狂小子"Time Is Changing ": 兩條麻甩痴漢漫遊東京・熱（二）

2020年4月22日星期三

兩條麻甩痴漢漫遊東京・熱（二）

嘩嘩嘩～不得了喇！不得了喇！等咗咁耐，眾人期待已久嘅新一輯《兩條麻甩遊東京》終於都要出爐喇！嘿嘿～Blog友們～你哋開唔開心？興唔興奮？😍

自從發表過一篇連李克勤本尊都睇過嘅30克聽後感之後，小弟個Blog嘅瀏覽人次就立刻好似香港個樓價一樣持續高企，而喺兩年半前所寫嘅《兩條麻甩痴漢漫遊東京・熱》更意外成為本人有史以嚟收視最高嘅非音樂／電影文章。由於肺炎疫情仍然處於嚴峻階段，為配合最新公共防疫措施及規例要求，香港各大戲院就由3月28號下晝6點起一直停業至5月7號。忽然多咗個幾月假期，我就趁機匿喺屋企靜靜咁聽吓歌、睇吓書、索吓貓、Loop吓Netflix，同埋好好整理一堆已經封咗塵好耐嘅旅遊相片，整吓整吓，就令我扚起心肝要完成呢一篇擱置多時嘅遊記……📌

Are You Ready？《兩條麻甩痴漢漫遊東京・熱》第二集而家正式開波！🎥

喺今集我同華Dee會帶大家繼續玩轉東京各個地方，而內容方面就保證比第一集健康得多，絕對係老少咸宜，大人細路都咁啱睇㗎！🌞

先同各位溫故知新一下，我哋兩條麻甩佬喺呢次東京之旅入面所住嘅地方，係位於上野7-12-9嘅Ueno Hotel，而呢個範圍就係酒店嘅吸煙區域。🚬

喺展開第二日嘅行程之前，就先嚟呢間經常都人頭湧湧嘅《麺処花田Ueno》度整返碗靚麵暖吓肚！🍜

呢度點餐好方便，只需要將錢放入呢部拉麵售賣機，然後將張收據交畀師傅就OK。👌🏻

我點嘅味噌拉麵 (¥830)，想加隻溏心蛋同竹筍就要畀多¥200。放喺最頂堆什菜全部都係即叫即炒嘅，塊叉燒大塊厚肉又冇豬腥味，啲麵食落煙韌彈牙，啖湯稍為杰咗少少而且味道偏濃，唔需要再加任何調味料。🧂

華Dee點嘅味噌沾麵 (¥1190) ，聽講係花田嘅招牌食品嚟！🤔

食飽飽，就嚟到JR乘搭山手線 (往淺袋方向)，由上野計起，只需要搭六個站就會去到今集嘅首個目的地 - 巢鴨。🚉

正所謂早起嘅雀仔就大把嘢食，遲起嘅雀仔就冇啖好食，咁多位大哥，請帶路！🙇🏻‍♂️

一到步，我哋就去咗呢一間位於巢鴨駅側入口處旁邊嘅百年老舖《伊勢屋菓子店》度食碗冰消消滯。🍨

呢兩碗刨冰望落去堆積如山，睇怕都夠食半日……😂

嘆完刨冰，我哋就喺案內所攞咗本旅遊指南，正式開始第二日嘅行程！💪🏻

臨出發前等我摸吓すがもん個大屁股先，話晒都係當地嘅吉祥物嚟㗎嘛！🤣

你好～歡迎嚟到雷神堂，請隨便睇隨便揀！💁🏼‍♀️

呢間位於巢鴨地藏通商店街嘅《雷神堂》創始本店從開業至今都有成36年歷史，佢哋嘅煎餅全部都係採用日本國產米，加上自製嘅特選醬油再以人手做成，傳統又健康，買嚟送禮就至啱！👍🏻

另外，位於《雷神堂》附近嘅《元祖塩大福みずの》同《巣鴨のお茶屋さん山年園》亦都係巢鴨當地廣為人知嘅名產店。🍵

喺地藏通商店街擁有三間分店嘅《萬盛堂藥局》所賣嘅貨品比坊間嘅連鎖藥妝店平好多，仲可以退稅。🤝🏻

相傳日本嘅長者都一致認為紅色會為人帶嚟好運、幸福、平安，所以呢間創立於1952年，齋喺商店街呢邊就有四間分店嘅紅底褲專賣店就成為一班歐巴桑、歐吉桑嘅最愛。👴🏻

嘿嘿嘿～我中原風流盲俠闖蕩江湖多年，時不時都要準備一副標準嘅老花眼鏡傍身！😎

買完副老花鏡，再配多個助聽器，咁就真係Perfect池喇！👂🏻

呢間舖賣嘅鞋個款都幾老餅，但感覺上應該就幾襟著。🥾

呢幾位店員睇落都幾梳乎喎～完全係佛系看舖Mode……😅

埋嚟啦～埋嚟啦～快啲帶我返屋企啦！喵～📢

誰輕輕叫喚我～聽到呢隻小貓貓嘅柔情呼喚，我就情不自禁咁行咗入呢間布遊舍……🚶🏻‍♂️

Hello Everybody～我哋就係本舍最受歡迎嘅招運福蛙！呱呱～🐸

布做金魚、布做貓咪、布做貓頭鷹、布做植物、布做家燕媽媽，就連布做Snoopy都有，認真估你唔到！😲

如果有親友結婚，就不妨買返套迷你人形公仔畀一對新人做禮物。🎎

今次就買住咁多先，埋單閃人！GoGoGo～👉🏻

離開巢鴨前，當然就要買隻鴨仔返去留念啦！✌🏻

吓～乜嘢話？卡拉OK？嗯嗯～既然一場嚟到，不如就落去開返場雙傻Mini Concert娛吓賓！🎤

濃濃嘅懷舊氣息，傳統嘅老街風情，一班和藹可親嘅老人家，雖然被外界戲稱為「婆婆媽媽嘅原宿」，但若果只係想嚟輕輕鬆鬆過吓日神，呢一個溫暖之都就肯定能夠滿足到你／妳。👵

今敞行程嘅第二個目的地係「谷中銀座商店街」，從巢鴨駅乘搭JR山手線 (往池袋方向) 到日暮里駅往西口行10分鐘左右就會到。👈🏻

嘩～我係呢隻喵喵嘅Die-Hard Fan嚟㗎！冇諗過會喺谷中見到佢喎！🥰

一次過見到咁多喵星產品，又令我忍唔住要高歌一曲喇～😽

貓～全部都係貓～貓貓貓貓貓～喵喵喵喵喵喵～😻

貓～全部都係貓～貓貓貓貓貓～喵喵喵喵喵喵～😸

貓～全部都係貓～貓貓貓貓貓～喵喵喵喵喵喵～😺

貓～全部都係貓～貓貓貓貓貓～喵喵喵喵喵喵～😼

貓～全部都係貓～貓貓貓貓貓～喵喵喵喵喵喵～😾

喺呢次嘅谷中快閃行動當中我買咗好多貓公仔，但就冇見到街上面有真・喵星人出沒，為我留低咗些少遺憾……😿

話咁快就嚟到今集嘅最後一站 - 台場，從日暮里駅去台場係要轉車㗎！過程如下：搭JR京浜東北線 (往橫浜方向) 坐到新橋駅→出站→轉程海鷗線到台場駅落車。👮

樓高7層，店舖數目大約有160間嘅大型綜合式商場《DiverCity Tokyo》，喺台場駅落車後跟住指示行6分鐘左右就會去到。🤘🏻

一嚟到就Shopping？我睇華Dee你個死仔只不過係畀深田恭子個人型紙牌吸引到咋啩～🤭

睇嚟我位好兄弟經已買好晒自己想買嘅手信，實在可喜可賀！👏🏻

多謝惠顧，歡迎下次再光臨！Have A Nice Day～💋

要數DiverCity最受人注目嘅一個景點，就肯定係豎立喺商場正門入口側邊嗰一座身高達18米嘅「RG1/1 RX78-2 Gundam Ver.GFT」。但可惜，經歷咗五年時光，呢座初代鋼彈立像喺2017年3月就正式宣布「被退役」，並由「RX-0 ユニコーンガンダム Ver. TWC」即係獨角獸鋼彈所取代。💁🏻‍♂️

無緣同Gundam大哥嚟個近距離接觸，都可以同佢班仔仔女女打聲招呼嘅！😬

Gundam Café精品店人氣產品一覽，邊一件最啱你／妳心水？😌

右邊嗰個鬧鐘同埋嗰堆渣古豆腐都幾盞鬼喎～不過左邊呢兩隻非賣品都唔弱，仲好有型㖭！😉

你有你扭蛋，我就求其喺度買隻高達BB返歸就得喇！🤗

行咗咁耐，都係時候要坐低攤唞吓～嚟一客熱辣辣嘅章魚燒，再嘆返杯冰凍啤酒，屌你爽呀喂！🤪

跟住我哋就嚟到集合咗各種新穎時尚嘅商店同餐廳，樓高7層，位於港區台場1-6-1嘅《Decks Tokyo Beach》。⛅

飲完杯啤酒好急尿，一踏入商場，我就馬上要搵個廁所放低幾兩……💦

哎喲～小姐，我只係咁啱路過，並唔係有心裝妳沖涼㗎！🙈

所有喜歡Lego嘅大朋友請注意，位於Decks 3F嘅《LEGOLAND》係唔會招待單拖過嚟嘅成人遊客 (16歲以上)，除非你有攜同一位小朋友(0至15歲) 入場啦！咁樣就唔同講法喇！👪

除咗《LEGOLAND》之外，位於同一層嘅《杜莎夫人蠟像館》同樣都係台場嘅知名打卡點。👸🏼

呢處係蠟像館嘅精品廊，你哋睇吓個梅姨，簡直就似到真嘅一樣……😧

唔扮嘢～露兩點～勁拍四級片～流鼻血～爛腳趾～生存沒意義～天地冇公廁～淪落到街頭屙屎～鳩硬冇骨氣～行路怪怪似喪屍～🧟‍♂️

已故台灣知名作家李敖曾經講過：「能少作一分懦夫，就多充一分勇士；能表白一下真我，就少戴一次假面；如果與覆巢同下，希望自己不是一個太狼狽的壞蛋；如果置身釜底，希望自己不做俎肉，而是一條活生生的游魂。」每個人各自都會有佢唔同嘅人生故事，你／妳未必可以選擇一個啱自己心水嘅劇本，但身為呢齣戲嘅導演兼演員，你就有責任盡力去演好每一場戲……🎞