《LAUGHING GOR之变節》看後感

搵一個「Cult片之王」去拍一套商業片，仲一早set定咗個框框畀佢拍，

好老實講，邱禮濤都算得上係有所交待㗎喇！～
雖然成齣戲畀人個感覺好有以前無線電視電影嗰種feel，
尤其係電影開頭用人物硬照嚟做演員介紹嗰度，直頭係跟撚足晒《學警狙擊》，
但衰在又跟D唔跟D喎！～可能係前期準備唔足啦！～

Laughing個Wendy變咗做失蹤人口都算，最多咪當阿Laughing哥花心囉！～
有陳茵媺都唔夠，仲要溝多件陳法拉，但係最尾佢話去搵孝哥嗰度就真係有D離譜....
喂～乜Laughing一開始唔係跟天哥㗎咩？你哋開拍之前冇做research㗎？

如果撇除以上所講嘅呢D錯誤，其實套戲又唔係話好差嘅....

起碼唔算係爛片先囉！～至少成齣戲都冇乜悶場，對白又夠精警，
娛樂性亦夠豐富，特別係戲中有兩句對白就令我印象好深刻，
例如係一哥（黃秋生飾）話Laughing係臥臥底嗰度，
同埋有一幕冼Sir（元彪飾）同Laughing講話佢越嚟越似一個真正嘅古惑仔，
跟住Laughing就答佢：「唔似會死㗎！～」哈哈哈～真係抵死得嚟又應景！～

咁有讚當然亦都有彈，首先係成套戲個節奏真係有D怪怪地，
而個敘事手法又好鬼死亂，嗰頭講阿Laughing走緊佬，
轉個頭又忽然跳咗去D回憶片段嗰度，成個編排簡直可以用雜亂無章嚟形容！～
每次當觀眾睇到最緊張嗰陣，鏡頭一轉，無啦啦又變返做文戲，
又上又落，又落又上，咁樣真係好難令人投入到！～
玩臥底條橋唔係話唔用得，都唔好玩得咁走火入魔呀！～
首先Laughing係黑白臥臥底，然後車仔（黃德斌飾）係警察臥底....
跟住阿巢（李思捷飾）又係社團內部臥底，屌～真係全部都痴Q晒線！～

而去到最尾潘Sir（黃日華飾）同一哥又係唔知做乜鳩？
兩條友無啦啦喺度互爆laughing身份，精彩嘅黑白交鋒突然間搞到好似細路仔鬥氣咁！～

仲有就係個結局畀人個感覺似係budget唔夠迫住要埋尾咁款....
最大鑊係尾段嗰場槍戰，出嚟個效果就有如狂風掃落葉一樣咁求其，
之不過算啦！～拍槍戰向來都唔係邱禮濤嘅強項嚟！～

若果你想欣賞激烈槍戰場面嘅話，咁就不如去睇杜琪峯套《復仇》啦！～ 

演面方面:

謝天華（Laughing）: 
戲味欠奉，張力不足，身為主角帶唔起成套戲，畀兩大影帝搶晒鏡。

黃秋生（一哥）:
戲份雖然多，但發揮空間唔大，表現亦只屬中規中舉。
（題外話，佢個「佐治童子Look」真係好X核突！～）

吳鎮宇（座頭）:
𡃁坤上身，癲狂演繹強勢回歸，成套戲最搶鏡嗰個肯定係佢，

而D笑位亦差唔多係集中晒喺佢身上，其中有三幕真係笑到我標眼水咁滯！～

一係佢爆Laughing樽嗰度，二係佢臨尾無啦啦捉住Laughing同佢講：
「仆街...仆街仔！～睇住我個妹呀！～」三係有一幕佢畀人拉咗返差館，
但又好心急想救個妹，就同黎耀祥講數叫佢幫拖，跟住黎耀祥個電話響....

鎮宇就無啦啦問佢：「邊個打嚟？」直頭變咗做佢上司咁！～XDXDXD～

除此之外，喺尾段畀個妹用自殺嚟要脅佢放Laughing嗰幕....

震乳哥嗰滴眼淚，加埋佢嗰個百感交集嘅複雜表情，兩個字：好戲！～

黃日華（潘Sir）:
戲份唔少，但唔係幾入戲，反而唔夠佢喺《復仇》度嘅客串演出咁有神采。

元彪（冼sir）:    
每次D戲一去到佢嗰度就好似絕晒緣咁，個角色又似足個耶穌，正宗口水多過茶。

黎耀祥（阿武）:
可有可無嘅一個閒角，成套戲動手多過動口，但都幾搶戲。

曾志偉（福爺）:
客串性質，複製韓琛，無驚亦無喜。

李思捷（阿巢）:
演技自瀆嘅問題依然十分嚴重，

拎起個酒樽爆Laughing嗰度氣勢弱過雞，

去到最後中槍死嗰幕更加係全場爆笑！～

嘩～D戲誇撚到呢！～你估你而家拍緊《喜劇之王》咩大佬？

陳法拉(Karen):
以初登銀幕嚟講，表現尚算合格。

呂慧儀（一哥女友1號）:
好搶戲嘅一個女角，但只係個角色搶，唔係佢D戲搶。

葉翠翠、陳爽、周美欣（一哥女友2、3、4號）:
行行企企，衰過花瓶。

至於其他嗰D就算罷啦！～
根本就係TVB三線藝員齊串演，出咗等於冇出....

成套戲整體嚟講算係不過不失，因為一個公仔箱熱潮人物而趕拍出嚟嘅「即食片」，
我一早就唔會對個劇本有太大期望，但若然你只係想睇吳、黃兩大影帝演技對碰嘅話....
放心！～畀足你！～另外，睇完套戲，有好多觀眾都會有個疑問....

就係一哥到底係忠定奸嘅呢？我自己就覺得佢係奸嘅，但對Laughing就仲有少少情義咁囉！～