《刁蠻為食公主Indie姐 的 快樂堡壘》

喵～各位哥哥姐姐好，我個名叫做Indie，現年3歲半，係一隻出晒名好食懶飛又刁蠻任性嘅貓界小肥婆，眨吓眼已經嚟咗呢個新屋企差唔多有三個月，暫時感覺十分良好，搞到小妹都當堂脹咗幾個碼～

記得當日初嚟甫到人生路不熟，嚇到我捐窿捐罅四圍騰又係咁作嘔，每晚都要搵個冇人見到嘅地方先至瞓得安落，卒之咪搞出個大頭佛囉！畀兩位極度愚蠢嘅人類誤以為本小姐喺廚房某個暗角位自掘墳墓仲瓜埋老襯，然後幾經辛苦將我救返出嚟，又要立刻嘗試用各種唔同嘅方法去安撫阿姐脆弱嘅心靈，幸好經過奴才A連日嚟嘅悉心照顧，我就總算漸漸適應到新居嘅生活。

奴才A對此表示：可能係曾經遭受惡意遺棄同埋畀人捉過去繁殖場嘅關係，Indie個款睇落好似長期都保持住一副厭世mode咁，所以一接佢入屋，我首先要做嘅，就係盡量令個衰妹有返啲安全感，跟手搵個裝修師傅封死晒屋企每一個狹窄嘅罅位，慎防意外再生。

除此之外，裝好全屋嘅窗網，當然亦都係每位貓奴必須要做嘅指定動作。

Hi～Darling～請將個頭擰過嚟呢邊～呆望我～上半身～下半身～來問聲～今晚我靚唔靚？

天靈靈～地靈靈～南無阿彌陀佛～媽哩媽哩空～奴才A唔該嗱嗱臨走去廚房開個罐罐畀我做早餐～

罐罐～罐罐～罐罐～罐罐～罐罐～罐罐罐罐～罐罐～

傻佬～你講緊咩嘢喵星話呀？家陣當阿姐係香港啲高官咩？我識聽人話㗎！

相處咗接近一個月，我發現原來Indie嘅適應能力係超強，而且又聽得明大部分嘅地球語言，仲唔會立亂搲／咬爛人啲嘢𠻹！唯一比較惡搞嘅呢～都莫過於係佢嗰種無定向喪心病狂嘅飄忽性格。

個牛王妹嚟咗唔夠七日就分別喺自己個竇口同老媽子張床送咗幾堆“黃金”我哋嘆，神出鬼沒、快如閃電嘅急速步伐令人難以捉摸，望住佢先天無辜嘅負極眼神，真係唔知好嬲定好笑。

總之凡係受佢大小姐“寵幸”嘅範圍，你班奴才就唔使旨意喺嗰度逗留多兩步，特別係客廳同兩間房嘅風扇位置，理由係乜？相信任你點諗都諗唔到，有隻傻貓居然會將嚿硬如石頭嘅風扇面板當係枕頭咁用，簡直係聞所未聞呢！

鑑於以上嘅原因，我同阿媽去到半夜經常都會忽然熱醒，跟住用力睜開雙眼一睇⋯⋯咦～乜又係妳呀Indie姐！

喂～快啲起身呀！夠鐘鏟屎喇！個屎兜好污糟呀喂！

點呀～你而家係咪對娘娘有咩唔滿意？信唔信我即刻化身做菲利大王懲罰你！

收到！清楚！明白！了解！不過靚女⋯⋯可唔可以畀我屙埋督屎先呀？

唉～妳個死懶鬼連玩都玩得hea過人，認真係冇妳收！

嗱～阿貓～老老實實，到底妳係貓扮狗定狗扮貓？好從實招來喇喎！

咳咳～實不相瞞，其實我真正身份，係一隻假扮狸貓嘅貓頭鷹。

簡單嚟講，Indie絕對係一隻非一般嘅異短，佢頭腦精明兼且精力充沛，但玩起上嚟往往就只得三分鐘熱度，有時候撞啱個人唔夠瞓你都咪話唔頭痕！

嗚嗚～咁你家吓即係嫌棄本公主啦衰公！喺最近，幫我起名嘅KoKo姐仲成日笑我啲表情似足個綠茶婊，呢兩兜友竟膽敢輪住嚟蝦大家最愛嘅Indie妹豬，實在係太過份喇！麻煩各Blog友紛紛入嚟留言幫手平反吓！好冇？喵～

正所謂天地有正氣，你哋一個二個衰到痺，講到尾都係靚姑姑最好心地！

嚟嚟嚟～等我同妳打個手印，擊掌為誓，從今以後做對無所不談嘅好姊妹！Come On～Give Me Five！Meow～

嘩～又特登買咗一大堆零食嚟供奉我，超滿足！勁開心！姑姑萬歲萬歲萬萬歲！

嗯嗯～見妳咁有我心，就批准妳攬一陣啦！一陣好喇！

喺呢度，都順便分享吓Indie平日係食開啲乜嘢，乾糧方面，左上角嗰包雖然標榜能夠預防牙石形成，但實則係冇乜作用，我只係見大小姐日日食過唔停先一路keep住入貨；右上角嗰包對改善敏感腸胃功效顯著，非常適合異短食用；而下面包凍乾係Indie最鍾意嘅口立濕，聞落去陣味勁似豬肉鬆。

至於罐罐呢～Indie把口都唔算好揀擇嘅，即使係啲平平哋嘅普通牌子，佢都照樣食得津津有味，完全冇詐過型。

唔只係日常嘅乾糧、濕糧，定期幫主子梳毛／排毛同樣係好重要㗎！同時亦要多多注意佢哋嘅牙齒健康。

妖～講咁多廢話做咩呀喵～仲唔死去努力搵錢買啲罐罐同玩具返嚟畀本宮？

知道！遵命！奴才馬上去辦！一於掃佢老味清佢倉！

年紀輕輕就不幸被當成繁殖工具，可想而知當中嘅經歷係有幾慘痛，喺上個月11號，我帶Indie去咗新港城一間評價唔錯嘅獸醫診所度檢查身體，仲book咗9月18號 (即係聽日) 幫佢做絕育手術，衷心希望到時一切都順順利利、平平安安，等Indie可以重獲新生，繼而過返一啲正常嘅日子。

同場加映：二傻柏盛 的 法式生日大餐

10號嗰日應老友盛哥要求嚟到位於The ONE 4樓嘅法式小店Odelice!幫佢補祝生日，坦白講平時真係好少食法國菜，但既然壽星公開到聲，作為三傻老大嘅我就當然要奉陪到底啦！

當日我哋揀咗一個Bistrot Set For 2 ($788)，另加4隻法國生蠔 ($145)，整體水準算係不過不失。

是日餐湯兩客，服務員介紹個湯係用青豆、忌廉淆成，飲落味道幾香濃。

主廚拼盤內有煙三文魚、意大利火腿、炸黑松露蘑菇球、奇異果醬、雞蛋沙律、燒茄子同酸種麵包，份量好足夠飽肚。

主菜(一)：馬賽龍蝦海鮮鍋，龍蝦肉質偏榎，盲曹魚口感偏鹹；青口、大蜆鮮味十足，值得一讚！個人建議將啲小八爪魚加埋蔬菜汁放喺塊脆卜卜嘅烘焙麵包上面一齊食，包你垂涎三尺、回味無窮。

主菜(二)：脆皮燒豬腩，總共有4件，食落個feel麻麻，遠遠唔及廣式燒肉咁吸引。

呢碟火焰橙酒可麗餅配雲呢拿雪糕又甜又鹹又苦，簡直係難食到唔撚識形容，可謂伏中之伏！

再一次證明啲懶高檔嘅法國菜始終係唔太啱我，不如得閒搵班兄弟打吓邊爐好過！約咗好耐先搞得成嘅「916咪走雞火鍋聚會」，難得集齊6大滾友，唔傾到口乾又點會捨得起身走？