2007年5月16日星期三

一首好歌 + 一齣好戲

最近,喺一個偶然機會下,我認識到一首好好聽嘅新歌,又重溫咗一部好好睇嘅港產舊戲……
近期幾乎個個人都喺度談論緊《溏心風暴》呢套劇,
記得前排上女朋友屋企同佢姪女慶祝生日嗰陣,除咗我同佢姪女之外,
佢哋成屋人就全部都眼定定咁望住部電視,哈哈~你都咪話唔誇張!
好老實講,我自己就對呢套劇冇乜興趣喇!
一嚟我一向都好厭倦呢類死唔斷氣嘅爭產劇,
二嚟係呢套劇啲演員嘅演技實在係太參差!
喺呢套劇啱啱開播冇耐,我就好無聊咁睇咗幾集,
我覺得李司棋、關菊英、米雪甚至係阮兆祥都算係交足戲,
然後鏡頭一轉,一睇到「作狀王」夏雨、「Pose王」林峰、「懶音王」蒙嘉慧,
再加埋全世界演技最差嘅女演員鍾嘉欣,我就即刻冇眼睇!
我知道一個好劇本固然係好重要,但一班演員帶唔帶領到觀眾入局亦都係唔可以忽視嘅一環。



雖然我對《溏心風暴》部劇冇乜興趣,但係我就幾鍾意入面首主題曲「講不出聲」,
呢首歌同之前克勤所唱嘅「心計」都算得上係近年TVB最好聽嘅兩首劇集主題曲。
平心而論,「講不出聲」呢首歌本身個旋律並唔算好突出,而歌詞方面亦未見驚喜,
不過,關菊英出色嘅演繹就令到成首歌有返晒靈魂,真係好難得……
一個老牌歌手竟然可以將一首時下嘅流行曲唱到咁自然,令人聽落好舒服,仲一啲out嘅感覺都冇!

其實我一直都好欣賞菊姐嘅歌藝,以前仲好鍾意佢首名曲「狂潮」,
佢把聲靚得嚟又夠磁性,唱歌咬字又夠清,而且仲好有感情,
聽完菊姐唱歌之後,我每次都好想同時下班偶像歌手講一句:「嗱~呢啲先叫做唱歌㗎嘛!」
另外,前排Cable重播咗一套我已經唔記得咗好耐嘅好戲,
就係由吳奇隆、朱茵同朱健鈞主演嘅《那有一天不想你》。
當年我好鍾意呢套戲個故仔,自然真摯、笑中有淚又拍得夠寫實,亦道出咗人生無常呢個道理。
今日同聽日都放假,終於都可以盡情抖抖喇!
頭先女朋友嚟咗我屋企煮咗餐意大利餐畀我食,
嘩~簡直係水準滿分呀!真不愧係本人嘅世一美女廚神!
唉~但一諗到放完假返去公司就會上嗰套韓片《醜女大翻身》……
OH NO!成116分鐘!慘喇呢次!

2 則留言:

  1. 那有一天不想你係我最喜歡的一部港產片(雖然好多人都話係爛片),不過我鍾意佢的主題,好溫馨,好真摯,好純潔!

    回覆刪除
  2. "溏心風暴" 嘻嘻 , 我曾經都係捧場客! 認同菊姐嘅歌藝真係一流 !!

    回覆刪除