後覓得與昔日摯友的相似身影,縱非天作之合,也會基於過去的經歷而珍視當前擁有的這段緣份。有多位友人都不約而同地表示,Latte的容貌與動靜跟已仙逝的CoCo甚為相像,例如是好奇心旺盛、貪玩、嗜吃,甚至連睡覺的姿勢亦一模一樣⋯⋯對於離世的至親,有人會乾脆逃避到底,即是不想不問不提,而我就剛好相反,直至今天,我對Co仔的思念依然是有增無減,也不會刻意迴避每一件與其相關的事物,正因為人生苦短,我才更加要緊緊抱實眼前兩隻可愛的小喵女,盡情去享受「有貓在家千日好」的那一份幸福與喜悅。Chapter 5:Inside Out 2 🧠
除【汪汪夢裡人】之外,在月頭我還先後看了【加菲貓:勇闖世界】、【全職乖孫】和【玩轉腦朋友2】,由古天樂出任監製的【加菲貓】徹底破壞童年回憶,生硬的冒險情節,角色設定多餘且缺乏必要性,直叫人尷尬癌發作。相比之下,【全職乖孫】和【玩轉腦朋友2】就討好得多,於我而言,【玩轉腦朋友1】是拍給大人看的,第二集則比較像一部闔家歡動畫片,雖不及首部曲驚艷,但整體品質仍屬上乘。Riley步入青春期,思路開始複雜,以焦慮為主的不良情緒反客為主,因而大大影響其思維定勢和行為決策,當看到Riley在結尾學會了如何呼喚情緒,而不是被情緒所控制,真是讓我心有慼慼焉。以往我常受阿愁和阿燥操控,直到不惑之年,才願意將阿樂、阿厭召喚歸來,拋開對一些無關重要的親情與友情的執著,成功解開那些埋藏在心靈深處多時的死結,不再停留於悲傷的氛圍之中,也許,人只要經歷到某個階段,便會自然而然地懂得怎樣去指揮各個情緒專員,進而妥善分配任務,唯有如此,你的生活方能過得更充實、更圓滿。不過話分兩頭,一個人壓抑得太久,偶爾也需要放阿愁出來透透氣,不然的話,終有一天你還是會活生生被壓力擊垮。Chapter 6:全職乖孫 🧓
泰國催淚親情片【全職乖孫】熱潮直捲亞洲各地,它的劇情其實很直白,卻相當的貼近現實。相信絕大部分家庭都總會有個爛賭爛滾、不務正業的仆街舅父,或是自持身家富裕,便以為可操縱大權的霸道姑姐,還有一大班喜愛搬弄是非的麻煩親戚。為何終日惹事的家人往往最受疼愛?而默默為這頭家付出的卻反成眾矢之的?相較於該片的主人翁明仔,筆者家中的故事著實比CCTVB電視劇更為荒誕不經,特別是有位騙吃騙喝超過三十年的外姓陰陽人,其厚顏無恥的程度,簡直令我大開眼界。從我出生的那一天起,阿奶 (我對嫲嫲的稱呼) 便把我視如己出,她的養育之恩,我想我今生今世都無以為報。回想童年時期的我性格很像【多啦A夢】裏的大雄,每當遇上難題總是會偷偷的躲起來哭,那時候,阿奶就像多啦A夢那樣長期在背後守護著我,無論在外面受了多大的委屈,吃了多少苦,只要有她在旁,甚麼心病皆會不治而癒。到長大後,阿奶跟各個親人的關係漸趨惡化,而選擇站在阿奶一方的我,亦順理成章地被眾人所孤立。時至今日,儘管我並非最富有的人,但至少我未有做過任何一件違背良心的事,也從沒對外借過一分一毫,而且,我始終堅信當潮水退去時,自會看清誰人沒有穿褲子,能持續堅持自給自足,並接受過阿奶賦予的關懷及呵護,這正是我所得到的最大「回報」。阿奶與我之間有著許多不為人知的「互動密碼」,若要細數對我影響最深的,都莫過於是從小培養我成為李克勤的歌迷,千萬別小看這個老人家,她可是連〈血脈沸騰〉那麼冷門的歌也認識的資深忠粉啊!
Chapter 7:催淚的花蝴蝶 🦋
談到烹飪這一環又怎能不提一提「我的廚神老爸」呢?酸甜開胃的蕃茄海鮮燴意粉、惹味又夠鑊氣的豬扒炒烏冬、綿滑足料的瑤柱粟米瘦肉粥,每一道均是叫人回味無窮的美味佳餚。某日下班在巴士裏百無聊賴,便按下「隨機播放」的按鍵,當聽到由費玉清翻唱的〈美麗的花蝴蝶〉,我竟突然失控地哭至缺堤,幸好當時車上空無一人,否則肯定當場‘’𤓓爆”。
Chapter 8:一年一度的海鮮大餐 🦞
每年生日最期待的,一定是由老媽子親自炮製的住家大餐,看到這set豪華豐盛的龍蝦+鮑魚配蕎麥麵,是否隔著螢幕都垂涎三尺呢?所謂家中有位媽大廚,美食何須到處尋?過往和老媽經常都為了彼此價值觀上的差異而產生摩擦,也了解到一班舅父阿姨才是其心肝命根,此外,她的某些惡習和固有缺點,亦給我帶來不少壓力,但每想到她已是我在世界上僅存的親人,且曾冒著生命危險將我誕下,我便會立即把這口氣吞下來。這幾年見證過大多生老病死,深切體悟到「世事變幻無常,莫道來日方長」的道理,因此,我認為應把握家母健在之時,多加關心及傾聽,並珍惜與其相處的每一分每一秒,別再徒留遺憾。另外,也祈望她在八月尾的膝頭小手術能順順利利。Chapter 9:Happy Birthday To Me 🎂
Happy Birthday To Me~Happy Birthday To Me~Happy Birthday To Me~Happy Birthday To Me~好喇~好喇~719,8點鐘,巧得鍋,唔講呀!唔講呀!見面先講呀!喺小弟牛一嘅前一Day,即係7月3號,我決定要一條冷出街幫自己提早慶祝,首先我去咗位於尖沙咀北京道65號嘅Jollibee度開餐,再搵星級髮型師Cor Cor剪個靚髮,喺Festival Grand Cinema睇完【汪汪夢裡人】之後,我就返去馬鞍山壽司郎慢慢嘆。每次碰到一啲唔開心嘅事,我都會走嚟Sushiro瘋狂‘’掃食”,保證萬試萬靈。宵夜食啲乜嘢好?兩支Corona啤加一包熱浪薯片,重拾中學年代走堂上天台‘’自修”嘅叛逆歲月。去到正日當日,小龍女就帶我去焱丸水產食個夠本,難得姑姑肯破戒同我飲返杯 (查實係佢擺烏龍點錯咗白桃玉露茶燒酎!哈哈~),過兒當然係奉陪到底!三年冇嚟,食物質素依然keep住喺高水平,真不枉其「本土最強黃店」之美名。開講有話:飲得苦中苦,方為真男人,Come On Bro~大哥先飲為敬,Cheers!食飽飽仲順便包埋飯後甜品,咁樣嘅老死直程係太監騎馬,冇卵得頂!Chapter 10:我的大婆與二奶 😚
我做人向來都分得好清楚,二奶還二奶,大婆還大婆,凡事分配好主客位置,想盡享齊人之福,變成名副其實嘅時間管理大師?真係話都冇咁易!Chapter 11:攜手走過廿一年 👩🏽🤝👨🏻
回頭當那天的我永遠未叫座~但您的雙腳亦留在愛河~當天原來您哭過~但您不忍心再打擾我~抬頭當這天的我要快樂慶賀~但您彷彿眼淚從未留過~您太瞭解我~如上世紀定了因果~今生跟我渡過~記得同您初相識嗰時,正好係克勤推出大碟《Ever Last》嘅同一日,唔經唔覺就攜手走過二十一個年頭,希望喺未來嘅每一年,我哋都可以好似平時咁陪住對方身邊慶祝生日,仲要預先約定拖住手一齊入戲院睇晒每一套【蠟筆小新】劇場版電影⋯⋯Chapter 12:感謝您們的厚禮 🎁
登登登登~It's my birthday boxing day!上面呢款小新散紙包睇落係咪好得意呢?係姑姑特登買嚟送畀我㗎!呢個由Miramax官方授權嘅「Bad Mother Fucker銀包」我已經用咗五年有多 (計埋今次總共更換過三次全新嘅做替補),有睇過【Pulp Fiction】嘅忠實影迷,實會明白佢嘅吸引之處。當霧越未麻撞正靈界小閻王,一場墮落嘅審判隨即展開。細佬嚟緊將會開設一間小型Cafe,正忙於物色合適舖位⋯⋯好炫友慧菁知道我因公事而冇辦法參加林志炫ONEtake2.0《我忘了我已老去》世界巡迴演唱會台北安可場,於是就好窩心咁買咗份周邊商品畀我作為留念。
Chapter 13:脫離舒適圈的太極,沒有包袱的Utopia 🤟🏻
太極喺約滿星光前發行嘅專輯《Utopia》大玩中西合璧,鋒利感十足,絕對係一隻破格而有完整音樂性之搖滾佳作。全碟好歌多不勝數,由Gary Tong作曲/填詞/主唱嘅〈天安門的風箏〉先聲奪人,〈偷食〉風趣抵死又有火,〈望故鄉〉盡顯Joey Tang廣闊嘅音域,加埋遊走喺Alternative Rock同Grunge之間嘅〈夢到這故事〉、最啱揸住車聽嘅〈白色園地〉以及擺明有‘’借鑑”〈Time in a Bottle〉嘅耶教神曲〈求祢〉,首首都極具水準,如果從來冇聽過呢張唱片,或者有九成香港樂迷都只會將呢班老鬼歸類為一隊專唱情歌嘅商業Pop Band。Chapter 14:愛不是遊戲 (2024年老聲衰版) 😮💨
晚安老闆,歡迎嚟到大富豪,本店嘅第一紅牌駐場歌手西門吹雪現正喺13號房恭候您嘅大駕光臨,呢邊請~WTF?廿蚊超荀價Dinner?點解感覺上似係有啲伏伏地咁嘅?
嗨~全宇宙嘅二傻fans~山頂嘅貧友~Are You Ready?Let's Go Rock And Roll!
正所謂腎不虛人不老,男人唔補好易冇,估唔到本年度最期待嘅一份生日禮物最後居然會變成咁⋯⋯何伯~哎~唔係!盛哥~閣下咁嘅表現,對唔對得住追隨咗你廿鳩幾年嘅鄉親父老?
懷緬過去常陶醉~一半樂事~一半令人流淚~夢如人生快樂永記取~悲苦深刻藏骨髓~嗚嗚嗚~
Chapter 15:有請特別嘉賓 - 鹹永撚 🫡
睇見現場噓聲不斷,高級經理塵伯長就急不及待吹雞Call大富豪嘅鎮店之寶鹹永撚出嚟平息民憤,另送啫啫花甲粉絲煲 + 傷心牛肉麵。介紹完眾位弟兄姊妹所送嘅大禮,下一個Chapter係Blog主精心揀選嘅新書推介!
Chapter 16:好書推介 - IMU | 空晴 📖
Blog友inanna最近出版了一本小說,是一個關於AI機器人覺醒的故事,實體書可於二樓書店 (灣仔森記) 或連鎖書店 (銅鑼灣商務) 找到,亦可在以下連結購買:電子書連結:
Chapter 17:令人又愛又恨的橙色兵團 🇳🇱
Euro 2024於兩日前曲終人散,大熟大勇的西班牙以一球力壓由「新一代戰術大師」修夫基領軍的英格蘭登基,成為史上奪得歐國盃冠軍次數最多的隊伍,亦再一次認證了哈利簡尼的黑氣石神話。至於我最喜愛的國家隊荷蘭,則早在四強慘遭英格蘭絕殺出局,雖然晉級過程備受爭議,但若單以整體陣容來看,近年明顯青黃不接的「橙色兵團」能走到準決賽階段,已屬超額完成任務。要列出近期最出位的荷蘭新星,我只想到表現超卓的加普、予人有點華而不實之感的沙維西蒙斯、效力德甲班霸拜仁慕尼黑的中流砥柱迪列治,以及因傷未有隨隊征戰的法蘭基迪莊。看著現時這支人才凋零的橙衣軍,真不禁令人感到唏噓,回首當年,在球王告魯夫的帶領下,讓荷蘭開始躋身足球強國之行列,並將其恩師米高斯「十上十落」的全能踢法發揮得淋漓盡致,至今仍然為球迷們津津樂道。
踏入80年代,由三劍客 (古列治、列卡特、雲巴士頓) 率領的國家隊甚至於1988年取得歐國盃冠軍殊榮,可惜這也是荷蘭唯一拿過的重量級獎盃,及後球隊在世界盃三度殺入決賽均鎩羽而歸,成了足壇上著名的「無冕之王」。
而說到本人首次接觸的荷蘭隊,就是於94世界盃八強與王者巴西鬥得難分難解的那一支,腳法細膩兼且射術精湛的「Iceman」柏金,加上剛崛起的「小飛俠」奧華馬斯,快速機動的悅目打法,使我正式變成一個不折不扣的‘’Holland躉”。 踏入80年代,由三劍客 (古列治、列卡特、雲巴士頓) 率領的國家隊甚至於1988年取得歐國盃冠軍殊榮,可惜這也是荷蘭唯一拿過的重量級獎盃,及後球隊在世界盃三度殺入決賽均鎩羽而歸,成了足壇上著名的「無冕之王」。
若要我選出近代最強的荷蘭隊,那就必定非1998年那隊莫屬,伯金、奧華馬斯、古華特、戴維斯、施多夫、高古、史譚、雲達沙、迪保亞兄弟,個個名字都響噹噹,惟於八強再度碰上宿敵巴西導致未能更進一步,對此,我也只能輕嘆一句時也命也。
Chapter 18:去晏菲路前做足準備 ☝🏻
上星期終於扚起心肝著手籌備11月的「利物浦朝聖之旅」,衷心多謝三位身在英國的好友和好上司華仔哥的傾力幫忙及溫馨提示。去晏菲路前做足準備,熟讀相關手冊、攻略乃是必須的。9、7、20、27⋯⋯到時著哪一件波衫過去好呢?白痴!小朋友才做選擇!我全部都要!有關我愛上利記的原因有三個,一是受我一位已故摯友的影響;二是自幼偏愛紅色,卻又與「魔鬼」無緣,而碰巧90年代中期的利物浦領隊伊雲斯所崇尚的「Pass & Move」戰術亦很對我口味;三是麥馬拿文、科拿、列納等「Spicy Boys」的冒起,靚仔列納踢法冷靜,並具有不俗的領導才能,還擅於處理自由球;科拿走位靈活,射術精湛,神一樣的射手觸覺和把握力,叫一眾英超守衛、守門員聞風喪膽;腳法秀麗的「老麥」麥馬拿文則擁有少數英格蘭球員所欠缺的盤扭技術,且覆蓋範圍甚廣,分分鐘令人防不勝防,更重要的一點是,他那邊扭波邊撥頭髮的瀟灑步伐,真是連球王施丹都要甘拜下風。廿六年前,我曾與我的畢生好友約定,假如利物浦能首奪英超錦標,我們便馬上飛到晏菲路跟一班名宿來個近距離會面,那管是傾家蕩產也要兌現承諾。無奈的是,自他走後,每逢利記贏得輝煌成就之同時,就例必會有一些外在因素令我不能享受其中。2005年,利物浦在「525伊斯坦堡之夜」奇蹟地殺敗星光熠熠的AC米蘭拿下球會的第五座歐冠獎盃,那一年,我還深陷於前度及摯友離世的陰霾底下;2019年6月1日,由高普帶領的紅軍於馬德里萬達大都會球場以2: 0擊敗首度打進歐聯決賽的熱刺六度封王,我的躁鬱又再次復發;來到2019年至2020年球季,當他們成功舉起首個英超冠軍獎盃,卻不幸遇上肺疫襲全球,這可能是上天的特意安排,又或許是人到中年,就連體內的激情細胞也跟隨著年歲的增長嘎然而止,種種意料之外,讓我的朝聖之路一再延宕。有人問我,會否因為錯過了跟傳奇名帥高普見面的機會而耿耿於懷?坦白說,我還真的沒有此想法,只要能親身踏足利物浦這個城市,並到晏菲路看一場球賽,我就已經心滿意足了。假若時間許可的話,屆時我還會去北愛爾蘭把【Derry Girls】的場景通通拍一遍。
未完成和正在努力的部分包括:先論身體狀況的滿意度我覺得是合格的,惟體重上尚有很大空間可改進;前往Procida尋找【The Talented Mr. Ripley】的取景地點,飛去荷蘭欣賞一望無際的鬱金香花田,以及上個章節所提及的「晏菲路朝聖之旅」僅取決於金錢和時間的允許,而有些需要他人配合的事情,則只有靜待時機成熟才作打算。在「最想看的演唱會名單」上,名列第一的是日本隱世歌姬山崎ハコ,第二是中國低調唱作才女丁薇,第三是寫歌如寫詩的黃舒駿,還有「可看可不看」的玉置浩二、康康、楊培安和徐佳瑩。Chapter 19:人生下半場的目標清單 💁🏻♂️
翻一翻我在上年3月所設立的「人生目標清單」,已完成的有:大阪贖罪之旅、狂歡三傻和好再合體、到紅館觀看「絲絨歌后」蔡琴的演唱會、養兩隻貓、與失聯二十三年的兒時老友相約飯聚。Chapter 20:Goodbye Roy Roy 🫂
工作方面,在年中Appraisal‘’員工的自我評語”一欄上,我寫道:「不與他人比較,只專注於自我提升,繼續努力維護團隊穩定,同時亦會時刻保持警惕,並將所學到的知識毫不保留地傳授給部門內的其他同事。」打破殘酷社會生存法則,杜絕辦公室政治,提倡守望相助、關愛共融的精神,確保每位同事都能夠在愉悅的氛圍底下工作,這管理哲學的確是很傻很天真,但我仍將堅定地扮演好支撐團隊的後盾角色。不要問~不要說~一切盡在不言中~這一刻~偎著燭光讓我們靜靜的度過~莫揮手~莫回頭~當我唱起這首歌~怕只怕淚水輕輕的滑落~願心中~永遠留著我的笑容~伴你走過每一個春夏秋冬~幾許愁~幾許憂~人生難免苦與痛~失去過~才能真正懂得去珍惜和擁有~情難捨~人難留~今朝一別各西東~冷和熱~點點滴滴在心頭~縱使你是MT Group內最常犯錯的一員,還一而再,再而三把我辛苦建立的金漆招牌拆下來,但我卻從未對你產生厭惡或憎恨之情,反而還選擇接納並包容你的不足之處,看見您從一個沉默寡言且態度傲慢的富家子弟,到後來每天都會跟我說聲早晨和再見,與同事們亦相處融洽,身為隊長的我真是深感欣慰。Roy,祝你一路順風,移民生活愉快, 但願你在此汲取的快樂養分能伴隨您一路成長茁壯。Chapter 21:十二年前後 👥️
歲月無聲消逝,回頭轉眼已41,拿起新舊照片作前後對比,如今體態略顯豐腴,髮量不再茂盛,衣著打扮亦與年少時大相逕庭,唯一不變的,是我那嫉惡如仇的火爆個性,還有對某些事物的執著和堅持。Chapter 22:Neway熱唱李克勤 🎤
嘩~連這首絕版Sidetrack都有?更意想不到的是,在從沒唱過之情況下,我竟然一句歌詞都沒有漏掉,這不是神蹟是甚麼?
Indie&Latte&Me 生活瑣事雜誌(2024年7月生日金裝紀念版)完,若然能一字不漏睇晒成本雜誌,恭喜你/妳,閣下已符合資格成為本寒舍的VIP會員。
Indie&Latte&Me 生活瑣事雜誌(2024年4月創刊號)CoCo&Me 生活瑣事雜誌(三週年停刊號)
CoCo&Me 生活瑣事雜誌(2020年10月號)
CoCo&Me 生活瑣事雜誌(2020年9月風月號)
CoCo&Me 生活瑣事雜誌(2020年7月生日金裝特厚版)
CoCo&Me 生活瑣事雜誌(2020年3月抗疫號)
CoCo&Me 生活瑣事雜誌(2019年10月Halloween特別號)
CoCo&Me 生活瑣事雜誌(2019年9月號)
CoCo&Me 生活瑣事雜誌(2018年7月號)
CoCo&Me 生活瑣事雜誌(2018年3月號)
CoCo&Me 生活瑣事雜誌(2017年11月創刊號)
噢,超詳細.
回覆刪除😁😁😁😁😁
刪除Latte好快就大隻過Indie,我除咗無睇講足球嗰個chapter,其他都有睇晒喔
回覆刪除角度問題,肥妹仲係大隻好多。😅🤣
刪除迪哥你去到呢個歲數髮量絕對算茂盛啦
回覆刪除同你熟嘅人基本上都知你係送禮勤歌迷,只係冇諗過原來係你阿嫲培養你
聽咗首neway medley,似模似樣又有感情,仲做曬mixing咁pro,正呀
同埋我想講,你次次出文我都一字不漏睇曬㗎喎,不過會分幾日睇囉。
我阿嫲由李克勤唱夏日之神話嗰時已經話佢係全香港唱得最好,佢仲問許志安唱歌咁難聽唔知點解可以出到道?😅🤣
刪除老一輩覺得許志安梁漢文係揸住春袋唱歌,事實上老鼠安一唱非主流歌就係出嚟搞笑,著名例子有play it loud
刪除安哥當年翻唱Let it be先係經典,不過我已經搵唔返段片,好似係同Uncle Ray賀壽,佢仲要接住陳奕迅之後嗰個唱,個感覺仲柒。🤣
刪除記得嗰次笑到我老母標眼水......😂
刪除生日快樂,能做到杜絕辦公室政治是一項很偉大的成就,柏金98世界盃對阿根廷球金球,至今仍歷歷在目。
回覆刪除柏金踢波真係好好睇, 好鍾意佢同古華特呢對前鋒組合。🤩
刪除貓貓確實好得意,但佢哋有起事上嚟,啲醫生費動輒以千元起跳,十分揦脷。而貓貓好難餵葯,令人筋疲力竭。
回覆刪除既然決定要養牠們,就已經有心理準備了,所以這幾年趁著還有體力和時間,就打算多去幾個一直以來想去的地方。🫡
刪除隻貓貓個樣好得意,好似俾人喺臉中間用毛筆寫咗個人字。
刪除的確如此,Indie如此可愛又討人喜歡,實在難以理解之前棄養她的人的想法。🙄
刪除Latte攬住indie好得意,睇落兩個感情其實唔錯😻😻
回覆刪除blog主望落去唔似41歲,仲好young好in👍🏿
Indie其實好錫個妹,阿b嗰日做完手術返屋企佢即刻全程貼身保護佢。🥰
刪除阿喬其實你而家係好睇過以前,Latte做完手術ok嗎?
回覆刪除做完手術比以前仲活潑,而且食量仲大咗。😂
刪除以前個樣比較乞人憎,之後肥咗睇落咪祥和啲。🫠
刪除以前你孭住屋企太多嘢太大壓力啫
刪除而家一樣要孭,呢啲嘢邊度孭得完? 如果可以失憶做個自私自利嘅仆街舅父咁就乜都唔使煩。😇
刪除迪哥你keep得算好好la!你睇下你同齡d朋友!😂
回覆刪除今年終於下定決心出發去利物浦喇!👍
我其實冇特別keep過,只係不嬲比較少掂糖分。😅
刪除我一字不漏睇完 😎
回覆刪除VIP客戶你好!😆
刪除有個 "多啦A夢" 長期守護著,真的幸福 ^.^
回覆刪除儘管我的多啦A夢已經離開多年,但我仍舊無法忘懷。😇
刪除一個忠心如你嘅超級利友唔親身去一次Anfield又點似樣呀?😁
回覆刪除Plan好曬睇邊場未?經驗之談,波飛最好幫襯官網,千祈唔好貪平,
玩high class啲就訂包廂,不過就會感受唔到現場氣氛,
你件老麥波衫一定要著過去呀,畀人知道你係spicy boys年代鐵桿粉👊
順便仲可以喺非賽事日參觀球場,你有時間上官網睇下。
肯定係睇11月9主場對維拉嗰場,但買波飛嗰度有啲阻滯,我都諗住過幾日直接喺官網買,包廂方面可以考慮,橫掂我買普通波飛都食硬炒價,參觀球場應該都會,因為我本身預咗4至5日時間喺利物浦。😁
刪除老麥件波衫一定會著過去,仲有27號運財童子,希望到時可以為球隊帶來好運。✌🏻
四至五日時間其實好夠,利市好細,除咗球場、store同披頭四博物館,基本上冇乜嘢好行。
刪除第一次歐遊,我係計埋自己會蕩失路嘅時間。😅
刪除個銀幣幾正,我都好後悔當初無訂,Klopp個公仔亦冇想像中咁核突。
回覆刪除嘉寶喺世界盃兩次嘅成功證明咗佢合適嘅位置從來只有左翼左邊鋒,
隊長就睇得出有少少回塘,下季會唔會去馬體會仲係未知之數,
仆街,神鵰俠都嚟咗一段時間,仲未開始買人真係痴鳩撚柒線!🙄
98年隊荷蘭勁好睇, 我記得辛頓打國家隊特別sharp,返利記就變返pat屎。
辛頓喺利物浦成日畀人擺去踢啲奇奇怪怪嘅位,一陣踢左閘,一陣又踢防守中場,而事實上呢兩個位根本就唔啱佢踢;加普而家個情況同佢有啲似,但老實講,佢上季總括嚟講都算交到功課㗎喇。😮💨
刪除佢同薜基、摩連迪斯一樣好雞肋,不過勝在一落場就搏盡唔hea踢。
刪除Gakpo啱啱嚟嗰陣都入過好多救命波,上季打唔好好明顯係擺位問題,如果前面真係要放走一個嘅我會簡迪亞斯或者傻紐多過佢!
我都會揀迪亞斯,佢十足十以前巴西個丹尼臣咁,花巧十足有睇頭,但踢落完全唔實際。😑
刪除薜基喺拜仁走咗之後無論喺意甲同英超發展都唔如意。🫣
刪除喵喵好活潑,有佢哋一定唔會悶!🐱🐈⬛
回覆刪除一動一靜,一肥一瘦,一個乖巧一個百厭。😂
刪除One Night In paris好靚聲wor,好有hacken feel。。。
回覆刪除段medley做得好仔細,都唱得好好呀!原來你嫲嫲咁有taste。。
有時一返到屋企睇到d喵嘅舉動真係會令人好快樂☺
41歲睇落仲好潮呢!
比較可惜的是,當時因為要協助家裡處理事務,錯失了帶他觀賞李克勤演唱會的機會。😇
刪除我迷上Hacken係出高妹嗰年,當時仲係學生。。
刪除未有及時欣賞到港樂同情情塔塔,又唔想睇左麟右李。。。
後來要等到佢同Joey個拉闊,我先第一次欣賞佢嘅現場演出。
欣賞唔到佢喺港樂嘅精彩演出,係我人生其中一個小小嘅遺憾。😮💨
刪除生日快樂,比全職乖孫更荒謬的人生故事?真的是想到也心酸呢。
回覆刪除心境已無牽無掛,聚散皆不繫於心。😇
刪除肥妹終於上得返床真係好!阿b由細到大都係霸王妹!🤣
回覆刪除做完手術仲冇時停,胃口仲比以前好咗,仲堅過Co仔。😅
刪除同肥妹有個強烈對比🤣
刪除話口未完跟住阿b就又痾又嘔,心痛死。🥲
刪除百厭星食嘢咁急又成日瀨地下,正常ar!🤧
刪除呢隻b又唔怕痛又反斗又為食,真係似足CoCo。😆
刪除大哥生日快樂,好期待睇你嘅利物浦遊記!
回覆刪除想像到under你工作一定好幸福,如果有機會可以做到你下屬就好...
暫時起飛前都有好多阻滯,希望之後一切順利;要喺我個部門工作首先要受到我啲火爆脾氣先,通常啲死仔一做錯嘢都例必會食我第一吓重炮。😂
刪除介唔介意講有乜阻滯?
刪除主要係波飛,但啱啱自己研究到喺利物浦官網嗰度買,錢就畀咗,而家睇下佢幾時會send電子波飛過嚟,當confirm咗我就會開始book機票同酒店。🙂↕️
刪除利物浦嘅飛出名係英超最難買嘅波飛之一,原因係佢哋嘅門票大部分都預畀自己友.
刪除有日無聊去Klook昅下,先知道阿仙奴啲飛原來係最貴,最平都要五千幾,做熱狗球迷就爽呀~用呢個價錢基本上已經可以坐到頭兩排。🫢
刪除因為利記同兵工廠始終都係傳統強隊,車仔 都係2000年之後先真正崛起.
刪除咁點解49000啲飛又會咁平嘅?最低千二蚊就有交易。🤔
刪除(1) 3年半手機就可以退休,羨慕!
回覆刪除(2) 那個波波是無線遙控的嗎?
(3) 貓捉曱甴是天性,我以前隻貓一定會玩死佢。
(4) 你說:「應把握家母健在之時,多加關心及傾聽,並珍惜與其相處的每一分每一秒,別再徒留遺憾。」非常欣賞你這個想法和做法,我是過來人,總之珍惜眼前人吧!
我每部舊電話都好得意,當我要買部新嘅時候,舊嗰部就會忽然自己好返,好似有靈性咁;個波波係無線遙控㗎,平時用usb叉電就ok。😁
刪除嚟緊好大機會會一個人去歐洲,所以想買部影相靚啲嘅電話。😄
刪除Cat, 希望你永遠快樂
回覆刪除多謝牛牛。😺
刪除兩隻貓仔互動很有趣🐱😸似乎很多貓都鍾意食貓條😻
回覆刪除零食基本上人人都愛,貓狗一樣。😺🐶
刪除🐰 謝謝狂小子用心分享嘅七月篇章🙏😊
回覆刪除個人感覺最火🔥 係【孖喵攬頭攬頸】嘅片 🥰
我【停不了】咁Loop住睇(◉‿◉) 【温暖不腻人】💞 哈哈🤣👍
我都覺得呢段片好正,佢兩個其實係sweet到爆。🥰
刪除汪汪夢裡人真係被人低估了,呢部暫時是我今年看過最感動的動畫電影。睇到全職乖孫裏面的水舅父真是火都嚟,難以想像屋企有個咁嘅人會幾咁痛苦?不過講到尾都是個老母自己攞嚟。
回覆刪除戲入面嗰個舅父同埋大仔我兩邊屋企都有類似嘅人,而且啲行為比佢哋仲嚴重多100倍,另加一班殺人如麻嘅邪教親戚。🕯
刪除睇到利物浦個章節有啲眼濕濕,支持Blog主親身去朝聖一次!我仲儲緊錢不斷努力中!!
回覆刪除你每次出文我都係一字不漏睇曬㗎! 我都應該要有張vip卡!!
即刻送上唔囉嗦!💳
刪除謝謝分享你的生活點滴,好好享受每一天。
回覆刪除荷蘭在74世界杯是實力最好的了,可惜是運氣不佳欠攻不下,最後贏不了冠軍,當時很為他們不值,跟著他們總是跟獎杯無緣,現在更是不濟了,😔
估唔到EE姨都係球迷,仲有幸經歷過告魯夫年代,真係令人羨慕呢!😊
刪除謝謝分享。
回覆刪除😃😃😃😃😃
刪除貓咪有你們的照顧,在家幾時都咁好~~
回覆刪除狂小子戴上眼鏡真係斯文好多......
右眼視力基本上只剩下一成,左眼也變弱了,成為四眼田雞是無可避免的,同時也可以遮擋住一些殺氣。🤓
刪除傻啦,一向都冇覺得你有股煞氣!!!
刪除戴眼鏡若能對視力有幫助也需要,大把人都要每日戴…
這是與我共事的人告訴我,說我有一股很強烈的氣場。😂
刪除Happy birthday,中學就已經識飲Corona👍
回覆刪除有時會飲Blue Ice,細個唔知點解唔覺得難飲。😂
刪除能夠有外/祖父母陪伴成長,係一種福氣。我都好慶幸,小時候家中有個老人家,伴隨著我們長大,有些互動,就是跟父母不一樣的。
回覆刪除真的很懷念和她相處的那一段日子。😊🧓🏻
刪除又大一歲la didi~~不嬲都覺得你戴眼鏡個look好睇好多!😎
回覆刪除聽你唱李克勤最有回憶,冇諗過原來係你嫲嫲引導你成為佢粉絲~~😮
喂喂最近係咪冇乜食煙飲酒呀?😆把聲有你高峰時期7,8成喎~
尤其第二首,但點解唱到咁多首都冇我不會唱歌同乜乜演奏廳㗎??😒回水呀!!!😤
每次聽你扮痰校長都笑死,真係好鬼似呀頂~~~😂
呢排冇食煙又少咗飲酒,嗰日一揸起支咪唱,嘩屌!把聲仲清撚過費玉清呀!🤪
刪除我不會唱歌得2017演唱會版本,個beat好難跟......🫠
刪除頂~~~~🤣🤣🤣🤣
刪除🤪🤪🤪🤪🤪
刪除indie姐好cool好正,觀貓吸貓真係令人舒暢
回覆刪除你型過十年前,睇唔出已到不惑之年
jollibee啲雞確實唔錯,不過貴咗啲
我係出晒名嘅鬼影變幻球,一敏感就會口腫面腫,但狀態ok嗰陣間唔中都會影到一兩張‘’照騙”。🤪✌🏻
刪除你扮阿倫啲detail位跟得好足 啲尾音似得好交關
回覆刪除如果你一早上殘酷一叮 馮文樂應該冇得出道 😂
以前有好多網友睇到【殘酷一叮】馮文樂出嚟嗰集以為係我上咗去。🤣🫣
刪除馮生扮得最似係棠哥葉振棠 阿倫其實唔多似
刪除如果講扮譚詠麟其實陳奕迅似啲。😆
刪除看兩隻貓貓的毛色和表情就知你把他們照顧得無微不至,
回覆刪除41看起來還很年青呢!知道小子的人生不易過,希望你未來一切都好。
謝謝。🙏🏻
刪除欣賞你想做就做,想去就去,呢樣嘢唔係人人可以做到㗎👍
回覆刪除人生無常,財富亦可能隨時散盡,生命更可能隨時消逝,及時行樂實屬必要。😇
刪除21年唔容易呀,
回覆刪除作為你哋其中一個見證人,真心替你哋感動
Jane
25/7/2024
😊😊😊😊😊
刪除荷蘭種大上大落嘅二奶命的確係令球迷又愛又恨,
回覆刪除身為多年死忠利迷,唔去一趟Anfield實會有遺憾,支持你嘅決定呀!
印象中佢哋好似射親12碼都輸......😅
刪除淨係贏過瑞典同哥斯達尼加.
刪除一對強隊基本上就輸9成......🤣
刪除你看起來完全沒有不惑之年的氣息啊!
回覆刪除每年生日都有那麼多朋友陪伴,足見你的好人緣呢。
今年生日我選擇了較為低調的慶祝方式,並減少了與一大群人的聚會。😊
刪除想看日本比較小型的音樂會是有點難度的,我之前也略有經驗,若果是工藤靜香和玉置浩二這類知名歌手當然就比較容易解決。
回覆刪除確實是較為繁瑣,因此暫時擱置了,原本想在十月底有機會欣賞山崎ハコの小型音樂會,還計畫到時與女友一人返回香港,一人直飛倫敦。😕
刪除不帶姑姑一起去?
刪除她多次表明不想搭長途機,我當然要尊重她的意願。🤨
刪除期待睇你嘅anfield之旅!!
回覆刪除好想快啲到11月。🙂↕️
刪除靚仔你carry到嗰副多角形眼鏡wor~~😆👍
回覆刪除Latte箍住indie條片我前前後後loop咗十幾次呀!!😍
你同姑姑講嘅嘢一樣喎!可能因為我塊面三尖八角,所以啱啱好負負得正。😂🤣
刪除有時我都給貓一隻一半周圍貓湯, 費事佢哋小氣 🙄 ... 唔爭時一隻一支!🙂
回覆刪除Indie好錫個妹㗎~成日乜都讓佢食先!🥰
刪除一系列的温情洋溢,祖母恩,父母情,21年與愛侣的携手相依,與摮友的情誼持續,十分難得!
回覆刪除延續了對coco的愛,Indie與小黑,今天多幸福!
更難得的是~Teddy營造了一個無私共享的工作環境,是一個很好的領導人。
近期全家深受病痛所苦,母親於八月底需進行膝蓋微創手術;本人因長期勞損導致腰部拉傷,須定期接受物理治療;Latte則罹患腸胃炎,目前正在服藥治療中;相較之下,Indie算是不幸中的大幸,僅有些微感冒症狀。😿
刪除人生不如意事十常八九,有病時忍耐,然後努力接受醫治。歌曲音樂可以安撫心靈,生活就好過了。
刪除面對一班搞風搞雨的惡毒親戚,才是最令人心累的一環。😞
刪除最可怕的是自私妒忌,加上掠奪利益的親人,真是令人有痛心的遺憾!
刪除忘記他\她吧,上天自然眷顧和平的人。
如果是三姑六婆之流,算了吧。
猶如一群滿口鮮血的寄生鯰魚,每日潛伏於旁側伺機而動,實則三姑六婆之稱呼與否,端視當事者之觀點而定,若您堅持每日敞開家門任人劫掠,我亦無可奈何。🤷🏻♂️
刪除相信沒有人會敞開家門任人掠奪,將之拒之千里,淡薄自甘,一切也就成為過去了。
刪除如此荒謬之事,竟接二連三發生於我身上,阿姨,您說可不可悲?😮💨
刪除多年來看到你與嫲嫲的照片,認識了你的童年,令人欣喜。自從谷歌開始至今,2013至24,十年了,今年生日41歲,漸趨成熟,思想更上一層樓,恭喜,恭喜! 阿姨祝你萬事勝意,四季安康!
回覆刪除多謝阿姨。😄
刪除生日快樂! 祝願你身體健康 生活愉快.
回覆刪除多謝。😃
刪除迪記青春常駐,仲溝死女
回覆刪除公司大部分同事年紀都細到做得我個女,仲溝乜嘢?😂
刪除Happy B Day dude
回覆刪除一個普通人又唔係公眾人物,keep到有頭髮冇發福已經算贏咗㗎喇。
本身幾欣賞太極joey tang,但最近見到佢奶鏡得咁肉酸認真係冇眼睇!
Joey哥性格較為圓滑,所以才那麼吃得開,但我自己就比較欣賞生哥周啟生,他說話直率,立場鮮明,即使是黃絲也會批評ViuTV,不像某些香港人隨波逐流,是非不分。🫡
刪除雖然生哥出名神經質同埋冇品,
刪除但對於香港樂壇佢同甄妮講嘢不嬲都夠公道,只係忠言逆耳
同香港人講音樂就曬鳩氣,從來都係隨波逐流,你淨係睇而家奧運就知道大部分香港人本身係幾冇思想。🙂↔️
刪除Blog主真係好叻,杜絕辦公室政治喺我眼中係mission impossible~
回覆刪除恭喜你同姑姑一齊21年,你嗰三個阿愁好得意呀~LIkE~
此留言已被作者移除。
刪除想徹底杜絕辦公室政治,只要拿出真誠的心意,就一定會得到少許回報。反之,面對一群一心想你家破人亡的親朋戚友,才是最不可能解決的事情。🙂
刪除Time Time生日快樂,你嫲嫲都好有品味喎,喺四大天王盛行嘅年代竟然 獨具慧眼識得欣賞Hacken。我唔只成篇blog一字不漏咁睇曬㗎,仲連你段克勤medley[好戲之人👍希望👍👍失瑰記👍👍👍先睹為快👍👍👍👍]同one Night In paris到聽埋,one Night In paris還原度至少有80%呀!~👍👍👍👍👍
回覆刪除多謝豬仔,我印象中真係冇聽過阿奶讚過其他歌手,就連張學友喺佢評價入面都只係中規中矩,許志安喺佢心目中直頭差過謝霆鋒。😅
刪除許志安嗰陣時d人氣大部分都係靠佢老婆同埋商台夾硬力谷,齋睇賣碟數字同埋演唱會場數佢根本遠遠唔及hacken,唱現場更加係擺唔上檯面,係班連登仔成日喺度刪改歷史!~
刪除我淨係覺得佢兩公婆日日出嚟做show好撚嘔心,不過普遍香港人最受呢套情感勒索。😷
刪除大阪贖罪之旅<-----呢個會唔會有得睇?:-P 🍊
回覆刪除話時話又真係好似從來冇出過大阪系列嘅完整遊記。😆
刪除但係我睇玩轉腦朋友2都喊左...係咪好廢XXXD
回覆刪除每個人個哭點唔同,唔可以咁講嘅。😁
刪除生日快樂,型佬。
回覆刪除🤗🤗🤗🤗🤗
刪除生日快樂狂兄,老麥唔係衰在懶散不思進取一早係球王級la!
回覆刪除荷蘭青黃不接嘅問題真係好嚴重,你見迪比條廢柴仲做到主力就知乜事!
btw,睇曬成篇blog,除咗欣賞你依然冇畀潮流淹沒嘅attitude,
仲勾起我親身去紐卡素嘅意欲.
老麥啱啱去皇馬嗰陣都有好多波踢嘅,跟住踏入六條煙年代,佢就開始成為高薪冗員,仲畀人笑鳩佢係碧咸個翻譯,唔知係咪坐得太耐搞到啲關節硬晒啦?跟住去到曼城直頭打到成擗屎咁。🫠
刪除Spicyboys只係得占士一個越打越好,明明之前出名牛油手,點知去到樸茅突然翻生仲越打越穩定,其他嗰幾個得Fowler叫有d貨交,麥卡迪亞去到後期直頭冇晒影..
刪除McAteer之後轉型成為一位著名荷里活演員,代表作有【金剛】、【豬兜有情人】、【阿SIR嚟自樂人谷】。🎬
刪除😂😂😂😂😂😂😂😂😂😂
刪除🤟🏻🤟🏻🤟🏻🤟🏻🤟🏻🤟🏻
刪除博主歌声很棒,不愧是克勤老师的多年忠粉。
回覆刪除🫣🫣🫣🫣🫣
刪除有偏好既朋友寧舍易選禮物既!套小新皮具,簡直無得頂啦。
回覆刪除我勁鍾意呀!🤩
刪除Happy Birthday Time Is Changing 🎂🎂🎂🎂
回覆刪除今年你算係滿足咗兩個小小讀者嘅幾個期望, 一係重啟生活雜誌,二係"居然"找返麻甩遊記條數~😆
{陳太字}兩隻小公主各有各靚,d片睇得我哋好開心,latte超級活潑,indie懶洋洋,形成一個好得意嘅對比🤣,latte兩隻腳仔好靚,好想捉住佢猛咁索呀!
{陳太字} 睇完全職乖孫我身同感受,同時亦都有諗起你嘅故事,對於一班食人唔lur骨嘅垃圾親友,我只能講句共勉之,拍拍。btw我都好掛住 阿婆整嘅梅菜蒸鯇魚lei。
最後,我哋一致認為,2024嘅TIC係完勝2012嘅TIC。👀
{陳生字}喂!幾時整返段neway熱唱林子祥呀?
梅菜蒸鯇魚我阿嫲都好拿手,仲有榨菜蝦醬炆豬肉;要唱成晚林子祥?請準備定幾個氧氣筒畀我。🙉
刪除原來唔經唔覺你同阿琪已經行咗21年,congratulations!
回覆刪除咁就頂咗我21年......😅
刪除橙色兵團冇大賽命呀!
回覆刪除🙂↕️🙂↕️🙂↕️🙂↕️🙂↕️
刪除巴打望落頂多30頭,戴咗眼鏡有D韓佬feel,又有少少似靚仔版趙哥😂
回覆刪除同之前你隻霸氣貓相比,呢兩隻喵又盞鬼好多,
細嗰隻一睇就知係刁蠻女,大嗰隻個樣成日好似苦瓜乾咁勁負🤣
親戚基本上大部分都係仆街,尤其係大陸落嚟嗰D更加係見錢開眼,
有睇過你之前寫嘅經歷,就知道你點解覺得全職乖孫呢D係小case😥
一直都好奇怪點解你聽歌歌路咁闊但又會一路咁迷戀出名保守嘅送禮勤?
原來係因為咁嘅原因,不過我覺得你唱淫卵D歌流暢好多,特別係啲尾音似撚到🙉
仆你個街,靚仔版趙哥其實都係貶義詞!哈哈~咁我係咪要改個英文名叫做Antony?Indie自從成為我哋屋企嘅家庭成員之後性格已經開朗咗好多,雖然佢平時乖得好緊要,不過間唔中都會發吓脾氣,仲要淨係對住我先係咁,呢樣嘢絕對係我嘅榮幸嚟㗎!【全職乖孫】個老婆婆到臨死前都肯醒覺承認邊個先係對佢最好,可惜呢種「痛改前非」嘅戲碼一般只會出現喺電影上。😏
刪除趙哥好多女冧㗎!有乜嘢唔好?😆
刪除哼~😮💨
刪除告魯夫個人技術超群,贏盡球會錦標,
回覆刪除但返去國家隊最多只係得世界杯亞軍,作為球王真係有D遺憾😣
98年隊荷蘭係好好睇,西多夫唔係衰唔穩定一早係world class,
柏金係我見過最出色嘅副鋒,無論胡禮,安力卡或者後期嘅享利都受過佢唔少甜頭👍
佢唔係怕搭飛機去比賽嘅話,成就應該比當更高😕
Between,你去到利物浦嗰陣隊波應該為緊護級而戰,祝你好運🙏
本來想屌柒你,但睇到F$G今季一貫嘅“出色”操作,你所提到嘅嘢都唔係完全冇可能發生;施多夫踢法唔夠戴維斯實用,但間中又會有啲神來之筆;如果我係1998年先開始睇波,我分分鐘會為咗柏金成為阿仙奴的球迷都唔定。🤨
刪除隊波現時最需要補充嘅明顯係中堅同埋防中嘅位置,
刪除但最近收到嘅消息竟然係想放走鳩美斯同航哥😆
你話前世到底做錯啲乜撚嘢事,今世先會做猁?😈👻
友賽贏阿記好犀利,睇怕都唔使買人了。
刪除聽日會唔會去太古城?貝加,科拿,史sir會響到喎!
回覆刪除去唔到呀~今日約咗同阿Latte拆線!🐈⬛
刪除搖控波波?
回覆刪除細時初接觸雞蓉麵,簡直係人生最好食嘅公仔麵,不過而家好似唔好食定太多選擇🧐
11月好快咋!Gogogo!
個波波係姑姑淘寶買畀佢哋,30蚊個左右;起初係plan埋10月尾同姑姑飛一轉福岡,主要原因係好想睇一個日本女歌手嘅mini concert (山崎ハコ),本身諗住飛完福岡佢返香港我直飛倫敦,但之後發現原來日本啲小型音樂會嘅買飛手續好麻煩,所以唯有放棄呢個諗頭。🫠
刪除保重Bondi。
回覆刪除🫡🫡🫡🫡🫡
刪除小心呀靚仔!!男人條尾龍骨好重要㗎~~~🙈😅
回覆刪除🫡🫡🫡🫡🫡
刪除take care!
回覆刪除🫡🫡🫡🫡🫡
刪除我識巧得鍋老闆達哥,有段時間成日幫襯,佢哋真係用心製作,唔再續約係好可惜..
回覆刪除🫡🫡🫡🫡🫡
刪除好精彩好豐富嘅分享~~ 多謝你!
回覆刪除貓貓好得意呢,希望佢哋繼續健康快樂~~
為你送上遲來嘅生日祝福:) 祝你心想事成,同姑姑幸福甜蜜,繼續開心食嘢旅行睇波聽歌唱歌!(你keep得幾好啦,我睇相估最多三十中)
多謝祝福。🫡🫡🫡🫡🫡
刪除玳瑁貓真係超級靚, 貓既極上.
回覆刪除有taste!😬🫶🏻
刪除