2009年8月22日星期六

《LAUGHING GOR之变節》看後感

搵一個「Cult片之王」去拍一套商業片仲一早set定咗個框框畀佢拍,
好老實講邱禮濤都算得上係有所交待㗎喇!~
雖然成齣戲畀人個感覺好有以前無線電視電影種feel,
尤其係電影開頭用人物硬照嚟做演員介紹嗰度,直頭係跟撚足晒《學警狙擊》,
但衰在又跟D唔跟D喎!~可能係前期準備唔足啦!~
LaughingWendy變咗做失蹤人口都算,最多咪當阿Laughing哥花心囉!~
陳茵媺都唔夠仲要溝多件陳法拉但係最尾佢話去搵孝哥嗰度就真係有D離譜....
~乜Laughing一開始唔係跟天哥㗎咩?你哋開拍之前冇做research㗎?
如果撇除以上所講嘅呢D錯誤,其實套戲又唔係話好差嘅....
起碼唔算係爛片先囉!~至少成齣戲都冇乜悶場,對白又夠精警,
娛樂性亦夠豐富,特別係戲中有兩句對白就令我印象好深刻,
例如係一哥(黃秋生飾)話Laughing係臥臥底嗰度,
同埋有一幕冼Sir(元彪飾)同Laughing話佢越嚟越似一個真正古惑仔,
跟住Laughing就答佢:「唔似會死㗎哈哈真係抵死得嚟又應景
咁有讚當然亦都有彈,首先係成套戲個節奏真係有D怪怪地,
而個敘事手法又好鬼死亂頭講阿Laughing走緊佬,
轉個頭又忽然跳咗去D回憶片段度,成個編排簡直可以用雜亂無章嚟形容
每次當觀眾睇到最緊張陣,鏡頭一轉,無啦啦又變返做文戲,
又上又落,又落又上,咁樣真係好難令人投入到!~
玩臥底條橋唔係話唔用得,都唔好玩得咁走火入魔呀!~
首先Laughing係黑白臥臥底,然後車仔(黃德斌飾)係警察臥底....
跟住阿巢(李思捷飾)又係社團內部臥底,屌真係全部都痴Q晒線
而去到最尾潘Sir黃日華)同一哥又係唔知做乜鳩
兩條友無啦啦喺度互爆laughing身份,精彩黑白交鋒突然間搞到好似細路仔鬥氣咁
仲有就係個結局畀人個感覺似係budget唔夠迫住要埋尾咁款....
最大鑊係尾段場槍戰,出嚟個效果就有如狂風掃落葉一樣咁求其,
之不過算啦拍槍戰向來都唔係邱禮濤嘅強項嚟
果你想欣賞激烈槍戰場面嘅話,咁就不如去睇杜琪峯套《復仇》啦 

演面方面:
謝天華(Laughing): 
戲味欠奉,張力不足,身為主角帶唔起成套戲,畀兩大影帝搶晒鏡。
黃秋生(一哥):
戲份雖然多但發揮空間唔大表現亦只屬中規中舉。
題外話佐治童子Look真係好X核突
吳鎮宇(座頭):
𡃁坤上身癲狂演繹強勢回歸,成套戲最搶鏡個肯定係佢,
而D笑位亦差唔多係集中晒佢身上,其中有三幕真係笑到我標眼水咁滯
一係Laughing度,係佢臨尾無啦啦捉住Laughing同佢講
「仆街...仆街仔睇住我個妹呀三係有一幕佢畀人拉咗返差館,
但又好心急想救個妹就同黎耀祥講數叫佢幫拖,跟住黎耀祥個電話響....
鎮宇就無啦啦問「邊個打嚟直頭變咗做佢上司咁~XDXDXD
除此之外,喺尾段畀個妹用自殺嚟要脅佢放Laughing....
震乳哥滴眼淚,加埋佢嗰個百感交集嘅複雜表情,兩個字好戲
黃日華(潘Sir):
戲份唔少但唔係幾入戲,反而唔夠佢喺《復仇》度嘅客串演出咁有神采。
元彪(冼sir):    
每次D戲一去到佢嗰度就好似絕晒緣咁,個角色又似足個耶穌,正宗口水多過茶。
黎耀祥(阿武):
可有可無嘅一個閒角,成套戲動手多過動口但都幾搶戲。
曾志偉(福爺):
客串性質複製韓琛,無驚亦無喜。
李思捷(阿巢):
演技自瀆嘅問題依然十分嚴重,
拎起個酒樽爆Laughing氣勢弱過雞,
去到最後中槍死嗰幕更加係全場爆笑
~D戲誇撚到呢你估你而家拍緊《喜劇之王》咩大佬
陳法拉(Karen):
以初登銀幕嚟講表現尚算合格。
呂慧儀(一哥女友1號):
好搶戲嘅一個女角,但只係個角色搶唔係佢D戲搶。
葉翠翠陳爽周美欣(一哥女友2、3、4號):
行行企企衰過花瓶。
至於其他嗰D就算罷啦!~
根本就係TVB三線藝員齊串演,出咗等於冇出....
成套戲整體嚟講算係不過不失,因為一個公仔箱熱潮人物而趕拍出嚟嘅「即食片」,
我一早就唔會對個劇本有太大期望,但若然你只係想睇兩大影帝演技對碰嘅話....
放心!~畀足你~另外,睇完套戲,有好多觀眾都會有個疑問....
就係一哥到底係忠定奸嘅呢?我自己就覺得佢係奸嘅,但對Laughing就仲有少少情義咁囉!~

29 則留言:

  1. 黃秋生分明係奸ga la 係架車度話要殺謝天華果度笑得幾鬼奸ar
    [版主回覆08/24/2009 22:22:00]
    係呀!~個死人陰濕樣!!~

    回覆刪除
  2. 見咁多人去睇 自己都有啲想去!!
    [版主回覆08/24/2009 22:21:00]
    想睇就要快啦小倫迷!~套野應該就下畫啦!~

    回覆刪除
  3. 算吧,每位導演都間中需要一齣賣座電影,邱禮濤也不例外,此片則當他是為錢而拍的呢。
    此片我不會看,始終太電視feel了。我還是prefer看他的真正作品,
    如《黑白道》、《性工作者十日談》、或《我不賣身,我賣子宮》等那些。

    《復仇》我也聽聞是較為遜色,據知明顯是拍給外國人看的。
    不過,我遲些還是會看,始終杜韋合作的我會捧場。
    [版主回覆08/24/2009 22:19:00]
    《性工作者十日談》同《我不賣身,我賣子宮》我仲未睇....
    有機會我一定會買碟重溫!!~

    另外邱禮濤...除咗《黑白道》之外,
    佢嘅《八仙飯店之人肉叉燒包》、《的士判官》....
    《伊波拉病毒》、《反收數特遣隊》同《殺科》.....
    都係我十分酷愛嘅作品!!~
    至於《復仇》.......劇情就真係唔係好得o架啦!~
    但鎗戰場面就依然精彩!!~

    回覆刪除
  4. 可能邱導演攞左陰陽路既意念黎做呢套戲既節奏,
    so...........變得咁亂呢 ??

    唉.........
    都係等碟 lu..!
    [版主回覆08/24/2009 22:07:00]
    江湖片當鬼片拍!!XD~~應該好快出碟o架啦!~TBB咁識做生意!!~

    回覆刪除
  5. um...由忠忠地變奸,再為自己變成好奸!
    [版主回覆08/24/2009 22:01:00]
    一哥?奸就一定係奸o架啦!~
    你睇佢最尾殺座頭果度,直頭好似鞭屍咁!!~
    另外我覺得其實黃日華個角色都唔係簡介所講咁正氣!~

    回覆刪除
  6. 邱禮濤作品真係停留o係C ~D級片好多年,D片永遠有D爛爛地(或更爛)既味道,
    好多時都係紅人唔紅戲,三個影帝响佢手果幾幕都制造唔到咩精釆野出黎...好浪費!~
    一哥(秋生)回憶片段返差館果幕...求其笠個勁假既假髮落去...造型又蒼老...
    就話係回憶,完全投入唔到... 。處理場面佢永遠不能凝住氣氛,總係鬆散+堆砌收場...。
    Ending又係工廠大厦,直頭將《黑白道》再重拍多次咁...D人逐個逐個僕出黎咁死。
    李思捷中槍一幕我果場都有人笑,佢中兩槍既反應慢左半拍,再加上佢非常刻意咁震左兩吓先肯瞓低...
    真係想唔笑都幾難,不過...都唔及佢既處男作《 喜劇之王 》咁極度浮誇及超愛表現自己咁經典...。
    唉... 又係一個有時唔識收、做戲久唔久有D過火表現既人....佢其實每一次都好努力去演(包括電視),
    但過火仍然係佢不自知既一大問題...。Ha!~Laughing最早係先埋天哥身都俾你留意到呢個錯位,好o野!
    [版主回覆08/24/2009 21:55:00]
    呢套真係港產江湖片Collection嚟!~
    鎮宇爆Laughing樽爆極都爆唔到果度...
    係《旺角揸fit人》都玩過!!~
    而Laughing殺一哥果度,一開槍之後畫面突然變黑...
    就《無間道1,2》都有玩過!!
    此外當然仲有你所提到嘅《黑白道》啦!~

    回覆刪除
  7. 我冇睇,坦白,我真係唔係為左溝女既話,呢亭戲,一定唔會入場囉 -
    佢黑d,因為我呢期真係冇女溝。。。可以慳番。 而家,連孤疑同復仇都唔知去唔去睇好…
    [版主回覆08/24/2009 21:43:00]
    如果有女仔約我去睇《保持愛你》, 我一定會同佢「保持距離」囉!~

    回覆刪除
  8. 石琪﹕《LAUGHING GOR之變節》弱智

    回覆刪除
  9. 的確,今次係秋生同鎮宇,帶起laughing,
    論表現,是鎮宇好過秋生,希望鎮宇哥能憑座頭拿他在港第一個影帝.
    [版主回覆08/24/2009 21:40:00]
    我都好想鎮宇哥拎一次金像影帝!~
    但呢套野好似laughing同一哥(秋生)先係主角!~
    震乳似係男配多D,不過就好搶鏡!!~

    回覆刪除
  10. 呢套戲其實都好吸引,不過秋生個髮型真係唔好睇。
    但我覺得套戲應該搵返陳茵微做女主角比較好D,不過可能佢個檔期唔岩掛!
    [版主回覆08/24/2009 21:36:00]
    我諗唔係陳茵微檔期唔o岩,係TVB根本就有心想力捧陳法拉囉!~

    回覆刪除
  11. 無劇情, 趕收工 如果純粹為睇laughing演技既可以算數, 同之前電視劇既表現無得比
    [版主回覆08/24/2009 21:24:00]
    Laughing D抵死對白無哂....好似變咗做另一個人咁!~

    回覆刪除
  12. 我很喜歡吳鎮宇和陳法拉那段兄妹情的描寫,
    哥哥到最後快要倒下了,還是要保護妹妹,這場戲很感人。

    回覆刪除
  13. 乜復仇有日華哥哥做嗎...
    真想一睹佢風采
    [版主回覆08/24/2009 22:24:00]
    有呀!~ 客串....超型!!!~

    回覆刪除
  14. 邱導演唔係好適合拍呢種戲
    所以真係冇乜意欲入場
    [版主回覆08/24/2009 22:23:00]
    咁你最鐘意邱導邊套戲呀!?

    回覆刪除
  15. 最近冇套得!!!!!!!!!
    [版主回覆08/24/2009 22:25:00]
    你指邱導定最近D港產片先!?

    回覆刪除
  16. 港產片.....................

    連復仇都5敢有厚望
    [版主回覆08/24/2009 22:33:00]
    《天水圍的夜與霧》、《竊聽風雲》同《新宿事件》都OK嘅!~

    回覆刪除
  17. 竊聽風雲 麻麻
    新宿事件只睇吳彥祖、及小部份配角......而成龍...
    天水圍的夜與霧...........我愛日與夜多dd
    [版主回覆08/24/2009 22:56:00]
    《竊聽風雲》我最鐘意都係嘉華哥!~
    《新宿事件》我最鐘意光頭神探!~
    但《天水圍》我就鐘意《夜與霧》多D!~

    回覆刪除
  18. 光頭神探我愛佢脫苦海廣告
    竊聽風雲我反而覺得大家都好平均.......係劇本麻麻
    夜與霧我成日覺得係許導演交換返黎咁既,冇 夜與霧就冇得拍日與夜
    [版主回覆08/24/2009 23:09:00]
    脫苦海廣告超正!!!~
    日與夜係晶哥俾$$拍!~夜與霧好似都係.....
    但日與夜鮑姐嘅演出,真係抵佢拎影后!~

    回覆刪除
  19. 王晶好識計數既...........兩套戲加埋我諗冇laughing呢套咁貴呀!!

    又有獎攞............夠晒唱!!
    [版主回覆08/24/2009 23:31:00]
    晶哥雖然真係拍咗好多爛片!~
    D橋又二十年如一日!!~但佢就真係好識計數!~
    香港一唔得就即刻上去搵人字!!~
    你睇最近果套009...爛到出煙!!!~但內地就收成億........

    回覆刪除
  20. 果套009...............碟我都5會睇!!!!!

    反而2012我好想睇!!!!!!!!
    [版主回覆08/25/2009 00:03:00]
    009....09年爛片廿大絕對逃不掉!~ 2012?西片?

    回覆刪除
  21. yup.........災難片.............尊古錫做既
    [版主回覆08/25/2009 00:23:00]

    找到了資料!~

    拍過《天煞─地球反擊戰》( Independence Day)及《明日之後》( The Day After Tomorrow)的德國導演羅倫艾默烈治( Roland Emmerich),今年再將世界末日題材搬上銀幕,他在新作《 2012》中玩得更大,美國白宮遭海嘯捲起的航空母艦擊碎,梵蒂岡聖伯多祿大教堂倒塌,單看預告片特技場面已叫人目瞪口呆。

    回覆刪除
  22. 我就係之前在youtube睇到預告片...........wa !! 勁 !!

    夠心寒 !!........好既d預告片5使長.....短短幾下己引到您入場,

    勁!!!!!!!!!
    [版主回覆08/25/2009 07:19:00]
    幾時上?

    回覆刪除
  23. 出嘢真係太多插敍,睇到我好亂呀!

    回覆刪除
  24. 其實這套電影與電視劇個套學警狙擊是否冇連貫的呢.....
    但唔知點解我提唔起興趣去睇!
    [版主回覆08/26/2009 11:38:00]

    有連貫不過功課又做唔足囉!!~

    回覆刪除
  25. 我冇追開「學警狙擊」,只當「 laughing gor 」係獨立一套電影來睇,個人覺得都唔錯 ge ,
    不過以短短兩個多月 ge 時間拍完,實有瑕疵架啦 ~ 我認為鎮宇同秋生都好搶!
    前者由奸變忠,後者忠變間,而且秋生中性化個 look 真係好搶 laughing哥 就明顯比下去了 ...
    邱禮濤都係小弟其中一位最鐘意 ge 導演,「伊波拉病毒」,經典中的經典
    好期待佢套「同門」...希望今年真係會上
    至於個套「我愛laughing」,原名係「廟街公主」(2003),食住laughing個勢係度混水摸魚= =

    回覆刪除
  26. 我剛看了《復仇》,坦白說,我差點想爆粗,風格重複不要緊,但今趟效果卻很生硬造作,
    英語對白像背書(重衰過《全職殺手》),同是杜琪 峰,他之前的《放.逐》、《文雀》好好多;
    同是韋家輝,比《再生號》的劇本真的差很多皮(《神探》、《大隻佬》更不用說),
    甚至無法想像他會編這種質素的 劇本來,我覺得阿豬阿狗都可以寫,根本不需韋家輝,
    因完全沒劇情可言,更甚的是那鬼佬Johnny Hallyday真的碌木咁,毫無表情。
    且我看出此片明顯很市場計算,擺明屬外國市場,並非他們的個人化作品,
    但整體效果給我想像中還差,完全不行....很失望﹗
    [版主回覆12/22/2009 05:29:00]

    Johnny Hallyday...型又唔係型....演技更是零.......

    回覆刪除