《尋找隱世巨聲》看後感：可能係全世界最好睇嘅歌手傳記片！

我一直以嚟寫blog嘅原因同動機其實好簡單，就係用嚟發洩、記錄同埋尋找知音，
由我開blog至今，無論係多人睇、少人睇定係冇人睇嗰陣，我都好堅持一點……
就係只會寫一啲自己感興趣嘅嘢，而咁啱我鍾意嘅歌手同電影通常都係比較冷門少少，
例如係今次，我就想藉住呢篇blog介紹一套極之精彩嘅冷門戲畀大家。

呢齣戲個片名叫做【尋找隱世巨聲】（Searching For Sugar Man），
係一部由瑞典導演Malik Bendjelloul執導、製片、編劇及剪輯嘅音樂紀錄片。

喺以往都出現過唔少用“追尋偶像”嚟做題材嘅電影，
【尋找周杰倫】、【尋找簡東拿】、【我和茱茱有個約會】，每一部都各有故事，
而呢套【尋找隱世巨聲】同佢哋唔同嘅地方，就係以上呢堆電影所“尋找”嘅……
全部都係一啲紅透半邊天嘅歌／影／球星，即係成套戲所發生嘅人同事基本上都係非常之公式化。

但……喺【尋找隱世巨聲】呢套戲入面所“尋找”嘅呢位人兄就確係好鬼特別！
到底有幾特別？你哋試諗吓！一個歌手喺佢自己出生嘅地方一直寂寂無名……
但有一日無啦啦喺另一個地方離奇爆紅，仲成為咗當地人人膜拜嘅“超級巨星”，
而佢本人就居然完全唔知有件咁嘅事！嗱～你話成件事係咪好神奇、好抵死先？

老友老友～下面有劇透！想睇就埋嚟！唔睇就早抖！（設計對白）

Sixto Rodriguez，現年71歲，墨西哥裔美國人，係一個生於工業城市Detroit嘅草根階層，

喺入行之前，佢拎住一支結他流浪走天涯，係當地一間地踎酒吧嘅駐唱歌手。
喺某年某月某日，有兩位唱片公司監製嚟到酒吧，一聽到Sixto Rodriguez嘅歌聲當堂嚇一跳，

諗都冇諗就決定要同佢簽約出碟，當時佢兩個都異口同聲認為……

呢條長毛飛才華橫溢，將來一定會變成下一個Bob Dylan咁話。

問心嗰句，你話Sixto Rodriguez嘅歌聲係咪好驚為天人？
個人就覺得還可以啦！佢嘅technique唔強，音域又唔廣，
不過佢嗰種演繹方式就有少少似John Lennon，即係聽起嚟平平淡淡，但就極富生命力。
除此之外，Rodriguez所寫嘅歌詞亦都同Lennon一樣，都係十分之有meaning。

 

Judges with metermaid hearts～Order super market justice starts～
Frozen children inner city～Walkers in the paper rain～
Waiting for those knights that never came～The hi-jacked trying so hard to be pretty～

寫實嘅歌詞，搭配歌者隨性自然嘅輕談淺唱，道出咗一班低下階層嘅心聲…… 

當年Sussex Records（Rodriguez所屬嘅唱片公司）上下仝人都對Rodriguez寄予厚望，
並一致睇好佢嘅音樂必定能夠喺巿場上有一番作為，只可惜事與願違，

Rodriguez嘅兩張專輯喺美國嘅銷情都相當慘淡，更錄得個位數字嘅銷售成績。

Cause I lost my job～Two weeks before Christmas～
And I talked to Jesus at the sewer～
And the Pope said it was none of his God-damned business～

就如上面首歌嘅歌詞所言，Rodriguez嘅音樂雖然得到業界一眾知名猛人嘅讚賞，
有一位曾經同MJ、Janet Jackson、Stevie Wonder等天王巨星製作過唱片嘅producer仲話……
喺佢人生合作過嘅歌手當中，Rodriguez嘅才華絕對係佢心目中嘅Top 5，遺憾嘅係……

商業社會始終係商業社會，喺推出咗兩張滯銷唱片之後，Sussex Records就即刻同佢解約，
眼見歌唱之路停滯不前，Rodriguez就飛返去Detroit繼續過佢嘅流浪生活。

回歸家鄉後，有關Sixto Rodriguez嘅傳言眾說紛紜……

有人話佢喺監獄服藥自殺，有人話佢喺台上吞槍自盡，甚至引火自焚……
講到呢度，Rodriguez個人嘅音樂故事看似完結……
但有時候，世事往往就係咁出人意表，我諗，連佢自己都唔會估得到……
佢嘅歌曲喺美國畀人當做垃圾，但就竟然喺地球另一面嘅封閉國家南非發光發熱……

究竟Rodriguez嘅音樂係點樣傳到去南非嘅呢？即使到今日依然係一個謎！
其中有一單傳聞就話有個美國女仔喺某年帶住Rodriguez嘅一張唱片嚟到南非，
然後佢班南非朋友一聽之下就好鬼like，於是就四周圍去搵呢隻CD，

就係咁一傳十，十傳百，百傳千，千傳萬……好快……
呢張碩果僅存嘅“稀世珍物”就畀人複製成一張又一張嘅盜版唱片。
呢個傳聞係真定假就冇人知，唯一可以肯定嘅，係呢張畀人copy咗N次嘅CD……
最終喺南非至少賣出咗50萬張，仲入選埋當地史上最著名嘅Album排行榜。
喺70年代中期，你求其去一啲白人或者係崇尚自由主義嘅中產階級屋企，
只要有收藏流行音樂唱片嘅習慣，你喺佢哋屋企就好大機會會搵到以下三張唱片：
第一張係“宇宙巨Band”The Beatles嘅《Abbey Road》，

第二張係“世紀靚聲組合”Simon & Garfunkel嘅《Bridge Over Troubled Water》，
第三張就係Sixto Rodriguez喺1970年推出嘅《Cold Fact》專輯。
對於好多南非人民嚟講，Rodriguez所寫嘅歌就如同佢哋生命中嘅背景音樂，
喺6、70年代，南非係一個極度保守同封建嘅國家，
除咗唔容許當地嘅歌手出國演出，外來嘅歌手亦都唔可以過嚟呢邊做巡迴，
嗰時南非嘅人民同外界接近隔絕，直到Rodriguez嘅出現，先令各人感受到一絲光明，
同時亦釋放咗一堆壓抑咗好耐嘅負面情緒，仲漸漸建立一份專屬嘅自由思想。
有見及此，南非當局就即刻立令禁播Rodriguez嘅幾首“政治作品”，

又專登搵人去刮花唱片嘅部分音軌，免得呢堆“反體制歌曲”流傳於世，

由此可見，Rodriguez嘅創作喺南非確實有十足嘅影響力。

正當人人都以為Sixto Rodriguez經已瓜咗老襯，

Rodriguez嘅頭號fans“老糖”Stephen同埋音樂記者Craig偏偏就唔信邪！
呢兩條癲佬用咗好多方法去追尋偶像嘅下落，例如係分析Rodriguez所寫嘅歌詞同設立網頁，
卒之有一日，喺佢哋個搜尋網站上面就收到一則喜出望外嘅留言：
「喂～Sixto Rodriguez仲未死㗎！我有見過佢，因為佢就係我老豆！」

一位“離開”多年嘅偶像有日突然生勾勾企喺你面前，
嗰種感覺，等同好多年前有人話哥哥查實只係移居咗去阿根廷……
到某一日佢竟然就真係出現咗喺大家眼前一樣，實在係超amazing！

原來Rodriguez喺退隱後就立刻返去家鄕做勞工，仲參加過地方選舉，
至於佢選擇隱退嘅原因，主要係因為覺得自己已經唔可能再寫出比以往更精彩嘅作品，
先毅然放低面前嘅音樂事業，重新再過返普通市民嘅日子。

Rodriguez嘅唱片喺南非賣過滿堂紅，反而喺佢嘅出生地美國就長期無人問津，
面對呢種反差咁大嘅情況，Rodriguez就好淡然咁回應：「喺唱片產業上係冇嘢可以保證嘅！」

喺商業掛帥嘅唱片業入面，的確係存在一堆難以預料嘅成功因素……
有啲偶像歌手明明唱到成坺屎咁，都照樣會keep住有班盲粉仆到去食，仲要食得津津有味；

有部分fans買張唱片返嚟，可能在意個唱片cover同張poster仲多過在意隻碟裡面嘅歌曲質素；
某位本土歌王舉起中指、露吓屎忽、玩吓性格，班死忠信徒就個個當佢神咁拜；
有一堆“老作歌手”係咁咦扭幾個音，打個冷震，人人就當正班友係R&B之光；
有一班參賽素人隊樽茅台，飲支五加皮就上台亂鳩咁嗌，但大眾傳媒就依然稱佢哋為“絕頂好聲音”；
又有一間知名電視台勁鍾意搵一啲“零演技”嘅歌手返嚟拍劇，
同時又叫一班五音不全嘅自家演員出去唱歌，再喺呢班唔識唱歌嘅參賽者之中選一個冠軍出嚟，
一個咁L荒謬嘅節目都長期收視爆燈，叫好又叫座，認真係唔到你唔服！
喺呢個千奇百怪嘅流行市場上，或者仲有好多畸形現象尚待發掘……
計我話，每一位演藝從業員都應該要盡快放下執著，總之一句到尾：認真你就輸了！

Oh～sorry！無端端扯咗去冇雷公咁遠添！好～等小弟馬上較返啱個channel先……

當Rodriguez知道自己嘅唱片喺南非創下驚人嘅銷售記錄之後，
佢就應兩位歌迷嘅邀請飛到當地開Show同接受多間電視台嘅訪問，
Rodriguez同佢嘅家人一落機，隨即受到前所未有嘅巨星級款待，
就係咁，Rodriguez喺“另一個世界”就展開咗佢人生一次unbelievable嘅奇幻之旅……

喺一開始，有好多樂迷都唔太相信Rodriguez仲在生呢個事實，
連台上嘅一班樂手，喺佢未開口之前都唔敢相信眼前呢位就係如假包換嘅Rodriguez，
演唱會當晚，Rodriguez一上台，全場嘅觀眾就不停咁尖叫同拍掌將近10分鐘，
事關喺咁多年以嚟，大家都係「只聞其聲，不見其影」，

根本就從來都冇見過“真真正正”兼且有血有肉嘅Sixto Rodriguez，
呢個“隱世巨星”唔似得其他名人咁可以隨便喺一啲雜誌同電視上見到，
所以喺呢一刻，佢哋成班就有如睇見貓王復活，呢一切，簡直係太奇妙，太唔真實喇！

「感謝你哋令我重生！」我真係冇諗過……呢句咁有含意嘅笑話居然會令我感動得亂七八糟。

經歷過事業上嘅名成利就，Rodriguez嘅生活有變得比以前多姿多彩嗎？

佢嘅細女Regan就回答：「其他地方可能有，但喺物質上就冇。」
隨住“奇幻之旅”結束，Rodriguez後來都有再飛去南非開咗超過30場concert，

仲將得到嘅大部分收入交晒畀佢嘅三位千金以及一班相識多年嘅親朋好友打理，

跟住就依舊住喺一間有40年歷史嘅破舊鐵皮屋入面，並堅持靠自己嘅一雙手過活。

另外，Rodriguez嘅遭遇亦間接改變咗好多人嘅生活……

佢嘅頭號fans“老糖”本來係Johannesburg當地嘅一位珠寶商，
其後受Rodriguez嘅音樂影響轉行喺Cape Town開咗一間唱片舖；
佢嘅大女Eva喺參與南非巡演期間認識咗主辦單位安排畀佢哋嘅一位bodyguard，
話咁快佢兩個就一見鍾情，二人同床，衫褲剝清，四圍咁摸！最後仲結埋婚生埋仔；
佢嘅唱片喺南非賣出咗50幾萬張，令一大班唔知名嘅盜版商賺到盆滿缽滿。
所有人嘅生活都喺度改變，唯獨係Rodriguez本人就從來都冇變過，
過去嘅生活，就係現時嘅生活，以前係咁，而家都係咁。

Sixto Rodriguez係一個真正能夠做到“得亦淡然，失亦坦然”嘅超凡智者，
社會上絕大多數人都好喜歡用金錢同物質去衡量一個人嘅成就，
而Rodriguez顯示出嚟嘅嗰一份氣度，正正就揭穿咗呢堆利慾薰心嘅人類有幾膚淺。

Michael Jackson、John Lennon、Whitney Houston、Janis Joplin……

張國榮、梅艷芳、陳百強、黃家駒、羅文、鄧麗君、李小龍……
眾多位巨星嘅遭遇令我不禁覺得，身為一個傳奇人物嘅下場，係咪通常都係咁悲慘同叫人惋惜嘅呢？

幸好，呢齣正面勵志又感人嘅【尋找隱世巨聲】就為我帶嚟唔少希望，
而戲中主角Rodriguez處之泰然嘅人生態度，亦都好值得我哋去效法同學習。

講開又講，Rodriguez嘅故事忽然又令我諗起另一位歌手，佢就係“台灣最美男聲”林志炫。

志炫喺“優客年代”曾經大紅過、風光過，但“單飛”之後佢嘅歌唱事業就持續下滑，
佢嘅唱片銷量一張比一張差，演唱會嘅入座率又唔理想，上綜藝節目仲畀人百般奚落，
有一年爭金曲歌王，又無厘頭輸咗畀一個唱歌冇粒音準嘅ABC。
喺台灣樂壇徹底畀人無視，萬料唔到志炫喺今年竟然會憑住《我是歌手》而喺大陸一戰翻紅，
佢喺呢個歌唱節目試過三度奪冠，仲一度被預測為首季歌王嘅最大熱門人選，
俗語有云：「是金子，總會發光的」，Rodriguez同林志炫嘅故事就印證咗呢個講法。

Sugar man～Won't you hurry～Cause I'm tired of these scenes～
For a blue coin won't you bring back～All those colors to my dreams～

喺【尋找隱世巨聲】上映之前，我對Sixto Rodriguez呢個人一無所知，
我好記得當我第一次睇呢齣戲嗰陣，內心真係充滿住一份難以言喻嘅感動同震撼，
到完場後，Rodriguez嘅名曲「Sugar Man」，仍然喺我腦海中不斷迴盪……

正所謂「一首歌一個故事」，喺世界上唔同嘅角落，仲有好多畀眾人遺忘咗嘅“隱世巨聲”，
下次有機會嘅話，我再同各位一一介紹啦！Bye all～後會有期！