新Blog開張第一炮 - 講故風雲之火爆仔重出江湖！

呢排小弟認真係諸事不順、是非多多，
嚟到呢個moment，我終於都忍唔住要大爆特爆喇！

忙！忙！忙！今期確係好鬼忙！
家事、公事、友事、波事、Blog事通通都忙！

前排老母因為耳鳴引發頭暈而入院，起初我阿娘打死都唔肯轉睇私家，

後來經我不停苦口婆心咁勸佢，佢先至勉強肯應承，

我同佢講：「咪當係破財擋災囉！最緊要係平平安安、身體健康！」

要知道全香港嘅公立醫院都係要慢慢排期排到世界末日，

之前有條黃綠醫生仲要亂鳩咁噏話我老母有可能係中咗風，

不過好彩，喺私家醫院度打咗幾支針之後，我老母家吓就好返好多，

而掃描出嚟嘅結果亦都証實佢個腦完全冇事，冇中到風……

呼～今次都總算叫做係還得神落，喺呢度，我要多謝我女朋友，

喺我工作嘅呢段期間對我老母嘅悉心照顧，姑姑，Thank you so much！^3^

眼見母親大人平安無事，我就即刻走去買咗兩份禮物送畀老豆老母沖喜吓，希望佢哋會鍾意啦！

噚日返去彩雲邨探嫲嫲，佢對於早排屋企所發生嘅事仲係好耿耿於懷，
又話好怕我會同嗰班是非精開火，但開講都有話：人不犯我，我不犯人，
若然一開始班友唔係成鳩日生安白造誣蔑我，我根本就唔想再理班單細胞生物！
屌你老味！我真心愛護我嘅家人，你哋居然可以將成件事扭曲到咁撚樣嘅地步？
咪以為我乜柒都唔知，我一直忍到今時今日，純粹只係畀面個老人家，
我清楚知道嫲嫲係全世界最錫我同對我最好嘅人，而佢亦都係我喺呢個世界上最愛嘅人，
佢對我嘅恩，我諗我今生今世都無以為報，所以我應承得佢嘅嘢就一定會遵守承諾，
總之就一句到尾！而家我最想嘅……就係嫲嫲同八姑姐以後都健健康康、快快樂樂，
至於其他嘅人？我就一於tell the dog，話鳩知佢哋啦！

最近，我公司位“好同事”又搞咗個大頭佛出嚟！唉～你話你個人呀！
早幾年你賭到傾家蕩產、妻離女散，成日走嚟同我乞我都算鳩數㗎啦！
好咗一排，依家你又要喺大陸搞坺咁嘅蘇州屎返嚟，
仲要日日為咗上面嗰“一盅兩件”走上走落，搞到連工冇心機返，
唔該你節省少少啦喂！成五十幾歲人都唔識得珍惜身邊嘅嘢，
一日到黑淨係喺度同人吹水話當年，好心你就醒吓啦！菲林時代老早就過去！

家吓係數碼年代！叫你畀啲心機去學你又唔肯！叫你乖乖哋返工你又唔聽！
嗱～咪怪我呢個做徒弟嘅三日唔埋兩日就屌鳩你！事關你呢條至尊無賴的確係十分抵屌！
老實講，唔係念在曾經同你係一場師徒？我真係屌你都嫌嘥精呀！

寫咗七年嘅Yahoo Blog，到今日終於都要正式摺埋，講起上嚟都真係有少少唔捨得。
記得我喺Yahoo剛剛開Blog嗰陣，當時嗰度直頭人影都唔見多隻，
直到一篇連珠炮發嘅《殺人犯》觀後感面世，再加多篇無聊到極嘅雜錦碟評，
先至令到我個Blog嘅瀏覽人次突然暴升幾千倍。
自此之後，我就透過呢個園地認識到好多唔同類型嘅Blog友，
能夠同呢班素未謀面嘅網友互相交流，確實係一件好難得嘅事，
正所謂真愛難尋，知己難求，知音，更加係諗都唔敢諗，

你哋知唔知，要喺現實世界入面搵到一個同你志同道合嘅人係有幾困難嗎？

自問向來都係一個懶到出汁兼且極少產量嘅Blogger，

喺七年以嚟我只係寫咗二百幾篇Blog左右，而咁啱我寫嘅題材又通常都比較冷門，
睇住個Blog一路keep住有唔錯嘅瀏覽人次同回應數目，細佬實在係深感意外。

喺“搬屋”之後，可以預期到時嘅人流應該會比以前少一半以上，

但就算得嗰小貓三四隻，我都仍然會堅持繼續定時同大家分享一吓自己嘅所思所想，
我曾經講過，本人嘅總資產只有兩億，就係“失憶”跟“回憶”，
正因為咁，我嘅回憶……查實係特登寫畀失憶後嘅我睇嘅……
之但係……有回憶又何來會失憶呢？喂喂～你到底喺度寫緊乜東東呀？(^_-)

初嚟報到，搞到呢一刻，我對呢間“新居”嘅操作模式仲依然處於摸索階段，
我諗連埋“搬屋”同“裝修”，我嘅“新居”至少要去到十月中先可以正式落成，
至於呢度嘅版面就唔會同以前有太大分別，主要都係以簡約為主。（其實係自己白痴唔識整！哈～）
若果有人同我一樣都係矇查查搞緊“搬屋”同“裝修”嘅工作，

咁我就誠意推介【豆丁主義】同【有誌戲】呢兩個好Blog畀大家，
我覺得佢哋兩位都係整網頁呢方面嘅專家，而且樂於助人，相信肯定會幫到你哋！(^-^)

Yahoo Blog喺呢咁多年以嚟畀我嘅感覺……

我只能夠用一句說話嚟形容，就係「神一樣的開始，神經病一樣的結束」，
而仲有一日，我就要同呢個“居住”咗多年嘅“老地方”講聲bye bye！
我啱啱已經完成晒所有備份，但雅虎嗰邊就貫徹佢哋一向求求其其兼錯漏百出嘅作風，
Backup完畢後，我每篇Blog嘅回應就無啦啦全部離奇“歸零”，
有好多篇文章仲畀人斬到支離破碎，簡直係慘絕人寰！

對於有部分Blog友提議寫一大堆E喵過去投訴，個人就唔太讚同呢種做法喇！

通行都知㗎啦！寫Email畀雅虎即係等於同空氣對話，簡單嚟講就係嘥Gas嘥心機！

唉～算啦！一切當係重新開始，再唔係我咪自己人手慢慢搬囉！

 

仆你個臭街！煩事多多……都好耐冇試過咁鳩興喇！
谷咗咁耐，呢次都真係不吐不快，吐完舒服晒，我而家成個人都開心返晒喇！Yo～

 
好啦！講咗咁多唔高興嘅嘢，不如講返啲開心事！
近排利記嘅表現可謂勢如破竹，唔只創下球會喺英超成立以嚟嘅連勝紀錄，
對上一場波仲成功劏獌上榜首，衷心希望班球員能夠保持住個氣勢，然後早日幫隊波重返BIG 4。

咁當然，先打咗幾場波就走去講呢啲嘢絕對係言之過早，
之不過榜首已上，理撚得你！梗係有理冇理都打住飛機先啦！

除咗家事、公事同波事之外，近日我仲要逐一找返一班老友嘅“生日飯數”。

仲有……就係炸極都炸唔完嘅“紅色炸彈”。

開心嘅事情一浪接一浪，陸續有嚟！多謝偉大嘅好老闆今個月又萬歲！

老闆萬完歲，自己再萬歲！
$40十件三文魚壽司 + 十件油甘魚壽司，超級肥美，勁撚抵屌呀喂！

各位觀眾～是日宵夜 - 花雕醉雞翼 + 出前一丁雞蓉麵，堪稱世紀絕配，人間極品！

咕咕咕～話咁快又要出門返工喇！今晚返嚟我就會一一“追蹤”返你哋，
順便呼籲埋每一位仲未“留名”+“Follow Me”嘅朋友盡快嚟本寒舍打個“手印”，

等我可以一次過將Yahoo年代嘅舊Blog友Bookmark晒落個List度。(^.^)

 

最後，感謝我嘅好兄弟“電腦之神”柏盛哥嘅全力幫忙，
全靠佢，我個Blog先可以咁快正常運作返，為咗好好答謝呢位老友……
我就決定要免費幫佢首新歌做宣傳，嚟嚟嚟～廢話少講！馬上去歌！Go～