2008年12月10日星期三

港版Crash -《証人》

我一向都幾欣賞林超賢所拍嘅作品,
例如係《野獸刑警》、《江湖告急》同《走投有路》等等……
嚟到2008年,佢嘅新作《証人》喺外界就獲得一致好評而結果亦冇令我失望,
整體嚟講叫做拍得唔錯,幾有張力又冇乜悶場,都算係一套誠意十足嘅港產片。
 
整齣戲嘅劇情其實唔算係有好大嘅突破,
以一宗意外牽連幾個背景唔同嘅人再延伸到佢哋各自嘅命運,
呢種題材有好多外國電影都曾經用過,再嚟就係單親阿媽啲仔女畀人綁架呢條橋……
講真呀~呢類劇情而家連CCTVB啲電視劇都用到唔用啦!
 
以戲論戲,我認為一眾演員嘅出色演技先至係呢部電影嘅最大賣點,
智叔演技爐火純青,直情係唔使多講,喺呢度,我反而想重點講一講張家輝,
喺《天地豪情》之後第一次睇到佢喺銀幕上演反派,
個角色好有發揮空間,儘管對白唔多但就有好多內心戲畀佢發揮演技。
 
今次佢喺戲中所飾演嘅呢一個半盲疤面殺手,
冷血中又帶點人情味,凶狠中又殘留一絲善良,
佢只係為咗癱瘓在床嘅老婆無奈咁去執行每一個任務,
但做到後期佢開始有啲失去理性,我對佢最深印象嘅一場戲……
係喺結尾佢知道自己將要失明仲繼續要爬到老婆面前見佢最後一面嗰一幕,
呢場戲佢真係handle得好好,甚至係佢從影以來最出色嘅一次演出,
我相信佢喺下年應該都好有機會憑著呢個角色橫掃各大頒獎禮嘅影帝寶座。
 
至於另一位主角謝霆鋒,見佢喺好多動作場面上都親力親為,認真係搵命搏!
亦睇得出佢喺戲裏面的確係演得好努力,但就有啲力不從心,
於是,喺一班好戲之人夾擊之下,佢嘅表現只可以用黯然失色嚟到形容,
尤其係喺內心戲方面,好似喺尾段佢攬住個細路女喊嘅嗰一幕……
成場戲明明係好慘㗎!但我竟然不自覺咁笑咗出嚟!
因為佢真係喊到成個《戇夫成龍》阿旺咁!哈哈哈哈哈~
 
我始終覺得謝霆鋒從影以來演得最好嘅一個角色,暫時都仲係《半支煙》入面嘅煙仔,
呢個角色根本就係為佢而度身訂造,而且又襯返佢當時個年紀。
講完男演員,又講下女演員,首先我想講嘅,飾演高敏細女嘅嗰位小妹妹,
呢位小妹妹嘅演出查實冇乜特別,只有一樣嘢好,就係似返個細路,
比起老積得嚟又過份早熟徐嬌明顯順眼得多,
而戲中女主角張靜初嘅發揮空間並唔算好多,但後段喺法庭嘅嗰場戲就演得十分好。
另外,飾演張家輝老婆嘅大陸演員苗圃,雖然佢喺大部份嘅時間都只能夠用眼神做戲,
但就依然交足功課,確實係令人讚歎不已,中國影壇,果係臥虎藏龍……

要數成套戲最令我驚喜嘅一位演員,肯定係以客串身份出現嘅郭政鴻,
喺短短嘅幾場戲佢就盡顯自己喺公仔箱浸淫多年嘅演戲功架,
特別係喺差館鬧爆謝霆鋒嗰一幕,簡直係佢嘅一場個人solo。

整部戲講唔上話有啲乜嘢好驚艷嘅新鮮感,但有啲位就拍得幾有意思,
每個人都為咗自己嘅目標而去做某啲嘢,
各個角色嘅人物特徵同性格都有花時間深入咁去描寫,絕對冇馬虎了事
 
有讚當然亦有彈啦!想彈嘅係呢套戲個節奏實在係拍得太慢,
而喺劇情方面又唔夠緊湊,所以喺電影初段就唔係幾帶到觀眾入局,
去到完場前大玩首尾呼應嘅嗰一幕,亦顯得有啲過份取巧同刻意。
不過總括嚟講,呢部証人仍然算係合格水平以上嘅!

3 則留言: