CoCo＆Me 生活瑣事雜誌（2019年9月號）

Chapter 1：CoCo電眼寫真放送 🐱
Chapter 2：歡迎各位新住客 🤗
Chapter 3：私伙潮物分享 💀
Chapter 4：紅軍向前衝 ⚽
Chapter 5：良心食堂 - 紅伶飯店 💝
Chapter 6：第三期焦點音樂猛人 - Eddie Cochran 🎸
Chapter 7：本月好歌放送 🎶
Chapter 8：各地唱片大晒冷 💿
Chapter 9：好碟再重溫 - 林志炫【ONE take】🎧
Chapter 10：舊片再回顧 - 誘情報局（The Paperboy）🗞
Chapter 11：9月觀影小記 🎥
Chapter 12：今期好書推介 - Silver Linings Playbook 📖
Chapter 13：回味台北 🇹🇼
Chapter 14：我愛蔡楓華壽辰慶典 🎂
Chapter 15：致我的好兄弟 📮
Chapter 16：香港人加油 🇭🇰💪🏻
Chapter 17：謝謝您，蔣篤慧 🎙

數數手指，距離上一期嘅生活瑣事雜誌已經有成年幾時間，喺呢度真係要同一眾讀者講返聲唔好意思～

Chapter 1：CoCo電眼寫真放送 🐱

用咗唔夠兩年嘅Sony Xperia XA2 Ultra喺幾日前突然宣佈退役，取而代之嘅……就係呢部Samsung Galaxy A70！

拎起部新手機第一時間應該做啲乜？當然係立即要同天下第一貓美男CoCo哥影返張型仔寫真先啦！計我話靚相唔使多，一張就足夠！呢張殺死人冇命賠嘅絕版珍藏數量有限，價值連城，因住手快有手慢冇呀喂～

嘿嘿～測試新手機拍片功能時間！一梳梳到尾；二梳白發齊眉；三梳兒孫滿地；四梳四條銀筍盡標齊；五梳翁娌和順；六梳夫妻相敬；七梳七姐下凡；八梳八仙來賀壽，寶鴨穿蓮道外遊；九梳九子連環樣樣有；十梳夫妻兩老到白頭，吾皇萬歲萬歲萬萬歲……

Chapter 2：歡迎各位新住客 🤗

貌合神離嘅怪誕屍夫婦Victor & Emily、嚴重貨不對版嘅照騙王Alex、日日要食漢堡包嘅極．危險人物Jules Winnfield、最愛冒險嘅熱血龍騎士達爾、專一顧家嘅動漫界暖男代表野原廣志、世上最強大毒L佐藤正男同埋全宇宙最鹹濕嘅兩父子Austin Powers & Mini-Me，仲有咁多位尊貴新客戶嘅主子，等我嚟同大家影返張大合照先！嚟～1～2～3～放膽呀大聲笑～我請你個老母食香蕉～

為民除害嘅的士界革命義士Travis Bickle，閣下嘅房間經已準備妥當，請你同你嘅室友Tyler Durden盡快聯絡本舍校車服務部安排接送工作！

收到！各位雀友請立刻轉發此信息俾十位摯愛嘅親朋戚友，一齊守護香港，好人一生平安，Be Water My Friend～

有興趣入住我哋宿舍嘅朋友就快啲打俾包租公Angry Bird（即係我）啦！電話係99999394～記住！係99999394！十點鐘後唔好打嚟，因為我瞓咗～

Chapter 3：私伙潮物分享 💀

集合天界巨Band成員John Lennon、Jim Morrison、Kurt Cobain、Bob Marley於一身嘅型爆T-Shirt。

人稱地獄最強結他手嘅冥界男神Hot As Hell，你哋Join咗佢嘅Fans Club未呀？

望住眼前呢條骷髏魔牛仔褲，不禁就令我諗返起中學時期嗰條MK火焰大喇叭……

嘩～將呢set戒指全部帶晒上手，再釘多粒紅光閃閃嘅骷髏頭耳環落耳仔，Wo～沉睡多年嘅一代老MK終於強勢回歸！

上身著住件Hot As Hell T-Shirt，下身著住條骷髏魔牛仔褲，成手骷髏飾物，襯埋呢兩對Dragon Beard限量版靚鞋……喂～阿哥～用不著那麼重口味吧？妖～你理得我呀！

有睇過《Pulp Fiction》嘅影迷朋友肯定就會清楚知道呢個銀包係乜嘢來頭！

儲齊七樣潮物，然後用呢個Zippo火機一撻，就可以呼喚到神龍伯伯出嚟㗎喇！呵呵呵～

Chapter 4：紅軍向前衝 ⚽

恭喜雲將軍！恭喜艾利神！當然，我哋亦唔可以忘記一班同樣勞苦功高嘅紅軍戰士，特別係樂善好施又甘為他人作嫁衣裳嘅無名英雄費明奴，希望你哋喺未來嘅日子能夠繼續為高普開山劈石，締造更多令一眾利迷喜出望外嘅球壇神話！

Chapter 5：良心食堂 - 紅伶飯店 💝

以下文字係轉載自某群組：「你哋會生存落去㗎！」朋友同老闆娘講。今日同老友又去咗呢間小店度打冷，坐喺我哋隔離有位藍士就喺度批評示威者近日嘅做法（聽佢口吻唔算好藍所以唔用藍屍稱呼），然後已經七十幾歲嘅老闆娘就即刻屌鳩佢話：「你知唔撚知大陸當年幾衰，我嗰時走落嚟係為咗乜？班後生仔係你哋帶大嘅，而家你亂咁打佢哋，佢哋冇阿爸阿媽㗎？一日未定罪你都唔可以咁！咁同以前有乜分別？」

嗱～位於佐敦吳松街19號地下嘅紅伶飯店就不嬲都係正斗兼有良心嘅！你淨係睇下佢個招牌咁黃你就知佢咩～啦！有睇開我個Blog嘅朋友，應該都會對呢間打冷舖有些少印象。嗰陣我三日唔埋兩日就會喺個Blog度瘋狂吹奏紅伶係香港打冷界嘅NO.1，吹下吹下，仲俾人質疑我係咪收咗錢做打手幫人哋賣廣告～但所謂「路遙知馬力，日久見人心」，學汪阿姐話齋，經過那些年～之後，一班熱血嘅同路人就總算叫做幫細佬平反咗，證明我火爆仔嘅推介係絕冇老點！

有段時間我一得閒就會約埋三五知己去紅伶打躉、吹水、劈酒，貪啲啤酒夠凍又冇雪味，到後來我就索性連朋友、女朋友甚至係自己嘅生日飯都交晒俾佢哋全權負責。呢度嘅老闆同老闆娘當年由家鄉普寧偷渡嚟香港，期間打過工捱過世界，十幾年前開始接手紅伶飯店成為第四任店主，專賣潮州打冷。佢哋兩公婆勤力拼搏又捱得，兩個人包辦晒廚房、企檔、樓面、清潔等工作，間中再搵班仔女客串下。起初同老闆娘唔熟，就以為佢份人好冇禮貌又串貢貢，當熟絡咗你哋就會發現呢個嬸嬸只不過係豪邁熱情真個性，我知陳太一向都好錫班後生，所以喺網上睇到有人咁樣表揚佢，我真係完全唔感到意外。

之但係我個人就好現實嘅，齋係有良心係唔夠㗎～作為一間食店啲嘢都要食得落口先過到關！首先我就不厭其煩再三要向大家推介一下紅伶嘅招牌芥辣墨魚片，啲墨魚鮮味十足，肉質彈牙有口感，點埋芥辣同鼓油一齊食，簡直係人間美味！屌你正呀喂～

除咗招牌芥辣墨魚片之外，佢哋呢度仲有好多正嘢！例如係爽口鮮甜嘅筍蝦、實淨嫩滑嘅韭菜豬紅，仲有就係多肉少肥膏嘅鹵水鵝片。

鼓椒炒蜆夠鑊氣，惹味蜆多冇空殼，包保冇呃秤！

個蠔餅直頭就唔使多講啦～大大碟好似層層疊咁，香口得嚟又唔會炸得太乾，而蠔仔同炸粉嘅比例又落得剛剛好！

蠔仔粥十分足料，有分大／中／細三種size，任君選擇。

好食到停唔到口嘅送酒孖寶 - 韭菜花炒鹹肉+ 四季豆炒豬脷

咬落去煙韌冇內臟味嘅生腸拼大腸／鵝腸又係一眾打冷愛好者嘅必嗌之選！另外嗰啲乜嘢醉雞鍋呀～羊腩煲呀～大眼雞呀～白灼蝦呀～花生豬手呀～蕃薯苗同埋豬皮蘿蔔就等你哋試完再話我知掂唔掂檔啦！

各位兄弟姊妹，同我好好認住呢塊招牌！個老闆一開閘就嗱嗱臨入去搞旺個場佢！事關老闆娘話最近生意比以前少咗好多，如果過埋年都冇改善嘅話就會拉閘執笠光榮退休㗎喇～

《紅伶飯店》

地址：佐敦吳松街19號地下

電話：2385 3524

營業時間：星期一至日：18:00 - 04:00

Facebook專頁：請按此進入

各項評分（ 冚唪唥十個㊣）

食物質素：食出同舟共濟嘅人情味！😋

抵食程度：良心無價！😉

服務態度：人話難求！😭

衛生：心靈潔淨冇雜質！😊

環境：自己入嚟感受一下！😤

Chapter 6：第三期焦點音樂猛人 - Eddie Cochran 🎸

1950年代嘅Rock Music係一種回歸青春嘅號召，叛逆嘅音樂風格、不羈嘅外觀同生活型態加上好幾位性格鮮明嘅搖滾樂歌手徹底征服咗一個世代，就好似今集嘅主角Eddie Cochran咁，呢個個款同把聲都勁似貓王Elvis Presley嘅有型士除咗有晒我上面所講嘅特質之外，仲精通結他、Bass、鋼琴、鼓等樂器，佢嘅出現深深影響住Country Rock嘅未來。

Eddie Cochran出生於美國明尼蘇達州，喺加州長大。1956年，佢喺一代金髮尤物Jayne Mansfield主演嘅歌舞片《The Girl Can't Help It》中初試啼聲演唱一曲Twenty Flight Rock，從此被普羅樂迷所認識，跟住喺1957年11月佢就發行咗生平嘅第一張亦係最後一張Album【Singin' To My Baby】。喺首張專輯推出嘅後一年，Cochran就製作咗一系列對整個鄉村搖滾樂界推動好大嘅經典金曲，當中就包括佢嘅首支英國單曲榜冠軍歌Three Steps To Heaven、由Cochran女朋友Sharon Sheeley所寫嘅Somethin' Else、入選滾石雜誌史上最偉大作品Top 500嘅C'Mon Everybody、電影《Go, Johnny Go!》插曲Teenage Heaven以及喺後期俾多位天王級人馬拎嚟翻唱嘅Summertime Blues。

Summertime Blues係Cochran喺19歲嗰陣同經理人Jerry Capehart合寫嘅，當年只係放喺細碟嘅B-Side。呢首歌雖然喺各大排行榜嘅成績只屬中規中矩（Billboard細碟榜最高第8位、英國單曲榜最高第18位），但喺往後嘅日子就俾Bruce Springsteen、Alan Jackson、Johnny Hallyday、 Olivia Newton John、Debbie Harry、The Who、The Beach Boys、T. Rex、Van Halen、Rush、Blue Cheer、Stray Cats等知名歌手／樂隊先後拎嚟改編重唱，仲入選埋滾石雜誌史上最偉大作品Top 500嘅第73位，而喺眾多位翻唱者入面，我自己就最鍾意Brian Setzer（Stray Cats主音）喺1987年為墨西哥裔美國歌手Ritchie Valens嘅傳記電影《La Bamba》配唱嘅嗰個版本。值得一提嘅係Brian Setzer本人亦有參與呢部戲嘅演出，所扮演嘅角色正正就係Eddie Cochran。


提到Ritchie Valens，唔講大家可能唔知，呢位曾經創作出Donna、La Bamba等名曲嘅傳奇鬼才同美國著名音樂人Buddy Holly其實都係Eddie Cochran嘅老友，三個年紀輕輕就創出一番事業嘅天之驕子本來擁有大好前程，但好景不常，喺1959年2月3號，Ritchie Valens、Buddy Holly加埋有綽號「The Big Bopper」之稱嘅JP Richardson Jr.就同時喺一場墜機事件中罹難，後來民謠歌王Don McLean喺世紀金曲American Pie嘅歌詞裡頭仲將呢件悲劇稱為「The Day The Music Died」。

身邊摯友離世令Eddie Cochran大受打擊，喺慘劇發生後佢就對外宣稱唔想再出席任何一個表現場合，以後就疊埋心水一個人留喺錄音室度工作，不過冇幾耐佢就接受咗一間經紀公司嘅邀請同Rockabilly界先鋒人物Gene Vincent孖住去英國做巡迴演出，為期三個月。然後喺1960年4月16號星期六（即巡演結束前一日），大約係晚上11點50分，演唱會經理人Pat Thompkins就幫Cochran、Vincent Call咗架車，演出完畢，佢哋幾個就坐上一架Ford Consul車款嘅的士，同行仲有Cochran當時嘅未婚妻Sharon Sheeley。

有關呢一趟亡命路程嘅傳聞有好多，有人話個的士佬醉酒揸車，亦有人話佢只不過經驗唔夠，唯一可以確定嘅就係警官R.S.McIntyre嘅報告：「1960年4月16號晚上11點50分，喺Chippenham嘅Bath Road發生咗一宗好嚴重嘅交通意外，喺撞擊嗰一刻，坐喺後座中間位置嘅Cochran即時被扔出車外，佢嘅頭部受到重創，喺一輪搶救之後，最終就喺4月17號下午4點10分宣告不治，享年21歲。」至於Sharon Sheeley、Pat Thompkins、Gene Vincent就喺今次車禍中執返條命仔，但係Vincent腿部嘅永久傷患就大大縮短佢嘅職業生涯，而涉案嘅的士司機G. Martin喺意外發生後竟然就絲毫無損，淨係被判入獄六個月同因為危險駕駛而被罰款50蚊英磅再釘牌九年。

Eddie Cochran嘅一生短暫而璀璨，佢喺整個音樂生涯就只發表過一張正式大碟同一堆寥寥可數嘅Singles，但佢對流行音樂嘅一啲重要觀念就啟發咗一眾殿堂級樂隊例如係Beatles同The Who日後嘅發展路向，其中Beatles嘅結他手George Harrison更加視Cochran為超級偶像，據聞Cochran當日喺英國開Show，George同John Lennon兩個都係坐上客。

1987年，Eddie Cochran正式入選搖滾名人堂，以表揚佢對Rockabilly嘅開創性貢獻。及後，Cochran生前所創作嘅多首作品就俾唱片公司拎咗嚟重新發行，從而得以流傳後世。2008年6月2日，EMI唱片公司就推出咗一本由Bobby Cochran（Eddie Cochran姪仔）撰寫名為『Three Steps to Heaven: The Eddie Cochran Story』嘅傳記書籍，裡面記載咗佢Uncle Eddie嘅一啲生活點滴，本書一出就大受歡迎被搶購一空。去到2010年9月27日，美國加州洛杉磯郡城市Bell Gardens市長仲將10月3日定為「Eddie Cochran Day」。

「如果單憑文字就能夠撫慰我哋失去摯愛Eddie嘅哀痛，咁樣呢一份愛就肯定唔係真實嘅。」呢幾段刻喺Eddie Cochran位於加州Cypress墓碑上面嘅悼文，真係充分表達出一班死忠對Cochran嘅思念之情。

第三期焦點音樂猛人（完），第四期焦點音樂猛人將會係……嗯～近排好忙，忙完先再諗，請各位拍硬檔睇返之前嗰兩期止下渴先啦！

Chapter 7：本月好歌放送 🎶

登登登～Fight低〈肥媽有話兒〉成為本週正氣金曲龍虎榜冠軍嘅……係成日鳩噏多過呼吸嘅炮王叻Feat.大灣區民主女神瑪俐亞嘅接力神作〈武警想害人〉，估唔到表面上藍到發光嘅叻哥同Maria喺私底下竟然係咁支持班年青人……Sorry呀兩位得高望重嘅老人家～一直以嚟都怪錯咗你哋！唉～冇法子啦！小弟六年班未畢業，政治呢家嘢我真係唔識㗎！嗚嗚嗚～



從容不迫也許是我的原則～每次告別難免會有些捨不得～為了掩飾我內心的軟弱穿沉重的殼～經過幾次失敗才相信曲折～呢幾句歌詞就好似一部測謊機咁講中晒我啲心事，早排孖住姑姑去台北旅行嗰陣，夜晚一返到酒店打開個電視就經常都會聽到大熱宮廷劇《如懿傳》嘅台版片尾曲，聽咗將近十次之後我就忍唔住走咗去一間位於中正區羅斯福路三段嘅二手唱片舖度買咗一張CD打包上機。

Chapter 8：各地唱片大晒冷 💿

同大家介紹！呢位貴婦味極濃嘅靚女個名叫做呂薔，芳齡25歲，佢聲線似林凡，唱腔似A-Lin，咬字似Tanya，仲曾經以黑馬姿態入圍第29屆金曲獎最佳國語女歌手，係一位貨真價實嘅泰雅族唱將。

出生於Hagen嘅80s德國搖滾天后Nena，細緻嬌脆嘅歌聲，同佢大方爽朗嘅外表形成一種好鮮明嘅對比，想深入去了解一下佢嘅音樂？最簡單嘅方法就係買一隻大件夾抵食嘅雙CD精選返屋企！

風流放蕩、才華洋溢、瓣數多到嚇死人嘅已故法國歌手／作曲家／鋼琴家／演員／編劇／導演／作家／畫家／詩人Serge Gainsbourg對整個法國流行樂壇影響深遠，Serge嘅曲風多變而又引人入勝，由Pop、Jazz、Chanson、Yé-Yé、Mambo、Reggae到Disco、Funk、New Wave、Electronic Music、Rock、Progressive Rock通通難佢唔到！重點推介Serge嘅三首歌俾你哋，第一首係露骨銷魂嘅跨世代性歌經典Je T'Aime... Moi Non Plus，第二首係深情浪漫又帶點唏噓寂寞嘅Manon，第三首係離經叛道仲差啲搞到佢一鑊泡嘅Aux Armes Et Cætera。

所謂踏破鐵鞋無覓處，得來簡直好Easy呀～喺一輪長途跋涉、翻山越嶺、趟水過河之後，總算皇天不負有心人！各位觀眾，昭和音樂真．女神森田童子歷年專輯晒你冷！

同樣係難搵到爆嘅Badfinger CD Puzzle全集，尚欠四塊！

呢張Japan日版唱片係大阪老字號唱片行【FOREVER RECORDS】老闆兼日本地下廠牌Hören幕後推手東瀬戶悟先生送俾我嘅禮物，好鍾意碟入面一首名叫Nightporter嘅歌，近日不斷重播中……

Chapter 9：好碟再重溫 - 林志炫【ONE take】🎧

今期好碟再重溫的主角是林志炫於2010年12月底發行的現場錄音專輯【ONE take】，以下是小弟在八年前所寫的一篇大碟聽後感……

這張【ONE take】是志炫跟台灣歌唱節目『音樂萬萬歲』一次難得的合作，亦是台灣首張與電視演唱同步錄音的專輯，更創下當地史上錄製最快的HD高品質電視歌唱節目。在『音樂萬萬歲』音樂總監韓賢光老師的帶領下，八首重新編曲的跨世代經典作品和全新發表的新作〈殘缺〉與中文版〈浮誇〉，共同展現「一氣呵成，一次完成」的演唱過程與神奇力量。

對於林志炫這種超級唱將來說，唱Live當然就不是什麼大問題，但要與樂手同步現場並且一Take過完成錄音，著實是有一定難度，像香港著名的實力派歌手李克勤，就曾推出過兩張類似「ONE TAKE」的Live專輯。只是，即使強如李克勤，我們在他的兩張「ONE TAKE」專輯內就還是可以找到不少瑕疵，不論在音準和拍子上，那就證明，真正的「ONE TAKE」，並不是人人能夠做到的。

但可幸的是，當我將這張【ONE take】專輯反覆聽了多遍之後，我發現志炫的現場演唱功力，又再昇華到另一個層面了！在音準、拍子和咬字上，我幾乎找不到志炫有半點問題出錯，要知道音準是作為一個專業歌手最基本的一環，要是音準拍子全錯，你就算唱得再如何歇斯底里，也是無補於事的。

既然在音準、拍子和咬字上都找不到問題的話，那就不如聽聽志炫在情感演繹、層次及流暢度方面的發揮吧！

若說全碟最受爭議的一首作品，相信一定是國語版〈浮誇〉，這首歌是改編自陳奕迅的同名大熱作品，坦白說，要超越原唱陳奕迅近乎滿分的演繹，實在是Mission Impossible！所以，當志炫這首全新的〈浮誇〉面世時，外界對這首歌的評價可說是好壞參半！有人說：「音是唱準了，但不夠浮誇。」有人說：「陳奕迅唱出感情和技巧，林志炫唱出技巧而沒感情。」有人說：「林志炫唯一的缺點就是太過完美。」看到這些評論，我心裡面頓時出現許多問號……我在想，現在的人聽歌到底有沒有仔細去留意每份歌詞的內容呢？新舊版本的〈浮誇〉，本來就是兩種個性，兩種態度。陳奕迅的〈浮誇〉，所控訴的是那份瘋狂背後的焦慮和恐懼；林志炫的〈浮誇〉，所描述的則是他本人在樂壇一路走來的心路歷程。平心而論，新版〈浮誇〉的歌詞確實是填得有點粗糙，但就直接道出了現今演藝圈甚至是大社會的眾生相。在今時今日的流行樂壇，好像勢必要夠浮誇夠高調才可以突圍而出，要成為一個天王巨星，就必須要講包裝講排場講人情，只要人紅有人氣便能夠出唱片，只要衣著暴露、賣弄身材就可以惹人注目。有些歌手說的話就總是比他唱的歌來得更動聽，口說：「我不貪財，我只愛音樂！」但就一直粗製濫造，並單靠一些出位的言論和耍雜技來嘩眾取寵，更可笑的是，某幾位歌王歌后唱歌時常走音忘詞，新一代的樂迷和專業樂評人竟然就將這些過失曲解為〝很有感染力〞。也許……志炫的〈浮誇〉是不夠陳奕迅的〈浮誇〉來得傳神入戲，而樓南蔚所填的新詞，亦不及原版黃偉文填得那麼精彩絕核，但很諷刺的是，新版的〈浮誇〉卻真實地唱出了這個新世代的無奈與荒謬。

接下來的〈愛／不要愛我〉志炫就把莫文蔚的兩首佳作組合成一首組曲，出來的效果相當不錯。原唱莫文蔚的演繹帶著幾分瀟灑，有種雲淡風輕之感，而志炫的演繹則比較沉重，在高低起伏和情感變化上亦較為明顯和豐富。假若說原版是一個女生正在回望過去，內心還在隱隱作痛著，那麼志炫的版本就是一個歷盡滄桑的男人直接把內心的遺憾和心痛唱給對方聽。整首組曲銜接得十分好，完全道盡了這個失戀男的痛苦與失落。

〈歡顏〉是「天籟之音」齊豫的經典作品，它的歌詞雖然字數不多，但卻填得很有意境，配上李泰祥大師所譜下的優美旋律，仿佛就像一幅藝術畫。記得我第一次聽到此歌，真是徹底被齊豫的超凡歌藝所折服，那永恆的空靈高音，直到曲子結束了，餘音仍迴盪在耳邊。

齊豫將美麗的〈歡顏〉唱到九霄雲外去，而志炫的重新演繹亦同樣精彩，把那張〈歡顏〉再度送回人間。相比起原唱有如天使降臨的絕美音色，志炫的唱腔就較為人性化，非常真切感人。話說回來，齊豫的歌還真適合志炫去發揮其深厚的翻唱功力，像在他上一張專輯【擦聲而過II】裡面的〈你是我所有的回憶〉就是一次極出色的示範演出。

〈蘇州河畔〉的原唱是姚敏、姚莉還是潘迪華？這都不是重點！我只是覺得志炫的唱法套用在古早味濃厚的抒情小調上好像就不太適合……我想，像這類有點年紀的老歌，還是留給蔡琴和費玉清這兩部懷舊點唱機吧！

〈誘惑的街〉是台灣音樂大師李宗盛一首描寫女性情傷的經典之作，天后林憶蓮極具標誌性的演繹，至今仍是教人念念不忘。因此，志炫要重唱這首經典，風險還真是頗大的。首先，在天后的珠玉面前，聽眾早就有了先入為主的觀念。第二，〈誘惑的街〉畢竟是一首從女性角度出發的歌曲，想要趕上或是超越原來的版本都是很困難的。有見及此，志炫就嘗試從男性的角度去詮釋歌中的情感跌宕，出來的效果還算OK。聽得出來他很努力去唱出自己的味道，從歌聲中亦深深感受到他那澎湃的力與美，但……個人覺得志炫在某些感情轉折上就可以做得再好一點！嗯～應該怎樣說好呢？我認為……志炫在這首歌裡面所投入的感情是很足夠的，可是在各個段落的層次鋪排上就未免太平鋪直述了點，尤其是開段需要柔性處理的地方，不過……我就頗喜歡他在歌曲結尾處的刻意安排。「若是我身在誘惑的街，若是我身在沉淪的午夜，妳的心是否會為我而淌血……」的確，無論是多強大的男人，都總會有說不出口的時候，特別是那些哽在喉嚨裡的話。

多年以來，志炫就曾經用過多首作品來紀念搬到天上的母親，例如是早期的〈Miss Mama〉以及重唱歌神張學友的〈離人〉，還有這次的〈花香〉。〈花香〉是台語歌后江蕙一首極為催淚之作，我本身不太懂台語，也是看了歌詞才知道這是一首思念亡母的歌曲。故此，對於志炫的台語咬字我就不敢妄下評論了！但有一點可以肯定的是……從志炫的歌聲中，我就清楚感受得到他對母親那份無盡透明的思念。（另附上志炫首次在『音樂萬萬歲』所演唱的版本，他唱到尾段都快要控制不住自己的情緒，還差點哭出來，這個版本真是令人為之動容，誠意推介給大家！按此試聽）

〈殘缺〉是志炫一位大陸歌迷為他精心創作的一首全新曲目，這首歌的旋律起伏不大，歌詞亦沒有什麼記憶點，整首歌聽起來略嫌平淡欠高潮，感覺甚為沉悶。說真的，像這種業餘水準的平庸作品，只能說句誠意可嘉。

〈回家／斷了線〉是專輯內的另一首動聽組曲，這兩首怨女味十足的作品由一位男生去唱，究竟會產生怎麼樣的化學作用呢？我自己就認為志炫所表達出來的氛圍，和兩位女士相比，完全是截然相反的。先說〈斷了線〉，原唱柯以敏是採用一種比較用力的唱法，音色亦較為沉實，而志炫的唱法反而就偏柔又帶點古典美，可惜在某些部分就略嫌有點過份嬌情。（順帶一提，柯以敏的歌唱風格和志炫真的有著很多頗相似的地方，他們都是那種一聽就聽得出來是受過正統聲樂訓練的實力派唱將，在多年前，兩人還曾合作過一曲〈愛我〉。）至於放在開段和後段來作首尾呼應的〈回家〉，如果說原唱順子的版本是一個外表堅強的都會女性藉著歌曲來訴說內心的脆弱，那志炫所呈現的就似是一個溫柔窩心的好男人正在呼喚舊情人回家一樣。

〈你在煩惱些什麼呢？親愛的〉，聽到這首，我只想說……親愛的林志炫先生，請你不要再隨便嘶吼好嗎？你根本就不適合走這條路線！你身上亦沒有流著所謂的搖滾血液！志炫呀～你還在固執些什麼呢？你知道嗎？數年前的〈進退兩難〉其實就已經是你的搖滾極限了！其後的什麼〈死了都要愛〉呀～〈She's Gone〉呀～這類火燒喉嚨的作品通通都不適合你的「雞尾酒唱法」去演繹！我始終認為，有些搖滾作品是絕不能用假聲和混聲來唱的，就以這首〈你在煩惱些什麼呢？親愛的〉為例，它本身是一首藍調搖滾，輕快中又帶有一種淡淡的憂鬱味道，但志炫所配合的唱腔聽起來就總是讓人覺得有點怪怪的。此外，這首歌的另一個敗筆就是在於整個編曲舖排上，搖滾味欠奉之餘亦不夠藍調，簡直可以用不倫不類來形容。

嗯～用〈鳳凰花開的路口〉這首歌來做整張碟的結尾曲，真是一件最適合不過的事！志炫細膩入微的演繹，和《熟情歌》專輯入面的版本相比可說是平分春色。感覺上志炫在舊版本所傳達的就是一種依依不捨的矛盾心情，然而，經過年月洗禮，新版本所表現出來的，就是一份默默的祝福。

【ONE take】推介：浮誇、愛／不要愛我、歡顏、花香、回家／斷了線、鳳凰花開的路口



最後，為各位送上【ONE take】演唱會的足本重溫，請慢慢欣賞。

Chapter 10：舊片再回顧 - 誘情報局（The Paperboy）🗞

有些電影很奇怪，明明拍得亂七八糟，但又會莫名其妙的讓你／妳深深著迷，《誘情報局》就是一套這樣的電影。坦白說，這絕對是《Precious》導演Lee Daniels一部擦槍走火之作，也許是編導野心太大吧！有太多東西想表達但拍出來就有點進退失據，一塌糊塗的敘事手法、零碎的段落鋪排，以致劇情鬆散、結構混亂，我想，若不是靠一眾星級演員的賣力演出，恐怕這部電影就能在B級片領域中徘徊。按此收看Trailer

既然拍得如此粗糙不堪，那為何又會讓我愛得不能自拔呢？我認為一切都是源自各個人物角色的性格設定和那份暗藏於鏡頭底下的意識形態與氛圍，此外，眾演員前所未有的顛覆性演出也是整部電影的其中一個焦點所在。在戲中，陽光男孩Zac Efron變成了一名患有嚴重戀母情結的臭小鬼；溫文爾雅的John Cusack變成了一名心理變態的暴力殺人狂；魅力非凡且男人味十足的Matthew McConaughey就變成了一名壓抑的同性戀者，還遭一群黑人輪姦；至於優雅端莊的Nicole Kidman則變成了一名風騷蕩婦，並瘋狂迷戀著John Cusack。

Nicole Kidman是一位名副其實的演技派，這點肯定是不容置疑，否則她也不可能於2003年憑著《The Hours》一舉拿下多個影后殊榮。可是，其高雅脫俗的貴族氣質就經常限制了她的戲路，所以她每次都是被安排去演一些合情合理的角色。然而，這次在《誘情報局》裡面，Nicole Kidman就將自己的身段放到最低，完全擺脫過往的高貴形象，並獻出她從影以來最有突破性的一次演出，成為了全片的最大亮點。在眾多場戲入面最令我印象深刻的就是她與John Cusack隔空對淫的那一幕，其大膽狂野的程度真是讓人刮目相看。

《誘情報局》的結局是很悲慘的，每個人都因為自己愚蠢、無知、墮落的行為而付上沉重的代價，而當中Ward（Matthew McConaughey飾）的下場就更是讓人深感痛心。

Chapter 11：9月觀影小記 🎥

片名：講鬼故（Scary Stories to Tell in the Dark）
導演：André Øvredal
主演：Zoe Margaret Colletti、Michael Garza
片長：108分鐘
級別：IIB
語言：英語
上映日期：2019-08-29
個人評分：★★

片名：噬逃險鱷（Crawl）

導演：Alexandre Aja
主演：Kaya Scodelario、Barry Pepper
片長：87分鐘
級別：IIB
語言：英語
上映日期：2019-08-29
個人評分：★☆（☆為半粒星）

片名：白宮淪陷3：天使淪陷（Angel Has Fallen）
導演：Steven C. Miller
主演：Gerard Butler、Morgan Freeman
片長：121分鐘
級別：IIB
語言：英語
上映日期：2019-08-29
個人評分：★

片名：曳曳同學會（Good Boys）
導演：Gene Stupnitsky
主演：Jacob Tremblay、Keith L. Williams、Brady Noon
片長：90分鐘
級別：IIB
語言：英語
上映日期：2019-09-05
個人評分：★★★

片名：ANNA

導演：Luc Besson
主演：Sasha Luss、Helen Mirren、Cillian Murphy
片長：119分鐘
級別：IIB
語言：英語
上映日期：2019-09-05
個人評分：★★☆（☆為半粒星）

片名：EXIT：極限逃生（EXIT）
導演：李相槿
主演：曹政奭、允兒
片長：104分鐘
級別：IIA
語言：韓語
上映日期：2019-09-05
個人評分：★★★

片名：大叔的愛：LOVE or DEAD（Movie: Ossan's Love: Love or Dead）
導演：瑠東東一郎
主演：田中圭、林遣都、吉田鋼太郎
片長：114分鐘
級別：IIA
語言：日語
上映日期：2019-09-12
個人評分：★★

片名：Abigail 魔域戰記（Abigail）
導演：Aleksandr Boguslavsky
主演：Tinatin Dalakishvili、Artyom Tkachenko
片長：111分鐘
級別：IIA
語言：英語
上映日期：2019-09-12
個人評分：☆（☆為半粒星）

片名：小丑回魂2（It Chapter Two）
導演：Andy Muschietti
主演：Jessica Chastain、James McAvoy、Bill Skarsgård
片長：169分鐘
級別：IIA
語言：英語
上映日期：2019-09-12
個人評分：★★★★

今期上映嘅新片仲有由鄭秀文、任賢齊、賴雅妍主演嘅《花椒之味》，本來我都幾期待呢部由麥曦茵執導及編劇嘅洋蔥小品㗎！但一見到某條九唔搭八嘅過氣屎蟲喺段預告片度不停遊嚟遊去，我就即刻冇晒入場嘅意慾……頂～正一陀衰家！

Chapter 12：今期好書推介 - Silver Linings Playbook 📖

中文書名：派特的快樂劇本
作者：Matthew Quick
翻譯：謝靜雯
出版社：馬可孛羅
出版日期：2013年1月30日

威水紀錄：
美國筆會／海明威文學獎獲獎作品，英國最具影響力閱讀節目《The TV Book Club》年度選書，獲亞馬遜五粒星評價，其後改編成電影更讓當時只有22歲的Jennifer Lawrence初嘗奧斯卡影后滋味。

從何得來：
在五月台北之旅的第六天我和姑姑突然心血來潮走到信義區四四南村的Simple Market，當中有一班女大學生擺的攤位就弄了一個名為「書送希望」的愛心行動，這個遊戲的玩法很簡單，你只需要用國語正確唸出英國偉大劇作家莎士比亞的任何一句經典名句，她們就會送你一本書。

簡短後感：
這本書比電影解釋了更多不為人知的深入細節，比如是老Pat對兒子那份壓抑而厚重的愛，電影有嘗試帶出這一點，可是就未有讓我意識到兒子對老Pat生活的影響竟是如此巨大。作者的寫作風格十分流暢，並沒有強加太多無謂的篇幅，很快你就會對整個故事和接下來將發生的事情感到興趣，並形成一種生活在情緒病患身邊的新視角。男主角Pat的個性很天真又很有希望，是一個非常惹人愛的角色，但相較之下，個人則比較喜歡那個表面粗魯內心卻很誠實的女主角Tiffany。這兩顆受傷的心因為各自的經歷走在一起，繼而相互學習，讀者很容易就可以從他們那段笑中有淚的過程當中得到共鳴。看完這本書，你心裡面會多了一條結實的快樂生命線，與此同時，亦衷心祝願每一個不被世俗所欣賞的人能夠得到幸福。

Chapter 13：回味台北 🇹🇼

一張手繪合照，一堆炫神手工卡，想起跟姑姑在台北遊玩時的一些點點滴滴，嗯～這一趟旅程還真是有許多讓人回味的地方！那些吃不完的美食、那些逛不完的景點、那些買不完的潮流服飾、那些親切健談的唱片店老闆和書店店員、那些好久不見的喵星人，都深深留在我的腦海裡……

嗨～住在佳佳唱片行漢口街分店的精靈貓咪～別來無恙吧？你看起來還是一樣帥氣迫人啊！

哎～Kent哥～這是我的錯覺嗎？怎麼你好像又胖了一個圈……

有很多朋友都說這張相片拍得蠻有艋舺的氣勢，我自己就只想到四個字，就是五行欠打……

祈求天地放過一班港人～怕發生的永遠別發生～從來未順利遇上好景降臨～如何能重拾信心～

每天都忙於覓食，每晚都捧著肚子，這種無憂無慮的生活真令人懷念……

先生小姐想買什麼手信回港？我們這裡的貨品包羅萬有，由女性用品、情趣用品到殺人於無形的獨門暗器一日喪命散、含笑半步癲都一應俱全。

炫友們，每次跟你們相聚感覺總是那麼愉快，那股真摯溫馨的暖流就如一道清泉，足以讓我抵擋外間那些殺不盡的洪水猛獸……

Ladies & Gentleman～有請新一屆朦面歌王喵星奴為我們深情獻唱一曲〈心如刀割〉……



雪玉姐，在與Huay Yen院長會面前，我跟聖文、小許一定會把梅姐的〈愛將〉和〈將冰山劈開〉練好的！屆時文帥弟、許爸爸就會化身成兩隻蚱蜢大跳豪情森巴舞，而我就會專門負責模仿許志安的一雙眼睛……


在回程前我有仔細點算過，今次我總共買了32張唱片和13本書，一切就如一位相識多年的好姊妹所言，我這個人真是死性不改……嘻嘻～

話說本人的多篇遊記特別是《兩條麻甩痴漢漫遊東京・熱》系列經已被為數不少的讀者多次投訴嚴重拖期，有一位代號小強的Blog友更將我揶揄為Blog界富奸。所以，寫到這兒，我都是時候要立定決心整理一下那堆封塵已久的旅遊照片了！呵呵～

Chapter 14：我愛蔡楓華壽辰慶典 🎂

恭祝你福壽與天齊，慶賀你生辰快樂，年年都有今日，歲歲都有今朝，恭喜你～恭喜你～

人生有幾多個相交超過廿年以上又可以互相開任何玩笑同坦白一切嘅老死？柏盛哥、二傻、霍金爺爺、甩毛劍客閪門吹雪、蔡楓華天字第一號Fans，在此大哥花滿樓祝你身體健康、工作順利、風調雨順、鴻圖大展、五福臨門、花開富貴、笑口常開、百事可樂、萬事如意、福如東海、壽終正……呀～唔係～應該係壽比南山先啱！

要記住我哋嘅約定，以後見面你都要著住呢件敢愛楓華T-Shirt，直至消失天與地，口講無憑，立此存照，日月可鑑。

Chapter 15：致我的好兄弟 📮

呢段嘢係寫俾喺2020上訴成功嘅某件柒頭睇嘅！因為喺我成班豬朋鳩友入面，就得佢一個會咁撚有心機睇閪晒我嘅每一篇文章，雖然佢次撚次睇完都會屌鳩我啲文寫得仲長過佢條隔夜油炸鬼，但係佢就依然會好戇鳩咁J晒每一段文字嘅內容，查實我都知條變態猥瑣鹹濕佬已經單戀咗細佬好閪多年㗎喇～但鬼叫佢份人平時咁撚污糟邋遢咩？試問一隻咁撚冰清玉潔嘅迷途純情小羔羊又邊鳩度有可能會接受到呢種閪男人呢！喂～話晒一場兄弟，我勸你都係唔好撚再諗埋啲走後門嘅嘢喇～如果出得返嚟，第一件事唔該就先洗乾淨你嗰條佈滿豬鏈球菌嘅椰菜花粒粒大粟米，跟住就同你老婆唱返首〈愛是永恆大結局之今晚喐你夜唔夜〉，從此以後～就乖乖哋做個餵奶換片倒屎好老公／好老豆，然後出去行街嗰陣就盡情呼吸下外面嘅新鮮空氣，皆因自由呢樣嘢喺香港將會慢慢變成奢侈品。仲有呀～行得出個門口就咪撚望返轉頭呀屌你！我唔想成日都要去到老蓮咁遠嚟搵你傾嗰半粒鐘計，仲要俾啲閪蚊追撚住嚟咬，更唔想下下靠飛鴿傳書同你聯絡，咁撚樣做人係好鳩痛苦㗎～知道冇？係咁啦撚樣～見到面先再傾，到時再同你吹爆佢！Bye～

Chapter 16：香港人加油 🇭🇰💪🏻

此章節話題較嚴肅，我還是用回書面語吧！實不相瞞，本人自出娘胎以來就毫無民族意識，每當聽到中國國歌〈義勇軍進行曲〉，再想想此歌作詞人田漢的下場，我便會感到混身不自在，更別說再高一個級別的〈東方紅〉和〈大海航行靠舵手〉了！在人人搶著自認中國人的大中華膠年代，我看著電視上一班體育評述員大力為中國足球隊打氣，看著他們如何替劉翔的退賽事件背書，當下的第一個反應就是：「關我什麼事？」那時候，我就連聽到賀年歌都會覺得受不了，這完全是出自本能反應，並不存在任何偏見與仇恨。

長大後，經歷過23條、國教、雨革和家中大大小小的鳥事，我不但跟那個所謂的祖國漸行漸遠，也對大部分的香港人失去信心。這個難以啟齒的心理障礙一天比一天嚴重，我開始很害怕跟每一個群體扯上關係，但凡身處於樂也融融的場合我便會立刻難受得想吐。或許是習慣了一個人，早已認定孤獨比擁抱實在，那些歡樂的人們，我難以接近，亦不想接近，這種怪異的想法就只有暫離香港往另一個地方才能消除。

時至今日，聽著這首由一班抗爭者所創作的「香港之歌」，心底裡竟忽然湧起一絲感動，這群無畏無懼的年輕小伙子，讓我這個80後中佬深感慚愧。在上一篇文章我曾提及過，721／831過後，有些人、有些事是注定永遠回不了頭的，眾多位反送中烈士、勇敢的爆眼少女、元朗恐襲白衣人、隨機斬人的惡毒老妖、沒有編號的速龍小隊、新屋嶺輪姦疑雲、太子站離奇失蹤傳說以及明修棧道，暗渡陳倉的黑鏡評分制，還有一堆數之不盡的荒謬案件，都有待焦土之母Carrie還香港市民一個真實的答案。我知道我這番話可能又會激起某些家人和朋友的不滿，但有一位經常周遊列國的飛女朋友就常鼓勵我，她說只要你真心認為自己所想的東西是正確的就應該繼續堅持，無須再三解釋，人生本來就是緣起緣滅，強求不得，一些懂你和相信你的人自然就會留守在你身邊。

噩夢連連卻有口難言，偶然也要洗滌一下情緒……還有幾天我和好兄弟華Dee就會啟程到大阪散心，起飛前，我只想說一聲：「香港人加油！我們1/10見。」

Chapter 17：謝謝您，蔣篤慧 🎙

正準備停筆的一剎，我突然收到一個消息，就是台灣知名女配音員蔣篤慧於今晨逝世，享年49歲。蔣篤慧投入配音界26年，曾配過《蠟筆小新》中的主角野原新之助、《名偵探柯南》中的主角柯南、《幽遊白書》中的藏馬、《火影忍者》中的漩渦鳴人以及《櫻桃小丸子》中的花輪。由於我跟蔣篤慧在Facebook上有一位共同朋友，因此，對於她的離開我並不感到十分意外，但當確認這個是事實時，就仍是不禁低頭嘆息，心想：上天為何就這樣帶走了一個如此具才華又滿載著正能量的幕後天使呢？

別了！我心目中唯一認定的野原新之助，感謝您曾為我帶來的每一段歡樂時光，請接受我的哀悼，願生者節哀順變。

喵～CoCo＆Me 生活瑣事雜誌（2019年9月號）完，下一期嘅出版日期……咳咳～對唔住～我唔答啲咁無聊嘅問題！Next Please～

CoCo＆Me 生活瑣事雜誌（2017年11月創刊號）

http://timeischanging2013.blogspot.com/2017/11/coco-me-201711.html

CoCo＆Me 生活瑣事雜誌（2018年3月號）

http://timeischanging2013.blogspot.com/2018/03/CoCoAndMe-March.html

CoCo＆Me 生活瑣事雜誌（2018年7月號）

http://timeischanging2013.blogspot.com/2018/07/CoCoAndMe-July.html