《保持通話》 VS 《駁命來電》

頭先因為工作關係，終於睇咗呢部由陳木勝執導嘅《保持通話》，

感覺上還算可以啦！比《駁命來電》搞笑，亦做到原作嗰種好緊迫嘅氣氛，算係冇乜冷場。

不過喺演員方面，我認為港版真係比原著遜色好多！整齣戲嚟講張家輝算係做得最好，大S做得唔錯，但就遠遠唔及Kim Basinger。至於古天樂，年頭嘅《一個好爸爸》，令我覺得佢嘅演技開始開竅，但估唔到咁快就打回原形！今次喺《保持通話》入面佢又再次回復以前嘅一貫演戲風格，即係好似事事放唔開咁，喺講對白嘅時候又似足背詩，但係若然要認真比較嘅話，其實Chris Evans都唔好得佢幾多㗎喇！所以呢round當係打平啦！Super！跟住就係劉燁個角色……嗯～我諗佢呢個角色如果畀吳鎮宇做嘅話一定會比而家順眼好多，事關劉燁實在太Overact喇！家陣叫你演舞台劇咩大佬？

哈～點都好啦！總括嚟講我都係較為鐘意原著多啲！另外，有好多人談論嘅一啲反駁位同埋唔合情理嘅地方……妖～話知佢啦！自己睇得過癮咪得囉！正所謂聽故唔好駁故呀嘛！