2009年5月4日星期一

《青春高校:回到17歲》&《金錢帝國》看後感

這幾天工作實在太累,所以要等到現在,才有時間寫一點看後感……

假如人生可以重來 -《青春高校:回到17歲》
 
 
劇情簡介

1989年,米克正值高中,是學校裡的萬人迷。
籃球場上他是球隊的明星;演講台上他是學校出色的童軍。
事事如意,光明的前途彷彿盡在掌握中,
但他為了女友史嘉莉和未出生的小孩,毅然決定放棄一切結婚去。

20年後的今天,剩下光輝不再的米克,和妻子史嘉莉離婚收場;
本來可能升職的機會又泡湯,連自己的孩子也看不起自己。
連高中時的好友、現在成了富翁的書蟲同學阿叻也和他反面。

一次偶然而奇妙的機會,米克突然一夜年青20年,變回17歲時青春時代的自己。
不幸的是,米克看上去雖似17歲,但他30多歲的穿衣風格,
和2009年的校園標準脫軌,完全不入流。

而在重溫昔日美夢的同時,米克亦可能會失去人生中最美好的事情……


個題材其實冇乜驚喜,但算係運用得幾有新意,
唔玩時光倒流,只係講男主角嘅容貌同身體都set返去十七歲嗰陣,
然後意圖用呢一個身份去修補返同屋企人嘅關係,
成套戲甚少悶場,係一套輕輕鬆鬆嘅勵志喜劇,
所有情節都盡在計算之內,但就勝在節奏明快,
完全冇刻意煽情同拖泥帶水嘅情況出現。
而有一點令我估唔到嘅係呢齣戲D笑位真係好鬼死密集,
尤其係飾演男主角老友嘅Thomas Lennon,直頭係笑到我扒街!
而喺眾多笑位當中,我最鐘意係Mike剛回到17歲嗰陣,
佢嗰身自以為好IN實則OUT到爆嘅穿著風格,
就畀學校D妹妹仔串佢喺度模仿懷舊Hip hop巨星,
另外,中段佢畀個女色誘嗰度,又係另一個令人笑到噴飯嘅拍手位。
笑位夠晒多,令人感動嘅場面亦唔少,
例如係回到17歲嘅Mike協助懦弱怕事嘅細仔追女仔同教佢打波,
仲有係佢睇住自己大女同個死飛仔濕吻嘅時候,
嗰種既心酸又無奈嘅感覺實在係百般滋味在心頭。
喺呢部戲令我最驚喜嘅一定係男主角Zac Efron嘅演技,
呢位被外界形容為「DiCaprio接班人」嘅明日之星,
真係睇得跳得又演得,我對呢位靚仔印象最深刻……
係佢喺戲中同女主角Leslie Mann嘅多場對手戲,
雖然對手係一個年紀比自己大一截嘅女演員,
不過,Zac Efron嘅演出就冇畀到一種怯場或者係亂倫嘅感覺我,
呢一切除咗係歸功於Leslie Mann保養得宜之外,
Zac Efron喺戲入面嘅用心演繹同樣亦都係功不可沒!
特別係佢喺法庭上致詞嗰一幕,D內心戲絕對係交到足,十分感人。
而對於某D媒體將佢定型為「DiCaprio接班人」呢個講法,
我反而就覺得佢個樣同演法都比較似Tom Cruise多D囉!
至於個結局個人嚟講就好鍾意,Mike最後明白到,
自己當年所做嘅決定經已係最好,因此到最尾佢同樣都係選擇去追求自己所愛嘅人。
坦白講,呢部戲確實係有好多犯駁位同埋含糊不清嘅地方,
首先係從頭到尾都冇交代到個校工阿伯到底係乜水?
另一方面,若然喺尾段可以畀Mike嘅仔女知道……
呢個靚仔有型打波又勁嘅完美化身就係佢哋老豆,咁成件事肯定會更加完美!
咁當然,作為一部爆谷電影能夠令人睇得開心又含有教育意義,
單係呢兩點已經係值回票價啦係咪?
(但有樣嘢真係不得不彈,就係套戲D字幕印得好矇好難睇!)
整齣戲主要想表達嘅一點就係「選擇你所愛的愛你所選擇的」,
千祈唔好對自己之前所做過嘅決定感到後悔,無論係對定錯。

  

爛片大王消毒之作 - 《金錢帝國》
 
劇情簡介

在英國管治香港期間,曾經有一段黑暗時期,
警隊貪污受賄無日無之,單單在1963至1973十年間,
香港貪污警察及黑社會共收受了一百億港元,相等於2009年的五千億!

《金錢帝國》就是以這個時代為背景,描寫香港島華人總探長Lak哥(梁家輝飾),
率領其下的貪污警隊集團人物包括火麒麟(黃秋生飾)、細九(陳奕迅飾)、
豬油仔(王晶飾)等,隻手遮天、縱橫黑白兩道,建立了權傾半邊香港的貪污帝國。
但成也金錢,敗也金錢,當驕橫跋扈的Lak哥連從英國新調任的警務署長也不放在眼內,
港督遂成立廉政公署,決心杜絕一切貪污。一直備受欺壓的大學生韓志邦(方力申飾),
加入由嚴國樑(林保怡飾)領導的ICAC反貪污行動部隊,
誓要徹底消滅由Lak哥為中心的貪污帝國。一場翻天覆地的廉政風暴,改變了香港的命運。

由王晶導演,陳奕迅、梁家輝、黃秋生、方力申、
林保怡、劉洋、徐子珊及孟瑤主演的《金錢帝國》,
是繼《五億探長雷洛傳》及《跛豪》後,久違了的傳奇人物電影。
影片籌劃了五年,搜羅了眾多一手內幕資料,
拍製成題材引人入勝、真實感與劇力兼備的香港電影。


從早年嘅《至尊無上》,到1998年嘅《龍在江湖》,
都證明王晶並唔係一個只識拍「屎尿屁」嘅商業導演,

而今年呢一部《金錢帝國》,好明顯係想幫之前嗰堆爛片消消毒。
相比起同類型題材,論娛樂性《金錢帝國》就遠遠唔及《雷洛傳》,
講戲味亦及唔上《黑金》,不過整體嚟講都算係一部「僅僅合格」之作。
成套戲個節奏非常緊湊,悶場亦唔算多,較為令人意外嘅係……
以一部IIB級片嚟講,呢套嘢D血腥場面同粗口對白都算幾多,
但我反而覺得,咁樣嘅安排就仲能夠反映到當時嘅現實,
試問現實中有邊個黑社會同差佬私底下唔係粗口橫飛㗎?
影嘅前半部主要係描述香港六十年代嘅貪污情況,
整個段落處理得幾好,拍得幾有張力,戲味十足,
但去到中段講ICAC嗰part就稍為有D草草了事,
根本就感受唔到ICAC應有嘅嗰一份氣勢。
歸根到底,成齣戲就擺得太多時間落去細九(陳奕迅)條感情線度,
之後一講到林保怡被殺,個劇情就突然急轉直下,
成個編排有如「盲公落斜」一樣,極度「虎頭蛇尾」,
而喺結局細九Lak哥(梁家輝)兩個人拎住支槍喺度指嚟指去
你指完我我又指返你,成個佈局更加係爛到我笑出聲!
全套戲最大嘅賣點就梗係喺選角方面啦!
黃秋生梁家輝兩大影帝正面碰頭,所擦出嚟嘅火花就比我預期中少,
但係由梁家輝所飾演嘅貪污帝國頭目Lak哥
就依然係全套戲之中最為搶鏡嘅一個,講開又講……
梁家輝以往都做過好多類似嘅角色,而呢一次佢喺《金錢帝國》嘅演繹方式,
基本上同佢喺《黑社會》度所飾演嘅大D分別不大,
直頭成個「倒模演繹」咁,確實係冇乜驚喜。

黃秋生所飾演嘅火麒麟,就係喺戲入面前後轉變最大嘅一個角色,
由一開始嘅敗壞警察、貪污團體小角色,到後來成為ICAC嘅其中一員,
直至親眼目睹好友嚴國樑(林保怡)慘死,令火麒麟嘅情緒完全陷入崩潰同恐慌,
呢種心態轉變同內心嘅矛盾掙扎,真係少D功力都冇可能掌握得到。
咁當然,我哋「躁狂影帝」嘅演技向來都係信心保證,
所以今次呢一個高難度演繹,秋生哥都總算係超額完成,
正如佢本人話齋:「戲可以很爛,但角色不可以爛。」

陳奕迅所飾演嘅陳細九可以話係整齣戲嘅靈魂人物,
喺警界裡頭佢係大阿哥,但同時佢亦都係Lak哥嘅跟班,
佢因為得Lak哥關照事業扶搖直上,仲獨攬九個老婆,
但實際上,佢只係一個專幫大佬「食死貓」嘅擦鞋仔。
有人話,《金錢帝國》係陳奕迅首度衝擊影帝之作,
個人認為就真係言之尚早,冇錯,陳奕迅的確係有演技,
但佢就始終都係適合去演一D帶有少少草根氣味嘅平民角色,
特別係當佢一拍落兩大影帝嗰度,個氣場就明顯差咗一大截,
尤其係佢每次發火同沉思嗰陣嘅表情,畀人個感覺就好似喺度遊緊白魂。
咁我都明白,畢竟Eason喺電影圈都仲算係年資尚淺,
而家你要佢一下子同兩大影帝互相過招,就確係有D強人所難。

介紹完一班主線人物,又講下一班配角,
首先係由導演王晶親自出演嘅豬油仔,哈~估唔到佢嘅戲份都幾重喎!
仲將呢一個樣衰好色又賤格嘅角色演繹得相當之入型入格;
林保怡所飾演嘅廉記阿頭嚴國,佢雖則戲份唔多,但就照樣交足戲;
跟住就係方力申個角色,嗯~我諗畀余文樂或者係徐天佑去做應該會適合D!
事關我真係接受唔到一個畀人打到仆晒街嘅人,
竟然仲會有空閒時間走去擺Pose,對眼仲要識得放電添!哈哈哈~

女角方面,就以大陸女星劉洋所飾演嘅玫瑰最搶(個名好Q老套呀屌),
至於徐子珊就只屬不過不失,而孟瑤除咗賣弄性感就一貫花瓶演出。
另外,只係客串咗幾場嘅「出爐影后」鮑起靜同埋老戲骨余子明
佢哋嘅戲份雖然寥寥可數,但就仍然令人印象深刻。
 
最後我想講,喺片尾影住個金紫荊廣場玩首尾呼應嗰一幕實在係太刻意喇!
搞到我一度以為臨完場Eason會走出嚟唱返首國歌助慶,實行嚟個反高潮!



10 則留言:

  1. 套戲粗口出奇地少,差人唔講粗口嘅竟然多過講嘅(真正講粗口係黃秋生一個,梁家輝帶少少潮州粗口,陳奕迅唔講、洪天明唔講、惠天賜唔講、余子明唔講,連行 Beat收片嘅老臨都唔講)。黃秋生處理去梁家輝屋企飲同係水塘和林保怡傾偈两塲內心戲已經值個影帝。陳奕迅唔只唔似探頭,根本唔似差人。梁家輝只係以大 D哥嘅靈魂嚟做徐樂民。

    回覆刪除
  2. 以王晶的認真劇情片中,沒錯《至尊無上》真的幾好,反而之後杜琪峯接手拍第二集《永霸天下》卻很失色。還記得王晶也曾拍過兩集《賭城大亨》,上集《新哥傳奇》很劇情、很有劇力(除萬梓良經常爆粗口搞笑外),整體很好;但到了下集《至尊無敵》真的很行貨,很爛。

    《金錢帝國》也聽聞是不俗,遲些可考慮一看。我記得他近期有些劇情片都不俗的,如《新紮師兄2004》及《瘦身》(此兩齣那時本沒打算看的,是意外地看了)。

    回覆刪除
  3. 王晶還是拍爛片比較可取,請影帝拍呢套戲,冇成本效益可言。

    回覆刪除
  4. 故事都係期待之內
    Eason 只係重覆佢係o既動作, 份內事一樁.

    OT: 江湖片如果無粗口, 無打交, 性慾場面不如番屋企睇TVB la!~

    回覆刪除
  5. To V For Vincent:

    另外,我認為《至尊無上》真是王晶劇情片中最好的!~
    也很喜歡譚詠麟 + 劉德華這個配搭!~
    八十年代的譚詠麟,對演戲還算是頗認真的!~哈哈~~
    至於第二集《永霸天下》....我也認同真的是頗失色的....
    但記得那時候,這套電影的主角王傑當時還是一代巨星...
    劉天王在此片中...也只是當第二男角而己!~
    但現在...哈.....早年還常被英皇安排去做一些反派或「低B」角色!~
    唉...真是可惜!~

    回覆刪除
  6. 「選擇你所愛的,愛你所選擇的」
    講得好...

    回覆刪除
  7. 17again男主角實在太迷人

    回覆刪除
  8. 「選擇你所愛的,愛你所選擇的」very good!!!
    and...Zac Efron is very very (x100%)handsome!!!
    I love hime and the movie very much!!!
    thx~

    回覆刪除
  9. 您好!又識多位愛電影的人我都好鐘意“ 金錢帝國” (我都有係blog打看後感!)

    回覆刪除
  10. 回到17歲令我覺得凡事珍惜目前所擁有的..不要只顧後悔以往..
    不過如果可以用回男主角ZAC本身個樣化中年個個妝會更好啦...

    回覆刪除