CoCo＆Me 生活瑣事雜誌（2018年7月號）

Chapter 1：撤離銅鑼灣 🏃🏻
Chapter 2：Restart！🎬
Chapter 3：Happy Birthday To Me～🎂
Chapter 4：又有一堆新住客搬入～🤗
Chapter 5：候選房客名單 👥
Chapter 6：好碟再重溫 - 港樂．克勤LIVE 🎼
Chapter 7：7月觀影小記 🎥
Chapter 8：好戲再回顧 - 鼓動真我（Whiplash）🥁
Chapter 9：2018世界盃冠軍誰屬？⚽
Chapter 10：再見陳仔／法拿根！👋🏻
Chapter 11：利物浦官方精品分享 💝
Chapter 12：傳說中的立山黑部 🏔
Chapter 13：CoCo電眼寫真放送 🐱
Chapter 14：所有皮膚病病友，共勉之！💪🏻
Chapter 15：齊歡唱～七月雙傻鬼門開！🎤

各位Blog友你哋好嗎？ 數數手指，原來我都有成三個幾月冇同大家分享一下自己嘅一啲生活大小事，理由好簡單，因為朕最近實在係太忙喇！

Chapter 1：撤離銅鑼灣 🏃🏻

呼～三個月試用期眨下眼就過去，能夠得到一眾上司同經理接近滿分嘅正面評價，火爆仔真係深感榮幸！再一次感謝各同事喺呢幾個月以嚟嘅提點同照顧，未來有時間我一定會再返嚟探你哋㗎！Good Luck To All！

過咗試用期之後，公司就叫咗我上總部簽約，佢哋除咗將我嘅人工大大提高之外，仲指定要派我去一個重點新場嗰度幫手，當收到呢個消息，我就立刻把握機會喺Windsor House附近四周圍走走，就當係懷緬一下我喺銅鑼灣呢段時間嘅一啲點點滴滴……

位於渣甸街22-24 號嘅《文輝墨魚丸大王》，呢度馳名嘅紫菜墨三鮮粉雖然索價四十幾蚊碗，但就確實係值回票價！而位於糖街27號A地下《榮記粉麵》，佢哋嘅牛筋牛肚麵真係陪伴咗我好多個肚餓難耐嘅下午。

食完飯想整返碗又香又滑嘅豆腐花做飯後甜品？位於渣甸街55號《人和荳品廠》幫到你！

其實嚴格嚟講，銅鑼灣都可以稱得上係一個劣食集中地嚟！我喺呢頭返工咁耐，都只係得文輝、榮記同人和呢三間舖頭會令我有一種想再返兜嘅意欲，而其餘嘅食店，粗俗啲講句……真係連狗都唔食呀！

記得最初加入公司嘅時候，為咗可以盡快融入放映部門嘅工作團隊，我每一日都好比心機做功課，有時甚至會忙到連放飯嘅時間都冇埋，但係唔使驚～桂姐喺大廳！三十幾蚊一份多餸多飯嘅小菜套餐仲要包埋一碗冇味精例湯，呢啲咁嘅良心小店喺今時今日嘅香港可謂極之罕見！所以當我嚐盡外面嘅美食劣食之後，到最後我就始終都係會重回桂姐嘅懷抱！嗚嗚～親愛嘅桂姐姐，喺嚟緊嘅日子我一定會將妳藏喺我嘅心入面，直到永遠，下刪三千字。

收工悶悶哋可以去邊？屌～仲使問！梗係嗱嗱聲走去呢一間位於銅鑼灣中心1F嘅《CD經濟特區》度瘋狂購物啦！

童年偶像郭富城、國民歌王周華健、台灣音樂教父黃大煒、Lam叔95演唱會、瘦皮猴Frank Sinatra、傳奇爵士歌后Sarah Vaughan、Jazz界占士甸Chet Baker、實驗搖滾先鋒The Velvet Underground，全部加埋都只不過係$360左右！

有次喺Youtube無意中睇到雷安娜姐姐嘅唱歌片段，赫然發現呢位喺80年代出道嘅老牌歌手把聲原來係咁鬼好聽！於是我就二話不說掃咗佢兩隻復黑王返屋企慢慢煲！

王家衛電影原聲大碟系列，每張$68，一次過聽晒四隻個人感覺即刻High-Class咗！

呢張《The Doors Live at the Isle of Wight Festival 1970》比起外面啲唱片鋪足足平過成舊水，唔買真係對唔住自己！

掃完碟仲想睇下玩具同漫畫？咁就可以行落去地庫昅昅！呢一間專賣各類美國漫畫／電影精品名叫《Metro Comics》嘅小店每逢星期三就會推出全新一期嘅美國漫畫（同美國同步），所有死忠美漫迷，記住行過路過唔好錯過呀！

嗯～行到攰攰哋不如就搵個位坐低休息下先啦！Hey～前面呢位鹿哥～麻煩你可唔可以坐過少少呢？

哈哈～講咗咁耐耶穌都係時候要閃人lu！咁多位朋友仔～我哋有緣再會喇！

Chapter 2：Restart！🎬

唔經唔覺已經喺沙田間新戲院工作咗一個幾月，暫時感覺So Far So Good咁啦！仲記得喺剛入嚟嗰陣，我都曾經有諗過辭職唔做呢份工㗎！理由係乜？首先：我本身做慣舊式戲院，對好多新機種同新科技都唔太認識，咁當然，突然間嚟到一個全新嘅環境大家就點都會俾返少少時間你慢慢去適應嘅～不過，當所有人知道你嘅職位同人工去到邊，好自然就會對你嘅要求特別嚴格同苛刻。第二：從踏入社會至今，我太約有九成時間都係拍住班年紀大我好多嘅老鬼一齊做嘢，而家霎時間要我走入班後生仔後生女嘅世界入面，咁我就梗係會好唔習慣啦！而第三點亦都係最重要嘅一點就係，呢度有好多檢查嘅工作都好需要靠對眼嚟判斷！嘩～你哋居然大膽到叫個盲佬去check一堆好似粒黃豆咁大嘅零件？咁即係擺到明靠害嘅啫！因為先天嘅缺陷而拖慢成Team人嘅節奏，跟住就成為同事之間嘅負累，呢種情況係我最唔想見到嘅！講真嗰句，喺呢個弱肉強食嘅社會打滾咗咁多年，我絕對清楚明白，無論你之前經歷過幾多唔愉快嘅事，人哋都唔係老奉要同情你！所以，與其要我每日返到嚟淨係喺度鳩遊遊側側膊呃飯食磨爛蓆，咁我就寧願選擇速戰速決自行了斷，無謂再浪費大家時間！就正當我想遞信炒老闆魷魚繼續我嘅環遊嘆世界大計之際，我哋偉大嘅放映部總經理就花咗大概15分鐘嘅時間去開解我，又不停強調我係一個工作十分有交帶嘅人，唔應該就咁放棄呢個機會，仲話如果真係有需要嘅話就可以將我調去公司旗下一啲冇MX4D嘅戲院度做。

聽完佢呢番說話之後，我返屋企諗咗成晚，最後都係決定留喺沙田同一班新同事並肩作戰！喺往後嘅日子我會用比其他人多幾倍嘅時間嘗試去克服自身嘅問題，然後當盡咗最大努力結果仍然係失敗嘅時候先再作打算！冇錯，我係一個半盲人士，呢個係鐵一般嘅事實，係我今生今世都冇可能改變得到！但若然我成日都要為咗避開呢樣嘢而將自己鎖死喺一個固定嘅框框裡面，咁我未來嘅人生就必定唔會再有任何進步空間！喂～大哥！你既然經已諗到唔撈呢一步，其實仲有乜鬼嘢好怕啫！計我話你不如就趁呢個機會喺呢個戰場度儲多啲彈藥，實行以一種收住錢嚟學嘢嘅心態返工！Come On Bondi～只係打份工又何須咁大壓力呢！家吓屋企又唔係等住你開飯！

Chapter 3：Happy Birthday To Me～🎂

再一次多謝晒所有請過我食生日飯同埋即將會請我食生日飯嘅朋友，能夠喺一個月之內食到咁多豐富大餐，我覺得自己實在係太幸福喇！

每一年生日最期待嘅就係由老媽子親自炮製嘅住家大餐，活潑生猛嘅新鮮大蝦、嫩滑爽口嘅厚切鮑魚、彈牙煙韌嘅香煎帶子、健康又好味嘅西芹芽菜炒金菇，再加多碗香噴噴嘅黯然銷魂叉燒飯，睇見咁嘅陣容係咪隔住個Mon都流晒口水呢？

食完大餐之後，我哋仲特別加插咗一段互相交換利是嘅環節，一於就您有您慶祝我牛一，我有我慶祝您終於夠期攞兩蚊乘車優惠！哈哈哈～

施公，我最尊敬嘅良師益友，多謝您每一年都咁有心從澳洲遠道返嚟探我，嚟到呢一刻我可以完全放低嗰件終極陀衰家嘅至尊無賴，呢個結果應該係您一直以嚟最想見到嘅，係咪？

咁多位親愛嘅炫友，喬喬真係好掛住你哋呀！睇到你哋嘅祝福，我簡直恨不得即刻買張機票飛去台北同大家唱個夠本！

因乜解究你食嚟食去都係嗰啲嘢㗎？記得我每一年生日姑姑都例牌會同我講呢一番說話，所以喺今年我哋就破天荒去咗一間懶浪漫嘅西餐廳度食咗一餐貴夾唔飽嘅Candlelight Dinner。

隨便睇！隨便揀！$998自選唱片套餐！一切費用全部由我嘅絕世好女友一個人負責！

華Dee，年年生日你請嗰餐都一定係最大手筆嘅～今年亦唔例外！一句：「錢，唔係問題，最緊要大哥開心！」足以勝過千言萬話。我嘅好Brother，以後我哋乜都唔使講，總之一切在心中啦！

之不過呢～你送埋啲咁獨特嘅禮物比我，我就真係唔知比啲咩反應你好囉……

喺咁多年以嚟，我有幸認識到好多位對我不離不棄並且兩脅插刀嘅知己良朋，但要數當中最錫我同最照顧我嘅就肯定係大佬輝！南提，同往時一樣，每年第一個同我慶祝生日嘅人依然都係你！我希望下年都係一樣！仲有呀～當所有事情大步檻過嗰陣，你就要好好學習點樣去做一個好老公同好老豆㗎喇！哈哈哈哈～所謂有咁耐風流得咁耐折墮，兄弟～呢勻我真係恭喜你囉！

今年嘅生日願望？查實每一年都係一樣……就係祈望呢個世界可以少啲天災人禍，然後我自己、姑姑、朋友、Blog友、家人同貓貓大家都健健康康、快快樂樂咁過活～咁我就已經心滿意足㗎喇！

Chapter 4：又有一堆新住客搬入～🤗

各位哥哥姐姐你哋好～我係嚟自立山黑部嘅雷鳥BB～以後請大家多多指教！

嘿嘿～咁多位樣靚身材正嘅大姐姐你哋好嗎？我哋就係人見人愛車見車載嘅小新家族！

他漂亮這麼多～他偉大這麼多～平凡像我～無強項亦未會唱歌～嗓子太壞但全情為妳落力發揮過～

有賊便有警察在穿插～未來全是鐵石做那心腸～要維護公正只好要用盔甲～未來警察今天要出發～未來警察為人民護法～

登登登登～今期嘅VIP星級住客～嚟自湘北籃球隊嘅櫻木同流川！

嗚嗚嗚～我同企鵝仔究竟做錯咗乜嘢呀？何解要將我哋分配去位於堅離地嘅度頸橋自生自滅？

Chapter 5：候選房客名單 👥

身高180cm，畢業於名校早稻田大學，喺大企業雙葉商事工作15 年，年收入超過650萬日圓，佢愛老婆又愛仔女，仲時刻為家庭著想，係日本女網友心目中嘅最佳老公人選，Ladies & Gentlemen～有請動漫界暖男代表 - 野原廣志！

由壽屋出版嘅呢set幽遊四子+妖孤真係型到冇朋友呀！但我諗佢哋五個人加埋嘅身價應該都夠我食多兩餐高檔Sushi！哈哈～

經典嘅白衫黑帽造型、邪到爆嘅笑容、一對會郁嘅眼珠、一個趣怪長鼻面具、一支攻擊性拐杖，最估唔到嘅就係連右眼條假眼睫毛同埋嗰杯The Korova牛奶都跟到足！呢個由MEDICOM TOY發行嘅7-inch Action figure，可以話係將【發條橙】男主角Alex DeLarge嘅靈魂同軀殼100%忠實還原！

小朋友～嚟！等IT叔叔帶你哋去金魚街睇金魚～

You Talkin' To Me？You Talkin' To Me？You Talkin' To Me？BOOM BOOM～

想當年紅爆全城嘅阿笨與阿占，大家仲記唔記得佢哋？

我香蕉菠蘿你個西瓜呀～咁排法咪要等到2047先上到樓？

對唔住，我唔答啲咁無聊嘅問題，麻煩你嗱嗱臨走落樓下茶記啪返個地溝油套餐先再慢慢思考下自己頭先講咗啲乜！

Chapter 6：好碟再重溫 - 港樂．克勤LIVE 🎼

今期好碟再重溫嘅主角係李克勤喺2001年3月推出嘅演唱會現場錄音專輯《港樂．克勤LIVE》，以下係本人喺十幾年前所寫嘅一篇大碟聽後感……  Disc 1 試聽按此／Disc 2 試聽按此

李克勤在2001年2月與香港管弦樂團合作開了四場演唱會，每場都爆滿，反應熱烈，令沉寂已久的克勤突然「鹹魚翻生」，並一度刷新了香港流行歌手與管弦樂團合辦演唱會的場數紀錄。

當李克勤遇上港樂，當俠客配上好劍，實在是天作之合，不作他人之選！雄渾圓滑的歌聲，配合優美的管弦樂韻，聽起來十分和諧、協調。在整個演唱會中，克勤都保持著極高水平的演出，不論是音準、拍子和控制聲音音量方面均準確無誤，還將多首首本名曲演繹得比原版更細膩、更動人。

演唱會開場的〈希望〉氣勢磅礡，歌者的表現相當棒，強勁有力的震音進而有序，跟鼓聲的頻率恍如連成一線；重新編曲的〈深深深〉有點不倫不類，這種故意把節奏拖慢的改編做法，徹底破壞了此歌原本的故事內容，算是整個Concert的唯一敗筆；浪漫綺麗的〈一千零一夜〉，無論是編曲和演繹上都比大碟版本更為出色；由〈球迷奇遇記／護花使者／舊歡如夢〉組合而成的串燒Medley，當鬼馬跳脱的流行歌曲碰上此起彼落的管弦樂聲 ，出來的效果真是過癮非常，出奇地叫人讚好！至於〈櫻花〉的現場Live版本，就足見克勤漸趨成熟的演唱功力，特別是最後一段的「櫻花一再為你開」，那句尾音克勤實在是收得靚絕！我發覺現在有很多新晉歌手唱歌，都好像不太在意句與句之間的尾巴部分，其實像羅文、蔡琴和克勤這種圓潤而又收放自如的尾音處理方式，是要真正懂得使用氣和了解自己各個共鳴點的人，才可以準確地勾畫出一條如此漂亮的弧度。

眾所周知，克勤有一把讓人羨慕的好嗓子，所以不管是自己的歌還是別人的歌，他都一樣可以把它們「照顧」得很好，而在這次演唱會裡，他就一次過翻唱了多位歌手的經典作品，並且沒有令他的樂迷失望，在演唱一些「別人的歌」時，他的唱功非常紮實，繼續保持一貫的穩定水準，還很完美地演繹出自己的個人風格，跟各原唱者比較起來可以說是不相伯仲，各有千秋。

首先是翻唱露雲娜的〈傳說〉，表現只是不過不失，嗯～怎樣說好呢？就是缺少了原唱那一份潔淨而純樸的真摯情感。接下來挑戰張學友的〈愛下去〉，這個翻唱版本跟歌神版相比可說是平分春色，絕不失禮，而在一些真音、假音、混音過渡方面，更是比原唱來得更流暢。再來是翻唱陳百強的〈等〉，我認為克勤的演繹尚算不錯，但就還是未能將原唱那一份獨有的憂怨味道表演出來。那些年來，我聽過無數〈等〉的翻唱版本，可是就始終沒有一個人能夠超越陳百強，當中就以謝霆鋒的翻唱最為失敗，而陳奕迅的演繹就隨意得有點過頭，至於克勤的版本雖然亦有不少缺點，但其細緻入微的歌唱技巧就大大掩蓋了那些不盡完美的地方，尤其是結尾那段空靈高音，即使曲子結束了，餘音仍然在我的耳邊不斷迴盪。最後就是翻唱樂壇當紅炸子雞陳奕迅的大熱之作〈K歌之王〉，這也是全個演唱會的第一個高潮位，當克勤演唱完畢，觀眾都紛紛報以熱烈的掌聲，那時候大家都在談論……到底哪一個版本的〈K歌之王〉才是最好的呢？是充滿激情的原唱陳奕迅？還是將這首歌詮釋得極為凄美的李克勤？我自己認為就各有各聽法啦！不過有一點可以肯定的，就是EASON那種不假思索的演繹方式，確實是把歌中主角那一份無奈與悲哀的情緒表露無遺！反觀克勤那種字正腔圓像說故事的唱法，每一句都是經過細心雕琢而成的，因此給人的感覺就像在使用一套名貴華麗的餐具來吃即食麵一樣，沒有什麼不好，只是用這種方式來演繹K歌似乎就較為隆重了點。

聽完Disc 1，馬上就來聽聽Disc 2！Disc 2的第一首歌〈好戲之人〉，強力推介給所有非勤迷！這個感情滿瀉的現場版本，絕對稱得上是一次近乎完美的演繹，但個人認為如果克勤能在歌曲收尾時適當地加點哽咽的效果那就更好了！重新編曲的〈夏日之神話〉整體來說比〈深深深〉好得多，至少沒有後者那種不倫不類，為改而改的牽強感；特意為是次演唱會度身訂造的新歌〈月光玫瑰〉，整首歌所散發出來的氛圍就如克勤所說：「真的很管弦樂團啊！」其後的港樂版〈大會堂演奏廳〉，克勤演繹得非常Powerful！抑揚頓挫的聲調，充分呈現出每一個段落應有的震撼和層次感；曾讓我萬分期待的港樂版〈月半小夜曲〉驟聽之下就有點怪怪的，緩慢的節奏加上克勤略為拖拉的唱法，頓時冰封了這首歌的原始靈魂。演唱完兩首經典，克勤就為大家帶來一首柔情似水的〈在我身邊〉，在歌中他徐徐地唱出自己對另一半那一份至死不渝的感情，我相信在當時深受感動的……一定不是只有盧小姐一人。深情過後，氣氛一轉，緊接而來的是一首蕩氣迴腸、悲壯淒絕的〈一生不愛別人〉，這個現場版本，聽後我真是要給克勤十一個Good！自問不甘心～卻一再地去等～難道這份愛念己變更～未忘掉你聲音和半濕的唇印～試問我怎愛別人～未忘掉你聲音和半濕的唇印～試問～我怎愛別人～嘩～在處理高音的同時竟然還可以把每一個字都唱得那麼標準！除了佩服我還能說些什麼呢？

歡樂的時光過得特別快，又是時候講Bye Bye啦！演唱會的結尾曲是〈紅日〉，克勤以一段長達二十秒的震音作結尾，為這個精彩萬分的港樂演唱會畫上一個完美的句號。

第一期好碟再重溫（完），下一期嘅好碟再重溫我將會同一眾樂迷一齊回味華語樂壇第一男聲林志炫一張名叫《ONE take》嘅現場錄音專輯，所有喜歡聽靚聲嘅朋友請密切留意。

Chapter 7：7月觀影小記 🎥

片名：蟻俠2：黃蜂女現身（Ant-Man and the Wasp）

導演：Peyton Reed

主演：Paul Rudd、Evangeline Lilly

片長：118分鐘

級別：IIA

語言：英語

上映日期：2018-07-04

個人評分：★★

片名：街頭祖霸王（Uncle Drew）

導演：Charles Stone III

主演：Kyrie Irving、Lil Rel Howery

片長：105分鐘

級別：IIB

語言：英語

上映日期：2018-06-28

個人評分：★

片名：死神遊戲（Truth or Dare）

導演：Jeff Wadlow

主演：Lucy Hale、Violett Beane

片長：103分鐘

級別：IIB

語言：英語

上映日期：2018-06-28

個人評分：☆（☆為半粒星）

片名：逃亡大計2（Escape Plan 2: Hades）

導演：Steven C. Miller

主演：Sylvester Stallone、Dave Bautista、黃曉明

片長：96分鐘

級別：IIB

語言：英語

上映日期：2018-06-28

個人評分：咪撚嘥時間！

片名：盜海豪情：8美千嬌（Ocean's 8）

導演：Gary Ross

主演：Sandra Bullock、Cate Blanchett

片長：110分鐘

級別：IIB

語言：英語

上映日期：2018-06-14

個人評分：★★☆（☆為半粒星）

片名：50次初吻（50 First Kisses）

導演：福田雄一

主演：山田孝之、長澤正美

片長：114分鐘

級別：IIA

語言：日語

上映日期：2018-06-14

個人評分：★★

片名：侏羅紀世界：迷失國度（Jurassic World: Fallen Kingdom）

導演：J. A. Bayona

主演：Chris Pratt、Bryce Dallas Howard

片長：128分鐘

級別：IIA

語言：英語

上映日期：2018-06-07

個人評分：★★

片名：聖鹿獵殺（The Killing of a Sacred Deer）

導演：Yorgos Lanthimos

主演：Colin Farrell、Nicole Kidman

片長：121分鐘

級別：IIB

語言：英語

上映日期：2018-05-17

個人評分：★★★☆（☆為半粒星）

今期大隻巨獻高凶浩劫（Skyscraper），仲未有時間入去睇……

未來猛片逐格睇，最令我期待嘅就當然係【蠟筆小新劇場版：爆盛！功夫小新～拉麵大亂鬥～】啦！

Chapter 8：好戲再回顧 - 鼓動真我（Whiplash）🥁

記得我當年曾經用幾句說話嚟總結呢部電影，就係：「好撚好睇！超撚好睇！勁撚好睇！仲未撚睇？快撚啲睇！」究竟【Whiplash】有幾好睇？事不宜遲，即刻就同大家回顧一下我喺2014年所寫嘅一篇電影觀後感！按此收看Trailer

大家在入場之前千萬不要被這齣戲的香港譯名所影響，於我看來，這根本不是一部激動人心的勵志電影，而是一部看後會令人全身發抖的驚慄電影！在片中，Andrew與Fletcher兩師徒那種接近病態的偏執在一般人看來絕對是難以理解的！但我相信只要你曾為理想付出過血汗，就一定會從Andrew身上找到不少共鳴。你試過因為堅持你的理想而被人嘲笑嗎？為了實現你的理想，你捱過多少個不眠不休的夜晚？一個人要成功在背後就一定會有所犧牲，哪怕是血流成河、眾叛親離……就像本片的主人翁Andrew，他的音樂理想從來得不到家人的支持和諒解，還經常受到他們的冷嘲熱諷。什麼跟John Lennon和Paul McCartney做朋友啦！什麼音樂家通常都是酗酒死亡收場啦！總之就字字有骨、句句入肉！可是，這些說話對於一心向著理想進發的Andrew來說就反而更使他燃起不甘認輸的鬥志，他為了讓自己的打鼓技術達到極致完美，不惜日練夜練……就算是練到手腕顫抖、手心起繭、手指出血亦都在所不計！而為了實現理想，不知天高地厚的他還主動向剛結識不久的女友提出分手，他認為對方會阻礙自己的音樂夢，於是便不加思索作出了這個不成熟的決定，直到後來他感到後悔並嘗試想挽留這段感情卻發現對方已經另結新歡，恨錯難返。

在偏執狂Fletcher潛移默化之下，Andrew漸漸被體內潛在的「魔性」反噬，更一步步陷入一個永無休止的深淵不能自拔。他開始孤立自己，並完全沉醉於他和Fletcher的音樂世界，他的眼中再也容不下任何人，還對這位嚴師產生出一種又愛又恨的感覺，但儘管如此，他就仍是不由自主地跟著其步伐行走。哈～一個在撞車後弄得滿身傷痕都要拼命跑回比賽場地繼續作賽的傻小子，一個為了培育新星而將學生逼上絕路也決不後悔的老頑固，這對師徒走火入魔的程度，真不禁令我想起《笑傲江湖》裡面的林平之和岳不群。

能夠讓觀眾從一部音樂電影當中感受到一份驚慄之感，新進導演Damien Chazelle真是一位不可多得的人才！在片中他利用此起彼落的擊鼓聲營造出一種排山倒海的劇力，一浪接一浪，令人有一份喘不過氣的窒息感。另外，不知道Damien Chazelle是不是Darren Aronofsky的忠實fans呢？在電影入面有多個場口的拍攝風格都跟Darren Aronofsky之前的作品非常相似，所以當鼓聲完結、影片落幕的一剎，我就不自覺地大叫了三聲：Perfect！Perfect！Perfect！

從影28年的美國演員J.K. Simmons，多年來都只是在電影和電視劇演一些小角色，不過今次在【Whiplash】裡面他就成為了整齣戲的靈魂人物。在戲中，他大部分場口都是靠對白和支體語言來展現演技，難度甚高，但他就還是充分將魔鬼教師Fletcher喜怒無常、真假難分的個性表露無遺，每次出場都帶給觀眾一份強烈無比的壓迫感，讓我們都默默為他的學生捏一把冷汗。正所謂「台上一分鐘，台下十年功」，機會從來都是留給有準備的人。來到2014年，J.K. Simmons的機會終於來了！我在此預言……Fletcher這個角色必定會讓沉寂多年的他在2015年橫掃各大頒獎禮的男配角獎。

Buddy Rich、Jo Jones、John Bonham，Gene Krupa、Neil Peart……每一個世界級鼓王一定都是經過千錐萬鑿磨練出來，別妄想可以一步登天！要成為一個真正的驚世奇才，是不會懼怕面前的任何困難！看完整部電影之後，也許你會對Fletcher極度苛刻的教導方式不感認同，但有一點可以肯定的就是他在最後又的確是將Andrew百屌成才，成功實踐了「嚴師出高徒，棒下出鼓王」這個道理。因此，在片尾當我看到Fletcher和Andrew師徒兩人相視一笑，那時我心裡面的OS是：「嘩～真是愛恨交纏一瞬間！這段錯綜複雜的愛情故事來到今天總算是開花結果……好了！兩位泥足深陷的癲佬，你們可以正式步入教堂行禮了！Congratulations！」

第一期好戲再回顧（完），下一期好戲再回顧嘅主角將會係……請等等～我Buddy Rich緊！

Chapter 9：2018世界盃冠軍誰屬？⚽

2018世界盃冠軍誰屬？打電話問民賤聯啦！瞓身民賤聯對家，包你贏到笑哈哈！絕對冇花冇假！

當知道荷蘭同意大利先後喺外圍賽出局，我嘅心情真係肉酸過葡撻張家輝，一心就諗住完全唔follow今屆俄羅斯世界盃嘅任何一場賽事，但最後我始終都係姣婆守唔到寡！哈哈～冇法啦！睇住班日本仔同克羅地亞人喺晉級嘅過程踢到好似足球小將同Slam Dunk入面啲劇情咁，又的確係好難忍得住唔昅下啲直播睇波網嘅～

仲有唔夠30分鐘，新一屆嘅世盃盟主就會橫空誕生，到時就睇下法國呢支咁鐘意揼波鐘嘅公雞兵團會唔會葬身喺一班滿腔熱血嘅格仔佬腳下啦！不過，喺呢場世紀決賽開戰之前，不如就先同各球迷細數下喺今屆世盃裡面最令我感到難忘嘅一啲經典時刻／球員……

今屆世界盃踢得最精彩嘅一場賽事 - 日本 VS 比利時

長傳急攻踢法陳舊～現代的足球整體戰入手～全場奔走永無走漏～猛虎衝力都可以射球～

今屆世界盃打得最刺激嘅一場賽事 - 俄羅斯 VS 克羅地亞

試問大家又點會諗得到俄羅斯竟然會喺自己個主場射失十二碼先得㗎！

今屆世界盃最令我估唔到嘅賽果 - 德國慘吞南韓兩蛋

本來諗住班韓國佬喺02年世盃嘅孽債仲有排都未還得完，點知偉大嘅德國大肉腸就較啱時間慷慨解囊捨身救泡菜，因而令到呢一堆囂張自大嘅厚粉餅可以名正言順攞個尾彩返歸打飛機！

今屆世界盃我最欣賞嘅守門員 - Kasper Schmeichel（丹麥）

縱使丹麥曲奇嚟到十六強就俾格仔兵團一腳foul咗出局，但喺本場淘汰賽勇救三球十二碼並一再拯救球隊於水深火熱之中嘅卡斯柏舒米高就以敗者一方獲選為全場最佳球員，成功延續Schmeichel家族嘅鋼門神話，果然係虎父無犬子！

今屆世界盃我最欣賞嘅後防球員 - Granqvist（瑞典）

佢冇速度又冇技術，但就有一份堅毅不屈嘅精神同埋征戰沙場多年嘅經驗做搭夠，呢支一夫當關，萬夫莫敵嘅瑞典定海神針確係冇得頂！

今屆世界盃我最欣賞嘅中場球員 - Modrić（克羅地亞）

恭喜晒本屆金球獎得主魔笛先生。（ 攞唔到我切！）

今屆世界盃我最欣賞嘅前鋒球員 - Mandzukic（克羅地亞）

做過無數一級神鋒嘅替補，無論喺西甲、意甲、德甲甚至係四年一度嘅世界盃都能夠交出好表現。佢哋勤力得嚟又唔獨食，每去到一啲關鍵時刻仲會突然化身成救國英雄，文迪蘇傑／文素基治／曼祖基奇，請受小弟一拜！

今屆世界盃最令人眼前一亮嘅超級新星 - Mbappé（法國）

娘子呀～快啲同牛魔王出嚟睇忍者龜！

今屆世界盃我最欣賞嘅國家隊領隊 - Southgate（英格蘭）

點樣用蔗渣嘅材料調較出燒鵝嘅味道？就等英軍主帥修夫基為我哋親身示範一次！

今屆世界盃我最欣賞嘅球隊 - 克羅地亞

58巴西，78阿根廷，98法國，唔通真係每隔廿年必有巨變？嚟到2018年，唔知道克羅地亞又會唔會沿住呢條軌跡成為世盃史上第九個奪冠嘅國家呢？

今屆世界盃最令我失望嘅球員 - Luis Suárez（烏拉圭）

其實你打得真係唔算好差，只怪你之前實在太神！

今屆世界盃最令我失望嘅球隊 - 德國

第一次喺小組賽包尾出局，第一次喺大賽上輸俾亞洲球隊，證明就算係坐擁多位超級球星嘅日耳曼戰車，最終亦一樣擺脫唔到衛冕冠軍提早GG嘅魔咒！

自選今屆世界盃最強23人

正選11人：

FW：Edinson Cavani、Kylian Mbappé

MF：Denis Cheryshev、N'Golo Kanté、Luka Modrić、Ivan Perišić

DF：Jan Vertonghen、Raphaël Varane、Andreas Granqvist、Šime Vrsaljko

GK：Kasper Schmeichel

後備12人：

FW：Cristiano Ronaldo、Mario Mandžukić

MF：Philippe Coutinho、Antoine Griezmann、Blaise Matuidi、Ivan Rakitić

DF：Martín Cáceres、Vincent Kompany、Dejan Lovren、Benjamin Pavard

GK：Jordan Pickford、Danijel Subašić

Coach：Gareth Southgate

今屆世界盃最靚金球Top 3

01. Dries Mertens（比利時 VS 巴拿馬）

02. Ángel Di María（法國 VS 阿根廷）按此重溫！

03. Benjamin Pavard（法國 VS 阿根廷）按此重溫！

Chapter 10：再見陳仔／法拿根！👋🏻

擾攘多時，安利簡最終都係決定要離開晏菲路同意大利老婦人簽下四年合約，年薪為400萬歐元。呢位集基迪拉、波歷克、巴布同馬圖斯等名將影子於一身嘅德國小將喺2014年以975萬磅超抵價從利華古遜加盟利物浦，過去四年為紅軍上陣超過150場，更一度成為球隊嘅核心主力。但可惜喺2017年6月嘅一次國家隊操練入面，陳仔就無啦啦整傷咗個膝頭，自此之後佢就一直都操唔起自己個比賽狀態，每次落場就撞板多過食飯，仲漸漸失去咗隊中嘅正選位置。而嚟到今季，隨著新兵拿比基達同法賓奴嘅加盟，莫講話陳仔，我諗就連拉蘭拿甚至係隊長軒達臣想喺呢種中場大塞車嘅情況之下搶得一席之位都唔係一件十分容易嘅事！因此陳仔要選擇喺呢個時候離開利記確實又真係無可厚非。不過無論如何，相信大部分利迷同我一樣都必定唔會忘記呢個通天老倌喺前季為球隊射入嘅嗰一個「世紀金球」，仲有就係佢喺上屆歐聯附加賽次回合對住賀芬咸嗰時有如球王駕臨嘅精彩演出。

除咗陳仔之外，喺近幾季狀態持續低迷嘅法拿根亦於上個月21號宣佈正式投靠昔日大佬謝拉特旗下嘅格拉斯哥流浪。曾幾何時，法拿根係利物浦隊中少數能夠取得正選位置嘅英格蘭青訓球員，由一個寂寂無名嘅小卒變成紅軍後防嘅重要主力，呢位利記富二代喺13-14年球季嘅出色表現就連前巴西名宿卡富都忍唔住要俾返個Like佢，更表示呢個後生仔嘅踢法同自己極為相似，到後來仲特意前往晏菲路同呢位「RedCafu」嚟一個近距離接觸。正當世人都睇好根少嘅職業生涯將會平步青雲之時，一次突如其來嘅嚴重傷患就徹底摧毀佢嘅足球事業。喺傷癒之後，根少完全得唔到領隊高普嘅重用，其後阿諾同祖高美斯呢兩位新秀嘅迅速崛起，就更加係直接將佢打咗入去「一借冇回頭の人球行列」裡面。

唉～喺呢度，我唯有衷心祝願我哋嘅神奇隊長可以早日協助根仔脫離當前困境啦！

舊嘅唔去，新嘅唔嚟！Welcome Keïta～Welcome Fabinho～Welcome Shaqiri～一隊中前場陣容咁鼎盛嘅利物浦，我都唔知有幾多年冇見過！

Chapter 11：利物浦官方精品分享 💝

嘿嘿嘿～呢啲就係我喺幾個月前參加由奧海城聯同EZ Football合辦嘅「Liverpool！YNWA！ 派對」嗰陣所買嘅戰利品！各位利迷，羨唔羨慕？妒唔妒忌？

點呀～係咪好後悔錯過咗呢個Party呢？唔緊要～只要坐上我呢一部「Time Is Changing時光機」就可以回帶返去4月30號當日！

咦～一班利物友圍埋一齊係咁影到底所為何事？等我Zoom埋去幫大家睇真啲先！

哦～原來呢度所擺放嘅全部都係一啲只可遠觀而不可褻玩嘅非賣品……

同大家介紹～晏菲路傑出球員系列，神奇隊長謝老四！

歡迎嚟到奧海城特設嘅利物浦期間限定店，各款球衣精品包括毛巾、Tote Bag、背囊、頸巾、匙扣任君選擇！此外，大家亦可以喺度預訂2018/19球季波衫。

喺咁多款復刻球衣當中你最喜愛邊一件？我自己就覺得利物浦同嘉士伯始終都係最夾同最襯！

當日最暢銷嘅三件貨品：科拿神9號T恤／125週年黑色落場版風褸／2005年伊斯坦堡球衣（謝拉特印字）

晏菲路主看台木製座位珍藏套裝，全球限量6000套，價值$1892，應該係全場最貴嘅一件貨品，除非唔係。

行咗咁耐有啲悶悶哋？快埋嚟打返幾舖《PES 2018》，再接受ICON Challenge專業足球訓練，成功挑戰由拉蘭拿所保持嘅射波紀錄，即可贏取利物浦精美禮品。

YoYoYo～Last-Minute Shopping Time～Let's Go Rock & Roll！

Chapter 12：傳說中的立山黑部 🏔

早排姑姑同佢屋企人就去咗位於日本中部嘅立山黑部旅行，想知道呢個同富士山／白山並列為日本三大神山更有「日本阿爾卑斯山」之稱嘅旅遊景點有幾吸引？唔使多講，埋嚟睇相！

立山黑部美食大集合！咦～望落去啲食物款式都幾多元化喎～未來有機會我都要同姑姑嚟呢度感受一下當地嘅風情同氣氛先得！

Chapter 13：CoCo電眼寫真放送 🐱

喵喵喵～睇完靚景睇靚貓！CoCo最新一期十二宮格寫真，數量有限，送完即止！因住手快有手慢冇呀喂～

Chapter 14：所有皮膚病病友，共勉之！💪🏻

喺上個月18號屯門就發生咗一件令人極之痛心嘅三屍倫常慘案，一名剛大學畢業嘅23歲少女阿瑜因為長期飽受濕疹折磨導致生不如死，於是喺父親節當日佢就用一把利刀親手殺死自己父母，然後就再用膠袋笠頭吸入氦氣自殺。坦白講，睇到呢單新聞，我個心真係非常之唔舒服！雖然我100%唔認同呢位小妹妹嘅行為，但係作為過來人我就絕對清楚同了解每一位皮膚病患者嗰種無助無援嘅感受。眼見身邊嘅朋友喺社會上努力打拼同盡情享受生活嘅同時，我哋就不斷要為自己嘅身體而戰，呢種感覺實在係既無奈又感慨！我唔知道可以講啲乜嘢說話嚟安慰你哋，只係真心想同各位講聲加油！我明白我哋嘅痛苦旁人係好難理解得到，不過請大家就唔好因此而放棄任何希望，亦唔好逃避，千祈咪以為唔掂唔理就會冇咗件事！想治癒就要忍住痛……嘗試徹徹底底咁醫好佢！所有皮膚病病友～握手！共勉 ！

Chapter 15：齊歡唱～七月雙傻鬼門開！🎤

2018七月雙傻鬼門開迷你癲唱會Rundown

01. Highway Star（二傻瘋華盛）Click here！

02. 敢愛敢做（大傻無比迪）Click here！

03. 愛情釀的酒（大傻無比迪）Click here！

04. 娛樂天空（二傻瘋華盛）Click here！

05. 當找到你（大傻無比迪）Click here！

06. Medley：別了秋天／傳聞（大傻無比迪）Click here！

07. 深深深（大傻無比迪）Click here！

08. 送禮勤經典浪漫情歌Medley（大傻無比迪、鹹校長）Click here！

09. 愛情陷阱（鹹校長）Click here！

10. 送禮勤屌西舞曲Medley（大傻無比迪）Click here！

11. Too Much Heaven（二傻瘋華盛）Click here！

12. 好戲之人（大傻無比迪）Click here！

13. 誰願分手（大傻無比迪）Click here！

14. 倩影（真．蔡楓華亂入）Click here！

15. 倩影Take 2（二傻瘋華盛）Click here！

16. 春秋（大傻無比迪）Click here！

17. 千億個夜晚（大傻無比迪）Click here！

18. 沒有你贏了世界又如何（大傻無比迪）Click here！

《2018七月雙傻鬼門開迷你癲唱會精華版》

 

天靈靈～地靈靈～七月十四鬼門大開～一首驚天地，泣鬼神嘅Highway Star，就連Deep Purple聽到都會馬上跪拜柏盛哥！

 

呵呵～能夠請到鹹校長本尊做呢次癲唱會嘅嚇窒嘉賓，我哋雙傻認真夠面子！

 

我就係華朗～你老豆疊羅漢～一不做！二不休！索性交個咪比校長唱晒成首！

 

吓～乜嘢話？Over～Over～收唔清楚！請問盛哥你而家係咪喺度噏緊火星話？拜託可否幫我同Robin Gibb、Maurice Gibb問句好？

 

嘩嘩嘩～楓華哥！今日真係好榮幸可以請到你嚟做我哋癲唱會嘅……喂喂喂～你做乜向住個出口起勢咁跑呀？

 

OH～楓華哥話收得嗰雞碎咁多嘅歌酬真係唱多幾句都嫌費事！嗯～當務之急，唯有就請返我哋嘅山寨版蔡楓華出嚟頂住檔先啦！

 

人生於世上有幾個知己～多少友誼能長存～今日別離共你雙雙兩握手～友誼常在你我心裡～今天且有暫別～他朝也定能聚首～縱使不能會面～始終也是朋友～嗚嗚～

 

咳咳～年紀大，機器壞，今次就唱住咁多先！多謝晒山頂同山腳嘅朋友！Bye Bye～


特別鳴謝廿年好友柏盛哥所送嘅生日禮物，呢啲陳年老古董真係啱晒我心意。

喵～CoCo＆Me 生活瑣事雜誌（2018年7月號）完，下一期嘅出版日期，我想肯定會是在～冬～季～