穿著窄身西裝的潮店老闆 - 李克勤三十周年紀念專輯《30克》

我對上一隻買嘅克勤唱片，數數手指，已經要數返去2013年嘅《復克》。自從俾陳詠謙大師首〈姐姐〉嚇親之後，搞到我有一段時間唔太敢再去接觸克勤嘅新歌，而事實上，除咗〈鑽石人生〉 、〈紙牌屋〉、〈生活大爆炸〉同〈戀愛為何物〉之外，克勤喺2012年至2015年呢段期間所推出嘅嗰堆作品，我真係大多數都聽唔入耳！

嚟到2017年，克勤嘅舊公司環球就搶先幫佢出咗隻《復克II》，起初見到隻碟個封面咁有型，都有少少興趣將佢買返屋企，但當我仔細望一望啲曲目……妖～原來全部都係揀返佢喺《我是歌手》唱過嘅嗰堆歌！仲要用埋啲死人罐頭式唱法去演繹，我只係試聽咗一陣咋～就頂唔順想放低個耳筒。

喺上年6月，當克勤對外宣布將會加盟英皇娛樂，有過半數勤迷都唔太相信同願意接受呢個事實。嚟到今日再調返轉頭一睇，唔知大家又覺得克勤當日呢個決定，又有冇為佢嘅歌唱事業帶嚟一啲新嘅衝擊呢？嗱～我份人就唔係咁市儈嘅！佢嘅轉會費有幾多？夠唔夠供兩個仔去外國讀書？呢啲嘢真係關我餐蛋治咩？我哋做歌迷最關心同最在意嘅，就梗係佢啲歌嘅質素啦！當舊公司環球仲喺度不停炒緊冷飯，新東家英皇就一心要打造一個全新面貌嘅李克勤。於是，佢哋就搵咗喺咁多年以來同王菀之合作無間嘅馮翰銘（Alex Fung）幫佢監製呢一張蓄勢以待嘅頭炮大碟。呢位80後音樂才子喺過去為Ivana同容祖兒等歌手寫過唔少膾炙人口嘅hit song，亦幫克勤監製過一堆歌，而我先前提及過嗰一首嚇到我打冷震嘅驚世巨作〈姐姐〉，剛巧就係出自呢位人兄嘅手筆。所以聽聞克勤隻碟將會搵佢做製作人，個心就即時涼咗一截！喂～你兩位大哥唔係諗住又玩返喺《在森林和原野》玩過嘅嗰啲花臣吓嘛？勤哥～呢隻話晒都係你嘅三十週年紀念專輯，咪搵啲咁嘅嘢玩好喎！不過又話分兩頭，佢今舖冇走去搵陳詠謙同Johnny Yim做幕後班底，基本上我已經要謝天謝地兼柯彌揭諦！

學查小陰話齋，連明眼人都睇得出，克勤近年係好想迎合班後生樂迷，無奈力不從心，你哋可能會屌鳩我尖酸刻薄喺度玩雞蛋裡挑骨頭，冇突破又話人不思進取，試新嘢又話人哋攞嚟搞！但各位請細心啲去諗下，一個四十幾歲仲要有兩個仔嘅已婚男人成日走去啲賣潮tee嘅boutique度揀衫，懶理旁人恥笑你衣不稱身都死要堅持。所謂突破都分好多種嘅～無需要刻意去做一啲同自己風格唔吻合嘅嘢嚟話畀人知你有幾緊貼個潮流！當你嘅大師兄張學友已升華到識得用餘生去愛嗰陣，你就選擇停留喺粵語歌個Comfort Zone度原地踏步，完全冇諗過去苦練下嗰口爛到爆嘅國語，反而樂此不疲咁屢次拎嚟做賣點搞爛gag！更大煲嘅係，你本身擁有咁紮實嘅填詞功底，居然就哽得落〈姐姐〉同〈你最重要〉呢類齋睇啲字就想作嘔嘅歌詞，仲要拎埋嚟做主打，計我話呢兩份歌詞莫講話張學友同陳奕迅，連尹光、朱咪咪睇到都唔一定會收貨啦！



睇完克勤同陳詠謙幫〈姐姐〉平反嘅呢一段YouTube片，我當堂嚇一跳，然後得啖笑！心諗：「搞乜你兩兜友可以用咁樂觀嘅心態去分析一件咁撚荒謬嘅事？」喺訪問中，陳生就解釋話〈姐姐〉並唔係一首膠歌，而係一首Cult歌，聽完陳大師嘅呢番解說，就令到小弟更摸不著頭腦！Ed Wood、Quentin Tarantino、三池崇史、園子溫……佢哋會唔會狗衝出嚟話自己係Cult片界嘅代表人物先？一部電影或一首歌Cult唔Cult，唔係應該由觀／聽眾嚟去定奪嘅咩？邊有人會咁唔知醜自認係Cult界乜乜乜㗎？再講，以歌頌菲傭為題材嘅歌曲喺香港樂壇其實絕唔罕見，早喺N年前，林海峰同周博賢已分別寫過〈最菲精選〉同〈菲情歌〉，前者風趣鬼馬兼而有之，後者則道盡晒一眾菲傭離鄉別井嘅嗰一份辛酸嘅心情。有時候，如果你啲作品係好嘅，自然就會有人欣賞，無須喺度諸多解釋（掩飾）。

陳詠謙喺近呢六年幾乎變咗做克勤嘅御用詞人，亦睇得到克勤係好欣賞呢位後起之秀，由買物寫到碌卡，由非凡人生寫到高山低谷，論創意論話題性，陳詠謙都算係勉強掂到條合格線嘅，有時喺佢身上，仲會隱約見到「80's詞壇鬼才」林敏驄嘅某啲影子。咁當然，同樣係創意無限，兩人嘅寫詞功力同文字根基實在係差天共地！若以電影人嚟作比喻，林敏驄肯定係劉鎮偉嗰種級數，而陳詠謙頂多只會係黃精甫、杜緻朗之流，即是空有構思，間唔時鍾意喺啲稜角位度玩下花巧掩眼法嚟魚目混珠，好似〈天河〉呢類輕描淡寫嘅小品咪畀你呃呃騙騙過到骨囉！再深入寫落去，就難免會出現破綻百出嘅情況，頻頻喺啲唔應該落筆嘅地方度落筆，感覺上似係喺度玩緊填字遊戲，尤其係喺早年，佢就更加將呢種特色推到極致，每次只係將堆啱音嘅字放入首歌度搏命左塞右塞，徹底忽視成份歌詞嘅結構同內容，呢種空洞鬆散嘅寫詞手法，唔只辣㷫一班資深樂迷，亦惹嚟唔少網民給予負評。

面對洶湧而來嘅劣評，陳詠謙所作出嘅回應就係搬晒成個樂壇出嚟做掩護，逢親睇見陳大師嗰副沾沾自喜嘅招積樣，加埋佢嗰份莫名其妙嘅自信，都會不其然令我諗起林子善喺電影《半支煙》嘅一段對白：「嘩～你咁春蠢㗎！厄爾尼諾現象都唔知點解！嗱～厄爾尼諾現象呢就即係話……好Q勁咁解！」識得固步自封，固然係能夠立於不敗之地，但連半句批評都包容唔到，咁同啲圍威喂嘅小圈子選舉又有乜分別呢？我明白周身G點係麻煩啲㗎喇！凡係望到啲唔順眼嘅言論，咪最叻屈人係Haters，責怪人哋理解力低，先冇辦法領悟到佢哋嘅境界，再攞正牌肆無忌憚咁亂寫一通，呢班人心裡面最想得到嘅唔係你嘅真心支持，而係靜靜去享受嗰種居高臨下、萬人膜拜嘅假風光，踩到嚿屎千祈唔好嫌臭，仲要揞住良心拍手叫好。喂！你班大帝自我感覺良好，呢啲係閣下嘅事！我哋唔一定需要奉旨配合你㗎吓話？一個消費者用真金白銀去買咗一張正版唱片返嚟，唔通連寫下真實嘅內心感受都唔得？咁你班友咪仲惡過共產黨？

咪以為我對香港班填詞人好有偏見，自問亦唔係一個只會懷緬過去嘅老頑固，相反，我一向都好尊重一啲用心創作嘅好詞人，佢哋喺文字差唔多俾人用盡嘅時候仍定期交到功課，單係呢一點已經令我深感佩服。舊一代嗰堆填詞人的確喺樂壇立下過唔少豐功偉績，並唔代表新嗰批後輩個個都冇貨賣，小克、林若寧、周博賢、Tim Lui，同埋包辦新碟八成歌詞嘅梁栢堅都係喺2000年後先開始寫詞，咪一樣寫到啲令人留下深刻印象嘅好歌。

李克勤 X 梁栢堅，當住家好男人遇上爛鬼作詞人，到底會產生出乜嘢化學效應？望一望梁栢堅幫克勤寫嘅嗰四份歌詞……嗯～可能係為咗遷就克勤嘅風格啦！又或者係克勤本身都唔想喺呢張三十週年大碟度搞咁多風風雨雨……所以向來詞風挑釁又踩界嘅PK（梁栢堅），今次就好明顯比以前規矩咗，既冇寫出好似〈C餐〉呢類抵死到肉又將啲字玩到出神入化，同〈篋神〉呢種盡情諷刺時弊又極具爭議性嘅歌詞，亦唔見有〈雲圖〉呢種寫得咁細膩同有意義嘅作品，但係喺〈恭喜你〉同〈30克〉入面，就依舊見識到呢位「抽水詞神」貪玩搞笑嘅一面。

唉～鬼叫我個人又outdate又奄尖咩！當身邊班後生仔都走埋嚟同我講：「阿叔！聽粵語流行曲梗係旋律同編曲行先，其次就係Vocal，啲歌詞填得好唔好就冇乜所謂啦！如果歌詞對一首歌真係咁重要，咁你聽英文歌、日文歌嗰陣又知唔知人哋噏緊乜先？」嗱～咪話大叔睇唔起啲Local嘢，亦唔係話外國嘅月光就特別圓，我只係想問下，由流行音樂界國民教育「搞靚衫」大行其道嗰日起，有幾多首廣東歌嘅旋律同編曲係勁揪到衝出國際先？啲音樂未做到世界級水準就要人跟你嘅步伐去行？會唔會開玩笑咗少少呀？好老實講，假如你張碟啲音樂係達到達哥隻《麻木》咁嘅Level，我仲會理你咁多嘢咩？我唔係話要貶低晒香港啲作曲人同編曲人，而係按照班後生仔個邏輯嚟睇嘅話，咁點解詞壇大師林夕會俾人當係神咁拜？何解開親作品展嘅佔70％都係啲填詞人？試下再諗遠啲，周杰倫若然冇咗方文山，佢喺華語樂壇嘅成就仲會好似而家咁高嗎？羅大佑同李宗盛之所以會俾世人稱為大師，主要係因為佢哋喺邊方面嘅才華呢？再唔明咪上網摷返舊陣時嗰啲乜鬼嘢《台灣百大唱片排行榜》嚟睇下囉！喺個榜上面排頭幾位嘅專輯，一概都係以歌詞行先。

有好多時下嘅年青人都認定我哋呢班老屎忽咁注重啲歌詞係一種行為上嘅倒退，但站喺我嘅立場嚟睇，身為一個土生土長嘅香港人，又點可能對自己最熟悉嘅語言毫無要求呢？我知道呢類咁主觀性嘅議題，就算再拗落去都係唔會得到一個明確嘅答案……與其無止境咁互相企硬，不如就嘗試尊重一下對方嘅諗法啦！正所謂鹹魚青菜各有喜好，聽歌呢樣嘢就從來都冇高低之分嘅！正如一碗拉麵最重要嘅係麵質、湯底定抑或係啲配料？相信每個人嘅選項都會唔一樣！咁就先唔好理人哋個準則係點，只從客觀嘅角度去睇，要成為一首流傳萬世嘅華語經典，係必須要具備多樣條件，除咗旋律、編曲同歌詞，仲要配合埋天時地利人和同歌手本身嘅音樂Sense先成就到整件事，但音樂Sense呢家嘢就唔係人人都有嘅！咁若果你係冇嘅，咪交畀你經理人同啲幕後人員去搞囉！理得你個人幾叻都好，都要揀返啲適合你嘅嘢嚟做先得㗎！即係你唔會見到甄妮有一日會無啦啦行出嚟同人講，話要轉型去做個熱力四射嘅勁舞Dancing Queen，趙傳喺個演唱會度亦唔會揀啲超低音嘅歌嚟折磨觀眾，呢啲嘢真係冇得亂咁嚟㗎！試幻想下，如果叫關正傑同張國榮將啲歌冚唪唥掉換嚟唱，聽完包保嚇到你瞓唔著呀！

咦～聽你咁講，好似李克勤呢啲齋賣靚聲嘅歌手，唔玩返演奏廳系列或索性轉攻口水歌市場，係咪只有死路一條？咁就當然唔係啦！要數同歌詞有關嘅高分佳作，2009年嘅《Threesome》咪係當中嘅表表者，而成個Project亦好適合佢呢類感情內斂嘅歌手去做，特別係表面平靜，實則殺人於無形嘅第三Plug〈二十四城記〉所描述嘅都市現象，嗰種對援交妹由憐生愛又要故作鎮定嘅無力感，真係一巴巴咁打落去嗰班經常跟隊批評佢唱歌似機械人嘅樂迷塊臉度。講到喺旋律同編曲上嘅重大突破，喺同年推出嘅專輯《Today Special》入面，克勤就請咗一班後輩歌手為佢度身訂造多款唔同類型嘅曲風，出嚟嘅效果仲相當唔錯，嗰份濃濃嘅麻甩佬浪漫情懷瀰漫住成隻碟，聽落都幾過癮㗎！

遺憾嘅係，呢兩張專輯喺當時所引起嘅迴響並唔係咁大，迫使勤叔後嚟又要走返去扮花𡃁仔，所揀嘅歌亦越嚟越偏離佢個age，一次又一次推翻喺叱吒頒獎台上講過嘅「西裝論」。去到近幾年，呢位著住老西嘅潮店老闆仲會間中利用「撚聲」嚟取悅一班年輕客仔，典型例子有今次新碟嘅第二Plug〈C3PO〉。呢啲Gimmick大過一切，潮童氣味又咁鬼重嘅「兵仔歌」，交畀方力申、周柏豪、陳柏宇、吳業坤或「不老童音」股巨肌唱就OK啫！至於阿勤哥……查實呢～你喺N年前染晒金毛唱〈高妹〉，我已經覺得個feel有啲怪怪哋，更何況你近五十歲人先走去玩埋啲兵仔歌路，咁咪即係似足無記以前啲電視劇叫汪阿姐同司棋姐扮返學生妹，又或者係迫劉華唔著唐裝玩Hip-hop，同埋捉梁朝偉去演孽念深電影啲角色咁！冇話唔得㗎！只係成件事望落好Q夾硬囉！總之做嗰個又尷尬，睇嗰個仲尷尬！



相比之下，由克勤親自填詞嘅〈五十路〉就討好得多，雖然佢嘅歌詞同〈C3PO〉一樣都係「歌名大過歌詞」，而喺內容方面亦冇乜中心點，去到Chorus部分咪又係左砌右砌咁囉！幸好，輕快清新嘅旋律，配上克勤悠然自得嘅演繹，恍如帶聽者遊完一場車河咁，令人心曠神怡。

個歌手可唔可以將歌詞入面嘅意境帶到出嚟？佢把聲夾唔夾首歌？個人適唔適合做呢件事？呢三樣嘢確實係好緊要㗎！我夠膽講，香港有一半以上嘅歌手，都唔太理解歌曲內裡係表達緊啲乜！先唔講嗰啲五音不全齋賣樣嘅偶像派，事關呢類花瓶根本唔配被稱之為歌手！我家吓想講嘅，係嗰堆有啲資歷嘅老牌唱將！呢班前輩好奇怪，一到咗某個階段啲打公仔心態就會浮晒上嚟，每次出show就如同例行公事咁，有時都冇認真睇下份歌詞寫乜就拎起支咪，求其唱啱晒啲音咪收工走人。我試舉一個例子：大陸有位熱愛鳩嗌嘅巨肺歌后，佢個名叫做韓紅，呢支國家級重型大炮曾經完成過一項極之驚人嘅創舉，就係用唱〈義勇軍進行曲〉嘅方式嚟去演繹趙傳首〈我很醜可是我很溫柔〉，個驚嚇程度仲恐怖過你入戲院睇十次《失眠》。睇到呢度，崇尚本土文化嘅哥哥姐姐一般都會屌出聲：「妖～I'm a proud Hongkongers！大陸嘅嘢關我叉事咩？」好！唔講大陸，就近近哋講返我哋香港堆唱家班！幾年前，喺個乜鬼群星演唱會度，葉振棠就唔知挑起邊條筋走去翻唱楊千嬅首〈小城大事〉， 點知唔唱由自可，經佢金口一開，小城大事即刻變咗做好大件事！或者你又會話：「唓～阿Faye同Eason夠成日hea唱啦！咁人哋又唔會有呢啲問題嘅？」係㗎！有種人天生就係有本錢打天才波，亦解釋到，因乜解究陳奕迅唱現場咁唔穩定，啲人都係會仆街咁仆去睇佢嘅演唱會！無論佢唱得有幾衰，表現得有幾咁晦氣，佢有樣特質就始終都係獨一無二，就係唔理你將啲乜嘢歌擺入佢個口度，佢都可以將佢哋處理得好通順，駕馭能力早達神級。王菲就仲犀利，那怕佢成晚齋企喺個台度依依哦哦，都照樣有本事感動到你！呢啲係天分，即老天爺賞飯吃，並唔係隨便搵個人就取代得到，呢一類能夠將腐朽化為神奇嘅天才型歌手，真係廿年都唔知出唔出到一個！

咁一個歌手冇天分，係咪等於乜嘢都唔使玩？嗯～又唔一定嘅！林憶蓮同張學友，一個係由零變有嘅最佳模範生，一個即使上到歌神呢個地位，仍然會不斷發掘自己嘅音域極限。咁若果你又冇天分又唔想努力呢？咪唯有交畀你個Producer去搞囉！一個Producer嘅重要性究竟有幾高？你淨係睇下黎明同鄭伊健喺90s嗰堆hit歌就知啦！提到黎明，大家仲記唔記得另一位天王郭富城喺出道嗰時咪俾人串過雞仔聲嘅！但城城偏偏就屎忽撞棍，運用呢個特點將一堆充滿少男情懷嘅糖衣情歌詮釋得鬼咁入心！由此證明，所謂夾唔夾，同唱功又唔係必然畫上等號嘅，對此，擅長使用「無病呻吟扯蝦功」去帶人入局嘅麥浚龍同周國賢應深有同感，呢兩位哥仔漏氣還漏氣，缺氧還缺氧，人哋就至少係喺度唱緊啲啱Style嘅歌，成個package睇落係合情合理。反觀克勤……我唔知係佢嘅音樂Sense差，定係班Producer有心整鬼佢啦！當啲小朋友準備要考上大學嗰陣，身為教師級人馬嘅李生竟然就走返去幼稚園學ABC！喺呢十幾年裡面，我經已唔只一次聽過啲製作人話要將李克勤tune返做一個正常人，而克勤本人似乎亦好樂意朝著呢個方向去行……到後來，呢班製作人仲會要求克勤唱得粗豪啲，甚至係搞爛把聲，務求達到佢哋想要嘅嗰種真實效果，卒之咪暴露晒克勤嘅各項缺點。



你話我保守又好，死板又好，啲硬谷出嚟嘅感情又會有幾真實呢？再者，一個出色嘅Producer就等同化妝師，係要適當地將Artist嘅先天缺陷遮蓋，而唔係將你老闆推出去剝光豬遊街示眾！喺呢方面，馮翰銘喺克勤今次隻新碟度就表現得好稱職。將呢張《30克》反覆聽咗幾十次，唔計〈C3PO〉 同〈一個都不能少〉，碟入面啲歌都畀我有一種煥然一新之感，不論喺曲風同唱法上都幾有驚喜，同時又喺中間攞到個平衡，比如上面呢一首頹廢味極重嘅〈恭喜你〉，克勤唱起嚟就終於唔會好似斯文佬講粗口咁，呢個轉變真係非常之唔容易。

稍為對克勤嘅歌唱歷史有所認識，應該都唔會忘記，喺開完04年嗰一次《左麟右李》後，李生把聲已廢咗一半武功，導致佢後期每唱到一啲比較高音同需要用到「實聲」嘅歌，就會出術用混音同假音輕輕帶過，而隨住年紀變化，佢嘅唱腔同埋用聲嘅方法亦同以往有好大分別，佢嘅假音同混音聽起嚟十分之陰陽怪氣，啲高音又變得好模糊好唔集中，十足十啲入咗水嘅耳筒咁！喺呢段時間，克勤就作出咗幾個新嘗試嚟keep住自己嘅人氣同賣碟量，例如係叫好又叫座嘅《演奏廳》系列，同搵Eric Kwok幫佢轉過另一種唱法去迎合大眾，仲因此而得到佢人生第一座「金曲金獎」。

〈花落誰家〉嘅成功畀到克勤喺唱腔上有一個全新嘅啟發，並決定要繼續沿用呢種避重就輕又慳水慳力嘅唱法去演繹歌曲，因而令到把聲長期都處於極不自然嘅狀態，終日冇釐神氣，情況要去到2009年先有返些少改善。喺重傷過後，克勤嘅唱功就始終冇法子同佢「高清亮」嗰段時期相比。有見及此，環球就立刻將佢掟去Hi-Fi碟嗰邊企圖混淆視聽，但又畀佢哋誤打誤撞殺出一條新血路，亦令我哋發現，克勤嘅中音同低音原來仲未打柴，而且仲比以前更加醇厚同有味道。只可惜，與此同時，環球對佢投放嘅資源亦相對地大幅減少，以致克勤喺各方面嘅發展都畀人有一種停滯不前嘅感覺。



直到兩年前，克勤喺祖國歌唱節目《蒙面歌王》中呈現出回勇嘅跡象，令我深深體驗到人民幣嘅魔力有幾強大。話之你個節目喺香港嘅評價係閪定Like，結果論就係，靠住一首有如行雲流水嘅〈富士山下〉，加上同容祖兒喺紅館嗰12場好評如潮嘅演唱會，就一嘢省靚返克勤呢部「人肉CD機」個生招牌，而喺同Joey合作嘅過程裡面，我認為克勤或多或少都有受到呢位後輩所影響，尤其係喺唱法上，除咗越嚟越跟貼到個潮流，亦保留到佢獨有嘅個人魅力。



吸收完多位後輩嘅日月精華，克勤喺掌握啲風格較為新潮嘅歌嗰時，就顯然冇之前嚟得咁拘謹。幾鍾意佢喺呢張新碟度同RubberBand主音6號合唱嘅〈黑膠〉，李克勤，繆浩昌（6號），一杯係入口溫醇嘅紅酒，一杯係口味濃郁嘅威士忌；一個係出道於黑膠唱片年代嘅資深唱將，一個係喺千禧世代崛起嘅80後Band友，估唔到呢兩把聲混合埋一齊會毫無衝突同違和感，而克勤喺合唱嘅部分又突顯到自己嘅靚聲優勢。有啲樂迷話想克勤唱得再Chillax啲，我覺得又冇咁嘅必要，再Chillax啲嗰個就唔係李克勤嚟㗎喇！此外，亦想讚一讚馮翰銘嘅編曲做得極其到位，柔和抒情嘅氛圍，配合埋嗰堆鳩噏到上太空又懶有品味嘅歌詞，聽起嚟似係兩條中產麻甩走咗入一間好高級嘅清吧度扮上等人，就咁坐喺個吧檯度拎住杯酒無無謂謂吹咗成晚水。「看！最簡單的對話是如此！」講得啱！麻甩佬之間傾偈啲內容本來就係咁Q無聊！



若果抽起份歌詞，淨係留意〈給歌迷梁小姐的公開信〉嘅旋律同編曲，驟耳聽落去，佢只係一首好普通嘅溫馨小品，然後，當嗒真啲梁栢堅所寫下嘅一字一句，你就會領略到首歌嘅深層意義，一個收埋喺糖衣底下仲鋪滿洋蔥嘅催淚故事。冇乘機利用啲Sad到爆嘅配樂 + 慘絕人寰嘅詞句去營造煽情氣氛，亦冇搬晒滿天神佛過嚟同你瘋狂說教，反為用一種好輕鬆嘅態度去同一位唔喺人世嘅歌迷Say聲Hello，嗰份感動係慢慢咁滲出嚟，正面得嚟又不落俗套。

〈失魂記〉成首歌似曾相識，前段同後段嘅旋律，同陳奕迅首〈Shall We Talk〉至少有七成相似，而個編曲手法亦令我諗起Do As Infinity首〈Yesterday & Today〉。夕爺愛徒林若寧從枕邊人嘅角度出發，再一步步去探索失智病患內心嘅嗰一份徬徨同無助，份歌詞係就係寫得平鋪直敘咗啲，但起碼打動到人又make到noise，而克勤嘅演繹大致上算係OK，從語氣、層次到情感鋪排都落足功夫，係每當唱到“追yeah”個高音位，把聲就會即刻變得乸乸哋。

作為克勤加盟英皇後嘅首支單曲，〈一個都不能少〉喺質素上無疑係合格有餘。佢嘅旋律悅耳流暢又易記，又Show到克勤一貫長氣嘅犀利好唱功，Wyman份歌詞論故事性就唔算好強，需要配合埋個MV先令個畫面感大大提高，但勝在簡單易明，喺結構上亦比其他作品完整，又能發揮到激勵人心嘅作用，絕對係一首不可多得嘅佳作，美中不足嘅係，將呢類風格咁鬼成熟嘅歌放喺呢張潮味十足嘅專輯裡面，畀人個觀感就有啲格格不入。



當我第一次聽到呢張紀念專輯嘅點題作〈30克〉，只係聽咗30秒左右，我就由心而發咁笑咗出嚟！先用七首經典勤歌做Background Music，再以A Cappella嘅形式去編排，個Concept盞鬼得嚟又唔覺突兀，唯一缺點係長度太短，似足啲唱片公司特登將每首歌cut到淨返10幾秒嗰啲新歌試聽版咁。由出道、拍劇唱到做無記契仔拎勁歌金曲獎，再由老婆盧淑儀、偶像譚詠麟唱到阿叔食煙同蒙面啟賢，最鬼正嘅係連送禮事件都搬埋入歌詞，中間仲要搵嚟炳文哥客串唱返兩嘴，當中嘅幽默，係要有返咁上下資歷嘅克勤歌迷先至感受得到！

《30克》好歌推介：黑膠、給歌迷梁小姐的公開信、失魂記、一個都不能少、30克


眨下眼就做咗克勤嘅歌迷廿幾年，睇住佢由有頭髮變冇頭髮，再由冇頭髮變咗做金頭髮又變返做黑頭髮，其中嘅一啲起起落落，確係令我意想唔到……

哈～唔知道有冇人會有過我呢種感受，當你默默支持咗一個人好多年，到有一日你先漸漸察覺到呢個人嘅思想、思路、思維同真實嘅一面，同你一路以嚟所諗嘅完全係背道而馳。細個嗰陣，我以為克勤係一名天生嘅歌唱家，將來勢必會走「港版Andy Williams」呢條路，殊不知幾年前，佢竟然走出嚟話自己嘅目標係做一個爛gag歌王，仲學人搞埋「棟篤唱」添！坦白講，筆者大大話話都做咗廿鳩幾年死忠，除咗個別嘅真心膠事件之外，我真係冇一刻覺得李克勤好笑過，由始至終，佢嘅強項就只有唱歌，佢所演嘅劇集、電影同主持嘅綜藝節目，我通通都唔識欣賞！

經過幾個世代變遷，我先發現克勤其實係冇我想像中咁有風骨，甚至比香港班打工仔更能屈能伸，唱歌撈唔掂咪去拍劇囉！冇碟出咪走去做勁歌主持囉！做厭勁歌主持咩？我直頭撈埋講波佬都仲得！問你死未？

我諗克勤喺星光年代都對自己嘅歌唱事業有過好大抱負，佢試過專誠飛去美國學SLS，一心想修正震音過多同唱腔守舊呢兩個問題，又孖住周啟生作出過唔少大膽嘅改變，佢唱過搞Gag怪歌、唱過Jazz、唱過Blues、唱過Rap，喺90s中期，佢啲高音粒粒爆到盡，簡直將條聲帶控制得揮灑自如，呢段時期嘅李克勤，先真正配得上「零瑕疵歌手」呢個稱號。只能講句時也命也，喺唱功達到最巔峰嘅時候並冇得到佢應有嘅輝煌成就，而1995年嗰10場票房慘淡嘅演唱會，就爭啲搞到李生一蹶不振，性格仲越來越莫薑……

受到佢偶像譚詠麟嘅影響，喺2002至2003年，當克勤憑著〈高妹〉同左麟右李一躍成為全城熱爆嘅最受歡迎男歌星，佢嘅行事作風同待人接物嘅態度就突然嚟個180度反轉。佢講嘢圓滑到冇晒稜角，啲歌又商業到暈，畀人個feel勁似Sales Manager，而當有埋小朋友之後，佢嘅心態直程成個公務員咁。我以前成日都會諗……假若克勤嘅偶像唔係譚校長而係張國榮，咁佢整個人生係咪會即刻唔同晒？佢嘅演藝生涯又會因為哥哥而起咗啲咩嘢變化呢？

有段時期，克勤嘅hea唱功力可謂登峰造極，當我以為李生團火已經熄晒嘅時候，佢喺《蒙面歌王》首集嘅表現，令我知道條友唔揸流灘原來係唱得到咁嘅水平，半年後佢上《我是歌手》同郎朗即席現場合作嘅〈我不會唱歌〉，就更加Show埋畀所有人睇佢仲有大把貨賣！對於有人屌柒李生上大陸搵人仔，又話參加《蒙面歌王》呢類節目係一種恥辱，我嘅睇法係……唓～家陣玩下蒙面啫～做歌手都要搵食㗎！唔上《我是歌手》唔通上《勁歌金曲》咩大佬？只要佢唔好學似某啲天王巨星咁……對住香港人就亂鳩咁唱閪晒口面，上到大陸就即時施展國粹玩變面咪得囉！Come On！No Big Deal！

數十年匆匆過去，睇見克勤依然走緊一條隨波逐流嘅商業路線，個心都係會有啲戥佢唔抵……但站喺李生個角度去睇，今時今日嘅李克勤就絕對稱得上係一個人生大贏家！佢有家庭有地位有身家有人脈，仲有車有樓有舖頭，圈中老友又多到數唔晒……而家佢得閒就同啲屋企人去下旅行，唔係就同老婆去英國睇下波，同兩個仔砌下Lego，呢種寫意嘅生活態度都唔知幾咁happy！

PS：部份照片係轉載自各大報章同李克勤嘅Facebook專頁。

相信我百分之一百係九成歌手眼中最乞人憎嘅嗰一類樂迷，雖然我同普羅歌迷嘅諗法係一樣，都認為要支持自己喜歡嘅歌手，最直接嘅做法當然係行入唱片鋪買佢哋嘅正版CD，唔同嘅係，一般歌迷對住偶像通常都係採取一種有讚冇彈嘅態度，再Die-hard啲嘅就會帶埋隻碟去參加個歌手嘅簽名會，實行嚟個近距離接觸。有啲人會希望有一日可以同深愛嘅藝人變成朋友，有啲仲會將其視為家人咁看待。而我嘅諗法就比較現實，我拒絕盲目崇拜，更討厭時下嘅造神文化，我欣賞一個歌手，就只會單純去欣賞佢喺歌唱方面嘅成就。至於佢嘅為人係點？政治立場係乜？鍾意啲乜嘢球隊？有冇包二奶或者係畀帽人戴？我真係完全冇興趣知道！喺我心目中，歌手同歌迷之間只係一買一賣咁簡單，唔需要包含太多私人感情喺裡面，除非好似林志炫呢一類對於我嚟講有特殊意義嘅歌手又另作別論。

我不嬲都有一個習慣，每次買隻唱片返嚟都會即刻將佢擺落部機度重覆聽十幾次，再寫篇短短嘅聽後感做紀錄。喺Yahoo Blog仲好鬼盛行嘅年代，都有唔少人睇過我所寫嘅一啲唱片聽後感。想當年，我嗰種諸多挑剔十足百彈齋主嘅寫文作風，曾為我樹立一大班「網上仇家」，有啲激進少少嘅歌迷仲試過日夜轟炸我Email同咒我死全家添！但我當時心諗……我本身又唔係啲乜嘢出名嘅Blogger，只係一個純粹鍾意分享音樂同電影嘅無聊人，況且我都係就返件事實話實說啫，又冇對任何人作出人生攻擊，區區嗰幾十隻網絡小螞蟻，真係怕佢老母有牙咩？所以喺往後嘅日子，我都堅持沿用返呢種風格去寫樂評／影評，直至近呢幾年眼疾日漸嚴重先逐漸減產，有時就算係寫好咗一啲感想，都未必會將佢哋放落個Blog度。諗起上嚟，自《紙牌屋》之後，我足足有四年冇寫過一篇完完整整嘅唱片聽後感，萬萬諗唔到，事隔四年，到我有意欲再次執筆寫樂評，篇文入面嘅主角居然咁啱得咁蹺又係同一個人，世事往往就係咁鬼玄妙。

追加感想：話說噚晚無意中見到有一位識咗好耐嘅舊Blog友喺佢嘅社交平台上轉載我呢篇看後感，仲寫咗一大段文字去回首昔日嘅一啲點點滴滴，真係冇諗過自己嘅文章曾經令到咁多人產生過共鳴，呢一切實在係太滾動喇！音樂果然係全世界最好嘅溝通語言！🎶

因為我寫嘅文章而令到更多人認識到一啲石沉大海嘅好歌同好唱片，呢個就係我一直堅持寫Blog嘅最大動力。✏