2022年8月15日星期一

奔向未來日子

無謂問我~今天的事~無謂去知~不要問意義~有意義~無意義~怎麼定判~不想~不記~不知~
無謂問我~一生的事~誰願意講~失落往事~有情~無情~不要問我~不理會~不追悔~不解釋意思~
無淚無語~心中鮮血傾出不願你知~一心一意奔向那未來日子~我以後陪你尋覓好故事~
再一次感謝喺今年請過我食生日飯嘅所有兄弟姊妹,特別係姑姑悉心為我安排嘅神秘驚喜。
能夠搵到一個入得廚房,出得廳堂,唔介意個個禮拜同你捱濕鳩米線、雲吞麵、田雞粥,兼且仲識得修補皮帶、整理門鎖嘅絕種好女人確實係我幾世修來嘅福份,如果有來生,我依然好想同呢位上天派嚟嘅命運救星緊緊扣住,永不分離,直至海枯石爛。
歲月無聲消逝,唔經唔覺就攜手走入第19個年頭,希望喺未來嘅每一年,我哋都會開開心心咁陪喺對方身邊慶祝生日。
另外,仲要預先約定手拖手一齊去戲院睇晒每一套蠟筆小新嘅劇場版電影⋯⋯
其實,無論身處邊度慶祝,只要有您喺旁邊就足夠,其他通通冇所謂。
哈~哈~什麼都不必說~華Dee,我嘅天字第一號老友,每年生日落得最重本嘅必定係你,嚟到呢一年亦唔例外,一句:「錢唔係問題,最緊要係大哥高興!」沿用到今時今日,仍然落地有聲。
嘩~就連飯後甜品都包埋,呢種老死
真係太監騎馬,冇卵得頂!
柏盛哥,光陰一轉眼,從小學keep到而家嘅真心知己就只係得返你一個咋!事隔一年再次光臨蠔站,冇諗過呢度嘅食物同服務質素都大不如前⋯⋯不過唔緊要~話咁快就輪到吹雪兄你牛一,過多幾日,不如就等我風流盲俠花滿樓搵個地方,然後再食返餐好嘅補數啦!
基於某啲原因而唔願意透露姓名嘅一位長輩朋友,好懷念幾年前同你喺京都盡情吃喝玩樂嘅美好日子,唔知幾時先可以重溫舊夢呢?
鋒,多謝你千里迢迢過嚟沙田拎DCP都不忘請二哥飲返杯嘢,你呢個三弟都算唔話得囉!
你以為你周圍匿就搵你唔到咩?冇用㗎!你有班咁出色嘅死黨,無論喺咩地方,都好似漆黑中嘅螢火蟲一樣咁照實你,由7月頭一路慶祝到8月中,期間食盡多款唔同類型嘅美食,所以俗語有話「出外靠朋友」的確係冇講錯嘅!
出外就靠朋友,在家就靠老母,話之你外面嘅誘惑有幾大,由老媽子親自炮製嘅星級住家私房菜,就幾時都係最高質!
登登登登~又嚟到一年一度嘅Birthday Boxing Day時間!喺2022年,一大班老死就一如以往咁錫小弟,個個都出錢又出力,簡直係窩心到暈!
講到最窩心,就梗係要close up一吓由姑姑送嘅呢一隻生於7月4號嘅得意豬豬啦!
話說有個friend知道我之前嗰隻乖乖女藍髮版蘭芝figure跌咗落床下底搵唔返,於是就即刻喺Carousell買夠一set畀我,仲搭多隻悟飯老母㖭!
就算係過咗咁多年,我始終都係覺得,打斯路嗰陣嘅超二悟飯係全宇宙最型嘅,不服來辯!
睇住電視嘆杯啤,閒時扮吓動感超人,十分融洽嘅野原一家,原來快樂就係咁簡單。
生日賀禮分享完畢,都係時候要孖小龍女返花叢修練玉女心經⋯⋯
除咗每一餐令人垂涎欲滴嘅生日大餐同每一份深得我心嘅慶生厚禮之外,每一位好友送上嘅祝福字句,我同樣都係咁珍而重之。
數數手指,喺左上角嘅呢一個“唱K大聯盟”組合都已經有超過五年冇埋班出動喇!太興嘅男人心一字馬、Candy嘅PLAY我呸、Sandy嘅手下敗將,呢堆昔日必點嘅至尊飲歌,都深深印咗喺我嘅腦海入面⋯⋯
炫友們,真的好想好想~好想好想~好想好想飛到台北去~一同開心歌唱~一起唱到天亮~讓每一個音符都串連成~我們最美麗~最美麗的回憶~
一班Yahoo年代嘅老Blog友,仲有我踏出社會工作嘅第一個師傅平哥,Thank you everyone!
Jody,多得妳喺呢十幾年嚟嘅開解同鼓勵,我同姑姑嘅感情先至可以越來越好,我嘅NO.1好姊妹,無言感激,盡在心中。
Erica、婷、琳,失聯咗廿幾年嘅舊相識,感覺既熟悉又陌生,喺6月畀情緒病折磨得最痛苦嗰時,我突然心血來潮一次過quit咗十幾個group,當中就包括上面呢一個。


好老實講,喺現階段,我真係好怕再接觸任何新嘅圈子,理由係⋯⋯經歷過無數次畀親人、朋友、同事背叛 + 出賣 + 欺騙嘅經驗之後,我經已冇辦法接受多一次傷害,呢份難以啟齒嘅陰影甚至嚴重影響我自身嘅人際關係,總之唔知由幾時開始,只要偶然遇上一啲溫馨洋溢嘅場合,或者係見到有人企圖向我釋出善意同關懷嘅時候,我就會馬上想搵個窿捐入去,尤其係近呢一兩年,我心裡面嗰隻長到插死人嘅牛角尖仲越鑽越深⋯⋯


你唱首歌我接一首~心裡像燒著營火有種溫暖的輕鬆~看我們這幾個熬得苦悶得久~還是能一個一個都出了頭~不說假話才是朋友~當我最消沉墮落是你罵醒我的錯~你對我的信心比我自己還足夠~你讓我沒有理由不向前走~

最真心最窩心總是陳年的老友~世界再冷好友讓人暖得不怕風~越知心越交心擠在一個夢裡頭~渴望一起擁有快樂有成就~
本以為quit完閃人再縮埋一二角咪一了百了囉!點知有幾位愛心爆棚嘅哥哥姐姐居然就不分晝夜打鑼打鼓咁搵我,其中喺中學年代認識嘅兩位舊同學,仲有心到專誠幫我搞咗個小型生日party,當見到一班好耐冇見嘅老朋友陸陸續續因為我而畀面出席,一陣莫名嘅感動隨即湧上心頭。
話畀你哋知我以前係點樣結交朋友同保護親人嘅!你無家可歸?唔緊要!咪過嚟我度住到你搵到個竇口為止囉!你冇錢開飯?快啲埋嚟~等大佬包你一日三餐茶煙飯!你溝條女溝咗十幾年都溝唔到?我立刻發散晒班兄弟幫你摷佢電話,再楝篤企喺路中心擋住架巴士等你埋去表白!上葵涌醫院精神科接冇人認領嘅家人返屋企?唔使騰!No problem!萬大事有我!喺婚宴度有老襟想上台搞事?我幫你隊冧佢!大不了咪頂酒頂到腸穿肚爛!瞓電燈柱咋嘛~使乜驚呀?而到最後,呢班我曾經搏埋條老命去撐嘅人,偏偏就係hurt得我最甘同拮得我最入嘅~至於坐喺我眼前嘅呢幾條傻佬,雖然冇一個係我用條命換返嚟,但佢哋就一直喺背後默默支撐同守護住我,有時世事往往就係咁玄妙同諷刺。
記得喺公司同我最熟嘅一個同事成日都會用半安慰嘅語氣同我講:「屌~你本身都慣咗做呢類角色㗎啦!乜仲有嘢好驚嘅咩?」咦~諗諗吓又係喎~都成39歲人,仲顧忌咁多嚟托麼~學我嘅VIP金卡Blog友毛毛話齋,你唔好越老越王傑先得㗎!為咗嗰堆忘恩負義嘅冚家祥,竟然就諗到要放棄晒成班真心對待你嘅知己良朋?喂~你做人有冇再荒謬啲呀?正宗係柒撚懵懵食甜筒,戇撚鳩鳩玩賓周!你老哥鍾意潛水啫~都唔需要吓吓玩到缺氧先肯收手㗎?
身為男人必定要講得出做得到!終於,喺生日嘅前幾日,我就下定決心要鑿開個龜殼伸返個頭出嚟唞唞氣,後來仲兌現承諾搵返好多位“失散N年”嘅舊友。講起上嚟,自從第一波疫情爆發,我都有成三年冇見過姑姑飛咗去台中讀書嘅姪仔,同埋長期喺澳門做嘢嘅三哥,眨吓眼就快到8月尾,到時佢兩個又要重返崗位繼續努力奮鬥,你話一個咁難得嘅放題聚會,我又點可以甩底缺席呢?
有日去紅磡廣場二樓探一位相熟嘅二手唱片店老闆,喺吹水吹到口沫橫飛嘅中途突然殺出一個廿歲出頭嘅妹妹仔加入戰團,我哋三兜友從Mirror傾到Twins,從KinKi Kids傾到SMAP,再由Serrini傾到The Pancakes,中間仲有提到My Little Airport喺三年前用原詞重編LMF嘅舊作今宵多珍重,就咁樣由15:00傾到18:30,足足吹咗三個幾鐘先肯畀老闆收舖離場!哈哈~
咇~奶奶奶奶奶奶~奶奶奶奶奶奶~奶奶奶奶奶奶奶奶~老闆私人贈送嘅絕版舊CD,一幕幕封塵已久嘅童年回憶即時返晒嚟呀喂!
唔走返去紅磡都唔知位於黃埔街22號嘅川越米線大王已經執咗笠幾年,嗚嗚~一諗起以後冇得再食我至愛嘅麻辣魚蛋 + 腩肉 + 爽肚 + 蘿蔔配紅薯粉,我就忍唔住要大叫一聲:「仆你個街冇陰功呀~呀~呀~」
慘被暗殺嘅日本前首相安倍晉三、曾出演經典驚慄片《危情十日》以及兩集《教父》嘅美國老牌影星James Caan、喺70、80年代紅遍全球嘅著名澳洲歌影紅星Olivia Newton-John,距離上一篇Blog發表至今,已有三位世界名人先後離世,人生變幻無常,大家一定要好好珍惜眼前所擁有嘅一切,千祈唔好等到失去咗先嚟後悔。
綜合幾個治療方案加上自己所付出嘅汗水同毅力,目前我嘅皮膚狀況大致上都好返六至七成,睇到呢種持續穩定嘅跡象,我嘅心情非常平靜,並冇太大喜悅,亦唔會排除啲牛牛同濕疹會有隨時復發嘅可能,喺另一方面,我又要處理一堆因病而起嘅後遺症,例如係暴肥、關節炎、甩頭髮、面部紅腫同間歇性呼吸困難等問題,加加埋埋都咪話唔頭痕!
新一年嘅生日願望?首先最重要嘅當然係我、姑姑、老母、老豆同身邊嘅家人朋友個個都身體健康,萬事順利,其次就係衷心祝願我嘅愛隊利記喺嚟緊嘅賽事入面能夠一路長贏長有,大開殺戒,實行一洗邪牌社區盾嘅衰氣!好~今次就寫住咁多先,各位Blog友,我哋下次見!Bye~

185 則留言:

  1. 祝你和姑姑天長地久,感情永固!❤️

    回覆刪除
  2. 如果未來日子都係咁食同玩真係唔錯 :P

    回覆刪除
  3. 乜嘢都假,總之迪哥開心就得!居然連安倍晉三嘅公仔都有?勁!

    回覆刪除
    回覆
    1. 冇記錯係兩年前喺深水埗某間玩具店度買,好似48蚊個,仲有買埋偉大嘅祖國主席雜近平。😊

      刪除
    2. 我歌頌佢歌頌到要擺佢隻figure喺屋企,咁都有罪?😚

      刪除
  4. 有咁多老死、長情姑姑係身邊支持,加油

    回覆刪除
  5. 電影都有講:一世人流流長,總會遇上好多人渣嘅。
    經驗之談,你對佢赴湯蹈火嘅人通常越覺得你老奉,久而久之咪會唔當你係嘢。自己友,要記住你有你上面所提到嘅嗰班兄弟姊妹已經贏曬,啲仆街就唔使再諗唔使再理,由得佢哋自生自滅已經OK!

    You really never walk alone!💪

    敢愛敢做Karaoke challenge<勁,癲,喪,高音,堅係掂呀你!

    回覆刪除
    回覆
    1. 39歲先開始慢慢領悟貝加兄你上面所寫嘅呢個道理,係咪太遲?😬

      刪除
    2. 絕對唔遲,有好多人去到七老八十都仲未打開個心結

      刪除
    3. 仲未完全打開,持續學習中……🧑🏻‍🏫

      刪除
  6. 波經時間:睇住49000俾隻蜜蜂針咗四個窿竟然完全笑唔出,因為自己隊波望落都千瘡百孔、傷兵滿營,加上鏝簽咗布歐之後又越嚟越屈機,而家就連阿仙奴都有耶穌降臨幫拖,今季要喺英超爭標真係難上加難,所以話嚟緊主場對水晶宮絕對係關鍵。

    回覆刪除
    回覆
    1. 又和一場,保持不敗,yeah!認真,而家隊波中場年紀老,後生嗰班未接到班, 啲人一傷後備就兵源唔夠。上季踢得咁好,唔多唔少係因為後備力量足夠,加上matip少傷,前面嗰幾個喺上季季尾已經睇到腳風唔順,估唔到一路延續到今季,所以嚟緊都係平常心啦~喺現階段我真係有少少感覺到高普最後一屆教多蒙特嗰個feel。😅

      刪除
    2. 真係睇到心酸,今日仲要見到基達話踢得唔開心想出走嘅新聞,真係睇到火都嚟!自己多傷又踢得唔好仲咁多怨言?唔該快撚啲走啦!好行夾唔送呀!

      刪除
    3. 你哋人哋49000就算成績幾折墮都會繼續科好多水執隊波,F$G?如果今鋪咁都唔買中場嘅話,就唔該放手畀其他集團搞啦 !🥲

      刪除
    4. 精壇嗰邊大把股東撐FSG,仆街,呢幾年乜嘢獎盃都攞曬,就連邪牌盾都攞埋,最後竟然淨係課得嗰五百萬英鎊?佢鹵味,真係吊出聲

      刪除
    5. 而家傳緊買巴塞個迪莊,我覺得都係鳩吹居多,冇見過F$G有一季嘅淨支出超過二千萬英磅。😈

      刪除
    6. 算吧啦FSG!連森林班主都肯洗一大筆,佢仲想玩限米煮熟飯?白白浪費咗呢幾年高普一手建立嘅嘢,唔該快啲get out啦!

      刪除
  7. 隻豬豬同雷鳥bb拍埋一齊又幾襯wor!🤭

    回覆刪除
    回覆
    1. 隻雷鳥bb落去個樣真係好蠢好傻好呆好可愛……🤣🤣

      刪除
    2. 係連隻豬拍埋去都醒目過佢……🤣🐷

      刪除
    3. 人哋都唔知幾聰明,邊好似你豬咁蠢!😝

      刪除
    4. 我IQ、EQ一齊拎負滿分呢個公開秘密通行都知㗎啦!🤭

      刪除
  8. 祝你:生日快樂!身體健康!心想事成!

    回覆刪除
  9. “間歇性呼吸困難” ,千祈咪飲酒同食辣嘢喎。祝安好 !

    回覆刪除
    回覆
    1. 多謝阿姨祝福同關心,畢竟每個人個敏感地帶同埋致命點各有不同,我自己嘅頭號殺手就係咖啡同朱古力,近年掂親就會皮膚痕+呼吸困難,但唔知點解喺台灣同日本做同一樣嘢就一啲事都冇……🤣

      至於酒同辣嘢還好,適可而止就ok。🤔🍻

      刪除
  10. 你睇,仲有大把人撐你架,加油呀阿喬。

    回覆刪除
  11. 生日快樂~~
    食物質素雖然重要, 但係同咩野人一齊食仲緊要, 如果要你同個唔啱傾嘅人食法國大餐三粒鐘, 你都會想C
    如果啱傾, 就算坐老麥, 都一樣開心呀, 朋友

    回覆刪除
  12. 今朝有酒今朝醉,你的人緣一定好好,咁多朋友和你慶生,生日快樂﹗

    回覆刪除
  13. 生日快樂!健健康康,心想事成!
    你就好喇,仲有咁多知心朋友,同埋姑姑&老媽子幚你慶生!所以要開開心心!

    回覆刪除
  14. “經歷過無數次畀親人、朋友、同事背叛 + 出賣 + 欺騙嘅經驗之後,我經已冇辦法接受多一次傷害…” 再加上身體痛苦的狀況……..
    你是否相信一句說話 : “上天取走了你認為寶貴的東西,也一定會再給予你更寶貴的東西。” ?!
    開心睇到你的熱鬧生日慶祝,良朋共歡,愛侶在伴…..
    在艱辛的日子,願無盡的祝福圍繞你 ^.^

    回覆刪除
  15. James Caan係個好優秀嘅老戲骨,Olivia Newton-John 七十幾歲走其實算早,安倍更加係令人意外,好難想像再會有政要畀人暗殺...

    回覆刪除
    回覆
    1. Btw,標題起得好,加油啊。

      刪除
    2. 像Olivia Newton-John這類天然無雜質的知性金髮美女偶像,還看現在已經是賣少見少。👩🏼‍💼

      刪除
  16. 恭喜找到合適療法,再一次祝你生日快樂。
    你有這班好朋友及好女友,或許是你當年早種下的因。

    回覆刪除
    回覆
    1. 世事難料,但求做好自己,並且無愧於心就好。😊

      刪除
  17. 明天會更好,加油啊💪
    The Pancakes,My Little Airport咁啱我有聽過,因為我阿仔好似中學已經聽佢哋。

    回覆刪除
    回覆
    1. 多謝EE姨,其實我唔係太鍾意以上呢兩個單位嘅演繹方式。😅🤣

      刪除
  18. 你有邊個男仔friend個喉嚨仲未俾你用林子祥d歌摧殘過??😂

    回覆刪除
    回覆
    1. 個個都有~~就連我哋女仔想同你jam歌都要俾你拉高個key!!!😒😡😵

      刪除
    2. 正宗係聲大大,冇貨賣……📣

      刪除
  19. 無數個生日飯,正呀~ 補祝一句生日快樂,記住你身邊有姑姑啦,唔好再諗咁多負面野,你唔開心,姑姑就唔開心,所以要開開心心。

    回覆刪除
  20. 近日看到台灣藝人艾成輕生的新聞,心裡很不是滋味,很明白情緒病人的痛苦,希望您加油,閒時多寫文章發洩不打緊,大家一定會支持您的。

    回覆刪除
    回覆
    1. 諗返以前睇【超級偶像】仲成日見到佢開開心心跳舞唱歌,真係十年人事幾番新,世事無常。😔

      刪除
    2. 超偶當中只有艾怡良算混得好,其餘都是浮沈星海,及後更在一年內走了兩個冠軍,還巧合都是40歲便離開人世。第一屆冠軍張芸京本來起點很高,又是因為各種原因停滯不前,真是時也命也。

      刪除
    3. https://youtu.be/gbzPdEODxr4
      睇返呢段片真係好感慨,我諗呢段時間應該係艾成人生最開心嘅時候。😔

      刪除
    4. 一切止於遇上王瞳之後,還有那個該死的馬俊麟!

      刪除
    5. 啲餐廳倒閉個傷害應該大啲,佢老婆件事都幾年前,我諗艾成娶得王瞳,應該一早釋懷咗。😇

      刪除
  21. 生命中能找到對的另一半,已算幸運........何況姑姑仲識做咁多嘢,起碼餐飯都了不起啦!!!!!

    回覆刪除
    回覆
    1. 越見得多身邊朋友嘅例子,越覺得自己萬分幸運。🙏🏻

      刪除
  22. 有好多美食啊!十分吸引( o˘◡˘o) ┌iii┐

    回覆刪除
  23. Happy 牛一呀痴線佬🤦🏼‍♀️
    有個對你又真又好嘅人一定要珍惜同感恩,唔好理所當然更加唔好良心當狗肺.
    傷害自己嘅人一律遠離.

    回覆刪除
  24. 生日快樂!祝你身體健康!
    芒果西米露我也要嘗一嘗。

    回覆刪除
  25. 狂小子, my belated ╠╣ḁℙℙẙ ❤️ Ḃ¡Ṙ†╠╣ḊḁẎ ❤️

    🐰 别管世事無常,莫問天意弄人, 生命的枯榮苦樂, 一切是那麽的自然 ❗️
    😀 珍惜眼前美景 ✨ 放空心靈 ❣️ 感恩擁有 💕 活在當下 🌟
    🐰 加 油 啊 💪💪💪

    回覆刪除
  26. 友情美食大曬冷,希望你繼續美滿落去,加油!一齊撑愛隊!!

    回覆刪除
    回覆
    1. 有預感下場會畀49000報仇成功……嗚嗚~🥲

      刪除
  27. 你平時對朋友家人好,係總會有一部分嘅人識得感恩圖報。。
    始終覺得呢d係你灑落嘅種子,所以大家先咁錫你。。。
    要加油啊。。每種因果自有天收,唔需要浪費心神於一班邪魔外道上。。。

    回覆刪除
  28. 屋企格局嘅海鮮餐好正呀,係咪就係姑姑煮架,好叻呀!祝你生日快樂!身體狀況可以早日穩定下來!朋友唔駛多,啱channel嘅就足夠!

    回覆刪除
    回覆
    1. 至尊星級私房菜乃係阿娘炮製的。🦐

      刪除
    2. 另外多謝妳嘅祝福,最後兩句非常啱聽!😌

      刪除
  29. 嚟緊龍珠超有套電影版係野比飯做主角㗎喎😆

    回覆刪除
    回覆
    1. 必看,已叫咗公司班後生仔通通讓路等阿叔嚟試片!😙

      刪除
  30. 珍惜眼前人,祝你倆執子之手 ,與子偕老

    回覆刪除
  31. 每次看你的facebook和blog沒有更新便會有點擔心,幸好其後你總是會出現寫些東西。有些人和事明白就好,無需太深究,反正你也改變不了他們的自私想法。

    回覆刪除
  32. 一直好羨慕你同琪琪果種細水長流嘅相處模式
    祝你哋有更多個19年,長伴到老,永不分離

    Jane
    20/8/2022

    回覆刪除
  33. 頭兩場聯賽的確令人失望,唔通社區盾真係咁邪?

    回覆刪除
    回覆
    1. 你睇下阿仙奴邪咗幾多年,今季先叫做暫時重回正軌咋!☠

      刪除
    2. 證明人哋班主有耐性又肯洗錢,畀著其他名牌球會,一早就炒咗阿迪達!!
      但令人更嬲嘅係,就算係好似曼聯之前咁玩恐慌式收購,點都好過我哋而家咁樣!!

      刪除
    3. 曼聯贏咗我哋都唔代表之後條路好行,今季估計仍然都係曼城嘅天下。😅

      刪除
  34. 睇你既blog, 恭喜你活得開心~~

    回覆刪除
  35. KinKi Kids正呀!~係我ge少女回憶!~
    兩個麻甩響二手唱片舖偶遇小妹妹,成個畫面好funny!~

    恭喜你終於搵到方法克制病情,希望你會繼續好落去,加油。🍊

    回覆刪除
    回覆
    1. 我時不時就會有呢種類似嘅經歷,試過喺台北某間二手唱片舖遇到一個滿頭藍髮皮膚白淨嘅新加坡女仔,又係同佢、老闆三個人吹咗成粒鐘,難為身邊嘅姑姑一路呆等……🤣

      刪除
    2. 你曳曳la!~響姑姑面前撩女仔...👊

      刪除
    3. 全程國語交談,佢都唔係好清楚我哋講緊乜。🤣

      刪除
  36. Olivia Newton-John噝油脂年代真係靚到揼一聲,到老咗都仲keep到陣韻味,相反肥尊老早就禿頭凸腩走下坡

    回覆刪除
    回覆
    1. 尊佬一向肥底,由細到大對佢嘅印象都係一個牛高馬大嘅man佬。😂

      刪除
    2. https://youtu.be/WvOWox2o5cU
      呢段真係經典,坦白講,以前真係唔知道Olivia Newton-John原來係咁唱得,細個一直都誤以為佢係類似香港周慧敏嗰種玉女明星,到後來先發現呢位靚姐並唔係虛有其表。😇

      刪除
    3. 周圍聞就算把啦!
      以前接客接到有性病,唔係點會甩唔到危疾?
      玉女?慾女就有佢份!

      刪除
    4. 都市傳聞唔肯定我就唔敢亂講,但我幾欣賞佢對貓嘅愛心。😄

      刪除
  37. KinKi Kids、SMAP都是名副其實不老的傳說,懷念以前給日本樂壇徹底攻陷的香江。

    回覆刪除
    回覆
    1. 寒流襲港後,已經徹底顛覆女人對男人嘅審美定義,唯獨對醜的標準就從來都沒有改變過。 (本人十分了解😌)

      刪除
  38. 我都鍾意睇小新同唱K,雖然冇以前咁熱愛了~

    btw,我收到你電郵既留言,不過顯示唔到喺blog,之前我亦去唔到其他blog留言,可能setting出咗問題

    回覆刪除
    回覆
    1. 往設定的垃圾桶“留言”一欄復原“垃圾留言”便ok,我發現我先前留給幾位Blog友的留言亦常常無故消失,原因未明。😅

      刪除
  39. 你有班咁撑你嘅朋友同埋一個對你咁好咁包容你嘅女朋友已經贏曬,好似我就恨都恨唔到,註定孤獨終老...

    今晚齊齊撐愛隊劏獌贏番場波先,今季睇咗兩場對下游球隊都和波,搞到我冇曬mood

    回覆刪除
    回覆
    1. 今期完全冇期望,感覺上我哋好似走緊阿仙奴之前嘅舊路……🤨

      刪除
    2. 同埋睇返富咸同水晶宮所打嘅賽事,其實人哋真係打得一啲都唔差。😷

      刪除
    3. 真係俾大哥你講中...其實琴日獌狗打得一啲都唔好,仲玩埋4424。一句到尾,只怪我哋自己唔爭氣

      刪除
    4. 上季踢得咁好,唔多唔少係因為後備力量足夠,加上matip少傷,前面嗰幾個上季季尾已經睇到腳風唔順。🥲

      刪除
  40. 祝Time Time繼續快快樂樂落去,同姑姑繼續sweet sweet~💕
    中國好聲音新一季又要開鑼,Hacken連續兩季擔任導師,以香港歌手嚟講都算幾威水~👍

    回覆刪除
    回覆
    1. 雖然冇完整睇過一季,近年更加係冇乜留意,但感覺上個導師陣容真係一年比一年弱。😅

      刪除
    2. 完全唔知廖昌永有乜嘢豐功偉績,或者係我孤陋寡聞~

      刪除
    3. 明顯唔係流行歌曲嘅界別,做呢類歌唱節目嘅導師感覺好似怪怪地……🤨

      刪除
  41. 諗通咗開心返就得,suoport u,+oil

    回覆刪除
  42. 有一大班老死在自己生日共聚暢飲直落真是福氣!

    回覆刪除
  43. 補祝生日快樂,自在、如意。

    LMF的歌詞其實有些寫得幾有社會意思,MC仁也不是泛泛之輩,不過現在都未必容易再公開播吧。

    回覆刪除
  44. 也許真心知己能遇不能求
    還是過去你我未到相逢時侯
    柔揚的歌聲中愛已開始開始深厚
    問句怎可輕輕一聲就說分手

    加油 願你能解開心結 笑看人生

    回覆刪除
    回覆
    1. 多謝一龍兄,上面嘅歌詞好熟,但唔記得咗係邊首歌……🤔

      刪除
    2. 譚詠麟

      藝海浮台

      作詞:向雪懷
      作曲:葉廣權
      編曲:盧東尼

      也許真心知己能遇不能求
      還是過去你我未到相逢時侯
      柔揚的歌聲中愛已開始開始深厚
      問句怎可輕輕一聲就說分手
      縱是夜靜造夢時淚水橫流
      何日我已變了是我挑戰對手
      浮沉於藝海中有太多不必的爭鬥
      為了光陰短促盡情擁有
      過去已過去毋用許多追究

      朋友又再感情如舊
      過去已過去還是繼續將來
      無論你無論我仍然是靠雙手奮鬥
      習慣忽高忽低如站於浮台
      無奈看似佔有沒法可以永久
      遙遙的一顆星縱使喜歡不可擁有
      但這閃閃的光輝劃過千秋
      也許當天開始難望可回頭
      誰沒試過奮鬥面對失明時侯
      連綿的掌聲蕩進心裡經已足夠
      願意彼此分享熱情一縷

      刪除
    3. 冇記錯呢首歌當年好似係送畀哥哥……🤔

      刪除
  45. 咁就祝你個blog長開長有,一路長紅啦!

    回覆刪除
  46. 晚安小子,恭喜重生,利記今季同車仔各有問題,呢次要睇下兩位德國教頭點樣拆彈?

    回覆刪除
    回覆
    1. 車仔兵源充足,暫時問題不大,相比之下利物浦嚟緊就大鑊好多,呢排同公司啲後生仔傾波,佢哋身為曼迷都覺得上場之所以贏到利記,好大程度係因為對面啲主力傷得七七八八。🤕

      刪除
  47. 睇到隻龍蝦同D肥牛好吸引,請問間嘢喺邊㗎?~

    回覆刪除
  48. James Caan都算是戲路縱橫,安倍的暗殺令人震驚,願他們和ONJ Sandy安息。

    回覆刪除
    回覆
    1. 教父同危情十日完全係兩種演繹,同樣戲味十足。😇

      刪除
    2. James Caan喺Godfather最精彩嘅十個場口 🎬
      https://youtu.be/3YQ2XtbveUE

      刪除
  49. 感謝山口富奸巴賜我藥方😢
    食咗一個月,暫時情況真係有好轉😭
    不過一個月洗成二千蚊左右都幾乸脷👅

    成日睇咗你個卜十幾年都有😌
    次次話甩頭髮,但就甩極都仲有🙄
    你叫我呢D廿歲已經好似林峯咁秃嘅情何以堪啊🤕

    回覆刪除
    回覆
    1. 有好轉就好喇!每個月用二千蚊都好過你個個月睇醫生仲要睇唔好,呢啲經驗我試得多!🤒

      刪除
    2. 秃到hihi,佢而家用假髮都遮唔到佢個高額🤢

      刪除
  50. 今季猁好明顯已經氣數已盡,秃普個頭應該有排甩👴🏻
    雲迪克愛進攻更成事實,沙拿呃完份肥約繼續鳩踢😆
    後備兵源莫講話英冠,直頭踢英甲都係危危乎🤣
    個感覺勁似廢中最後教多蒙特嗰季,個陣又係天殘地缺😷
    再加埋班咁冇遠見嘅班主,唔只錯失咗重建王朝嘅機會👑
    分分鐘仲會好似之前阿狗獌狗咁沉淪好多年😇

    回覆刪除
    回覆
    1. F$G最叻就係搵到高普同神Deal俠,紐尼斯係神Deal俠走咗之後嘅最大收購,如果到季尾證實係水貨,咁就證明冇咗愛華士對利記嘅影響有幾大。🦅

      刪除
    2. 好大機會,諗起季初精壇班猁仲吹到條水貨勁過布歐💩

      刪除
    3. 季尾再講啦!雖然我都覺得紐尼斯停完賽出返嚟之後係冇可能會好似哨牙蘇咁癲……😅

      刪除
  51. 迷軒是無道理2022年8月25日 下午5:31

    Blog主加油,今季完全冇期望,
    畢竟玩以快打慢玩咗咁耐,重整期跌watt係可以理解嘅

    回覆刪除
  52. 果然係小新ge忠實fans wor~~
    要keep住快樂ar~~你都搵到你心目中ge娜娜子姐姐la!!!😁

    回覆刪除
    回覆
    1. 佢到今日都係當我好似小朋友咁樣看待……🤣

      刪除
  53. 陳家上下祝Time Is Changing一日開心過一日,千其 唔好忘記找番啲blog 數呀

    回覆刪除
  54. 今屆英超真係估你唔到,分分鐘呀妓可以爆冷贏返失去多年嘅聯賽冠軍.

    回覆刪除
    回覆
    1. 九成都係鏝㗎喇!阿仙奴都未打強隊……😅

      刪除
  55. 先嚟一場大炒,再嚟一場絕殺,希望可以keep住個勢打返起,順帶一提卡華路呢位後生仔真係冇得頂

    回覆刪除
    回覆
    1. 保重啊自己友,希望你位家庭成員可以早日康復💪

      刪除
    2. 多謝關心,多口問句,你覺唔覺得Fábio Carvalho好似Bruno Mars?😂

      刪除
  56. 點解最新果篇唔俾人留言gei??
    闔家辣基本上都係ronald一人solo,edan純係孭票房,d戲仲未得~~~🌶
    明日戰記係好難睇ar!!你講得啱~~睇到網上一致讚好真係好假!!
    MC係樂壇炭治郎,負責斬妖除魔,雖然擺明係fuckboy但我欣賞佢~~💗

    回覆刪除
    回覆
    1. MC本身串柒柒又爛玩,根本係希爺low版2.0,喺唱方面,我覺得佢係有潛質可以走港版林宥嘉路線,嗰啲乜嘢記憶棉、反對無效、老派約會簡直係埋沒咗佢真正嘅唱歌技巧,總之一句到尾:香港藝壇係需要多啲fuckboy,少啲偽pure偽ture男!🤟🏻

      刪除
  57. 保重呀大哥。
    FSG終於肯出手,不過係借多個傷多過踢嘅藥煲返嚟,紀律問題仲要麻麻,最經典係話佢患過性病...

    回覆刪除
  58. 雖然知道明菜這次久休復出應該是為了搵真銀,但現階段只想她活得比渣男好,不求別的。

    回覆刪除
    回覆
    1. 呢條連老母骨灰都可以棄之不理嘅渣男都算不枉此生啦!就算而家瓜老襯都係風風光光!😇

      刪除
  59. 你後面哥篇哥套戲院小新我都有諗過買XXXXD

    回覆刪除
    回覆
    1. 造型超靚,手工極好,買咗絕對唔會後悔!😍

      刪除
  60. Is so good to have a party with the Friends. Have a nice summer everybody.

    回覆刪除