卸下不死身的成龍 - 新宿事件

噚晚喺公司總算係完完整整咁將《新宿事件》睇咗一次，
感覺唔錯，成套戲個節奏好明快，D場面亦好有震撼力，
但可能因為題材問題，所以有部分橋段就悶到我差D恰眼瞓……

喺成套《新宿事件》入面令我最驚喜嘅一個地方，
係一個有血有肉仲會識得嗌救命，同埋唔再有不死身嘅霸王大哥龍。
唔難睇得出成龍近年係想漸漸轉型，
嗯～其實都啱嘅！年紀有返咁上下都好應該乘機唞唞！
講真呀～幾廿歲人仲成日跳嚟跳去扮馬騮又打極都唔死，真係你唔厭我都厭啦！
只可以講成龍大哥同星爺一樣，過去嘅成就實在係太輝煌喇！
想徹底成功轉型確實唔係一件容易嘅事，但點講都好，
睇到大哥龍今次（終於）能夠放棄做英雄……
唔賣功夫又想喺演技上有突破，我認為淨係呢一點就值得大家畀D掌聲佢！

好～第一個問題嚟喇！成龍大哥呢一次喺戲入面嘅演技到底係咪有好大突破呢？

好老實講，大突破就冇㗎喇！係人都知道成龍D演技向來都係粗枝大葉㗎啦！

想佢好似梁朝偉咁用眼神做戲簡直係天方夜譚！
仲有係佢個角色畀人個感覺始終都係存有好大嘅漂白意味，

雖則話喺戲入面鐵頭（成龍）同其他人一樣都係有撈偏殺人，

但係喺某D場口上，導演似乎就想刻意營造到佢係一個忠嘅黑幫咁樣。

喺劇本方面，個故事都算寫得幾好，講一班中國人點樣喺人哋嘅地方度掙扎求存，
由一開始個個都係窮光蛋冇嘢輸，到後來大家就為咗權力同金錢反目成仇，
印證咗一個事實，就係做兄弟往往只能共患難而不能共富貴。
講真呀～見到香港仔（錢家樂）殺老鬼（林雪）嗰一幕我都呆咗一呆，
一開始我仲以為香港仔應該會係呢班人當中最重情重義嗰一個添！

喺成套戲入面最可憐嗰個，我覺得一定係阿傑（吳彥祖），
阿傑嘅性格一向膽小如鼠，佢偷渡咗去日本之後一直都冇撈偏，
開始嘅時候，佢只係一心諗住喺街邊賣下栗子，就咁渾渾噩噩過一世，
可惜好境不常，有一次佢因為幫人睇住一部畀人做咗手腳嘅彈珠機，
跟住食咗隻死貓，然後再畀由高捷飾演嘅黑幫大佬同佢班手下斬到半死，
毀咗容又冇咗隻手之後，阿傑嘅性情就開始大變，
仲一度自以為已經變成一個天不怕地不怕嘅超級強者，
無奈嘅係，到阿傑臨死嗰一刻，佢先發現……
到頭來自己只係得個殼，佢嘅本性根本一路都冇改變到，
一切如佢所講：「原來，我仲係一個膽小鬼。」
真係好悲……好悲……好悲……同時又十分寫實。

至於鐵頭（成龍）身為眾人嘅領袖，
為人雖然係有D小聰明，但就缺乏遠見同分析能力，
佢為報私仇次次都衝動行事，最終就落得客死異鄉嘅悲劇收場。
成套戲幾乎冇一個中國人有好嘅下場，基本上係全軍覆沒，正宗係冚包散晒咁滯。

其他角色方面，最搶鏡嗰個肯定係飾演老差骨嘅光頭佬竹中直人，
呢位日本實力派老牌演員不嬲都係戲路縱橫，
無論係演諧角、變態佬或者係一D好鬼嚴肅嘅角色，
佢都一樣可以演繹得揮灑自如，真係唔到你唔服！
另外，由高捷所飾演嘅台南黑幫同樣亦都係可圈可點，戲味十足。

喺香港區嘅代表入面就以吳彥祖做得最好，
原因在於阿傑呢個角色本身個性格就好鮮明，
只要拿捏準確同發揮正常，能夠突圍而出可以話係意料中事。

講開又講，我發覺爾冬陞近年經常都好鍾意加一兩幕好震撼嘅場面喺戲入面，
例如係前年嘅《門徒》就有老鼠咬屍同埋智叔畀鎚仔扑斷手，
而再早期嘅《旺角黑夜》就有年輕警員喉嚨中槍血漿狂噴，
嚟到今次呢部《新宿事件》，若果論血腥程度都算係去得幾盡，
不過想提一提各位，就係我哋而家喺戲院睇到嘅呢一個版本查實已經唔算係好激㗎喇！
記得早排去會展做電影節嗰陣，我就有幸睇過呢部戲嘅三級版本，
喺呢個版本裡面，阿傑最後應該係畀班日本人拮到連D腸都飛埋出嚟……
真係核突到嘔！但呢一幕喺2B級個版本度就變咗用遠鏡拍攝。

嚴格嚟講，《新宿事件》絕對唔算得上係爾冬陞嘅巔峰之作，
論劇力佢唔及《門徒》，論迫力佢亦遠遠及唔上《旺角黑夜》，
但整體嚟計仍然係合格有餘，爾冬陞作品，依然係信心保證。
喺呢度，真係好希望大家以後唔好一見到「英皇出品」呢四個字就即刻耍手擰頭，
事關相比起膠Label，英皇近年D電影都算係叫做拍得幾有水準㗎喇！