兩條麻甩痴漢漫遊東京・熱（一）

嘩嘩嘩～不得了喇！不得了喇！等咗咁耐，眾人期待已久嘅第一輯《兩條麻甩遊東京》終於都要出爐喇！嘿嘿～Blog友們～你哋開唔開心？興唔興奮？😍

警告：此Blog經淫審處審定為三級文章，如未滿18歲嘅讀者請立即離開！🙅

正所謂今日唔知聽日事，得快樂時且快樂，所以喺幾個月前我就即興plan咗一個日本之旅，一心諗住同姑姑去大阪過二人世界！但點知臨門一腳姑姑竟然就以自己莫財呢個理由一口拒絕我嘅邀請，仲非常堅決咁話……如果兩個人旅行嘅洗費要我一個人出晒嘅話咁佢就寧願唔去喎！嗯～既然我呢個絕世好女友咁堅持，咁我就唯有即刻急call二奶華Dee嚟頂替佢嘅位置啦！哈哈哈～而經過一輪相議之後，我哋兩條麻甩佬就決定將目的地由較為陌生嘅大阪改為本人比較熟悉嘅東京。👬

各位觀眾，Are You Ready？《兩條麻甩痴漢漫遊東京・熱》第一集而家正式開始！🎥

一到步第一件事應該做乜好？華Dee哥話梗係要馬上吸返口帶有尼古丁嘅新鮮空氣先啦！👄

呼～抽完煙，再搵個廁所放低幾兩，然後我哋就向著上野酒店嘅方向出發！👉

喂喂～華Dee你最近咪話有病要睇醫生嘅～做乜一見到塊廣告牌就嚇到走夾唔唞呀？😲

從JR入谷口行5分鐘左右，就可以搵到呢一間位於東京都台東區上野7-12-9嘅Ueno Hotel。✌

將行李寄放喺酒店Reception之後，我哋兩兄弟就先去阿美橫丁打咗幾個白鴿轉……👣

嗯～行到悶悶哋，個肚又打晒鼓，一於就坐低整返碗刺身丼做早餐！😋

嗱～我呢碗嘢有名堂㗎！叫做任性海鮮丼（￥880），食落去個味道都算唔錯。😌

不過……唔知係咪隔離飯永遠都香啲嘅呢？同樣賣￥880，華Dee點嘅呢碗超大量金槍魚丼睇落好似正好多咁喎！😣

夏日炎炎天氣熱，喝返杯透心涼嘅冷凍飲品，個感覺簡直係爽歪歪呀喂！😆

唏唏呀唏呀唏呀唏～食飽飽，搭JR！一眨眼，我哋就嚟到今次麻甩東京遊嘅第一站。🚉

YoYoYo～歡迎大家嚟到聞名亞洲嘅毒撚天堂秋葉原！哎喲～我淨係睇到呢句標語已經隱約感受到一股好強勁嘅毒氣，認真唔講得笑！😨

望乜X嘢呀～未見過咁靚仔嘅混血兒呀？👀

吓～乜嘢話？雙傻日本巡迴演唱會？唔好意思～呢啲咁重要嘅Project我要返去同我個金牌經理人CoCo商量下先！🙏

一場嚟到秋葉原，又點可以唔拜訪一下佢哋嘅玩具模型店呢！😁

如果你係一名超級Figure發燒友，就應該唔會對SHF呢個名字感到陌生。😃

Woo～呢組系列嘅figure確係型到震呀屌！💓

無敵嘅聖衣～金光璀璨好美麗～唔係鐵～係聖衣～著咗打都打得勁啲～👊

高達戰士大集合，你哋比較Like邊一位？😉

宇宙戰艦大和號，出擊！波動炮準備！倒數10秒發射！🚀

一大堆經典電影人物共冶一爐，好不熱鬧！🎬

位於日本東京都千代田區外神田一丁目嘅《ラジオ会館》係一座充滿秋葉原流行文化特色嘅商業大樓，呢度以前嘅商店係售賣電子零件同無線電設備居多，而家就變成Figure、毛公仔、布公仔、偶像商品、鐵路模型、服裝等商品嘅大本營。👆

Fans遍佈全球嘅龍珠戰士、東洋最知名嘅超級女英雄美少女戰士、堪稱日本新一代嘅動漫畫經典新世紀福音戰士、遊戲界巨星Mario家族，就連近年hit爆嘅監獄學園Figure都有！👍

睇見櫃入面嗰幾部Game Boy同啲Game Boy盒，真係乜嘢童年回憶都返晒嚟！😊

聲優迷請注意！呢個area就係你哋荷包嘅墓地！💀

呵呵～估唔到咁都比我喺度撞到我屋企裡面嘅其中一位新住客餃子先生！😜

行完《ラジオ会館》，我哋就去咗一間名叫《KOTOBUKIYA》嘅人氣動漫產品專門店度探下一班勁cutie嘅卡通人物。😙

呢楝《SEGA遊樂場》樓高5層，如果想玩夾公仔同太鼓達人可以去1F／2F，如果想玩射擊類同音樂類遊戲就可以行上3F／4F／5F。🔫

喺秋葉原渾渾噩噩遊蕩咗一段時間，我先發現呢度大部分玩具嘅價錢居然比信和、皆旺、兆萬同現時點仲要貴好多！😮

我覺得作為一個稱職嘅電影工作者，係好應該嘗試花些少時間深入咁去了解一下人哋嘅電影文化，大家話我講得啱唔啱？📀

咳咳～就咁嘅！我哋兩兄弟忽然間諗起有啲日用品想買，咁多位大哥，你哋可唔可以暫時停一停機先呢？📵

Hello～兩位後生仔，行咗咁耐有冇見肚餓呀？有冇興趣入嚟叫返隻雞食下咁呀？揀啱邊個Number可以隨時Call我！📞

喺下午茶時段叫雞？唔好喇啩～計我話我哋不如就求其搵間Cafe入去嘆杯茶食件餅扮下上等人仲好啦！🍰

好～嘆完個Afternoon Tea，就要同呢個毒撚王國講聲再見喇！あきはばら！Sayonara～👋

離開秋葉原之後，我哋就乘坐JR山手線嚟到全東京最大嘅美食購物集中地，就係位於東京車站嘅《東京駅一番街》。💸

哈哈～呢間舖頭啲手作仔又做得幾精緻喎！👏

若果我冇記錯個Logo嘅話，呢度應該就係日本富士電視台旗下動畫嘅商品專門店。📺

等我同大家介紹一下，上面嗰班香蕉精（Nanana）就係東京電視台嘅原創吉祥物。🍌

咦～左下角嗰間擺咗一大堆多啦A夢產品喺門口嘅精品店好似好吸引咁啵！💙

其實右邊嗰隻姣到震嘅粉紅超人到底姓甚名誰？我真係好想知道呢嚿咁樣衰嘅蛋散早排點解可以喺香港玩具界掀起一陣搶購熱潮……😑

深受一眾女學生同OL歡迎嘅鬆弛熊雖然喺香港呢面都有專門店，但若要一次過搜羅最多最齊最新嘅Rilakkuma產物，就當然要嚟日本嘅《Rilakkuma Store》走一敞啦！🐻

咁多位靚仔靚女埋嚟睇埋嚟揀喇喂～男左女右多種款式任你選擇！📢

你哋睇下～一向洗錢唔眨眼嘅華Dee哥話咁快已經搵到佢嘅心頭好喇！😏

東京駅警察官呼籲：有一班動物小偷近日經常喺東京駅一帶橫行，請各遊客好好昅實自己嘅財物！👮

銀河唯一的秘密～天際最強人物～正氣朋友～性格忠實～英勇未變質～🎤

世界第一打怪物～將惡人重罰～厭惡邪惡～哪怕衝突～邪惡馬上消失～🎤

護衛人類～挽救地球～看守這宇宙～這進行曲～一高奏～妖怪便逃走～山頂嘅朋友大家一齊唱！🎤

奴隸獸～奴隸獸～東一隻～西一隻～東一腳～西一腳～給批鬥～抱著頭退後～十秒便失手～🎤

你老味你兩條友仔走入嚟又唔幫襯～仲強姦埋本大爺首飲歌！係咪嫌命長呀而家？💢

呢間《LEGO click brick》喺東京、大阪、九州同北海道等地區都有分店，聽聞佢同其他Lego Shop／Outlet最大嘅分別就係可以「自訂文字」製作出一款款獨一無二嘅Lego鎖匙扣！🔑

集英社呢個大名，相信每一個日本漫畫迷都應該有聽過啩？👂

龍珠、聖鬥士星矢、男兒當入樽、浪客劍心、海賊王、狐忍，呢啲都係佢哋曾經連載過嘅漫畫巨作！👑

哎吔～行到有啲攰攰哋添～喂悟空～麻煩拎兩粒仙豆嚟回一回氣先唔該！😩

Hey～朋友！食粒仙豆都唔夠？請過嚟呢邊叉叉電！🔌

完成整個充電過程，你哋就可以變成宇宙最強嘅超級撒亞人喇！💥

嘩屌～究竟係邊個天才諗到將菲利大王變做垃圾桶？想笑撚死朕咩？😂

由松竹直營嘅《松竹歌舞伎屋本舗》，淨係齋睇個門面已經好有藝術氣息。👘

劇場賣店嘅人氣商品、原創商品，多款精美嘅人手作商品，仲有一啲歌舞伎公演嘅介紹，所有喜歡日本歌舞劇嘅朋友，你哋絕對唔可以錯過！📣

Lady & Gentleman～華Dee哥Shopping Time！⏰

正當華Dee仲喺另一邊廂搏殺緊嘅時候，我自己就一個人戇鳩鳩咁行咗去吉卜力工作室嘅周邊商品專賣店。👦

歡迎嚟到どんぐり共和国～咁多位哥哥姐姐～有冇興趣將我哋全部帶哂返屋企呢？💞

就等我嚟帶大家去參觀一下呢個共和國入面嘅環境啦！Yeah～一行入去就比我搵到我想要嘅獵物，實在係太Lucky喇！🌟

你哋見唔見到呀～有一班搶人錢唔使本嘅吸血小怪物喺度同我哋揮緊手！😱

咦喂～你睇你睇～呢班吸血鬼個死人款望落去好似仲猖狂過頭先嗰班喎！😖

喺度靜靜雞同大家講個秘密～我細個嗰陣成日都覺得飛天紅豬俠係參照我老豆畫出嚟嘅！🐽

家長們可以放心～呢度嘅文具同小童餐具款式都算幾齊全。👪

一班入得廚房出得廳堂嘅家庭主婦，請稍移玉步到呢邊嚟～💋

Yo～靚女們～唔使騰～No Problem！行多兩步就係你哋嘅戰場！💪

喵喵喵～多謝惠顧～為您服務係我哋嘅榮幸～期待您嘅再度光臨啊～喵～💕

咕嚕咕嚕～話咁快就嚟到晚餐時間！人嚟～今晚本大爺決定要大開殺戒！🍣

呢個係極上天然金槍魚套餐，價值￥3500。👅

呢個set係本店最受歡迎嘅店長推介，又名Omakase（￥3000），意思係不問菜單，不問做法，所有食材均交由廚師發辦。✔

兄弟～難得今日咁開心，就破戒同你隊返杯大啤啦！Cheers～🍻

《築地すし好-和-》

地址：JR東日本東京駅構内地下1階

電話：+81 3-5220-0505

營業時間：星期一至五：07:00 - 22:30；星期六至日：08:00 - 21:30

各項評分（五個㊣為滿分）

食物質素：㊣㊣㊣㊣㊣

抵食程度：㊣㊣㊣

服務態度：㊣㊣㊣㊣

環境：㊣㊣㊣㊣

衛生：㊣㊣㊣㊣

食完晚飯，阿華就嚟咗一間好似電影《屍殺列車》咁款嘅密室度同班日本佬一齊嘆返口飯後煙。🚬

你有你抽煙，我有我睇車！呢度有咁多款唔同顏色嘅車，我諗住一次過買晒佢！都係嗰句，容易襯衫呀嘛！😎

Jesus Christ～呢架Nissan R35 GT-R真係好掂呀喂～快啲搵人同我嗱嗱臨包起佢先唔該！🎁

Oh Shit！原來間車行仲未開張！唉～真係掃興！😔

叮叮叮叮～親愛嘅遊客們～我哋商場就快要閂門喇～再一次感謝每一位嘅蒞臨！🔊

OK～咁好啦！拜拜囉～咁多位東京駅嘅居民～有緣再會！✋

第一日嘅行程就此告一段落，都係時候要搭車返上野lu！🚈

哦～《Hard Rock Cafe》嘅分店果然係佈滿世界各地喎！但係入去行咗兩轉，我先發覺裡面查實係冇乜嘢好行……🎸

冇獎問答遊戲環節：掛喺最上一排嗰五個面具，第一個係大喊十，第二個係金仔，第三個係雞雞，第四個係侵侵，跟著喺佢隔離嗰第五個面具係邊個？我只可以透露一點嘅就係答案一定唔係肥佬黎。🍎

夜已深～還有什麼人～過咗22:00，阿美橫丁啲舖頭就開始陸陸續續閂閘，起初我仲諗住入去買幾件Band Tee返去，但後來諗諗下就都係決定留到最後一day先再返嚟買個夠本！💴

嗱嗱嗱～兩位哥哥仔～眼看手勿動呀吓！唔係我咬斷你手指㗎！👶

你兩條拐子佬係咪想拐走我個仔？看招！S級臭狐攻擊！🔥

救命呀～呢件驅風行血老耆英連出晒名重口味嘅華Dee哥都大聲高呼頂佢唔順！要快快搵個地方避難先得！👈

唔使驚～Baby Groot喺大廳！你哋兩個走先～我留低做掩護！🍃

只係半年冇嚟je～呢座城堡就已經起咗咁多間新店舖……😶

歌聲響起歸家的訊號～哎～唔經唔覺又行咗半粒鐘……今次堅係要打道回酒店喇！🎶


嘻嘻～對於兩條極之大食嘅麻甩佬嚟講，呢堆宵夜大概只係夠我哋食兩日左右㗎咋！😛

糧食要充足，水源亦要充足！實行塞爆成個雪櫃！🈵

華Dee：親愛的觀眾們，是咁的～我現在要趕快去茅廁試下啲日用品質素如何，所以……多謝各位嘅收睇！我哋下次見！😈

兩條麻甩痴漢漫遊東京・熱第一集（完），To Be Continued……🙈

點呀～睇完第一集係咪覺得有啲唔係好夠喉咁呢？唔打緊！喺下一集我哋將會帶大家繼續玩轉東京各個地方（巢鴨➡谷中➡台場），而內容方面就保證比第一集健康得多，絕對係老少咸宜，大人細路都咁啱睇㗎！🌞

講開旅行，喺兩星期前我就同女朋友、老母、阿姨去台北食咗好多好嘢，而我自己亦分別到當地多間唱片舖掃咗一大堆貨，又同一班好耐冇見嘅台灣朋友唱咗成六個幾鐘頭K，最後仲差啲累到三位靚女上唔到機添！因乜解究搞到咁大鑊？想知道當中嘅事發經過，請密切留意全新一輯台灣之旅嘅出版日期……📝