位於觀塘成運工業大廈1樓嘅《巧得鍋》喺6日前宣布租約期滿，並於8月3號晚 (即噚晚) 結束營業，作為佢哋舖頭嘅長期食客，收到呢個消息真心覺得好可惜。😔認識我嘅朋友都知道我一向係條‘’超級大滾友‘’，最鍾意約埋三五知己一齊去打邊爐，而喺我幫襯過嘅咁多間火鍋店之中，齋計食物質素嚟講，《巧得鍋》絕對係當之無愧嘅NO.1。🫵🏻靚到瀑布咁款嘅牛肉拼盤 (包括安格斯牛頸脊、安格斯牛肩胛、安格斯牛柳粒、澳洲和牛)，一睇就知高質貨！😍價值$588嘅龍蝦海鮮拼盤，每次嚟之前我都會預先訂定。✋🏻你睇吓條龍蝦生猛到！好似喺度打緊招呼咁！為表誠意，我哋決定要夾手夾腳將你連殼消滅！🦞
貴價海鮮、肥美和牛固然吸引，但我最欣賞《巧得鍋》嘅一個地方，係班師傅會將每一樣食材都處理得一絲不苟，尤其係爽口彈牙嘅手打鮮蝦滑，食完真係返唔到轉頭。😋成班麻甩齊齊滾，唔整返碗雞子又點捨得行出個門口？🤤人生於世上有幾個知己，多少友誼能長存～今日別離共你雙雙兩握手，友誼常在你我心裡～今天且有暫別，他朝也定能聚首～縱使不能會面，始終也是朋友～說有萬里山，隔阻兩地遙～不需見面，心中也知曉，友誼改不了～🍻
喺Latte患病嘅呢段期間，Indie完美充當監護人嘅角色，跟出跟入唔在講，任阿B點樣發脾氣，佢都一樣照單全收。🥰
嘿嘿～老豆你顧掂自己先啦！扭親條腰可大可小㗎！成40幾歲人，一陣搞到連活塞運動都做唔到就認真大鑊鳥！喵～🐈⬛講起上嚟，我喺2024上半年都算得上係黑過墨斗，淨係喺錢銀方面，因為屋企同阿媽引起嘅種種原因，夾夾埋埋我都跌咗差唔多有廿皮，又經歷過跳蝨走全屋嘅慘況，早排餵Latte食藥嗰陣唔小心抽到條尾龍骨，仲攤咗喺地足足15分鐘起唔到身。用咗接近兩個月時間滅絕蝨患，再利用物理治療、針灸加上走罐去舒緩尾椎疼痛，希望過埋老母8月尾個膝頭手術之後，一切都會恢復平靜，錢跌咗咪當破財擋災囉～正所謂人冇事先做到世界冠軍㗎嘛！況且，無論遭遇幾多風風雨雨，只要返屋企見到兩隻傻貓嘅日常互動，我就會即刻開心返晒。☺️
沒有留言:
不接受新留言。