希貓CoCo嘅“圍姬伯蝌” 🐾

由於之前喺好多期嘅生活雜誌上都有好多哥哥姐姐抱怨話本王啲相唔夠多～有見及此，今次我就決定要滿足晒咁多位靚仔靚女嘅要求，實行擔大旗做主角！喵～

以下係希貓CoCo嘅“圍姬伯蝌”，首先第一個問題就係……CoCo今年到底幾多歲？講起上嚟，從維港汽車電影院年代開始計起到而家都有成14年……嗰陣時CoCo仲係好似手板咁細隻，所以我估計佢嘅真實年齡大概就係14歲半左右。

點呀！見我生得咁Babyface係咪有啲估唔到呢？喵～

至於我同CoCo係點認識嘅？喺八年前一篇名叫《愛，是一生一世的承諾》嘅文章入面，我就曾經同一班Blog友分享過我同呢隻反斗貓嘅相識經過……

下一個問題，CoCo個名當初究竟係點嚟嘅呢？咁就真係要問下我阿娘喇！人哋明明係個美男子嚟～您居然就會搞錯晒佢嘅性別，仲起埋個女人名畀佢！卒之叫下叫下……咪叫到依家囉！

而關於希貓呢個花朵嘅由來，大家就可以去一篇個名叫做《希貓的自白》嘅Blog度昅昅……

妖～你係咪仲講呀？人哋都話咗唔想再提囉！喵～

OKOK！唔講花名，不如就介紹下你喺喵之世界拍過嘅電影呀！例如係呢一部紅爆全球嘅《功夫貓貓》！嗱～我先開估咗第一套戲個片名，之後嗰啲就交由各位去揭曉！Come On～看圖！睇對白！估戲名！

第二部：你行得上台唔好怯呀～怯，你就輸咗成世！

第三部：咩嘢事咁邋遢呀？捽甩佢！

第四部：講你又唔聽，聽你又唔明，明你又唔做，做你又做錯，錯你又唔認，認你又唔改，改你又唔服，唔服你又唔講！

第五部：你要記住，如果你見到嗰個人佢好唔專心咁望住你做緊其他嘢，佢就係差人嚟㗎喇……

第六部：我一直都以為我同何寶榮好唔同，點知原來寂寞起上嚟嗰陣，個個都係一樣。

第七部：1960年4月16號下晝三點之前嘅一分鐘妳同我喺埋一齊，因為妳我會記得嗰一分鐘，由而家開始我哋就係一分鐘嘅朋友。

第八部：我不嬲講嘢都咁大聲，我大聲講嘢唔代表我冇禮貌！阿～Sir～㗅～

咁貴為貓界巨星嘅希貓CoCo，平日喺屋企又鍾意睇啲乜嘢電視節目呢？The Answer Is Discovery Channel。

食物方面，CoCo近年就轉咗食呢一隻由比利時出產嘅Brabanconne貓糧，佢嘅成分有雞肉、白米飯、糙米飯、甜菜漿、角豆粉、釀酒酵母、維他命、礦物質、纖維素、亞麻籽、南瓜乾、麯黴屬真菌、迷迭香提取物、葡萄籽提取物同絲蘭等等……對於改善排便好有幫助，而且又容易消化。

呢一包係CoCo最愛嘅口立濕，已經食咗十幾年都仲未覺得厭……

除咗貓糧同口立濕之外，CoCo仲好鍾意食呢個牌子嘅火腿！



開餐囉～開餐囉～我認為CoCo嘅身體狀態之所以可以保持得咁好，同佢驚人嘅飲水量絕對有莫大嘅關係！


水分充足，令佢屙金暢順！於是，擺喺騎樓個貓廁所就越買越大……

貓砂嘅話我哋就用開呢隻，佢係用純天然小麥製造，除臭味超強仲好快凝固，非常方便清理。

CoCo通常鍾意瞓喺邊？基本上全屋都係佢嘅睡眠範圍，但我張被同埋張床嘅左上角邊邊就肯定係佢最愛霸佔嘅位置！

我唔喺屋企嘅時候，佢就會走入呢架專屬太空船度瞓……

呢一座應該係CoCo所擁有嘅第五座貓貓架，冇記錯嘅話……



再鋒利嘅刀都會有生鏽嘅一日，磨爪係每一位喵星人每日必須要修練嘅功夫……


啲柱畀佢抓得太多，好快就會爛，到後來我就索性喺IKEA買幾塊嘢返嚟自己慢慢包！

CoCo最鍾意玩嘅玩具？舊陣時佢都幾鍾意玩上面嘅呢堆波波嘅～間唔中就會同我玩吓摔角同Boxing (即係畀佢打畀佢咬畀佢抓)，不過家吓年紀大咗就乜都唔想做，淨係想人哋服侍佢……



一梳梳到尾；二梳白發齊眉；三梳兒孫滿地；四梳四條銀筍盡標齊；五梳翁娌和順；六梳夫妻相敬；七梳七姐下凡；八梳八仙來賀壽，寶鴨穿蓮道外遊；九梳九子連環樣樣有；十梳夫妻兩老到白頭，吾皇萬歲萬歲萬萬歲……


喺全身咁多個部位當中，CoCo就最鍾意人摸佢個頭，次次摸親佢都笑到四萬咁口～

相比起其他貓貓，CoCo「不能觸碰」嘅部位就唔算好多，唯獨係佢個大籮Pat……



朋友，請停一停，諗一諗！切勿以身試法，否則後果自負！



講開又講，CoCo平時嘅怪癖都幾多，其中一個就係唔准人開風扇！


仲會經常喺人哋沖完熱水涼之後走入個浴缸度焗桑拿……



以前，我一出遠門佢就會飛撲過嚟咬我隻腳……



家陣變咗隻老貓，就嘗試轉用眼神攻勢……哈哈哈哈哈～


古語有云：曹操都有知心友，關公都有對頭人，咁你哋又知唔知道希貓有生以來嘅最大宿敵係邊個？登登登登～答案就係古墓派第三代掌門人，綽號Emoji黑妹妹，人稱翻版昂山素姬嘅深山姑姑！



正所謂仇人見面，份外眼紅！呢啲明爭暗鬥嘅場面對於我嚟講簡直係司空見慣……


乜Q嘢昂山素姬黑妹妹呀？強烈反對巨鵰過兒一再詆毀我形象！(半真實對白)

唔講你唔知！CoCo喺聽歌方面嘅要求一向都好高，佢每次只要一聽到啲佢認為唔好聽嘅音頻就即刻會大發雷霆鬼殺咁嘈！呢種情況大大話話都發生過百九幾次㗎喇！而以我觀察所見……希貓最討厭嘅兩位歌手就九成九係走音當食生菜嘅盧巧音同埋經已壞咗嘅許志安。

講到希貓對耳咁奄尖，咁佢鍾意得嘅歌手就當然係有返咁上下水準啦！我相信，喺當今世上，就只有一位歌手能夠令CoCo願意停落嚟靜心咁聽佢唱歌，呢個人就係近年極少喺香港做公開演出嘅靚聲王呂方！

記得當年呂方隻《好情歌演唱會》DVD一出，我就立刻第一時間走去CD舖度買咗張返屋企開嚟同老母一齊睇！正當我哋兩母子喺度欣賞緊呂方嘅歌聲嗰陣，CoCo竟然就一路伏喺個電視上面郁都唔郁！喺呢三個鐘入面，佢完全冇行開過，仲豎起晒隻耳仔嚟享受，條尾就起勢咁打拍子，嗰一個意猶未盡嘅表情，直到今時今日依然係記憶猶新……

提到CoCo喜愛嘅音樂，由著名華語男歌手姜育恆主唱嘅〈愛我〉亦都係佢嘅至愛！喺CoCo仲係BB仔嗰段時期，我晚晚都係靠住唱呢首歌嚟氹佢瞓覺㗎！


喂～你哋問完未呀？有乜嘢留返我瞓醒先講啦好冇？喵～

好啦～今次就講住咁多先！最後，送上CoCo喺N年前發表嘅一篇回顧日記，覺得仲係唔多夠喉嘅朋友不妨就睇埋先走！

傻貓CoCo的回顧日記 (7-1-2008)
http://timeischanging2013.blogspot.com/2008/01/coco.html