2006年12月14日星期四

我最愛的球員,始終都是你 - 麥馬拿文

最近有唔少傳言話麥馬拿文可能會來港獻技,仲會強勢加盟流浪,
我覺得前段令人雀躍,後段則令人發笑,哈哈又點會呀?講笑咩大佬!
當然我近排工作都幾忙,即使佢嚟咗我諗我都應該唔會抽到身去捧佢場,
但係聽到呢個消息,內心仍然會有一種興奮嘅感覺,好想親身去睇睇佢。
查實講真呀~早幾年皇馬訪港老麥就已經嚟過啦!
但可能當時實在有太多球星睇,而老麥又冇落場踢,所以先會畀人忽略咗啫!
哈~講開又講,唔經唔覺老麥原來都三十有四,
我記得我首次接觸嘅足球賽事係94年嘅World Cup,
而我第一隊追捧嘅球隊,就係十上十落嘅橙色兵團Holland,
然後當Holland八強不幸畀Brazil踢咗出局,咁我咪唯有寄望Italy可以幫我隊愛隊報仇囉!
只可惜最後……唉~R.Baggio嗰球十二碼,到今時今日,依然係記憶猶新。
不過,如果要追溯到本人真正迷上睇波嘅嗰個階段,咁有一位球員就一定不可不提!
佢就係今篇Blog嘅主人翁,亦都係Liverpool永遠嘅7號仔 - 麥馬拿文。
90年代中期嘅Liverpool雖然正處於一個非常低潮期,
但佢哋極為悅目嘅打法就深深吸引著我,仲令我成為利物浦球迷至今。
當年利記班Spice Boy,即係老麥、科拿、列納同占士等等……
佢哋全盛時期嗰時真係好勁,可以話係各有千秋!
列納嘅打法冷靜,有領導能力,又擅於處理自由球,
而科拿就具有神一樣嘅射手觸覺同把握力,至於老麥就係少數擁有秀麗腳法嘅英倫球員,
佢可以一個人連續扭過幾個對方後衛,而且活動範圍又夠大,分分鐘都令人防不勝防。
咁我鍾意老麥嘅最大原因係乜?
答案好簡單!因為喺呢個世界上……
真係冇人可以好似佢咁扭住波嚟撥頭髮咁有型同咁瀟灑,
就以球王施丹做例,佢扭波係好勁呀!但就慘在冇髮可撥!XDXDXD~
喺1999年,老麥用Bosman條約離開利物浦去做其6萬鎊周薪嘅皇馬後備,
佢呢個無情嘅決定,確實係傷咗唔少利迷嘅心(包括我),
而自從三大辣仔老麥、科拿同列納先後撤離晏菲路,
基本上我大部分時間就只會focus喺利記啲賽事度,
係有時老麥、科拿或者係列納效力隊波有比賽我先會睇下。
公平啲講,其實老麥去到皇馬都唔係一路冇正選嘅,佢喺第一年都算係球隊主力嚟㗎!
表現唔錯之餘仲入過唔少金球,又協助皇馬攞過兩次歐聯冠軍,
但隨著費高、施丹同碧咸呢三條煙相繼加盟,老麥就正式開始其板凳生涯。
從銀河戰艦降落地面冇耐,老麥就加盟咗由奇雲·基瑾執教嘅曼城,
坦白講,老麥喺曼城嘅表現絕對可以用一無是處嚟到形容,
佢每次落場無論係有波定冇波喺腳都淨係識得手指指,簡直就一啲建樹都冇!
而最終佢亦都只係喺曼城踢咗一季,之後就冇再落班喇
回顧老麥15年嘅足球生涯,我認為除咗伊雲斯同雲拿保斯之外,
就冇幾多位領隊識得點樣善用佢嘅長處,
有返咁上下波齡嘅球迷應該都知道,老麥嘅最佳位置從來都係中場自由人,
夾硬將佢放喺兩邊打翼根本就完全發揮唔到佢嘅優點,
對於麥記嘅遭遇,我只能夠輕嘆一句生不逢時,
我相信若然佢唔係生喺英格蘭同埋撞正獌狗盛世嘅話,佢嘅成就肯定不至於此。

喺今年,科拿回歸利物浦令到一眾利迷驚喜萬分,
唔知老麥你又會唔會有機會……喂!妄想下都得啩?哈哈~
我最愛嘅球員,永遠都係你 - 麥馬拿文!
冇老麥,我唔會係利記球迷。冇老麥,我唔會係球迷。

25 則留言:

  1. hello,我都係利物浦+老麥+神既球迷 而家睇見占士出場都有懷緬下當時既日子架

    回覆刪除
  2. 我打親winning都用利記, 見親對面有麥馬拿文都忍唔著要踢到佢抬出場唯止.

    回覆刪除
  3. 諗返以前利記既青訓真係好好,但自隊長後,真係冇邊個青訓可以上到位。美羅,禾仔等最後都賣左走,希望史柏寧同達比有機會啦!

    回覆刪除
  4. 美羅射破Arsenal, one of my all time favourite goal!

    回覆刪除
  5. 好羡慕你可以見證利物浦好多野,雖然無緣睇麥馬拿文踢波,
    不過哩幾句:"無老麥,我唔會係利記球迷..無老麥,我唔會係球迷"
    我都有同樣的體會:就係無巴路士,我唔會係利記球迷,無巴路士,我唔會係球迷。
    就算世界足壇怎樣精彩,天才新星怎樣光芒四射,係心中始終留返一個位置,留意住佢,果個令我迷上足球的人!
     

    回覆刪除
  6. 鐘意麥馬拿文,都應該係資深球迷了
    94世界盃我都記得係要朝早睇波,係咪?因為美國時間嘛

    回覆刪除
  7. 麥馬拿文,一對膠水腳!當年佢活動範圍太大反而被人批評,不迎合當時英超.
    如果佢後生六年,今時今日眾人一定當佢神咁拜.
    現今英國球員中只係懂得攔截,遠射就大把球迷將他們捧為球星,可見英超球迷球員的水平同樣咁低!
    八十年代尾,老麥初出道的時侯,己是當年走下坡的利物浦救星.
    對方就算派兩個後衛嘜佢,一樣要俾佢舞龍咁舞, 照樣可以底線出波!
    當今英國球員中,有老麥級數的個人技術者已經絕種.

    回覆刪除
  8. 咁就支持咗利物浦十幾年,人生仲有幾多個十年……英超冠軍……

    回覆刪除
  9. 我最愛o既球員,永遠都會係你 - 麥馬拿文! 無老麥,我唔會係利記球迷 SAME

    回覆刪除
  10. 當時利記真 0既 打法 真係不怕輸幾多, 我都有辦法去入番甚至嬴番你. 科拿,老麥同列納呢班 SPICE BOY 個種不認輸0既心態先至最好睇

    回覆刪除
    回覆
    1. 相比起而家而家班波,嗰時真係熱血好多!

      刪除
  11. 狂小子, 早晨! 足球員小雲唔認識啊^^' ,謝謝分享!~

    回覆刪除
  12. 費高黎左之後麥馬拿文仲係正選黎架, 一個右一個左
    真正坐冷板係02-03球季

    回覆刪除
  13. 依!2007年8月25日的回應都見得番!真好!

    回覆刪除
  14. 荷蘭的表現,又的確令人常常失望。

    回覆刪除
  15. ...∧_∧
    (。・ω・。)つ━★・*。
    ⊂   ノ    ☆・゜+.
     しーJ   °。+ *´¨)
              ೋ☾*´¨) ¸.·*¨)
               (¸.·´ (¸.· * ☼。☾.﹒☁。中秋節快樂♦・゚★

    回覆刪除
  16. 老麥加盟流浪? 痴線咩!
    麥記少年成名, 係皇馬名利雙收, 其他幾條煙到步後, 開開心心係場邊睇波.
    三十頭已經去曼城掘埋最後一筒金, 早早退休了, 點去仲拋個身出嚟撈呢?

    回覆刪除