童年回憶 - 忍者龜

因為公司嘅一號院線喺今晚開始會上《戇豆放大假》嘅關係，
所以《忍者龜》同《戰狼300》呢兩套上咗一排嘅電影就調咗去我負責嘅院線度先後放映，
於是，噚晚我咪終於有機會可以真正去睇睇呢套由我哋香港人製作嘅《忍者龜動畫電影》囉！
（戰狼300我就一般啦！一向都唔太好呢類戰爭片……）

《忍者龜》係我細個嗰陣好鍾意睇嘅一套卡通片，亦都係我細個好鍾意玩嘅一隻Game，
而喺呢四隻龜當中，我最喜愛嘅係帶住橙色眼巾用雙截棍嘅Michelangelo，
點解？事關喺隻Game度，Michelangelo真係好鬼死好用！

講返呢部電影，以動畫嚟講，我認為喺戲入面出色嘅CG畫面，
比起外國一啲動畫電影確實係有過之而無不及，甚有荷李活級別嘅功架，相當值得大家讚賞，
而喺粵語配音方面，一眾配音員嘅演繹亦都非常盞鬼抵死，
尤其係森美所配嘅Michelangelo同阿旦哥所配嘅龜師父。
我好記得有一幕當龜師父走去開電視話要睇《膠朋滿座》，
雖然成件事好Hardsell，但我都係忍唔住笑咗出嚟！

至於套戲個故事我一早已經唔會抱有太大嘅期望，
大概都估到呢套戲嘅劇情同以前嘅卡通版應該都係大同小異，
但係我自己就幾鐘意Leo同Raphael嗰條友情線同埋之後佢哋成班兄弟同心去救Leo嘅嗰一幕，
另外，Leo同Raphael嗰一場天台雨戰亦都係十分精彩。

有讚當然亦都有彈啦！
第一係阿Don同Michel喺套戲度竟然完全做咗大大大配角，
令到長棍同雙截棍毫無發揮嘅空間，實在係九兩菜！
第二係周麗淇小姐超多懶音嘅配音簡直係聽到我隻耳都側埋！

不過，我都好同意一啲朋友所講，
呢套《忍者龜》都算係香港動畫同電影製作革命性嘅一頁，
同時亦見證到香港創意工業衝出亞洲邁向國際嘅一個里程碑，
計我話，身為香港人就一定要入戲院支持一下呢班龜龜呀！