2006年12月14日 星期四

我最愛的球員,始終都是你 - 麥馬拿文

最近有唔少傳言話麥馬拿文可能會來港獻技,甚至加盟流浪! 
我覺得……前段令人興奮,後段則令人發笑!哈哈又點會呀?講笑咩大佬!? 
當然我最近工作都幾忙,即使佢嚟咗我諗我都應該唔會抽到身去捧佢場! 
不過聽完呢個消息之後,內心就仍然會有一種興奮嘅感覺,好想親身去睇睇佢……
查實講真呀!早幾年皇馬訪港嗰陣,其實老麥早就己經嚟過啦!
但可能因為當時實在有太多球星睇,而老麥又冇落場踢,所以先會俾人忽略咗啫!
哈~講開又講……唔經唔覺老麥原來都已經34歲……
我記得我第一次開始睇波就係睇94年World Cup,而當年我就梗係捧我嘅愛隊Holland啦!
但當時Holland八強就俾Brazil踢咗出局!所以嗰陣我就唯有寄望Italy可以幫我隊愛隊報仇!
咁當然最後……唉~R.Baggio嗰球十二碼,到今時今日……依然係記憶尤新。
不過,如果要數我真正迷上睇波嗰陣嘅話,咁有一個球員就真係不可不提!
佢就係今篇Blog嘅主人翁,亦都係Liverpool永遠嘅7號仔 - 麥馬拿文!
90年代中期嘅Liverpool雖然正處於一個非常低潮期……
但佢哋當時極為悅目嘅打法就深深吸引著我,仲令我成為利記球迷至今。
當年利記班Spice Boy……即係老麥、科拿、列納同占士等等……
佢哋全盛時期嗰陣真係好勁,可以話係各有千秋!
列納嘅打法冷靜,有領導能力,又擅於處理自由球!
而科拿就有神一樣嘅射手觸覺同射術!至於老麥就係少數擁有秀麗腳法嘅英倫球員!
佢可以一個人連續扭過幾個對方後衛……而且活動範圍又夠大,簡直就令人防不勝防!
至於我鐘意老麥嘅最大原因係乜?答案好簡單!
其實就係因為我覺得喺呢個世界上……
真係冇人可以好似佢咁扭住波嚟撥頭髮咁有型同咁瀟灑!
即係好似施丹咁!佢扭波係好勁呀!但佢就唔可以撥頭髮喇!哈哈哈哈~
當年,老麥用Bosman條約離開利記去做其6萬鎊周薪嘅皇馬後備……
佢當時呢個決定……真係傷咗唔少利迷嘅心(包括我)……
而自從老麥、科拿同列納都相繼離開利記之後……
除咗利記啲賽事之外,基本上我就已經好少睇波!
係有時如果老麥、科拿或者係列納效力隊波有比賽我先會睇下……
不過公平啲講,其實老麥去到皇馬都唔係一路冇正選嘅……
佢喺第一年都算係球隊主力嚟㗎!表現唔錯之餘仲入過唔少金球,又協助皇馬攞過兩次歐聯冠軍!
但係隨著費高、施丹同碧咸佢哋相繼加盟之後……老麥就正式開始其板凳生涯喇!
離開皇馬之後,老麥就加盟咗當時由奇雲·基瑾執教嘅曼城……
坦白講,老麥去到曼城之後嘅表現真係可以用一無是處嚟到形容!
佢每次落場無論係有波同冇波喺腳嗰陣都淨係識得手指指,簡直就一啲建樹都冇!
而最後佢亦都只係喺曼城踢咗一季就離開咗,之後就冇再落班喇!
喺今年,科拿回歸利記令到一眾利迷都驚喜萬分……
唔知老麥你又會唔會有機會……喂!妄想下都得啩?哈哈~
我最愛嘅球員,永遠都係你 - 麥馬拿文!
冇老麥,我唔會係利記球迷。冇老麥,我唔會係球迷。

25 則留言:

  1. hello,我都係利物浦+老麥+神既球迷 而家睇見占士出場都有懷緬下當時既日子架

    回覆刪除
  2. 我打親winning都用利記, 見親對面有麥馬拿文都忍唔著要踢到佢抬出場唯止.

    回覆刪除
  3. 諗返以前利記既青訓真係好好,但自隊長後,真係冇邊個青訓可以上到位。美羅,禾仔等最後都賣左走,希望史柏寧同達比有機會啦!

    回覆刪除
  4. 美羅射破Arsenal, one of my all time favourite goal!

    回覆刪除
  5. 好羡慕你可以見證利物浦好多野,雖然無緣睇麥馬拿文踢波,
    不過哩幾句:"無老麥,我唔會係利記球迷..無老麥,我唔會係球迷"
    我都有同樣的體會:就係無巴路士,我唔會係利記球迷,無巴路士,我唔會係球迷。
    就算世界足壇怎樣精彩,天才新星怎樣光芒四射,係心中始終留返一個位置,留意住佢,果個令我迷上足球的人!
     

    回覆刪除
  6. 鐘意麥馬拿文,都應該係資深球迷了
    94世界盃我都記得係要朝早睇波,係咪?因為美國時間嘛

    回覆刪除
  7. 麥馬拿文,一對膠水腳!當年佢活動範圍太大反而被人批評,不迎合當時英超.
    如果佢後生六年,今時今日眾人一定當佢神咁拜.
    現今英國球員中只係懂得攔截,遠射就大把球迷將他們捧為球星,可見英超球迷球員的水平同樣咁低!
    八十年代尾,老麥初出道的時侯,己是當年走下坡的利物浦救星.
    對方就算派兩個後衛嘜佢,一樣要俾佢舞龍咁舞, 照樣可以底線出波!
    當今英國球員中,有老麥級數的個人技術者已經絕種.

    回覆刪除
  8. 咁就支持咗利物浦十幾年,人生仲有幾多個十年……英超冠軍……

    回覆刪除
  9. 我最愛o既球員,永遠都會係你 - 麥馬拿文! 無老麥,我唔會係利記球迷 SAME

    回覆刪除
  10. 當時利記真 0既 打法 真係不怕輸幾多, 我都有辦法去入番甚至嬴番你. 科拿,老麥同列納呢班 SPICE BOY 個種不認輸0既心態先至最好睇

    回覆刪除
    回覆
    1. 相比起而家而家班波,嗰時真係熱血好多!

      刪除
  11. 狂小子, 早晨! 足球員小雲唔認識啊^^' ,謝謝分享!~

    回覆刪除
  12. 費高黎左之後麥馬拿文仲係正選黎架, 一個右一個左
    真正坐冷板係02-03球季

    回覆刪除
    回覆
    1. 半個正選啦!嗰陣仲有個沙維奧!哈~

      刪除
  13. 依!2007年8月25日的回應都見得番!真好!

    回覆刪除
    回覆
    1. 因為是我自己人手搬的!所以......@@.......

      刪除
  14. 荷蘭的表現,又的確令人常常失望。

    回覆刪除
  15. ...∧_∧
    (。・ω・。)つ━★・*。
    ⊂   ノ    ☆・゜+.
     しーJ   °。+ *´¨)
              ೋ☾*´¨) ¸.·*¨)
               (¸.·´ (¸.· * ☼。☾.﹒☁。中秋節快樂♦・゚★

    回覆刪除
  16. 老麥加盟流浪? 痴線咩!
    麥記少年成名, 係皇馬名利雙收, 其他幾條煙到步後, 開開心心係場邊睇波.
    三十頭已經去曼城掘埋最後一筒金, 早早退休了, 點去仲拋個身出嚟撈呢?

    回覆刪除