《特別號外 之 10月生活記事本》

由於成個10月都忙到甩肺，同時又要發表一篇寫咗有一段時間嘅音樂文章，所以有關上個月嘅一啲生活點滴，我就選擇將佢哋放晒喺呢篇Blog入面，當係做個記錄。

俗語有云：「一日之計在於晨。」開工前點都要食返個早餐先夠精神！大快活為慶祝50週年學人玩懷舊致敬，連消失N年嘅小丑logo都要重出江湖，計我話，如果貴公司肯復刻埋舊時個餐牌價錢同食物份量，咁先為之係最貼題呀！

一連串嘅港片謝票場／包場，加上全球矚目、一票難求嘅《Coldplay Music Of The Spheres》世界巡迴演唱會 (阿根廷布宜諾斯艾利斯站) 線上轉播，搞到戲院上上下下嘅高層同員工都非常緊張。坦白講，自己平時冇乜點聽Coldplay啲歌，咁當然，對於〈Viva La Vida〉、〈Yellow〉、〈Fix You〉、〈Paradise〉、〈The Scientist〉呢啲Top hits梗係會好有印象啦！但數到本人最鍾情嘅〈Easy To Please〉，喺當晚就未有機會聽得到。

有時候，世事嘅嘢往往係好難預料，相信大部分嘅80後中佬中女，都冇可能會估得到有一日由黃子華主演嘅電影票房竟然會全面屌打“浩南哥”鄭伊健，而喺戲裡面，“子華神”仲可以一次過咀勻兩大宅男女神鄧麗欣、林明禎，正宗係行返個尾運。

近日熱爆全城嘅【正義迴廊】，我老早就睇咗試片喇！能夠喺兩個幾鐘頭之內做到接近零冷場，去到結尾都依然令人意猶未盡，配合埋一班演員嘅用心演繹，到目前為止，都稱得上係2022年最高質素嘅港產片，唯一美中不足嘅係中段敘述有少少混亂，同希特拉嗰啲虛實結合嘅穿插橋段亦表達得太過刻意，反而仲大大削弱咗故事本身嘅原有張力。喺獎項上，飾演第二被告唐文奇嘅麥沛東簡直係100%神還原，完美複製原型人物謝臻麒嘅一舉一動，估計肯定會同【踏血尋梅】嘅白只一樣橫掃金像、金馬同電影評論學會嘅男演員獎；飾演第一被告張顯宗嘅楊偉倫邪氣逼人，係衰在外表望落太老成，實在好難說服到其他人佢只係得29歲；飾演資深大律師嘅蘇玉華同林海峰一個就用力過猛，舞台劇痕跡太明顯，另一個就棟篤笑上身，講對白又似足背廣告slogan咁做作；久違大銀幕多年嘅周文健喺導演嘅巧妙運用之下，成功將佢嘅口音特色變成長處；飾演兩位被告家屬嘅朱栢謙、楊詩敏表現恰如其分，相當出色，帶領觀眾瞬間入戲；由一眾綠葉組成嘅八人陪審團每一句對白都超有記憶點，例如係借用美國低智殺人魔Ottis Toole嘅案件嚟做例子，特別要讚一讚邱萬城同葉蘊儀嘅精彩演出，為一場黃藍老中青嘅立場角力增添咗唔少現實色彩。

各位動漫迷，由Neofilms策劃嘅【多啦A夢～時光機之旅2009-2015～】重映計劃現正啟航，Are You Ready？

拖咗差唔多成個月，終於都睇咗由原作者鳥山明親自擔任人物設計、故事同劇本嘅【龍珠超：超級英雄】，本來一心諗住入場睇野比飯表演，點知睇睇吓先發現，原來佢契爺魔童叔叔先至係呢套劇場版嘅主要靈魂。

嚴格嚟講，部戲嘅情節十居其九都係炒冷飯，最離譜嘅都莫過於係將斯路設定為一個毫無個性嘅腦殘怪物，之後咪又係例行公事趕收工咁囉！作為一個由細睇【龍珠】睇到大嘅麻甩佬，望見咁嘅情況，確實係有些少唏噓。

魔～貫～光～殺～炮～悟飯喺結局使出師傅教落嘅絕招打低final boss，唔再係用典型嘅“龜波氣功”或者係“元氣彈”嚟做收場，都算係全片最令我感動同驚喜嘅地方。

擱置咗好耐嘅法式西餅店總算裝修落成，喺開張當日，我邀請咗一大班卡通界名人幫忙剪綵，就連久未露面嘅戰損獨臂雙魚黃金聖鬥士都有抽空出席，認真係夠晒面子！

吓？咩嘢話？港府突然立例話要禁止本少爺出席所有戶外活動？我啱啱先約咗Joker剪完綵去中環BBQ喎！(設計對白)

咳咳～麻煩請呢隻蝙蝠快啲飛返去你嘅洞穴裡頭！人嚟！落閘！放狗！帶走！(設計對白)

嘿嘿～唔講你唔知，放映佬只係我嘅表面工作，其實我真正嘅身份係一個幼稚園園長，從事如何有效地減少同一堆蠻不講理嘅野獸家長產生磨擦，以及盡力阻止班上嘅未成年小童提早打茄輪。

係咪每一件玩具嘅官圖都必定會比實物靚仔嘅呢？呢一盒由日本動畫公司株式会社ぴえろ出品嘅「幽☆遊☆白書Minifigure Collection Vol.1」，就證明凡事都總有例外嘅！

提到【幽遊白書】，早排去赤柱探監路經銅鑼灣皇室堡，咁啱見到地下中庭有一個「秋祭動漫精品市集」，於是我就二話不說揞荷包買咗個幽遊咕𠱸同靚靚牡丹鎖匙扣返屋企。

探完囚友倍思親，因為疫情關係，我都有成兩年冇拜過嫲嫲同爺爺。

面對離開嘅人我哋要多多懷念，對住在世嘅人我哋要好好珍惜，閒時就同老母飲吓茶⋯⋯

仲要用心品嚐老豆所煮嘅每一味佳餚，千祈唔好以為呢一切都係必然。

隨住年紀增長，我而家先深深體會到何謂人生苦短，亦好享受同家人、女友、朋友相處嘅每一分每一秒，唔會再好似以前咁下巴輕輕得把口，免得老來先嚟抱憾話當年。

位於尖沙咀金巴利道40號MW Plaza地舖嘅人氣燒肉店牛繁，我好早之前已經想帶姑姑過嚟開餐㗎喇！

牛繁三點盛合 ($558)，包括特上牛胸腹肉、上級M9和牛腹肉、中落牛肋肉，另加牛舌盛合 ($148) 同一碟上級M9薄切和牛里脊肉配月見汁 ($108)，CP值極高。

好少燒肉店會連啲前菜都做得咁有水準，實屬難得，埋單太約千二蚊唔講上好平，但絕對係值回票價。

麥文記／麥奀記／麥兆記，同樣係麥氏家族嘅一份子，到底邊一間先係名副其實嘅雲吞麵世家？個人嘅首選係位於佐敦白加士街51號地下嘅麥文記麵家，皆因呢度啲雲吞／水餃皮薄餡靚，蝦肉爽口彈牙，湯底清甜冇味精，麵質又有韌度。

擁有最多分店嘅麥奀記樣樣嘢都平平無奇，粒雲吞就微型如乒乓波，直頭係搵鳩笨柒！

曾經係三者之冠嘅麥兆記近年不思進取越做越差，個湯鹹到仆街唔在講，啲麵條又硬如鐵線，只有碟蜆蚧鯪魚球叫做保持到應有水平。

另一間大不如前嘅食店，係位於佐敦吳松街141號地舖嘅泰國菜館THAI-IN，曾令我讚不絕口嘅生蝦刺身、蠔仔炒蛋同街邊燒牛肉，味道通通打個六折！

試咗咁多劣食，都係時候要食返啲好嘢中和吓！扎根香港40年嘅佳佳甜品，堪稱港式糖水舖嘅最高指標，口感香滑嘅家傳石磨芝麻糊、一試難忘嘅粒粒紅豆涼粉，連巨星發哥都讚好。

恭祝你福壽與天齊，慶賀你生辰快樂，年年都有今日，歲歲都有今朝，恭喜你～恭喜你～衷心祝願姑爸每日都身體健康、風調雨順、五福臨門、花開富貴、笑口常開、百事可樂、萬事如意、福如東海、壽比南山，感謝你同伯母生咗一個咁好嘅女人畀我！

慶生飯數何其多，找來找去都找唔完！一踏入10月第一筆要找嘅飯數，係由姑姑靚口認證嘅大婆兼我嘅終極NO.1好兄弟華Dee哥。

遲來嘅生日禮物，BANDAI [ROBOT魂] MS-06JC 陸戰型渣古II JC型 (ver. A.N.I.M.E.) Action Figure，小小意思，不成敬意，望大佬笑納。

嚟到月中，我除咗要幫二傻柏盛補祝之外，仲受佢所托為一班苦候多時嘅忠實歌迷準備一場別開生面嘅網上錄播癲唱會，另包全日伙食。

鑑於資金嚴重不足，今次我就碌爆人情卡搭膊頭call咗“結他之神”Jimi Hendrix返嚟做音樂總監。

Hello everybody～《2022同心抗疫 之 雙傻出海萬眾同樂癲唱會》現在正式開始！喂～究竟係邊個天才度埋啲咁有維穩意味嘅show名？同我拖佢出去斬！

有請今晚嘅主角，人稱“無敵K場鬼見愁”嘅“翻版楓華”，為大家帶嚟佢嘅首本名曲〈愛不是遊戲〉！

用尹光個腔口去唱〈友誼之光〉？睇過～又扮得幾似喎衰鬼！

記得喺2000年，你求其走入去一間K房，都總會撞著有班MK仔、MK妹喺度唱緊盧巧音嘅〈垃圾〉 、高雪嵐嘅〈絕〉、楊千嬅嘅〈抬起我的頭來〉、許志安嘅〈愛你〉、黎明嘅〈Sugar In The Marmalade〉、謝霆鋒嘅〈早知〉，仲有就係陳奕迅嘅〈黃金時代〉。

點樣用生命去影響生命？傻盛話：「睇住！我只示範一次！」

正所謂光陰似箭，日月如梭，16年嘅放映生涯匆匆而過，此時此刻，真係好想唱返首〈星光伴我心〉以示紀念。

凡走過高山低谷嘅人自會明白，縱使相識滿天下，可道心聲有幾人？能做到一路相伴不問理由，先係義無反顧真・老友！盛哥，從小學二年級認識至今，請容許我講一聲：「感激我遇見，世間始終你好。」

數數手指，我喺8月／9月／10月嘅唱K次數已超過2017年至2022年 (截至7月) 加埋嘅總和，再度聯同多位舊K友重拾昔日嘅少年時光，感覺十分回春。

When you walk through a storm～Hold your head up high～And don't be afraid of the dark～

At the end of a storm～There's a golden sky～And the sweet silver song of a lark～

Walk on through the wind～Walk on through the rain～For your dreams be tossed and blown～

Walk on, walk on～With hope in your heart～And you'll never walk alone～

呢排畀身邊班獌串到隻閪咁，冇計啦！鬼叫利記今季個狀態曳成咁咩！喺聯賽作客暫時從未贏過，贏完曼城、韋斯咸又輸畀榜尾森林，仲要畀列斯斬斷埋雲迪克嗰70場英超主場不敗紀錄，球壇羅賓漢神話再現，熟悉嘅海鮮氣味，激到成班利迷生蝦咁跳，高呼要FSG立即落台嘅聲音此起彼落，更有人重提高普嘅“7年魔咒”定律。

曾一手將利物浦推上世界之巔，喺執教期間為球隊贏盡各項頂級錦標，仲繼曼德拉後成為史上第二位外國利市榮譽公民，還看成個球壇，仲有邊位領隊有本事可以攞住每季雞碎咁多嘅net spend做到呢種程度？直接啲講，假如冇咗高普，利記根本乜柒都唔係！

明知班波青黃不接又唔科水買人，季季都想學阿記前教頭雲教授玩刀仔鋸大樹，淨係識養埋一大堆十字文員，相反，對住費明奴呢啲多功能兼且交足功課嘅模範員工就無動於衷，遲遲拖住人哋份約唔續，偉大嘅F$G集團，果然係名不虛傳。

屌～你哋班友識條春咩！11萬週薪包6個月Anfield Staycation連手術費，直程係爽歪歪！多謝各善長股東慷慨解囊，芬威萬歲萬歲萬萬歲！(設計對白)

佢，拍過無數爛片；佢拍嘅電影，荼毒全港青年無數；喺佢嘅鏡頭下，每個女人都係白痴。仲鳩拍？成個影視圈畀你搞cheap晒喇！我真係唔明，點解到今時今日，都仲有觀眾會對由孽大導一手包辦製作嘅劇集有丁點期望？開講都有話：「停一停，諗一諗，葉念琛作品，教撚壞女人。」我諗，只要稍為對呢位出晒名粗製濫造又鍾意譁眾取寵嘅腹黑肥叔叔有啲認識嘅人，睇怕都唔會再中佢伏啩？

講開劇集，最近，有為數唔少嘅朋友都不約而同話呢條泡菜佬個樣似我，針對呢班友仔嘅講法，我當堂嚇一跳，然後得啖笑，不過話時話，雖然唔想承認，但事實上，綜合近十年咁多個畀人話過似我嘅明星當中，呢位人兄個款都算得上係人模人樣，至少唔係肥腫難分、甩皮甩骨，而更重要嘅係，身處喺韓流盛行嘅現今世代，畀人話似韓星都唔見得係一件壞事。

控制咗個病半年，現時狀況算係so far so good，之但係一堆因病而起嘅後遺症，例如係暴肥、甩頭髮、面部紅腫等問題就唯有擺埋一邊話鳩之佢！反正呢廿幾年嚟，我都慣咗做“鬼影變幻球”嘅永恆VIP代言人。眨吓眼都活到近40歲，與其事事怨天尤人，倒不如嘗試放開懷抱，咪再繼續玩慢性自殺，盡量活好每一日，學習同自己重新相處，睇見啲賤人落難嗰陣咪係咁意笑吓，見到班閪佬閪婆走埋嚟扮friend我得閒咪交吓戲講聲友誼永固，唔得閒咪即刻啟動自動潛水模式囉！總之萬事開心至上！

自COVID-19爆發以嚟，平均每3至6個月就會出現新一波嘅變種病毒，望住條女中完阿媽中，阿媽中完老豆中，返到公司，幾乎各個部門都有三至四個帶菌者，最誇張嘅係有次九兜友去打邊爐，其餘八個中晒，我依然仲係安然無恙，莫非當真如某同事所言，喺朕體內確係存有新變種人嘅基因特質？

做過Dear Jane歌曲〈最後一間唱片舖〉嘅MV佈景，喺80年代，由黃耀明、李麗珍主演嘅電影【戀愛季節】都有特登喺度取景，位於恒豐中心經營37年嘅豐美唱片 (原名：精富唱片) 終宣布光榮結業，身為實體唱片die-hard支持者嘅我，就喺佢哋last day前一日專誠入嚟打個卡。

初步粗略計算，我屋企啲CD數目經已超出7000隻，足以夠我聽埋個下半世，套用【大隻佬】一句為人熟知嘅謁語「萬般帶不走，唯有業隨身」，活咗咁多年人，都好應該要學識乜嘢叫做適可而止，拒絕盲目消費，仲立下決心要喺豐美揀選我人生所買嘅最後一張唱片，至於揀上面隻碟嘅原因係乜？無他嘅，只係純粹覺得個cover簡約得嚟睇落幾舒服，又一直有買開Katie Melua嘅album，並冇任何特別意思。

災難再三提醒世人生命無常，停筆前，想對韓國梨泰院人踩人慘劇嘅死難者同埋喺屯門龍鼓灘北朗村起火意外中喪生嘅貓貓狗狗致以最沉痛嘅哀悼，願逝者安息，生者平安。

特別號外 之 10月生活記事本 (完)，新一篇Blog嘅主題同推出日期將會係？唔好意思，等我聽埋下一首歌先慢慢再諗，好冇？

Holy shit！又要等？係咪唔招呼我先？你呀～你都墮到盡㗎啦！日日食長齋生仔都唔方有屎忽呀！長期走數冇口齒，就算揸住支筆寫幾萬字有咩用呀？吓！follow啲咁嘅Blogger，吔屎啦你！(設計對白)