2014年12月6日星期六

Welcome to my food court!

歡迎嚟到小弟嘅至尊food court!本店嘅美食包羅萬有,
中式、西式、日式、韓式、潮式任君選擇,包閣下睇到眼花撩亂唔捨得走!
晨早流流,不如就去食返個健康早餐先啦!
呢間位於九龍圓方商場嘅《Pret A Manger》,
店裡所賣嘅食物一般都係以輕食料理為主,好適合一班注重健康嘅keep fit人士。
Pret A Manger嘅產品雖然大部分都係預先整定,
但係喺包裝紙上就大大隻字標明係「日日新鮮日日清」,即係包冇隔夜咁話!

Pret A Manger仲有一個幾吸引人嘅特色同賣點,就係英國菜同多國嘅Crossover,
一款款令人意想唔到嘅新奇配搭,好似北京填鴨薄餅卷、小龍蝦牛油果三文治、
照燒三文魚壽司沙律,以及我最鍾意嘅山葵煙三文魚紫菜薄餅卷。
當英國菜mix埋日本料理到底會擦出啲乜嘢火花呢?
呢條睇落有啲似手卷壽司嘅紫菜薄餅卷,入面嘅餡料有煙三文魚、
青瓜、生菜、酸薑同白蘿蔔絲,再配上Wasabi同蛋黃醬,
混合出嚟嘅效果竟然出奇地夾,一咬落去個口感好爽脆,
酸酸哋又有啲攻鼻,個feel幾過癮,有少少美中不足嘅就係塊薄餅皮較為韌咗啲,
同埋單單一件紫菜薄餅卷要賣成$44確實係有啲貴。
食完件煙三文魚薄餅卷仲唔夠皮嘅話可以整多客公司沙律($32),
呢個盒裡面有什生菜、青瓜、車厘茄、雞蛋、雞肉同煙肉,
將所有嘢同法式沙律汁撈埋一齊嚟食,既好味又健康。

最近成日作感冒,都係時候要飲返支流感戰士($24)對抗病菌!~XDXDXD~
Pret A Manger嘅環境都算唔錯,簡潔企理得嚟又唔會太擠迫,
仲有提供Wi-Fi服務,等客人能夠一邊用餐一邊上網,十分方便。
Pret A Manger

地址:尖沙咀柯士甸道西1號圓方
Elements1樓1031號舖
電話:2196 8048
營業時間:星期一至
五:07:30 - 21:00星期六:08:00 - 21:00星期日:10:00 - 21:00

各項評分(五個為滿分)

食物質素:㊣㊣㊣
抵食程度: ㊣㊣
服務態度:㊣㊣㊣

環境: ㊣㊣㊣㊣
衛生:㊣㊣㊣


呢半年因為要同皮膚病搏鬥嘅關係,
除咗放假同宵夜之外,我每日三餐基本上都係以素食為主。
而呢間位於紅磡都會商場嘅《素食軒》,喺呢半年就成為咗我嘅晚飯飯堂。
呢度嘅素菜少油、少鹽、少糖,完全符合健康飲食嘅三大原則,
而且價錢又好合理,所以每到佛誕都一定會大排長龍。 

最搶手嘅$36三餸飯,啲餸嚟得快又去得快,保證100%新鮮。

我最常食嘅三種配搭,九成都係以綠色食物作為主菜。

一眾女士怕肥嘅話亦可以免費將白飯轉做餃子或者係芥辣素菜卷。

喺度建議大家千祈唔好幫襯素食軒》嘅碟頭飯、炒粉麵同湯麵,
點解?先講啲碟頭飯同炒粉麵,話就話即叫即炒,但就要等成半粒鐘先有得食,
仲要賣成$48一碟,個份量又唔係多過人,喂喂~我喺茶記食大大碟都係收我$35至$40左右咋!

然後再講下個湯麵,明明話係金菇肥牛素湯麵,
你求其拎啲麵筋嚟做假肥牛我都算啦!咁啲金菇呢?因乜解究會變晒做雞脾菇㗎?
碎麵筋、雞脾菇再加多幾條西洋菜,成碗麵望落去似係用啲餸頭餸尾煮出嚟咁,
食落係唔算好難食,問題係擺明唔值$35一碗囉!
 
《素食軒

地址:紅磡都會道6號置富都會8樓美食廣場

電話:3167 7127
營業時間:星期一至
:09:00 - 22:00

各項評分(五個為滿分)

食物質素:㊣㊣㊣
抵食程度: ㊣㊣

服務態度:㊣㊣㊣

環境: ㊣㊣
衛生:㊣㊣㊣


講開素食,又再介紹多間齋舖畀咁多位,呢間位於大埔寶鄉街嘅《多利民素食》,
啲嘢好食得嚟又夠多元化,價錢仲好實惠,缺點係間舖嘅地點比較偏僻同難搵,
若然唔係生日嗰陣姑姑帶我嚟呢度嘅話,我都唔知大埔原來有一間咁高質嘅齋舖。

哈哈~啲素菜款式真係千奇百趣、創意無限,實在係令人佩服佩服!
桂花炒素趐($78)& 西蘭花金菇如意卷($65),
食落去個口感好奇妙,像真度極高,再飲埋碗全無味精嘅鮮甜例湯,兩個字:滿足! 

有機會一定要試埋餐牌上嘅酥炸生蠔同發財好巿先得!呵呵
多利民嘅客飯套餐好受歡迎,幾乎係日日清咁滯!
而喺咁多款客飯當中,我自己最鍾意嘅就係羅漢齋($34)同脆皮素乳豬($36)。

姑姑最愛嘅香荔酥卷($60),配埋個酸甜汁嚟食,非常開胃。
 咦~睇落呢樹嘅早餐同下午茶都好抵食喎!
喺我食過嘅咁多間齋舖入面多利民素食都算係幾高水平,
食物唔錯款式又多變,係衰在啲餸菜稍為多油咗少少。
服務方面,多利民》嘅員工講唔上係禮貌周到,又唔會同你鞠躬講多謝,
但班叔叔嬸嬸就勝在真係好真誠咁去對待每一位客人,
你對啲餸菜有乜嘢唔明嘅地方,佢哋會好細心慢慢講解畀你聽,
你想攞多幾個外賣盒同膠袋又唔會托你手踭或者係黑你面,
一到晚飯時間,成班員工都只會推介一啲客飯套餐客人,
並唔會刻意sell你去叫間舖嘅貴價小菜,呢一點確係極之難得。
多利民素食

地址:
大埔寶鄉街43號地下
電話:
2650 8225 
營業時間:星期一至:08:00 - 22:00

各項評分(五個為滿分)

食物質素:㊣㊣㊣

抵食程度: ㊣㊣

服務態度:㊣㊣

環境: ㊣㊣
衛生:㊣㊣㊣


呢間位於大埔海寶花園地下嘅《武藏野》,
佢嘅前身其實係我至愛嘅日式料理店《御八築地》。
聲稱會沿用返御八築地嘅原班人馬,
嘿嘿~係真唔係呀?等我呢個長期食客入去分辨一下真假先!
足足一年冇嚟開餐,今次再度光臨,我發現呢度除咗換咗個門牌同老闆,
其餘各方面就一切如常,總之員工如常、擺設如常、服務如常,
至於食物質素亦依舊維持高水平,並冇因為易主嘅關係而跌watt。

拖尾嘅三文魚壽司($29)仍然係本店嘅最大特色。

左起:櫻花魷魚壽司($28)、海膽壽司($52)、辣味螺肉軍艦($28)
好兄弟華Dee最愛嘅牛油果軟殼蟹卷($38)。

要大力推介餐牌上嘅薄切三色魚生拼盤,之前試過一次,正到飛起!

燒物嚟講最正一定係呢個原隻醬燒魷魚筒($54),
將日本原隻魷魚燒熟,再掃上甜甜哋嘅日式照燒汁,入口煙韌彈牙又唔會過份乾身,超級好味!
足料又大份嘅鐵板金菇牛肉卷($46),個味道係點就要問問姑姑先知!事關細佬呢排戒緊牛!

鐵板牛舌得嗰兩串就賣成$45?好似貴咗啲喎!
總括嚟講,我認為《武藏野》最值得推介嘅始終都係佢哋嘅壽司、刺身、燒物同小食,
其他熟食例如係拉麵、烏冬、Pizza同石頭鍋飯,個人就只係覺得普普通通,冇乜特別。
記得六年前同姑姑去御八築地食飯,兩兜友嗌到成檯嘢埋單都係兩嚿幾水左右,
勢估唔到嚟到今日,我哋只係食到七成飽已經要畀成$689落樓(一個令人討厭嘅數字!),
可想而知,間嘢易手之後個加價幅度係有幾咁誇張,
可能正正係呢個原因影響啦!對比起以前,呢度嘅人流就明顯疏落咗好多。
武藏野

地址:
大埔安慈路1號海寶花園15號舖
電話:
2661 6928
營業時間:星期一至:11:45 - 15:00;17:45 - 23:00

各項評分(五個為滿分)

食物質素:㊣㊣㊣

抵食程度:
服務態度:㊣㊣

環境: ㊣㊣

衛生:㊣㊣

一個月前同華Dee去沙田食飯,無意中就發現到呢一間位於沙田中心嘅《丼丼屋食堂》。
呢間嘢喺下晝三點後會有一個「下午茶優惠之選」,驟眼望落去都幾吸引。
呢個係我點嘅滑蛋雞肉丼($53),味道都幾好,略嫌個滑蛋濕咗啲。
華Dee點嘅豚肉生薑燒丼($73),
聞落去好鬼香,我仲即刻偷咗佢一塊豚肉嚟食!~XDXDXD~

跟餐加$10可以換到兩款小食,當日我哋就揀咗炸牛肉薯餅同炸魷魚鬚。
嗯~講真,丼丼屋食堂啲嘢食算係唔差嘅,
但每人要畀成$80去食一個下午茶餐就認真係Holland Bank Cheque!
係就係畀人搵咗笨柒,但另一方面我又好想試下餐牌上面嘅其他食物,
於是,上個禮拜我就帶咗姑姑嚟丼丼屋再Encore一次!
重點推介一:特上盛大蝦海鮮丼($128
兩隻鮮甜爽滑嘅特大赤蝦,加上新鮮嘅三文魚、帆立貝、吞拿魚刺身同三文魚籽,賣相極好。

重點推介二:十勝帶廣名物豚丼(特盛),盛惠$108。

日式咖喱吉列豬扒飯($68)無論賣相同味道都好一般。

咦喂~右下角個泡菜豚肉鍋好正咁啵!下次再嚟試下先!

丼丼屋食堂

地址:
沙田橫壆街2-16號沙田中心3樓27號舖
電話:
2608 0708
營業時間:星期一至:11:30 - 22:30

各項評分(五個為滿分)

食物質素:㊣㊣㊣

抵食程度:
服務態度:㊣㊣

環境: ㊣㊣

衛生:㊣㊣

而家啲外帶壽司店開到成行成巿,
譬如係《爭鮮》、《魚尚》呢啲專賣「$3自選壽司」嘅連鎖店,
就更加係解決咗一班壽司愛好者嘅荷包乾硬化問題,
但正所謂一分錢一分貨,$3一嚿壽司會有幾好食?
我諗唔使我講大家都知道啦!
而我本身亦從來都唔會對呢類特價舖頭有任何期望,直到《風神》嘅出現……
呢間位於紅磡必嘉街嘅外帶壽司店,喺戒口之前我間唔中都會幫襯佢哋,
我覺得《風神》所賣嘅壽司同刺身的確係比《爭鮮》同《魚尚》高質好多,
而自從食過呢啲「優質平價壽司」,我就冇再入過《爭鮮》、《魚尚》度買嘢喇!

$28十件三文魚壽司,賣相味道皆良好,真係相當抵屌!
咪睇呢個雜錦魚生飯($40)好細盒咁,查實啲魚生同飯多到爆,
可惜個味道就同盒飯嘅價錢一樣,大概都係值40分左右!哈哈~

深受顧客歡迎嘅三文魚腩、劍魚腩、海膽刺身,睇落CP值都算唔錯。

啲酒如果唔係裝飾嚟就好喇!~XDXDXD~

以一間平價壽司店嚟講,《風神》絕對係合格有餘,
不論係食物同服務質素都係唔錯,有時候就算你只係幫襯買少少嘢,
佢哋都會畀一大堆餐具、鼓油同Wasabi你,唔會學似啲連鎖店咁斤斤計較,
衛生方面,呢度嘅公開式壽司工場亦畀人一種乾淨企理嘅感覺。

風神關東

地址:
紅磡必嘉街83號地下
電話:
3689 1378
營業時間:星期一至四:12:00 - 22:30星期五至日:12:00 - 23:00

各項評分(五個為滿分)

食物質素:㊣㊣

抵食程度:
服務態度:㊣㊣

衛生:㊣㊣


有日放飯時間畀我望到公司附近開咗一間新嘅韓國食店,
喺好奇心驅使之下,我就決定入間舖度試下佢哋啲嘢……
點知唔試由自可,一試就鍾意咗!相比起隔離街間《韓點》,
金媽媽韓國配菜》啲用料就明顯新鮮啲,特別係啲泡菜,真係好容易食得出個分別。
喺食物款式方面,呢間舖同一般嘅韓式料理店都係大同小異,
分別在於金媽媽嘅製作模式就較為「住家」一啲,並唔係單純嘅快餐店機械式出品。
舖頭內嘅佈置同擺設都充滿住一股濃厚嘅韓式風味,
仲會無間斷不停播放一啲韓國嘅音樂MV同綜藝節目,啱晒一班死忠韓迷。

餐牌上嘅飯餐基本上我已經全部試勻晒(B同C除外)!

重要推介金媽媽嘅炸醬麵($40)畀大家,呢碗麵就咁睇落去好似冇乜特別咁,
裡面嘅配料其實都係豬肉、薯仔、洋蔥同青瓜呢啲普通嘢,奇怪嘅係……
佢哋個秘製醬汁加埋一粒粒甜甜哋嘅韓國薯仔,就將成碗麵嘅好味指數提升咗幾個level。

好鬼足料嘅豆腐湯飯,辣辣哋幾醒胃,喺現時呢個天氣食就最啱。

一開始我睇錯咗個餐牌以為個F係泡菜豬肉炒飯,點知後來先發現原來係泡菜炒豬肉飯先啱。

所謂嘅「頭鍋」實則上就係韓式什錦拌飯。
擺喺近門口供客人免費試食嘅多款韓式小食,
有泡菜、炒蝦乾、蠔仔乾、魚仔乾、小魷魚仔同八腳鱆魚,
我自己就冚唪唥都試過晒,感想只有三個字,就係超好味!
啲$25壽司賣相麻麻咋喎!個觀感極廉價。
仲有炸雞、炒年糕、泡菜煎餅,嚟緊呢幾日等我一次過將佢哋放晒落肚!~XDXDXD~
金媽媽韓國配菜

地址:
紅磡湖光街3號地下
電話:
5180 6849
營業時間:星期一至:11:00 - 22:00

各項評分(五個為滿分)

食物質素:㊣㊣㊣

抵食程度:
服務態度:㊣㊣

環境: ㊣㊣

衛生:㊣㊣


試完中日韓美食,又帶各位嚟到太子一間好出名嘅西餐廳度鋸下扒……

位於西洋菜南街嘅《第尾牛扒》,係我巴打輝哥聲稱嘅特級好介紹,
呢度每逢夜晚都會擠滿客人,事關佢哋個Dinner set真係超抵食,
一個餐有湯有包仲可以免費揀多杯熱飲/凍飲/特飲,而且份量又夠大件。
好!先嚟飲返個頭淡湯先!碗湯夠熱,牛味夠濃,當真值十個Like!
輝哥最愛嘅鐵板肉眼牛扒($81)。

呢個係普通嘅鐵板牛仔扒($69)。

呢個係我點嘅鐵板什扒($81),食落去個口感都OK嘅,
兩塊雞扒嫩滑多汁,塊豬扒有啲豬氣味但都尚可接受,
不過條腸仔同啲薯條就唔多掂喇!先講條腸仔呀!
成條軟腍腍,似足條皺皮賓周咁,一啲咬口都冇!
再講啲薯條呢~就整得唔夠實,一放入口度就散到變成一嚿粉!

呢碟白汁磨菇雞扒天使麵($69)啲白汁杰撻撻,啲麵又腍坺坺,嗯~負皮負皮!

另外,我仲想私人送多一條負皮畀班「第尾侍應」,頂佢個肺!
個個十問九唔應,塊面仲黑撚過阿嬌,我同個朋友坐咗成五分鐘都冇人攞杯水我哋飲下,
唯一優點係班友仔收嘢嘅速度真係好快(其實呢個算係優點定缺點呢?哈哈~)。
第尾牛扒:大興餐廳

地址:太子西洋菜南街218-220號1樓

電話:
2380 3938
營業時間:星期一至:11:30 - 01:00

各項評分(五個為滿分)

食物質素:㊣㊣㊣

抵食程度:
服務態度:

環境: ㊣㊣

衛生:㊣㊣


以前每次同姑姑去德福MCL睇完戲都例牌會喺《池記》食晚飯,
原因係呢度啲嘢食品質幾好,環境又光猛整潔,係啲座位排得比較迫咗啲,令人出入好唔方便。
池記嘅早餐、午餐同下午茶個價錢都算合理,係個晩巿套餐揦脷咗少少,
就咁嗌碗艇仔粥加款小食埋單居然要$70?真係好過去搶!
馳名嘅金衣蟹皇粥($90),姑姑每次嚟都會嗌返桶慢慢嘆。

我嘅最愛 - 瑤柱鮑絲蝦籽蝦球湯飯($67)

消腫排毒好幫手,超好飲嘅熱薏米水。
隨餐附送嘅酥炸豬扒同蠔油菜心塊豬扒外皮好脆肉質好有彈性。
數數手指都有成幾年冇嚟過池記,早排睇完戲我就順道去咗位於朗豪坊嘅分店,
一坐低望望張餐牌,先發現佢哋個加價幅度又唔係想像中咁嚴重咋喎~確實係有啲估佢唔到!
價格冇乜點變,食物質素就有些少下降,
就以呢碗雲呑麵($34)為例,嗰四粒雲呑係幾正㗎~夠晒爽口彈牙!
但個麵呢~就硬到好似鐵線咁,正宗係少啲牙力都咬唔開!~XDXDXD~

池記

地址:九龍灣偉業街33號德福廣場一期F27號舖

電話:
2243 4022
營業時間:星期日至星期四:07:15 - 22:45;星期五至星期六07:15 - 23:00

各項評分(五個為滿分)

食物質素:㊣㊣㊣

抵食程度:

服務態度:
㊣㊣
環境: ㊣㊣

衛生:

隨住《陽光快餐店》執笠,冬菇亭嘅水準又每況愈下,
而《成發餐廳》亦繼續貫徹其邋遢本色,
再加埋喺巴士總站對出開咗冇耐嘅世界級垃圾食堂《意樂餐廳》,
迅即令整個彩雲成為飲食界煉獄,幸好,《桃園制作》嘅出現,
就為一眾冇啖好食嘅彩雲居民打咗支增食開胃針。
《桃園制作》嘅小菜客飯住家味好重,加$15仲會有多盅足料燉湯,
好適合一班成日無啖湯水落口嘅忙碌上班族。
雲耳勝瓜炒鮮魷($58)辣辣哋幾惹味,用嚟餸飯確一流!

桃園蝦仁炒滑蛋($58)啲炒蛋都幾滑,但就有啲散。
桃園霸王蔥油雞($58)好有雞味,但啲雞肉就鞋烚烚,仲有就係成碟嘢骨多過肉。

猴頭菇排骨燉湯,好足料,零味精,超好飲!
我姑姐點嘅手打魚腐米線 + 唐生菜($33)
有樣嘢值得一提嘅係喺呢間舖入面有一位好鬼臭串嘅男待應,
有次我同柏盛嚟食飯,呢條友唔只成日專登唔理啲客人,
仲夠膽兜口兜面串咗我兄弟兩次,跟住我怒啤佢,
佢就即時扮晒嘢咁喺度假笑,屌佢老味!欺善怕惡,簡直係不知所謂!
桃園制作

地址:彩雲商場A322號舖

電話:
2764 0118
營業時間:星期一至日07:00 - 22:00

各項評分(五個為滿分)

食物質素:㊣㊣㊣

抵食程度:

服務態度:

環境: ㊣㊣

衛生:


同樣出名係美食沙漠嘅馬鞍山(點解我住親啲地方都係咁?嗚嗚~),
只要你哋願意喺裡面細心尋找,就一樣都能夠搵到一啲唔錯嘅隱世小店,
例如富寶花園嘅《利苑小廚》、富輝商場嘅《天河食坊》,
同埋新港城一期嘅《Bro & Sis Yogurt Café》等等……
而今次我想為大家介紹嘅呢一間小店就係位於新港城街巿嘅某一個角落,
呢間超抵食嘅車仔麵舖喺馬鞍山已經有十幾年歷史,每日都人來人往、客似雲來,
尤其係下晝六點打後呢段時間真係插針都插唔入,搞到有時食碗麵都要食到好似走難咁。
唔想食車仔麵嘅話,你哋亦都可以試下佢哋呢度嘅炒粉麵、
碗仔趐、生菜魚肉、韭菜餃同埋好多款唔同類型嘅街頭小食。
辣魚蛋/牛柏葉/蘿蔔/粗麵($26)
魚蛋有魚味,牛柏葉夠爽口,蘿蔔夠腍又冇渣,
係衰在個麵就乾身咗少少,整體都有75分啦!
$6四件煎釀三寶,抵就的確係好抵,但唔知係咪啲嘢擺咗好耐嘅關係啦!
一擺落口就有一種凍冰冰 + 腥腥哋嘅feel!哈哈~果然係一分錢一分貨……
康泰車仔麵

地址:馬鞍山新港城街市S72舖

電話:
2633 5151
營業時間:不詳

各項評分(五個為滿分)

食物質素:㊣㊣

抵食程度:
㊣㊣㊣
服務態度:

環境:

衛生:


話咁快就嚟到宵夜時間,你哋話一班麻甩佬夜麻麻聚埋一齊最好去邊?
仲使問!梗係齊齊去滾啦!由於小弟份工經常都要開夜班,
以致我同班兄弟打邊爐嘅地方通常就只會局限喺太子同旺角,
事關呢兩個地方都係通宵車嘅集中地,想搵架車返歸都方便啲,
但係老實講,想喺凌晨時分嘅太子同旺角搵到一間平靚正嘅火鍋店實在係談何容易!
嗰啲乜嘢福苑金御德興》,真係聽到個名都打冷震!
好在後來,我嘅好兄弟華Dee就介紹咗一間位於旺角好景商場附近嘅《厚福火鍋》畀我。
呢間火鍋喺宵夜時段啲嘢真係抵屌到暈!
$1一個重慶雞鍋/澳門豬骨鍋、$38一客新鮮嘅厚切三文魚刺身、$20一支大青島……
夜晚九點後入座大部分火鍋配料仲一律六折㖭!
有好嘢當然要同多啲老友一齊分享啦!自從發現呢個邊爐好地方之後,
我成日都會約埋三五知己嚟呢度開懷暢飲、談天說地,真係快活過神仙!
但有一點我想提提各位嘅,係呢度一踏入凌晨十二點就會開始煙霧彌漫,
若果閣下係一個好怕食二手煙嘅人,咁我勸你最好就唔好喺呢個時段嚟幫襯喇!
~認真係好景不常!估唔到只係幾個月冇嚟……
呢樹經已轉型變咗做一個小菜場,雖然喺宵夜時段佢哋依然都仲有火鍋供應,
而且價錢方面亦冇乜點變,之但係可以選擇嘅火鍋配料就越嚟越少,
最離譜嘅就係連蝦同蠔都冇得叫!嗚嗚所以話有時候有啲嘢,真係往事只能回味。

三文魚刺身依舊係$38一客,但就由厚切變咗做薄切。  
好彩個$1澳門豬骨鍋重慶雞鍋仲仍然存在……
平心而論,以呢個價錢嚟講,轉型後嘅《厚福》啲嘢嘅質素都仲係幾OK嘅!
我諗呢度唯一一樣嘢冇變嘅就係《厚福》班待應嘅服務態度,
不停漏單、上菜奇慢呢啲通通都係指定動作,坦白講,嚟到今日……
我覺得呢班人唔願做嘅程度直程可以用行屍走肉嚟到形容,
不過我自己呢~就點都會體諒佢哋嘅!你哋試諗下呀
好哋哋一個正常人,又點會無啦啦變咗做一條全無生氣嘅喪屍呀?
唔使問都知班伙記肯定係受到公司嚴重欺壓定啦!嗯冇錯!一定係咁! 

最後,想請問各讀者有冇一啲平靚正嘅邊爐好地方介紹畀我呢
地點:太子/旺角,時間:凌晨時分,如果有嘅話,就請留個言話畀我知,萬分感謝!

為利記戒煙,為健康戒酒,Blog主喺度唯有以茶代酒,先行謝過!

厚福火鍋海鮮專門店

地址:旺角通菜街1M-1T號華發大廈1樓全層

電話:
2757 1228
營業時間:星期一至日07:00 - 04:00

各項評分(五個為滿分)

食物質素:

抵食程度:
㊣㊣
服務態度:

環境:

衛生:



每個鍾意打冷嘅朋友都要好好認住呢間嘢!信我!真係一級棒㗎!
講起上嚟,呢次應該係我第三次喺度同大家介紹呢間打冷檔,
我唔介意畀人嫌我煩,亦唔介意人哋懷疑我係咪收咗錢幫人賣廣告,
我只係想大聲講畀所有人知,我所寫嘅每一篇Blog個宗旨都好簡單,
冇陰謀㗎!淨係想同各位分享啲好嘢咋!~XDXDXD~
不厭其煩要再次推介一下呢間打冷嘅招牌芥辣墨魚片,
啲墨魚鮮味十足,肉質彈牙有口感,點埋芥辣同鼓油一齊食,Woo~簡直係人間美味!
 
爽口鮮甜嘅筍蝦、實淨嫩滑嘅韭菜豬紅,仲有就係多肉少肥膏嘅鹵水鵝片。

個蠔餅直頭就唔使多講啦!大大碟好似層層疊咁,真係極之襟食! 

蠔仔粥有分大、中、細三種size,任君選擇。

輝哥必點嘅鹹肉炒韭菜花,啲韭菜花好爽甜,啲鹹肉就同輝哥一樣咁鹹。
另外,紅伶飯店嘅生腸拼鵝腸又係令人好食到停唔到口!
嗱!有相為證㗎!上年柏盛、輝哥同鋒弟嘅生日飯我都係帶佢哋嚟《紅伶》搞掂,
個個食完之後都讚不絕口,證明絕無老點!~XDXDXD~

注意:紅伶嘅價格時不時就會有改動,所以喺度我就唔將佢哋嘅食物價錢標出嚟喇!
《紅伶飯店》

地址:佐敦吳松街19號地下
電話:2385 3524

營業時間:星期一至日:18:00 - 04:00

各項評分(五個為滿分)


食物質素:㊣㊣㊣
抵食程度: ㊣㊣
服務態度:㊣㊣㊣
環境: ㊣㊣
衛生:㊣㊣㊣


呼~一口氣介紹咗咁鬼多嘢,真係講到口水都乾!
等我去滿記》整返個飯後甜品潤下喉先! 
本人最愛嘅滿記》產品抺茶彩虹($36),裡面有抺茶雪糕、抺茶啫喱、
西瓜、木瓜、哈蜜瓜、芒果、椰果、紅豆,食完個感覺好滿足!嘻嘻~
我第二最愛嘅滿記》產品 - 什果椰汁豆腐花($33)
華Dee最愛嘅滿記》產品 - 抺茶豆腐花($32)

姑姑最愛嘅滿記》產品 - 南北杏雪耳燉木瓜($28)
近日佢哋promote緊呢個雪山系列,個人就真係冇乜興趣。
《滿記甜品》

地址:沙田沙田正街18號新城市廣場一期7樓704A號舖
電話:2602 6366

營業時間:星期一至日:11:30 - 23:30

各項評分(五個為滿分)


食物質素:㊣㊣㊣
抵食程度: ㊣㊣
服務態度:㊣㊣㊣
環境: ㊣㊣
衛生:㊣㊣㊣



又到聖誕又到聖誕踏入十二月,即係代表聖誕節又就快嚟到喇!
你哋計劃咗同自己嘅另一半、家人、朋友去邊度食聖誕大餐未呀?
假如仲未決定好嘅話,唔知我呢篇Blog所介紹嘅嘢又有冇畀到一啲諗法大家呢?
雖然喺呢個Foodcourt裡面就冇火雞、火腿、鴨肉或者係菠蘿腸仔供應
但有時候我覺得無論係聖誕又好,生日又好,情人節又好…… 
最緊要都係你同對方兩個食得開心啫!只要雙方都喜歡嘅話……
就算係喺大排檔度過聖誕又有乜嘢所謂呢?~XDXDXD~

162 則留言:

  1. 流感戰士係咩果汁?
    新港城果間車仔麵檔真係周時都逼滿人@@

    回覆刪除
    回覆
    1. 飲落去似薑汁又似橙汁又似菠蘿汁,應該係mix咗好多種果汁落去!不過唔知係咪心理作用呢?飲完支嘢我個人又真係好似好番啲咁喎!哈哈~

      刪除
  2. 好友*笑呵呵。゚開心星期六•*☀早晨+黃昏好☁
    ✿¤*¨⊹❀。今天又暖粒粒•*♡*゚太陽再出來呢。・゚゚❤⊹
    人生無幾多個十年嘛♪¤*¨♫*大家活得快樂啦♬°•♩

    回覆刪除
  3. 嘩勁呀Time Is Changing,呢篇Blog仲犀利過飲食男女!不過睇到個人好鬼肚餓!

    回覆刪除
  4. 真的有好多美食選擇吖^^

    回覆刪除
  5. 好勁呀! 你都食咗好多嘢呀! 謝謝分享! 週末愉快!

    回覆刪除
  6. 我對眼已經食飽啦,哈哈~

    回覆刪除
  7. 睇到我口水直流,好好睇呀呢篇blog,多謝你嘅用心同無私分享!

    回覆刪除
  8. 睇嚟打冷啲嘢都幾好食,不過價格浮動就唔慌會相宜了。
    甜品都好吸引!

    回覆刪除
  9. Pret A Manger海港城同其他好多地方都有, 不過不失咁啦.
    下次個臭串友上黎招呼你地, 即時彈走佢換人, 落足佢面XXD

    回覆刪除
    回覆
    1. 我都費事理佢!反正佢咁嘅態度都唔慌會做得長!

      刪除
  10. 晚安小子,多謝你所提供既100分飲食指南,尤其係介紹素食果part真係岩哂我!超正!

    回覆刪除
  11. 食匀九龍新界喎!揾日要試吓《丼丼屋食堂》,因為近我!

    回覆刪除
    回覆
    1. 火姐姐一定試下佢哋個特上盛大蝦海鮮丼!

      刪除
  12. hihi...枝仔嚟食嘢了,唔客氣啦!我正想講話你近來食素菜,係咪清減了好多呢?但再往下看,噢…你由圓方食到落大埔,想唔肥都難了!哈哈。。。枝仔有好介紹呀!新填地街,凌記,應該係打冷舖啩,佢嘅蠔仔餅超掂!同埋九龍城城南道,興隆泰國菜,呵呵。。。係我嘅至愛,有機會你都去試吓吖。。。

    回覆刪除
  13. 壽司和麵食以乎是你最愛, 很久沒到圓方了,
    賣日本茶葉的店有在嗎?

    回覆刪除
  14. DiDi你連食評都撈埋ar~~haha~~間武藏野好似好正咁wor~~

    回覆刪除
  15. 哈哈 , 你可以寫埋食評喇 !!

    回覆刪除
    回覆
    1. 哈哈~外面有咁多專業嘅食評喺度!我呢啲純粹係玩下啫!

      刪除
  16. 一次過介紹咁多間食店,要慢慢"消化"下先得^^

    回覆刪除
  17. 哈哈 你可以挑戰Alan食物焚化爐既皇者地位

    回覆刪除
    回覆
    1. 聽過佢喺電台同電視度講自己啲「威水史」,我諗我拍馬都追唔上佢!XDXDXD~

      刪除
  18. 嘩 你真厲害 走遍港九新界! 最吸引我的還是壽司呢! 我們這邊就是wasabi

    回覆刪除
  19. 呵呵~我投多利民同武藏野一票 !

    回覆刪除
  20. 看Teddy介紹的,就想去試試看!

    回覆刪除
  21. 你寫得很詳細,很有食家風範,不如看看我對這套電影的看法.
    http://blogcity.me/blog/reply_blog_edit.asp?f=YFP7GITUOH239628&id=687152

    回覆刪除
  22. 吾得了 , 愈睇愈肚餓 , 明天再睇 , 睡覺忘記肚餓 , 謝你詳細的介紹

    回覆刪除
  23. 寫食評都可以寫得咁生動,服鬼左你...
    我俾你寫第尾牛扒同厚福果兩段野笑鬼死左!
    不過睇哂篇野之後真係好想去試下間紅伶...

    回覆刪除
    回覆
    1. 貝加兄你一定要試下佢哋個招牌芥辣墨魚片!信我!食過包你話正!

      刪除
  24. 嘩!呢篇blog要食飽先好入,睡前要慎入!

    回覆刪除
  25. 嘩~咁多嘢食~真係睇到流哂口水呢~!

    回覆刪除
    回覆
    1. 嘻嘻~成日過嚟黃師奶妳嗰度黏餐,都係時候要禮尚往來喇!XDXDXD~

      刪除
  26. 另人口服心服的食品指南! 丼丼的十勝帶廣名物豚丼好味! 勝在煎得甘香而肉不乾 :)

    回覆刪除
  27. 大埔間多利民素食 , 我都覺得好味加抵食 , 呢間我都好鐘意幫襯呢~!!

    回覆刪除
  28. 初初以素菜為主,又慣唔慣呢??

    回覆刪除
    回覆
    1. 都唔會唔慣,因為我適應能力都算幾強!好似戒煙戒酒我都係用一日就戒咗!絕無藕斷絲連!呵呵~

      刪除
  29. 又係ㄧ篇勁有用既blog!已bookmark,多謝狂兄!

    回覆刪除
  30. 好耐沒有吃齋!
    原來大埔都有好多美食。

    回覆刪除
  31. 今次介紹認真豐富、啱晒胃食一族喇!

    回覆刪除
  32. 好正嘅一篇飲食blog,真係越嚟越欣賞你個種純粹真心想同人分享嘢嘅態度,甜品我都係淨係會幫襯滿記,鋸扒我就鐘意去花園餐廳多D!

    回覆刪除
  33. 最開心聽到又平又靚嘅壽司,而你講嗰間第尾牛扒西餐,看賣相我就覺得麻麻!
    同時好耐也冇去過打冷,睇到超想食,尤其是鵝、生雙腸,正!

    回覆刪除
    回覆
    1. 第尾牛扒以呢個價錢嚟講算係不過不失啦!

      刪除
  34. 我又係睇到食唔到~ (TT_TT)

    回覆刪除
  35. 紅伶之前在看到你的推介之後去了一敞,至今仍回味無窮。看完這篇後,下一站我應該會去試試多利民或是武藏野。真的謝謝你。

    回覆刪除
    回覆
    1. 俗流兄有冇試到佢哋個招牌芥辣墨魚片?

      刪除
    2. 第一道就試,果然沒介紹錯,不愧是招牌菜。

      刪除
    3. Yeah!以前去親一定要食兩碟先夠喉!

      刪除
  36. 嘩犀利 ~ 咁多嘢食...... 真係睇到眼花撩亂!!

    回覆刪除
  37. 咁多好嘢,真係要慢慢睇呀!謝謝!

    回覆刪除
  38. 好吸引ar~~件三文魚拖尾拖到好似婚纱甘~~😄

    回覆刪除
  39. "丼丼屋特上盛大蝦海鮮丼"。。。I love it too。。。^^。。。

    回覆刪除
  40. 華~你好有心機呀~~~~整理左咁多間食店~~
    山葵煙三文魚紫菜薄餅卷超吸引!!

    回覆刪除
  41. 好正的食評. 見到咁多美食, 真係想大吃一餐. 祝你有個輕鬆寫意的週二!
    ╔══ ೋღ✰ღೋ ══╗
    .✰✰ 天天開心幸福 ✰✰
    ╚══ ೋღ✰ღೋ ══╝

    回覆刪除
  42. 介紹得很詳盡,應有儘有,可謂各適其適,十分佩服TEDDY的心血食評!我俾100個LIKE!

    回覆刪除
  43. Pret A幾正,佢個卷同湯唔錯!#good#
    丼丼屋唔撚得啦,完全係天價吉野家,85蚊一個飯,得份量多過吉野家!:o):o)
    雖然個大蝦魚生飯好似好撚正 但要成$128:~( :~(
    Bewteen,間野美心D仆街大集團開架好似:o)

    回覆刪除
    回覆
    1. 丼丼屋係美心集團嘅咩?你唔講我真係唔知!個大蝦刺身飯真係幾正㗎!有機會你可以去試試!

      刪除
    2. 邊有巴打你咁有貨?:o) :o) 我呢D窮撚平時多數都係捱M記同飯盒:-( :-( :-(

      刪除
  44. 「第尾牛扒」肯定係全港最臭串食肆,幫襯佢好似阻住佢咁全程黑面
    明明見到你入去會扮見唔到你見到,你自己坐度左繼續唔show你
    menu都唔比個你,水更加唔洗指意有,去一次以後無再去過#ng# #ng# #ng#

    回覆刪除
    回覆
    1. 建議你去一次厚福,去完包你覺得第尾係親善食堂!

      刪除
    2. 我做乜鳩要貼錢買難受?[sosad][sosad][sosad]

      刪除
    3. 咪當係去感受下個氣氛囉!XDXDXD~

      刪除
  45. 打邊爐去德興啦,10 點後 $128位,都幾多野食下,蝦丸幾正#good#
    再唔係稻香啦,無任食但D野企理好多#good#
    甜品我鐘意MK甜牙牙幾好味,多選擇,但晚晚多人排#cn# #cn# #cn#

    最後又估下,今次blog壇比利到底又會咒死幾多間鋪呢? #hehe# #hehe# #hehe#

    回覆刪除
    回覆
    1. 多謝tommy仔嘅介紹,下次嗌埋班兄弟去試下先!

      刪除
    2. 講真,我覺得金媽媽真係有啲危,當然我唔希望佢會執!

      刪除
    3. 你都多餘:o)你想間金媽媽韓國嘢好就應該直頭對佢隻字不提先啱[sosadx][sosadx]

      刪除
  46. 好友✬¤*¨又係時候瞓覺豬喇º°*甜夢安睡☁☾。゚晚安★•*¨

    回覆刪除
  47. 我最想試呢幾樣!

    《多利民素食》桂花炒素趐($78)
    《武藏野》拖尾三文魚壽司($29)
    《金媽媽韓國配菜》炸醬麵($40)
    《池記》金衣蟹皇粥($90)
    《滿記甜品》抺茶豆腐花($32)
    《紅伶飯店》招牌芥辣墨魚片

    回覆刪除
  48. Flu Fighter 有沒有效??
    滑蛋雞肉丼我都會在家做; 不過會放在 cutlet 豬扒上.
    港式羅宋湯我都有做, 次次個個都飲哂; 不過覺得不是健康之湯.

    http://timelessdimension0.blogspot.ca/2013/12/christmas-dinner-2013-2013.html

    今年 Christmas 是做另一種湯.

    港食真是多姿多彩; 可惜我個胃沒有這麼大.

    回覆刪除
  49. 這麼誘惑的美食當前,想減肥也難呀。《Pret A Manger》的sandwich和salad我超喜歡。

    回覆刪除
  50. I love Pret A Manger. There food is healthy & delicious!
    DONDONYA is one of my favourite choice of Japanese food,
    because I love sashimi rice bowl very much!

    回覆刪除
  51. 防治感冒, 打流感針, 再加多飲果汁, 多吃水果.

    回覆刪除
  52. 而家好嘅齋舖真係越來越少,我就最like青松觀,D錦鹵雲吞真係無得頂...

    回覆刪除
  53. 打冷我去開砰蘭街新泉發,火鍋我鐘意去新星,紅伶唔記得去過未,不過睇落都幾正搵次去試試先!

    回覆刪除
  54. 謝謝你。
    不去測試,
    沒有理由。

    回覆刪除
  55. 武藏野拖尾三文魚 & 丼丼屋特上盛大蝦海鮮丼。おいしい!

    回覆刪除
  56. TimeTime,連食評都難唔到你,呢篇仲遍佈九龍新界,勁過食在紅磡1、2,好嘢!好好睇!

    回覆刪除
  57. 素食我至愛,不過一睇到條拖尾Salmon sushi就立刻想將佢一啖吞落肚,哈。

    回覆刪除
  58. 御八築地啲嘢份量不嬲都好大份,不論壽司、刺身、飯、麵、小食等都係。所以有咁多捧場客,真係有理由。

    回覆刪除
  59. 回覆
    1. 英文、德文、法文、俄文、日文、韓文、甲骨文......不能盡錄......

      刪除
  60. 素食軒和多利民素食會是我的首選。

    回覆刪除
  61. 哈哈,Openrice精華版,好掂。

    回覆刪除
  62. 好有心機的介紹,讚!
    對甜品最有興趣

    回覆刪除
  63. 我覺得丼丼屋好難食,我都覺得個滑蛋太濕,令到成件事好錯…=.="
    平時好少出去食日本菜,我覺得一般都好貴,我寧願去大喜屋放題。

    回覆刪除
    回覆
    1. 旺角兆萬最近開咗一間新嘅日式放題幾正!

      刪除
  64. 真喺眼花撩亂 , 有選擇困難症啊 !! 不過喬生身體不太好 , 唔好食咁多刺身, 生冷嘢食少少好喇 ^-^

    回覆刪除
    回覆
    1. 啲相好多都係一年前或者係朋友點嘅,我呢半年都好小心飲食!嘻嘻~

      刪除