四隻被命運再三捉弄的壞手指

Badfinger，一隊曾被外界稱為「窮人版Beatles」嘅苦命組合，今日喺呢度我就想同大家介紹一下呢隊Band！到底我當初係點樣發現到佢哋嘅音樂嘅呢？咁就要從呢一張有十八年歷史嘅舊唱片開始講起……

五年前，當大熱美劇【Breaking Bad】全五季播放完畢，一首既熟悉又陌生嘅英文老歌就喺主角Walter White臨終前一刻徐徐響起，呢首聽起嚟十分有feel嘅片尾曲喺當時除咗引起一眾影迷熱烈討論之外，佢嘅點擊率亦隨住套劇嘅熱度而大幅上升。



呢首hit爆全城嘅片尾曲叫做〈Baby Blue〉，係收錄喺Badfinger一張名叫《Straight Up》嘅專輯入面，或者有好多朋友都係透過呢首歌先認識到Badfinger呢個名字，但以我嚟講，其實早喺十幾年前我就已經比呢支樂隊嘅其中一首經典作品〈Carry On Till Tomorrow〉深深吸引，仲因為咁而專登走去唱片舖買咗佢哋嘅一張精選碟返屋企。

"Carry On Till Tomorrow, There's No Reason To Look Back～"呢句歌詞真係埋藏咗好多正面嘅能量喺裡面，但同時又會令人感到好感觸，試問又點會有人諗得到，一首咁勵志嘅作品居然係出自Pete Ham（Badfinger主音兼結他手）、Tom Evans（Badfinger Bass手）呢兩位悲劇人物嘅手筆！所以每次當我聽到呢首歌嗰陣，再諗起Badfinger四位成員各自嘅際遇同結局，都會深深咁覺得有時候世事實在係好鬼諷刺！好喇～成日講到呢隊組合咁鬼慘情，究竟有幾慘情先？嗯～不如各位就先細味下呢首咁好聽嘅跨世代名曲，我去飲杯茶食塊餅，然後再慢慢同你哋講……


Badfinger嘅前身樂隊喺1961年成立於威爾斯Swansea一條名叫Iveys嘅街道，故此就將樂隊取名為The Iveys。當時隊Band嘅成員就包括Pete Ham（Tonic Guitarist）、David "Dai" Jenkins（Rhythm Guitarist）、Ron Griffiths（Bass Player），嗰陣佢哋三條友仔先得嗰15、6歲，就連毛都未出齊，但就已經有機會幫一班老早成咗名嘅英國本土樂團例如係Spencer Davis Group、The Who、The Moody Blues、The Yardbirds做巡迴暖場，直到1965年鼓手Mike Gibbons就加盟咗The Iveys並且仲同一個名叫Bill Collins嘅音樂經紀人簽咗一份長達五年嘅合同，自此樂隊就開始踏上正軌。

去到1967年，Bill Collins就將樂隊嘅原始成員David "Dai" Jenkins Out出局，仲搵咗嚟自利物浦嘅結他手Tom Evans接替佢嘅位置。後來因為一次偶然嘅機會，The Iveys就比樂壇教父Paul McCartney睇中，之後就加盟咗由Beatles投資嘅蘋果唱片公司（Apple Records），而佢哋嘅第一首單曲〈Maybe Tomorrow〉就喺1968年11月15號正式面世，當時呢首歌喺英國同日本都幾受歡迎，更登上Billboard Hot 100嘅67名，有見及此，Apple Records就嘗試將Ron Griffiths所寫嘅〈Dear Angie〉投放到日本以及歐洲其他地方例如係德國、意大利嘅音樂市場。

Apple Records對The Iveys嘅音樂事業起咗極大嘅推動作用，喺〈Maybe Tomorrow〉推出後嘅兩個月，The Iveys就正式將樂隊名稱改為Badfinger，跟住身為老闆嘅Paul McCartney就即刻送咗一首〈Come And Get It〉比佢哋做禮物，呢首歌一出就風靡全歐洲（Billboard Hot 100第7名、UK Singles Chart第4名），而受到長輩Beatles嘅影響，Badfinger嘅音樂風格就漸漸轉向為Power Pop。另外，喺錄製〈Come And Get It〉期間，Pete Ham、Tom Evans、Mike Gibbins亦同時製作咗兩首原創作品〈Rock Of All Ages〉、〈Carry On Till Tomorrow〉嚟作為電影【The Magic Christian】嘅主題曲同插曲。

1969年秋天，隨住Bass手Ron Griffiths離隊，Badfinger就決定喺同年嘅11月進行重組，佢哋先邀請同Paul McCartney十足餅印一樣嘅Joey Molland加入，而前結他手Tom Evans就改為彈Bass。Joey Molland呢個大眼仔都幾有腳頭，喺佢加盟咗樂隊之後冇耐，Badfinger就等到佢哋嘅首張專輯誕生，呢張名為《Magic Christian Music》嘅電影原聲大碟喺Billboard 200專輯榜得到第55名，成績算係不過不失，眼見隊Band走勢幾好，唱片公司喺1970年11月就打鐵趁熱幫Badfinger推出第二張大碟《No Dice》。

《No Dice》可以話係Power Pop嘅開山之作，除咗贏盡口碑同銷量之外（Billboard 200專輯榜第28名，係Badfinger喺音樂生涯上嘅最高排名），喺呢張專輯入面有唔少好歌都能夠流傳後世，而其中分別喺英美流行榜（Billboard Hot 100第8名、UK Singles Chart第5名）得到好成績嘅First Plug〈No Matter What〉同埋喺後期透過眾多位歌手翻唱而為人所熟悉嘅〈Without You〉就係當中嘅表表者。

根據統計，〈Without You〉截至目前為止比人翻唱過嘅次數已經有超過180個版本以上，呢首膾炙人口嘅情歌至尊係由Peter Ham同Tom Evans所寫嘅，喺1970年推出初期並未有引起外界太大嘅迴響，但係喺一年後，美國男歌手Harry Nilsson就無意中喺一個舞會場合度聽到呢首歌，聽完覺得好有feel就拎咗嚟改編重唱，仲將佢放咗入專輯【Nilsson Schmilsson】裡面，結果就大受歡迎，呢個翻唱版本喺當時不但霸咗Billboard Hot 100嘅冠軍位置成個月，而且仲為Harry Nilsson贏得一座Grammy Award「最佳流行男歌手獎」。



但若果要再舉出另一個年代距離比較近而且又最家喻戶曉嘅翻唱版本，咁就一定要提一提Mariah Carey喺1994年發行並收錄喺佢張《Music Box》專輯裡面嗰一個唱到聲嘶力竭又百轉千迴嘅Cover Version，經過呢位巨肺歌后運用佢雄厚嘅嗌功猛力一推，再注入一啲帶有R&B元素嘅編曲落去，兩者配合起嚟就成功為呢一首歷史悠久嘅懷舊老歌增添咗一份時代感，仲為Mariah Carey贏得四次英國單曲榜冠軍。



哈～唔知係咪年紀越嚟越大同埋個人經歷多咗嘅關係，而家我無論係聽到Harry Nilsson、Mariah Carey又或者係Air Supply嗰個同樣係嗌爆咪但就K味極濃嘅翻唱版本，個感覺就已經冇以前後生嗰時咁強烈，反觀Badfinger原裝正版嘅〈Without You〉雖然喺唱法同編曲上都冇乜嘢特別出色嘅地方，但呢種樸實嘅質感反而就更表現到歌詞裡頭想呈現出嚟嘅嗰一份悲壯同無奈，尤其係每當佢哋唱到"I Can't Live, If Living Is Without You, I Can't Live, I Can't Give Any More～"嘅時候，嗰種接近絕望嘅呼喊真係令我完全感受到何謂「哀莫大於心死，而人死亦次之」。


第二張大碟《No Dice》嘅成功，大大提升咗Badfinger喺歐美地區嘅知名度，為咗準備1970年嘅首次美國巡演，Badfinger喺當時就特意聘請咗一位名叫Stan Polley嘅紐約經紀人，呢位Polley先生喺音樂界個朵都算幾響㗎～但係佢嗰種極為踩界嘅處事方式同埋財務管理手法喺往後嘅日子就徹底改變咗Badfinger四位成員嘅人生。

1971年，Badfinger嘅另一張知名專輯《Straight Up》橫空出世（Billboard 200專輯榜第31名，仲喺個榜度逗留咗32個禮拜），呢張唱片嘅幕後陣容可謂非常鼎盛，首先就有「披頭四第五人」George Martin同埋美國著名搖滾歌手Todd Rundgren擔任製作人，又搵咗George Harrison喺單曲〈Day After Day〉（Billboard Hot 100第4名）度同Peter Ham合作Slide Guitar Solo部分，再加埋我喺頭幾段提及過嘅嗰一首因為大熱美劇【Breaking Bad】而再現光芒嘅遺珠好歌〈Baby Blue〉，就令到Badfinger再一次獲得一眾樂迷同樂評人嘅大力支持，而喺十幾年之後，《Straight Up》就更加比著名雜誌《Goldmine》嘅讀者評選為「最愛絕版唱片」。

本來形勢大好，但可惜早喺《Straight Up》錄製之前，Badfinger嘅大老闆Beatles四子就已經各散東西，當時Apple Records正陷入一片混亂之中，而由於Badfinger同公司尚有一張專輯嘅合約喺度，Apple Records就喺拖拖拉拉嘅情況下幫佢哋發行埋最後一張唱片，喺嚴重缺乏資源加上零宣傳底下，呢張名為《Ass》嘅專輯最終就只能夠喺Billboard 200專輯榜得到第122名嘅成績，除此之外，喺碟入面嘅重點主打歌〈Apple Of My Eye〉亦未有打入美國任何一個熱門單曲排行榜。

喺錄製《Ass》期間，Badfinger新請返嚟嗰位貪錢到仆街嘅經紀人Stan Polley就自作主張同Warner Bros. Records談判同簽咗一份幾百萬美金嘅合約，就係咁，Badfinger就正式離開咗一手發掘佢哋出嚟嘅Apple Records，而喺《Ass》錄製完成嘅六個星期後，Badfinger四子就經已密鑼緊鼓籌備緊加盟Warner Bros. Records後嘅頭炮大碟《Badfinger》。平心而論，呢張同名專輯嘅質素確係相當唔錯㗎！曲風多元化之餘，我仲喺隻碟入面搵到好幾隊班霸樂隊嘅影子，好似帶有濃濃Beatles氣味嘅〈I Miss You〉、〈Lonely You〉同埋同The Rolling Stones Style有九成相似嘅〈Matted Spam〉，仲有就係集Elvis Presley／The Velvet Underground曲式於一身嘅〈Andy Norris〉，首首都各具特色，但儘管係咁，呢張唱片嘅命運就同先前推出嘅《Ass》一樣，唔止銷情慘淡（Billboard 200專輯榜第161名），就連班樂評人都唔多接受。

眼見星途一日比一日暗淡，Badfinger喺1974年就將全副精神放晒落新碟《Wish You Were Here》度，希望藉此挽回一班樂迷嘅心，但與此同時，嗰位吸人血唔眨眼嘅人渣經紀人Stan Polley長期私吞款項嘅陰謀喺同年就終於比人揭發，之後Warner Bros.就將Badfinger全部人告上法庭，仲下令要將發行咗七個星期嘅新專輯《Wish You Were Here》喺市場上全面落架，實行要斬斷晒Badfinger嘅所有經濟來源，喺樂隊遭受一連串官司訴訟之際，結他手Joey Molland就立刻決定同一班兄弟割席Say Goodbye。



坦白講，我真係好羨慕每一位擁有《Wish You Were Here》呢張唱片嘅樂迷，雖然呢隻碟就只有九首歌，但Badfinger竟然就能夠喺40分鐘嘅時間之內創作出一首首緊湊得嚟又極之有連貫性嘅概念音樂，而更重要嘅係，碟入面啲歌即使過咗四十年都依然唔會比人有一種過時嘅感覺。我真心覺得假如Badfinger四子唔係咁黑仔嘅話，呢張製作得咁認真嘅Concept Album就應該可以喺歐美流行樂壇史冊上劃下一筆。



經濟陷入困境，比隊友離棄，又比最信任嘅經紀人出賣，加上條女又就快生得，喺無計可施之下，Pete Ham就多次嘗試打電話比Polley求救，但係呢條吸血鬼又點會比你咁易搵得到呀！於是，喺1975年4月23號，已經一無所有嘅Pete就約咗隊友Tom Evans出嚟通宵劈酒，劈到凌晨時份，Pete就一個人去咗自己位於倫敦間車房度進行一件人生大事，就係申請成為27 Club Member，而喺靈魂人物Pete Ham過身之後，Badfinger就只好被迫宣布解散。


喺1977年，前樂隊成員Joey Molland就搵咗昔日隊友Tom Evans返嚟重組Badfinger，仲喺1979年同1981年分別推出過兩張專輯，但好景不常，接二連三嘅厄運又再次降臨喺佢哋身上。喺1983年11月19號，Joey Molland同Tom Evans就為咗〈Without You〉嘅版稅分配問題而吵大鑊，之後Tom Evans喺當晚凌晨就去咗自己屋企個花園吊頸自殺（同好朋友Pete自殺嘅方式基本上係一模一樣），享年36歲，而佢嘅離開亦直接為Badfinger嘅音樂故事畫上一個句號。

睇完Badfinger四子嘅故事，唔知大家又有冇為呢隊Band嘅經歷同結局感到惋惜呢？呢四個原本有大好前途嘅年青人，剛出道就比Paul McCartney睇中同寫歌比佢哋唱，要知道喺以前個年代並唔係隨便一隊Band都咁容易得到Paul神欽點，仲有機會長期企喺Beatles四子同George Martin身邊學嘢（Tom Evans同Joey Molland更有幸親眼目睹並參與〈Imagine〉嘅錄製過程），但可惜成也Beatles，敗也Beatles，所謂嘅傳奇就係獨一無二，喺當年有唔少樂評人都好鐘意拎Badfinger同佢哋嘅大老闆Beatles作互相比較，呢一個沉重嘅包袱喺咁多年以嚟就一直跟隨住Badfinger嘅四位成員，到後來佢哋更發現原來自己喺樂壇上嘅剎那光輝可能就只係建立喺「愛屋及烏」呢四個字底下。咁當然，如果Badfinger四子喺當日唔係遇到Stan Polley呢條粉人嘅話，咁佢哋四個人嘅命運或者就唔會走到今時今日呢個地步，只不過世事又邊有咁多如果呢！

若然大家有興趣想深入了解Badfinger呢隊Band嘅音樂，咁我就誠意推介上面呢一張名叫《The Very Best Of Badfinger》嘅唱片比你哋！呢張精選集包含晒Badfinger喺蘋果同華納時期嘅極品好歌，我認為用佢嚟做「入門」嘅第一步絕對係最適合不過！至於Badfinger嘅其他專輯喺坊間就確實唔係有咁多機會比我哋見得到！就以本人為例，我曾經走遍香港、台北同日本嘅大型／二手唱片舖，又經常留意世界各地大大小小嘅拍賣網，最終都只係搵到佢哋嘅兩張正版唱片同一張Bootleg CD，學洪震南師傅話齋：「唔係咁易㗎！」

好～都係時候要收筆喇！喺停筆前我就想同大家分享自己所喜愛嘅一啲Badfinger歌曲，首先就為你哋帶嚟由Badfinger唯一生還者Joey Molland所主唱嘅〈Sweet Tuesday Morning〉（佢哋嘅鼓手Mike Gibbons於2005年10月4號過身，享年56歲，而Badfinger嘅第一代經紀人Bill Collins同埋嗰位壞事做盡嘅萬惡吸血鬼Stan Polley亦分別喺2002年同2009年離開人世），並祝各位有一個愉快嘅晚上！拜拜～

嚴選心目中最喜愛嘅Badfinger歌曲（Top 50）

01. Carry On Till Tomorrow 試聽
02. In The Meantime/Some Other Time 試聽
03. Day After Day 試聽
04. Midnight Caller 試聽
05. We're For The Dark 試聽
06. Dennis 試聽
07. Baby Blue 試聽
08. Without You 試聽
09. I Miss You 試聽
10. Sweet Tuesday Morning 試聽
11. Love Time 試聽
12. Know One Knows 試聽
13. Andy Norris 試聽
14. Lonely You 試聽
15. Maybe Tomorrow 試聽
16. King Of The Load (T) 試聽
17. Name Of The Game 試聽
18. I'll Be The One 試聽
19. Meanwhile, Back At The Ranch / I Should Smoke 試聽
20. Come And Get It 試聽
21. I'd Die Babe 試聽
22. My Heart Goes Out 試聽
23. The Dreamer 試聽
24. I Can't Take It 試聽
25. No Matter What 試聽
26. Rock Of All Ages 試聽
27. Where Do We Go From Here? 試聽
28. Timeless 試聽
29. Watford John 試聽
30. Matted Spam 試聽
31. Just A Chance 試聽
32. Suitcase 試聽
33. When I Say 試聽
34. Keep Believing 試聽
35. Get Down 試聽
36. Lost Inside Your Love 試聽
37. Blodwyn 試聽
38. Got To Get Out Of Here 試聽
39. Arthur 試聽
40. Back Again 試聽
41. Crocadillo 試聽
42. Apple Of My Eye 試聽
43. Love Is Easy 試聽
44. Turn Around 試聽
45. It's Over 試聽
46. Knocking Down Our Home 試聽
47. You're So Fine 試聽
48. Mean, Mean Jemima 試聽
49. Dear Angie 試聽
50. Piano Red 試聽


PS：部分嘅資料同內容係改編自Badfinger嘅Wikipedia。