2006年12月2日 星期六

我不是一個好知己

前幾日同女朋友傾開一個話題,就係……其實我哋兩個算唔算多朋友呢?
我女朋友話……佢所有朋友大多數都係屋企人,除咗我之外就冇乜街外朋友……
而我就剛剛好相反,我除咗同嫲嫲比較多溝通之外,基本上同其他家人嘅關係都較為疏離!
我所有朋友都係街外人……講真,如果要我認真數一數嘅話,其實我都算得上係相識滿天下!
因為我本身好鐘意去認識各種唔同年紀、身份嘅人,亦好鐘意去留意佢哋各人唔同嘅故事。

我覺得自己係一個好好嘅聆聽者,但就絕對唔會係嗰種24小時On Call嘅老友!
喺我心目中,朋友只係一班用嚟傾計同玩嘅對象,唔使幫我擋兩刀,唔好問我借錢……
當然同樣我亦都唔會問你借!我一向都認為做朋友真係千祈唔好涉及金錢、利益同女人……
做老友嘅,其實就只需要安份咁去做一個垃圾筒就已經好足夠。

我一向都唔鐘意將「朋友」兩個字搞到咁鬼複雜,
簡簡單單嘅友情,喺我心目中向來都係最靠得住!可能係因為個性問題啦!
經歷亦都係一個重要因素!我從小就習慣咗自己一個人去處理所有煩惱……
講真呀!細個嗰陣邊度會有人得閒理你講乜㗎?
再加上當時老豆老母又長時間唔喺自己身邊,而我又唔想嫲嫲擔心……
所以日子耐咗……就會漸漸習慣一個人孤身作戰,仲會變得好討厭去同其他人交代一切!
唔開心嗰陣……我只需要一個人靜下就OK!有好多朋友成日都話突然會搵我唔到……
唔知我到底發生咗乜事……但冇辦法,我個人就係咁!坦白講,其實我當佢哋每個人都係朋友!
只係我個人實在係太講心情同太需要私人空間喇!同埋喺朋友上我真係會分得好清楚!
玩嘅朋友、傾心事嘅朋友、食飯嘅朋友、網上嘅朋友……基本上我都會分得好明確!
但其實喺我心目中……佢哋全部都係我嘅老友,根本就無分高低!
只係我認為……乜人係只適合去玩,乜人係只適合傾心事,我自己心中有數!
所以,一啲平日比較少聯絡嘅朋友!例如係:盛恩、家敏、阿欣、阿龍、阿聰同一班小學同學……
講真,有時候我真係唔係有心唔聽佢哋電話㗎!
只係可能撞啱嗰排我個人真係好唔開心,所以我先唔想出去影響大家嘅心情啫!

我冇可能全部人去逐個解釋,只有等唔明白嘅人慢慢去明白同了解我!
哈~我諗喺而家班朋友入面……應該就只有小玲算係最了解我!可能係因為大家自細就認識啦!
其次就係阿龍同柏盛……而華Dee同我認識嘅時間雖然唔係好長,但唔知點解大家就異常咁夾!
至於Miss黃,其實我哋都係好好嘅朋友!但有時候我自己就真係唔希望再加深佢嘅煩惱……
所以我每次見親佢都一定唔會將自己唔開心嘅野同佢講,等佢可以好安心咁全心全意去戰勝病魔。

哈~講開又講,其實,喺呢個世界上曾經都有兩個朋友係好了解我嘅!
但可惜……我哋己經冇可能再見面喇!
老實講,直到而家……我都仲係唔能夠接受佢哋已經唔喺度呢個事實!
只不過……事實歸事實!有時候有啲嘢發生咗就唔可能時光倒流!
呢個係我哋凡人一世都唔會改變得到嘅命運。

講真,喺我嘅現實世界入面……其實真係冇乜朋友知我竟然會有寫Blog呢個咁姣嘅習慣!
網友就反而好多都會知!不過,有時候我自己又覺得……查實佢哋睇唔到咪仲好!
因為有時候有好多嘢,我認為又真係唔使下下講到咁白嘅!

老老實實,有時諗番起以前同大家一齊酒醉落泊嘅日子,我自己都會感到好心甜……
我知道我真係唔係一個好稱職嘅朋友,但希望大家都可以體諒一下我呢隻「冇尾飛陀」啦!哈哈~

好!各位朋友,嘢我就唔再多講喇!大家心照不宣啦!Good Luck to all of us!

沒有留言: