重新愛上NBA，全因為你 -「Birdman」！

自從「波神」佐敦退役，《公牛》皇朝沒落之後，
我已經有一段好長嘅時間冇留意《NBA》，
但最近，喺一個偶然機會下，就畀我留意到一位十分有character，
打法又非常有趣味性嘅「癲狗型」球員，佢就係「Birdman」Chris Anderson。

呢位人兄，第一次見到佢嗰陣我心諗：「呢件箭豬頭乜水呀？個款咁鬼有型嘅！」
起初我仲以為佢係今年嘅新秀，但睇返資料先知呢條友原來已經成三十歲，
佢去過CBA，打過《Hornets》、《Nuggets》、《New Orleans》，
仲曾經因為吸毒而被禁賽兩個賽季，一身古怪紋身、麻煩多多、形象喪爆又臭串……
呢條死癲佬，真係似足我喺藍球界嘅偶像「壞孩子」Dennis Rodman，
哎～唔係！其實佢最似嗰個，應該係《Slam Dunk》嘅主角櫻木花道先啱！哈哈～

不過串還串，今屆「Birdman」喪爆回歸又的確係交足功課，
尤其係有一場喺對《Utah Jazz》 嘅賽事入面，
佢喺29分鐘內竟然就做咗8個block slot，
真係痴X線㗎！block到Boozer當堂"O"哂咀！～
再加埋佢block完人之後嗰個串爆樣，實在係癲得太美妙！～

雖然「Birdman」並唔係球隊嘅正選球員，但憑著佢一流嘅封波技術，
就成功替補咗Camby離隊之後嘅空缺，仲喺防守上作出咗唔少貢獻。

我相信《Nuggets》簽返「Birdman」嗰陣，應該都唔會諗到佢今季會打得咁鬼生，
希望「Birdman」會好好珍惜呢次機會啦！衷心祝福佢哋可以過到下一關，
實行fight低《湖人》，block臭Bryant！呵呵～

總之，無論佢哋最後係輸定贏，我都撐梗呢隊「丹佛爛仔團」㗎喇！加油呀！～

來吧！嘗嘗我安德森的麻辣蓋火鍋吧！納命來！～ 

「鳥人」好波，不妨一睇再睇！～