林子祥X李克勤拉闊音樂會2011觀後感

13/9/2011 「903id club 拉闊音樂會“林子祥x李克勤”」Rundown

開Show時間：晚上八時三十五分
完Show時間：晚上十時三十分

01. 沙漠小子（李克勤、林子祥合唱）
02. Victory（李克勤）
03. 寂寞嘍囉（李克勤）
04. 罪人（李克勤）
05. Medley：零時十分／黎明不要來／祝福／莫再悲（李克勤）
06. 天河（李克勤）
07. 孔明燈（李克勤）
08. 深深深（李克勤）
09. 飛花（李克勤）
10. Devoted To You（李克勤、林子祥合唱）
11. 學生哥（李克勤、林子祥合唱）
12. 分分鐘需要你（林子祥）
13. 最愛是誰（林子祥）
14. Medley：追憶／單車／空凳（林子祥）
15. 這一個夜（林子祥）
16. 千支針刺在心（林子祥）
17. Medley：愛情陷阱／夏日寒風（林子祥）
18. 憑著愛（林子祥）
19. 敢愛敢做（林子祥）
20. 海市蜃樓（林子祥）
21. Ah Lam日記（李克勤、林子祥合唱）
22. 紅日（李克勤、林子祥合唱）
23. 數字人生（李克勤、林子祥合唱）


觀後感 :

開Show前，萬分期待，完Show後，好鬼失望。
估唔到個Show嘅合唱部分會咁少，
而選歌方面亦都唔算話有好大嘅驚喜，

尤其係克勤，所揀嘅歌幾乎全部都係打穩陣牌，
開場佢哋合唱〈沙漠小子〉嗰時係威係勢，
等我仲以為個Show往後一定會有好多驚喜添～但點知……


先講克勤嘅Solo部分，
一開始嘅〈Victory〉四平八穩，但就冇斟埋阿Lam叔一齊玩，
唉～實在係太可惜喇！一首咁好玩又咁啱佢兩個發揮嘅歌，
竟然淨係得克勤自己一個人獨唱，
我覺得如果佢可以拉埋Lam叔入去Jam返part嘅話，
咁成隻歌出嚟個效果肯定會〝爆〞好多囉！

我頭先都講過，克勤噚晚所揀嘅歌，接近90%嘅曲目都係打緊穩陣牌，
〈飛花〉、〈深深深〉、〈天河〉、〈罪人〉……
呢堆歌喺先前嘅小交演唱會度都有唱過，
而成晚令我較為驚喜嘅，就有上兩隻專輯嘅第二Plug〈寂寞嘍囉〉，
不過克勤就唱得認真麻麻哋，有好多假音位都發揮得唔係咁好，
〈罪人〉就一如以往，唱Live冇次唱得似樣，
至於新歌〈孔明燈〉就唱得幾投入，但首歌本身嘅質素就好普通。

整個Solo部分，我最鍾意嘅係首慢歌Medley，
特別係克勤唱〈零時十分〉嗰陣，把聲真係好靚好soft！
但我起初以為會有機會聽到嘅〈似夢迷離〉同〈最愛是誰〉佢就冇唱到。
綜合全場嘅表現嚟講，我認為克勤嘅演出只屬一般，更有些少〝Hea唱〞feel，
仲有呀～〝Hea〞唱都算啦！仲要成晚喺度搞埋D爛GAG！
乜嘢勾搭李林，仲話可以搵「李派林喼汁」做贊助！
嘩～勤哥！D GAG爛成咁！想凍死人咩大佬！哈哈～

基本上全晚嘅高潮位，九成都係嚟自成晚俾克勤嗌佢做祥哥嘅Lam叔，
睇完成個Show，確實不得不佩服祥哥寶刀未老嘅深厚功力。
而家嘅祥哥，儘管聲線同狀態都遠不及當年，
連我女朋友都話聽得出佢唱歌唔多夠氣，
但係經驗老到嘅祥哥，就係有辦法將D經典唱出另一種味道，
例如係將〈Ah Lam日記〉改成慢版，唱出嚟有少少Reggae味道，簡直係cool爆！

另外，〈這一個夜〉同〈愛情陷阱／夏日寒風〉又係好鬼死正！
雖然D高音聽落有D flat flat哋，但嗰一份「擋不住的blue風情」確係令人難以抗拒，
相比起〝Hea唱當食飯〞嘅李生，祥哥直頭係「為你唱足一百分」！
講真呀～當我聽到佢嗌破喉嚨唱住〈敢愛敢做〉同〈海市蜃樓〉呢類痴Hi線作品，

嗰種搵命搏嘅精神，真係要套用〈Ah Lam日記〉嘅一句歌詞：「我服你真係服到你就五體投地！」

嚟到最期待嘅合唱環節部分，除咗〈Devoted To You〉嗰度夾得好正之外，

感覺上勤哥同祥哥就好似例行公事咁，火花欠奉之餘又大失水準，

連我一開始對佢哋充滿信心嘅〈Ah Lam日記〉快版，
出嚟個效果都係一塌糊塗，克勤仲差D成段甩晒添！
（話時話，01年克勤同Lam叔合唱嗰個版本又的確係太勁揪嘅！）

可能係因為Lam叔大部分嘅歌都非克勤能夠駕馭得到，
仲記得克勤喺開場冇耐就同大家講：

「如果唱千億個夜晚同誰能明白我嗰D你哋都估到啦！唔會有驚喜！」
我當時心諗：「勤哥！你唱千億個夜晚同誰能明白我呢D先夠驚喜呀！
我真係好想睇吓你會用乜嘢方法嚟唱後面D高音位！XDXDXD～」 

嗯～但總括嚟講個Show都算OK啦！雖然係有D失望，
但淨係睇阿Lam叔完全唔錫聲嘅落力演出，我就已經覺得值回票價喇！

《林子祥 X 李克勤》呢個組合，相信會再合作嘅機會就唔係幾大，
老實講，克勤係唱家班，呢個事實絕對係無庸置疑！
但睇返成個香港樂壇能夠夾到Lam叔嘅後輩歌手，就始終都係得陳奕迅一個。

題外話，我真係好想知拉闊新嗰首主題曲到底係邊個唱㗎？
嘩～實在係難聽到嘔！開場前仲要播成十幾次，真係攞你命三千‎！！

《香港仔南記》？我細細個就聽過呢個名喇！

十幾年冇食過，D嘢難食咗好多，連我細個最鍾意食嘅四寶河都係！
所以話有時有D嘢……真係往事只能回味。