2008年12月10日 星期三

港產Crash -《証人》

我一向都幾欣賞林超賢嘅作品!好似《野獸刑警》、《江湖告急》同《豪情》等等……
至於今次佢呢套新作《証人》喺外界就獲得一致好評而結果亦冇令我失望
整體嚟講算拍得唔錯幾有張力都算係一套幾有誠意嘅港產片啦!
尤其係同期有我哋孽大導嘅大爛片《啜袋雙嬌》,所以相比之下就更加係高下立見
 
整齣戲嘅劇情其實唔算係有好大嘅突破!
以一宗意外牽連幾個背景唔同嘅人各自嘅命運……
呢種題材其實好多外國電影都用過!
至於單親阿媽啲仔女俾人綁架呢條橋……
講真呀!呢類劇情而家就連TBB啲電視劇都用到唔用啦!
 
老實講,我認為一眾演員嘅出色演技先至係呢套戲入面嘅最大重點!
智叔演技爐火純青,真係唔使多講!不過成套戲最搶嘅我認為就係張家輝!
《天地豪情》之後第一次睇佢喺銀幕上演反派,個角色好有發揮空間
雖然對白唔多但就有好多內心戲可以俾佢發揮演技。
 
今次佢喺戲入面演嘅呢一個半盲疤面殺手……
冷血中又有啲人情味,凶狠中又殘留一絲善良……
佢只係為咗癱瘓在床嘅老婆無奈咁去執行每一個任務!
不過做到最後就開始有啲失去理性!我自己對佢最有印象嘅一場戲……
就係喺最後佢知道自己將要失明,但就仍要爬到老婆面前見佢最後一面嗰一幕!
我覺得呢一場戲佢真係handle得好好!甚至係佢從影以來最出色嘅一次演出!
坦白講,我認為佢下年應該都好有機會可以憑著呢個角色橫掃各大頒獎禮嘅影帝寶座。
 
至於另一位主角謝霆鋒,見佢有好多動作場面都要親力親為,實在搏命!
亦睇得出佢今次喺戲裏面真係演得好努力,不過就好似有啲力不從心!
尤其係喺一班好戲之人夾擊之下,佢嘅表現就更見失色喇!
特別喺內心戲方面就更加係有待磨練!好似喺尾段佢攬住個細路女喊嘅嗰一幕
成場戲明明係好慘㗎!但我竟然就不自覺咁笑咗出嚟!
因為佢真係喊到成個《戇夫成龍》個阿旺咁!哈哈哈哈哈~
 
題外話,我覺得謝霆鋒從影以來暫時演得最好嘅一個角色……
就始終都係《半支煙》(我最愛嘅港產片)入面嘅煙仔!
因為呢個角色簡直就係為佢而度身訂造,而且又襯番佢當時個年紀。
講完男演員,又講下女演員!首先我想講嘅喺戲中嘅嗰位小妹妹……
我覺得佢真係演得幾好!內心戲交足之餘最重要就係似番個細路!
比起《CJ7》老積嘅徐嬌同《父子》過份早熟吳景滔真係順眼得多!
而戲中嘅女主角張靜初今次嘅發揮空間就唔多!不過最後喺法庭嘅嗰場戲就演得十分好!
至於飾演張家輝老婆嘅大陸演員苗圃,雖然佢喺戲入面大部份嘅時間都只係用眼神做戲
毫無對白,但就依然交足戲,實在令人讚歎不已!大陸影壇,果真係臥虎藏龍……

不過,成套戲最令我驚喜嘅就反而係以客串身份出現嘅郭政鴻!
喺短短嘅幾場戲入面佢就盡顯自己喺公仔箱浸淫咗多年嘅演戲功架!
尤其係鬧爆謝霆鋒嗰一幕,我認為簡直就係佢嘅一場個人solo!

整齣戲雖然講唔上話有乜嘢新鮮感,但有啲位就拍得幾有意思!
每個人都為咗自己嘅目標而去做某啲嘢……
喺戲入面每個角色劇本都有花時間深入咁去描寫,絕對冇馬虎了事
 
有讚當然亦有彈啦!想彈嘅係呢套戲個節奏實在係拍得太慢……
而且劇情又唔夠緊湊,所以就唔係幾帶到觀眾入局!
另外,喺結尾玩首尾呼應嘅嗰一幕,就好似玩得有啲過份刻意!
哈哈~雖然彈多過讚,但總括嚟講我認為証人呢套戲就依然算係合格嘅!

3 則留言: